Oilonga yOvayapostoli 2:1-47
2 Ndele eshi efiku loshivilo shOpentekoste la fika, ovahongwa aveshe ova li va ongala monhele imwe.
2 Fimbo va li omutumba, ohaluka ova uda epopomo la dja meulu la fa omhepo inene, naaveshe meumbo ova li ve udite epopomo olo.
3 Ndele ova mona omalaka a fa omundilo nokwa li a wila kombada yavo, keshe umwe elaka limwe.
4 Opo nee aveshe ova tililwa omhepo iyapuki noye va ningifa va dule okupopya omalaka a yoolokafana.
5 Pefimbo opo muJerusalem omwa li Ovajuda ovatilikalunga ovo va li ve lihanena moiwana aishe kombada yedu.
6 Konima yepopomo olo, ongudu yovanhu oya li ya ongala noya li ya kumwa molwaashi keshe umwe okwa uda eshi ovahongwa tava popi melaka laye loshidalelwamo.
7 Ovanhu ovo ova li va kumwa neenghono, ndele tava ti: “Taleni, aveshe ovo tava popi kave fi hamba Ovagalilea?
8 Osha enda ngahelipi opo atushe tu kale tu va udite eshi tava popi momalaka etu oshidalelwamo?
9 Vamwe vomufye Ovaparti, Ovamedia, Ovaelami, ovakalimo vomuMesopotamia, Ovajudea, Ovakappadokia, Ovapontus novanhu vomoshitukulwa shaAsia,
10 Ovafrigia, Ovapamfilia, Ovaegipiti novanhu vomoitukulwa yaLibia popepi naKireni, ovatalelipo va dja kuRoma, Ovajuda naavo va ninga veitavelo lOshijuda,
11 Ovakreta nOvaarabia. Otwa uda tava popi momalaka etu oshidalelwamo kombinga yoinenelonga yaKalunga.”
12 Oshinima osho osha li she va kumwifa neenghono aveshe, ndele tava pulafana tava ti: “Eshi osha hala okutya ngahelipi?”
13 Ndele vamwe ova li tave va sheke tava ti: “Ova kolwa komaviinyu.”
14 Petrus okwa fikama pamwe novayapostoli 11, ndele ta popi novanhu ovo mokule ta ti: “Ovajuda nye novakalimo amushe vomuJerusalem shiiveni oshinima eshi nokupwilikina nelitulemo kwaashi handi mu lombwele.
15 Ovanhu ava inava kolwa ngaashi tamu ti, osheshi paife omuwoi wongula.*
16 Kakele kaasho, osho osha xunganekwa okupitila momuprofeti Joel a ti:
17 ‘ “Ndele momafiku axuuninwa,” Kalunga okwa ti, “Ohandi ka tilila omhepo yange movanhu aveshe,* opo nee ovanamati novanakadona veni otava ka xunganeka, ovalumenhu ovanyasha otava ka mona omamoniko novalumenhu ovakulunhu otava ka twa eendjodi;
18 nokuli novapiya vange ovalumenhu novakainhu ohandi ke va tilila omhepo yange momafiku oo notava ka xunganeka.
19 Ndele ohandi ka holola oikumwifilonga keulu nomadidiliko ohonde, omundilo nomwifi kombada yedu.
20 Etango otali ka laula nomwedi otau ka shituka ohonde ofimbo efiku laJehova linene nolididilikwedi inali uya.
21 Ndele keshe ou ta ifana edina Jehova ota ka xupifwa.” ’
22 “Ovaisrael nye, pwilikineni eendjovo edi: Omulumenhu Jesus Omunasaret omwe mu ulikilwa kuKalunga moipafi okupitila moilonganghono, moikumwifilonga nomomadidiliko oo Kalunga a longa mokati keni okupitila muye ngaashi ashike mu shi shii.
23 Omulumenhu oo omwe mu kwata po nomwe mu yandja momake ovakolokoshi ovo ve mu valela komuti nove mu dipaa. Kalunga okwa efa osho shi ningwe molwaashi okwa li e shii osho tashi ka ningilwa Jesus.
24 Ndele Kalunga okwe mu nyumuna moku mu mangulula mo mefyo,* molwaashi efyo kali na eenghono doku mu kwatela mo.
25 David okwa popya kombinga yaJesus ta ti: ‘Molwaashi Jehova oha kala alushe pwaame* kolulyo lange, kape na nande osho tashi ningifa nge ndi tengauke.
