Omapsalme 86:1-17
Eilikano laDavid.
86 Omwene Jehova, pakaleka okutwi kwoye,* nou nyamukule nge,Osheshi onda fininikwa nonda hepa.
2 Pashukila onghalamwenyo* yange, osheshi ondimudiinini.
Xupifa omupiya woye oo te ku lineekele,Osheshi oove Kalunga kange.
3 Omwene Jehova, file nge onghenda,Osheshi ohandi ku ifana efimbo alishe.
4 Hafifa omupiya woye,*Osheshi ohandi kongo ekwafo,* Omwene Jehova.
5 Osheshi ove, Omwene Jehova, oumuwa, nowe lilongekida okudimina po;Oho ulikile aveshe ovo have ku ifana ohole inene i na oudiinini.
6 Omwene Jehova, pwilikina keilikano lange;Nokuyandja elitulemo, eshi handi pula ekwafo.
7 Ohandi ku ifana mefiku loudjuu wange,Osheshi oho nyamukula nge.
8 Omwene Jehova, kape na oo e ku fa mokati kookalunga,Kape na oilonga ya fa yoye.
9 Oiwana aishe, oyo wa shita,Otai uya, ndele tai ku linyongamene, Omwene Jehova,Notai ka fimaneka edina loye.
10 Osheshi ove oumunene, noho longo oilonga ikumwifi;Oove auke Kalunga.
11 Omwene Jehova, honge nge ondjila yoye.
Ohandi kala handi ende moshili yoye.
Hanganifa omutima wange,* opo ndi tile edina loye.
12 Omwene Jehova, Kalunga kange, ohandi ku tange nomutima wange aushe,Nohandi fimanekifa edina loye fiyo alushe,
13 Osheshi ohole yoye i na oudiinini, oyo wa ulikila nge, oinene,Nowa xupifa omwenyo* wange uha ye moule wOmbila.*
14 Omwene Kalunga, ovanhu ovalinenepeki ova fikama va lwife nge;Ongudu yovanhu ovakwanyanya otai kongo omwenyo wange,Noinave ku fimaneka.*
15 Ashike ove, Omwene Jehova, oKalunga omunanghenda nomunalukeno,*Iho handuka diva, nou na filufilu ohole i na oudiinini nosho yo oudiinini.*
16 Taalela kwaame, nokufila nge onghenda.
Pa omupiya woye eenghono,Ndele to xupifa omonamati womupiya woye okakadona.
17 Ulikile nge edidiliko* louwa woye,Opo ovo ve tonde nge ve shi mone nova fifwe ohoni.
Osheshi ove, Omwene Jehova, oove omukwafi nomuhekeleki wange.
Eshangelo lopedu
^ Ile “endeka, ndele to pwilikine.”
^ Ile “omwenyo.”
^ Ile “omwenyo womupiya woye.”
^ Ile “yelulile omwenyo wange.”
^ Ile “Pe nge omutima inau tukauka.”
^ Ile “onghalamwenyo.”
^ Sha hala okutya, kOufi. Tala Omafatululo oitya.
^ Ile “Noinave ku tula komesho yavo.”
^ Ile “noku na onghedi iwa.”
^ Ile “nomunashili.”
^ Ile “oumbangi.”
