Omuudifi 9:1-18
9 Onghee onda tuvikila ashishe osho momutima wange nonda fika pexulifodiladilo kutya, ovayuki novanaendunge nosho yo oilonga yavo aishe oi li momake aKalunga kashili. Ovanhu kave shii ohole noutondwe oo wa ulikwa kwaavo ve va tetekela.
2 Aveshe ove na exulilo* la faafana, ovayuki novakolokoshi, ovo hava longo ouwa nova koshoka nosho yo ovo inava koshoka, ovo hava yandje omayambo naavo ihava yandje omayambo. Oo ha longo ouwa okwa faafana naao ha longo owii; oo ha ningi eano okwa faafana naao ha kala a lungama, ngeenge tashi uya pokuninga eano.
3 Eshi oshinima shinyikifa oluhodi osho tashi ningwa koshi yetango: Molwaashi aveshe ove na exulilo* la faafana, omitima dovanhu nado odi yadi owii; nopefimbo lokukalamwenyo kwavo omitima davo ohadi kala di yadi oulai, opo nee ohava fi.*
4 Keshe oo e li momwenyo oku na eteelelo, molwaashi ombwa i na omwenyo oi li xwepo i dule onghoshi ya fya.
5 Osheshi ovanamwenyo ove shi shii kutya ove na okufya, ndele oonakufya kave na eshi ve shii nandanande nokave na vali ondjabi yasha, molwaashi ashishe osho sha li shi na okudimbulukiwa kombinga yavo, osha dimbiwa.
6 Natango, ohole yavo, outondwe wavo nondubo yavo oya xula po nale, noihava kufa vali ombinga mwaasho tashi ningwa koshi yetango.
7 Inda u ka lye oikulya yoye nehafo, nokunwa omaviinyu oye nomutima u na ehafo, osheshi Kalunga kashili okwa hokwa nale oilonga yoye.
8 Oikutu yoye nai kale alushe itoka,* noino kala ino vaeka omutwe woye omaadi.
9 Hafela onghalamwenyo pamwe nomukulukadi woye omuholike omafiku aeshe okukalamwenyo kwoye kwongaho, oo Kalunga e ku pa koshi yetango, omafiku oye aeshe oongaho elela, osheshi osho osho oshipewa* shoye monghalamwenyo nomoilonga yoye idjuu, oyo to longo koshi yetango.
10 Keshe osho to longo nomake oye shi longa neenghono doye adishe, osheshi mOmbila* omu to i kamu na oilonga, eemhangela, eshiivo nounongo.
11 Onda mona vali oshinima shimwe koshi yetango, kutya ovo ve na onhapo haalushe hava findana mefiyafanepo, naavo ve na eenghono haalushe hava findana molwoodi, novanaendunge haalushe ve na oikulya, naavo ve na owino haalushe ve na oupuna, naavo ve na eshiivo haalushe hava pondola, molwaashi aveshe otava dulu okuhangwa komafimbo madjuu nokoiningwanima yombadilila.
12 Osheshi omunhu ke shii efimbo laye. Ngaashi ashike eeshi hadi kwatwa konete oyo hai dipaa, noudila hava yulwa komwiyo, ovana vovanhu navo ohava yulwa pefimbo loudjuu,* ngeenge ole va hange ombadilila.
13 Onda konakona vali oshinima shimwe koshi yetango shi na sha nounongo, nosha kumwifa nge:
14 Opa li oshilando shinini, omo mwa li ovanhu vanini, nohamba inaenghono oya li ye uya oku shi ponokela. Oye shi dingilila noku shi umbila ongubu ye shi kondeka.
15 Moshilando omo omwa li omulumenhu ohepele, ashike okwa li omunaendunge, nokwe shi xupifa nounongo waye. Ndele kapa li nande oumwe a dimbuluka omulumenhu oo ohepele.
16 Onde lipopila nda ti: ‘Ounongo ou li xwepo u dule eenghono; ashike ounongo wohepele owa dinika, neendjovo dayo ihadi pwilikinwa.’
17 Oshiwa okupwilikina keendjovo domunaendunge, oo ta popi a ngungumana, shi dulife omaweelelo aao ta pangele mokati komalai.
18 Ounongo ou li xwepo u dule oilwifo yoita, ndele omukolokoshi ashike umwe ota dulu okuhanauna po oinima ihapu iwa.
Eshangelo lopedu
^ Ile “oidjemo.”
^ Ile “oidjemo.”
^ Eln., “nokonima yaasho ohava i koonakufya.”
^ Sha hala okutya, oikutu yomaluvala a twa nawa, osho tashi ulike kehafo, ndele hakoikutu yeefya.
^ Ile “oshitukulwa.”
^ Sha hala okutya, kOufi. Tala Omafatululo oitya.
^ Ile “loshiponga.”
