Job 11:1-20
11 Sofar, Omunaamati, okwa nyamukula, a ti:
2 “Mbela eendjovo adishe edi otadi kala inadi nyamukulwa,Ile mbela okupopyaana otaku ningifa umwe a kale e li mondjila?*
3 Mbela eendjovo doye dongaho otadi ka mweneka ovanhu?
Mbela kape na oo te ke ku hanyena omolweendjovo doye domasheko?
4 Osheshi oho ti, ‘Ehongo lange ola yuka,Nonda koshoka momesho oye.’
5 Ndele ngeno Kalunga oye ashike na popyeNoku ku makulile omilungu daye.
6 Ngeno ote ke ku hololela oiholekwa younongo,Osheshi ounongo tau longo kau fi oshinima shongaho.
Opo nee oto ka mona kutya Kalunga oha efa omapuko oye amwe a dimbiwe.
7 Mbela oto dulu ngoo okushiiva oinima yomoule yaKalunga,Ile okushiiva keshe shimwe kombinga* yOmunaenghono adishe?
8 Ou* li pombada u dule eulu. Oto dulu okupondola shike?
Owa ya moule u dule Ombila.* Oto dulu okushiiva shike?
9 Oule u dule eduNounene u dule efuta.
10 Ngeenge okwa piti po, ndele ta kwata po umwe, noku mu twala komhangu,Olyelye ta dulu oku mu kelela?
11 Osheshi ngeenge ovanhu tava kengelele, oha kala e shi shii.
Ngeenge okwa mono oukolokoshi, mbela ihe u didilike?
12 Ndele elai otali ka uda ko ashike,Ngeenge ondongi yomoixwa oya dala omunhu.*
13 Oshixwepo ashike u longekide omutima woye,Nou yelule omake oye we a yukifa kuye.
14 Ngeenge omake oye otaa longo osho sha puka, a tula kokulekule,Noino efa momatwali oye mu kale okuhenouyuki.
15 Opo nee oto dulu okuyelula oshipala shoye uhe na etimba;Oto dulu okukala wa pama, uhe na oumbada.
16 Opo nee oto ka dimbwa oupyakadi woye;Oto ke u dimbuluka, ngaashi omeva, oo a pita po pwoove, taa kunguluka.
17 Okukalamwenyo kwoye otaku ka kala kuyela, ngaashi efimbo lomutenya;Nokuli nomulaulu wayo otau ka kala ngaashi ouyelele wongula.
18 Oto ka kala u na elineekelo, molwaashi ope na eteelelo,Noto ka talaatala nokunangala meameno.
19 Oto ka nangala nopehe na oo te ku tilifa,Novanhu vahapu otava ka konga ekwafo kwoove.
20 Ashike omesho ovakolokoshi itaa ka mona ko vali;Noitava ka mona onhele, oko tava i onhapo;Neteelelo lavo efyo ashike.”*
Eshangelo lopedu
^ Ile “mbela omulinenepeki ota kala e li mondjila?”
^ Ile “okumona ongaba.”
^ Sha hala okutya ounongo.
^ Sha hala okutya, kOufi. Tala Omafatululo oitya.
^ Ile “Ngeenge ondongi yomoixwa oya dalwa i li omunhu.”
^ Ile “okuxula po kwomwenyo.”
