Omayeletumbulo 17:1-28
17 Oshixwepo okulya omungome oo auke meumbo mu na ombili,Shi dulife meumbo mu na oitendele,* ndele kamu na eudafano.
2 Omupiya omunaendunge ota ka pangela omonamati womwene waye, oo ha ningi oinima ififa ohoni;Ota ka pewa efyuululo e li ngaashi umwe womovamwaxe.
3 Ombiya yokuhemuna oyoshisilveri, nediko la hanya omundilo oloshingoli,Ashike Jehova oye omukonakoni womitima.
4 Omukolokoshi oha yandje elitulemo keendjovo diyahameka,Nomupukifi oha pwilikine keendjovo dii.
5 Keshe oo ta sheke ohepele ota tuku Omushiti wayo,Nakeshe oo ta hafele oupyakadi wamukwao ita kala ina handukilwa.
6 Ovatekulu ovo oshikoroni shovanamido,Nooxe* ovo efimano lovanamati* vavo.
7 Eendjovo douyuki* itadi wapalele elai.
Mbela ongahelipi eendjovo doipupulu tadi wapalele omupangeli?*
8 Oshali oi li ngaashi emanya londilo* kumwene wayo;Ohai mu ningifa a pondole keshe apa ta i.
9 Keshe oo ta dimi po* etauluko ota kongo ohole,Ndele keshe oo ha kala ta shokonona oshinima, ota tukaula ookaume kopofingo.
10 Omunhu oo e na eudeko ota ka tambula ko diva epukululo,Ndele elai itali ka uda ko, nonande ou li denge lwefele.
11 Omukolokoshi oha tukula alushe ounashibofa,Ndele ota ka tuminwa omutumwa omukwanyanya e mu handukile.
12 Oshixwepo okushakena nemwangha la kufwa ounimwena valo,Shi dulife okushakena nelai la pwila moulai walo.
13 Ngeenge omunhu okwa longele owii oo e mu longela ouwa,Owii itau ka dja mo meumbo laye.
14 Okuhovela eenhamanana okwa fa okupanuna ondama;*Dja po, ofimbo inapa holoka eenhangu.
15 Keshe oo ha popile omukolokoshi, nakeshe oo ha tokola omuyuki,— Aveshe ove li oshinima shitondifa kuJehova.
16 Otashi kwafa shike, ngeenge elai ola mono omhito yokulikola ounongo,Ndele kali na eshi tali u longifa?*
17 Kaume kashili oha ulike ohole efimbo keshe,Noku li omumwaina oo a dalwa a kwafele pefimbo loudjuu.
18 Omunhu oo ehe na eendunge oha endelele okuninga eudafanotwokumweNoha dimine okufuta omukuli moipafi yomushiinda shaye.
19 Omunhu oo e hole eenhamanana oku hole etauluko.
Nakeshe oo he litange alushe ote lietele oshiponga.*
20 Keshe oo e na omutima u na omakoto ita ka pondola,*Nakeshe oo ha popi oipupulu ota ka wila moupyakadi.
21 Ou a dala elai ota ka nyika oluhodi;Naxe yaao ehe na eendunge ke na ehafo.
22 Omutima u na ehafo oo omuti muwa,*Ndele omhepo ya nyanyauka otai mane omunhu eenghono.*
23 Omukolokoshi oha tambula ombubo meholeko,*Opo a pengife ouyuki.
24 Ounongo ou li moipafi yomunhu oo e na eendunge dokuyoolola,Ndele omesho elai otaa talaatala kominghulo dedu.
25 Omonamati welai ota nyikifa xe oluhodiNokweetela nakudala ouyahame womomutima.*
26 Okuhandukila omuyuki kashiwa,Nokudenga ovafimanekwa oku li omhinge naasho sha yuka.
27 Omunhu oo e na eshiivo oha hoolola noukeka eendjovo daye,Nomunhu oo e na eendunge dokuyoolola oha kala a ngungumana.*
28 Nokuli nelai olo hali kala la mwena otali ka talika ko li na eendunge,Naao ha kala a umika ota ka talika ko e na eendunge dokuyoolola.
Eshangelo lopedu
^ Eln., “omayambo.”
^ Ile “Novadali.”
^ Ile “lovana.”
^ Ile “diwa.”
^ Ile “omuwiliki.”
^ Ile “emanya olo hali eta ouwa.”
^ Ile “tuvikile.”
^ Eln., “okupanuna omeva.”
^ Ile “Ofimbo lihe na eendunge.”
^ Ile “Nakeshe oo ta tungile oshivelo pombada ote likongele oshiponga.”
^ Eln., “mona ouwa.”
^ Ile “omuwa nokuvelula.”
^ Ile “otai kukutike omakipa.”
^ Eln., “ombubo tai di ponhulo.”
^ Eln., “oululu.”
^ Eln., “e na omhepo italala.”
