Omapsalme 139:1-24
Komuwiliki. Epsalme laDavid. Eimbilo.
139 Omwene Jehova, owa konakona nge filufilu, nou shii nge.
2 Ou shi shii ngeenge ndi li omutumba, nongeenge nda fikama,
Oho konakona omadiladilo ange okudja kokule.
3 Oho konakona* nge, ngeenge handi ende, nongeenge nda nangala;Ou shii eendjila dange adishe.
4 Ofimbo kelaka lange inaku uya ondjovo yasha,Tala! Omwene Jehova, ou i shii nale nawa.
5 Owa dingilila nge konima nokomesho yange;Nowa tenheka eke loye kwaame.
6 Eshiivo la tya ngaho ola nyenga nge okuuda ko.*
Oli li pombada elela opo itandi dulu okuhanga.*
7 Openi handi dulu okuya onhapo omhepo yoye,Nopeni handi dulu okufaduka po oshipala shoye?
8 Ngeno ondi londe keulu, oko u li,Nongeno ondi ninge ombete yange mOmbila,* tala, omo u li.
9 Ngeno ondi tuke nomavava, eshi eluwa tali tende,Opo ndi ka kale konhele ye likalela mefuta,
10 Nokuli naako eke loye otali wilike nge,Neke loye lokolulyo otali kwata nge.
11 Ngeenge onda ti: “Oshoshili, omulaulu otau tuvikile nge.”
Opo nee oufiku, oo wa dingilila nge, otau ningi omutenya.
12 Nokuli nomulaulu kau laula fokofoko kwoove,Ashike oufiku otau ka kala wa yela, ngaashi omutenya;Kwoove omulaulu owa faafana ashike nouyelele.
13 Osheshi owa shita eefiyo dange;Owa kala wa tuvikila nge* moshidalelo shameme.
14 Ohandi ku tange, molwaashi onda shitwa lela monghedi ikumwifi.
Oilonga yoye oikumwifi,Ondi shi shii* nawanawa.
15 Omakipa ange kaa li e ku holekwa,Eshi nda shitwa meholeko,Eshi nda tungwa moule wedu.
16 Omesho oye okwa mona nge nokuli eshi nda li engwili;Oitukulwa yalo aishe oya li ya shangwa membo loyeShi na sha nomafiku omo ya tungwa,Fimbo nokuli paha li nande oshimwe shomuyo.
17 Omadiladilo oye onde a lenga neenghono.
Omwene Kalunga, omuvalu wao kauhapu tuu neenghono!
18 Ngeno ondi kendabale oku a valula, oku dule ehekedu.
Ngeenge handi penduka, natango ondi li naave.*
19 Omwene Kalunga, ngeno ou xulife po ashike omukolokoshi!
Opo nee ovakolokoshi* otava di po pwaame,
20 Ovo tava popi oinima i li omhinge naave nelalakano lii;*Ove li ovatondi voye, ovo hava longifa edina loye monghedi yongaho.*
21 Omwene Jehova, mbela inandi tonda ovo ve ku tonde,Nokunyanyala ovo ve ku tukululila oshibofa?
22 Ondi va tonde nomutima wange aushe;Ova ninga ovatondi vange shili.
23 Omwene Kalunga, konakone nge filufilu, nokushiiva omutima wange.
Konakone nge, nokushiiva oshisho* shomadiladilo ange.
24 Tala ngeenge mwaame omu na eamo lasha lii,Nokuwilika nge mondjila yaalushe.
Eshangelo lopedu
^ Eln., “yeleke.”
^ Ile “olikumwifi neenghono kwaame.”
^ Ile “olihapu unene kwaame okuuda ko.”
^ Sha hala okutya, kOufi. Tala Omafatululo oitya.
^ Ile tashi dulika, “hondjela nge kumwe.”
^ Ile “Omwenyo wange ou shi shii.”
^ Ile tashi dulika, “natango ohandi a valula.”
^ Ile “ovo ve na etimba lohonde.”
^ Ile “metwokumwe nomadiladilo avo.”
^ Ile “monghedi ihafele.”
^ Ile “okupiyaanekwa.”