26 Osho osha hafifa omutima wange nohandi popi nehafo linene. Onghee ohandi* kala ndi na eteelelo,
27 molwaashi ito ka efa nge* ndi kale mOmbila* noito ka efa omudiinini woye a olele mo.
28 Oto ka ulikila nge ondjila oyo tai twala komwenyo, noto ka hafifa nge unene koshipala shoye.’
29 “Ovamwatate, pitikei nge ndi popye nda manguluka kombinga yatatekulululwa David kutya okwa fya nokwa pakwa, nombila yaye oko i li fiyo okunena.
30 Ndele molwaashi okwa li omuprofeti nokwa li e shii kutya Kalunga okwe mu anena kutya umwe womoludalo laye* ota ka kala omutumba kolukalwapangelo laye,
31 okwa mona nokwa popya kombinga yenyumuko laKristus fimbo inali ningwa, kutya ina efiwa a kale mOmbila,* nombelela yaye inai olela mo.
32 Jesus okwa nyumunwa kuKalunga, nafye atusheni eembangi dasho.
33 Onghee hano, molwaashi okwa tumbalekwa a kale kolulyo laKalunga, nokwa pewa omhepo iyapuki kuXe oyo ya udanekwa, okwe tu tilila osho mu wete nomu udite.
34 David ina londa a ya keulu, ndele okwa popya ta ti: ‘Jehova okwa lombwela Omwene wange: “Kala omutumba kolulyo lange
35 fiyo handi ningi ovatondi voye oshilyatelo sheemhadi doye.”’
36 Hano eumbo alishe laIsrael nali shiive kutya Jesus ou mwa valela komuti, Kalunga okwe mu ninga Omwene naKristus.”
37 Eshi va uda eendjovo odo, ode va kuma komitima, ndele tava ti kuPetrus nokovayapostoli vakwao: “Ovamwatate, oshike tu na okuninga po?”
38 Petrus okwa tya kuvo: “Lidilululeni, ndele amushe tamu ninginifwa medina laJesus Kristus mu diminwe po omatimba eni notamu ka pewa oshali yomhepo iyapuki.
39 Jehova Kalunga ote ke mu pa omhepo iyapuki amushe novana veni, naaveshe ovo ve li kokule nosho yo aveshe ovo ta ka ifana kuye.”
40 Ndele okwa popya navo, e va udifila nawanawa nokwe va kumaida ta ti: “Liyoololei ko kepupi eli lovakolokoshi opo mu xupifwe.”
41 Ovo va li va tambula ko nehafo eendjovo daye ova li va ninginifwa, nomefiku olo momuvalu wovaitaveli omwa li mwa wedwa ovanhu* 3 000.
42 Ndele ova kala va diinina ehongo lovayapostoli, okukala pamwe, okulya nokwiilikana.
43 Ovayapostoli ova longa oikumwifilonga ihapu nomadidiliko, novanhu aveshe* ova li va kwatwa koumbada.
44 Aveshe ovo va ninga ovaitaveli ova kala pamwe nova li va tukulilafana oinima oyo va li ve na.
45 Ova li va landifa po oinima yavo nokutukulilafana oimaliwa she likolelela keemhumbwe dakeshe umwe.
46 Ndele efiku keshe ova li hava ongala kotembeli ve na elalakano limwe, nohava i noikulya komaumbo e lili noku lili, ndele tave i tukulilafana nehafo linene nonehalo liwa.
47 Ova kala yo hava tange Kalunga nova li va hokiwa kovanhu aveshe. Pefimbo opo tuu opo, efiku keshe Jehova okwa kala nokuhapupalifa omuvalu waavo tava ka xupifwa.
Eshangelo lopedu
^ Eln., “otundi onhinhatu.”
^ Eln., “mombelela aishe.”
^ Eln., “mouyahame wefyo,” ile tashi dulika “meemhango defyo.”
^ Ile “moipafi yange.”
^ Eln., “ombelela yange.”
^ Ile “omwenyo wange.”
^ Ile “mo-Hades,” sha hala okutya koufi. Tala omafatululo oitya.
^ Eln., “womoshinena shaye.”
^ Ile “mo-Hades,” sha hala okutya koufi. Tala omafatululo oitya.
^ Ile “eemwenyo.”
^ Ile “neemwenyo adishe.”
