Embo lOvaroma 16:1-27
16 Ohandi mu shiivifile kombinga yomumwameme Foibe, oo ha kwafele meongalo laKenkrea,
2 opo mu mu tambule ko mOmwene monghedi oyo ya wapalela ovayapuki nomu mu kwafele mukeshe osho a pumbwa, molwaashi okwa kala ta kwafele vahapu, naame nda kwatelwa mo.
3 Kundileni po Priskila naAkwila, ovalongi pamwe naame muKristus Jesus,
4 ovo va tula eemwenyo davo moshiponga omolwange;* haame andike handi va pandula, ndele otava pandulwa yo nokomaongalo aeshe omoiwana.
5 Kundileni po yo eongalo olo hali ongala meumbo lavo. Kundileni po omuholike Epainetus, umwe womovashikuli vaKristus votete muAsia.
6 Kundileni po Maria, oo a longa noudiinini omolweni.
7 Kundileni po Andronikus naJunias, ovapambele vange neenghwate dikwetu, ovo va shiivika nawa kovayapostoli nova kala ovashikuli vaKristus efimbo lile ve dule nge.
8 Kundileni po Ampliatus, omumwatate omuholike mOmwene.
9 Kundileni po Urbanus omulongi mukwetu muKristus nosho yo omuholike Stakus.
10 Kundileni po Apellas, oo e li omudiinini muKristus. Kundileni po yo ovaneumbo vaAristobulus.
11 Kundileni po Herodion, omupambele wange. Kundileni po yo ovaneumbo vaNarkissus, ovo ve li ovashikuli vOmwene.
12 Kundileni po Trifeina naTrifosa, ovakainhu ovo hava longo noudiinini mOmwene. Kundileni po yo omuholike Persis, oo a longa noudiinini mOmwene.
13 Kundileni po Rufus, omuhoololwa mOmwene, naina, oo nde mu tala ko yo onga meme.
14 Kundileni po Asinkritus, Flegon, Hermes, Patrobas, Hermas novamwatate ovo ve li pamwe navo.
15 Kundileni po Filologus, Julia, Nereus nomumwainakadona, naOlimpos nosho yo ovayapuki aveshe ava ve li pamwe navo.
16 Kundilafaneni po nokuxupitafana pahole. Omaongalo aeshe aKristus otae mu kundu.
17 Ohandi mu kumaida ovamwatate mu pashukile ovo tava eta etukauko nove li omhinge noinima oyo mwe lihonga; va kukumeni.
18 Osheshi ovanhu ovo ve li ngaho kave fi ovapiya vOmwene wetu Kristus, ndele ovapiya vomadimo avo, nova pukifa omitima daavo vehe na eshiivo okupitila meendjovo domaheka nodokambweenga.
19 Aveshe ova didilika kutya ohamu dulika, onghee onda hafa omolweni. Ndele onda hala mu kale ovanaendunge opo mu shiive osho shiwa, nomu henuke oilonga ii.
20 Kalunga oo ha yandje ombili ota ka nyanyaula Satana mafiku noku mu tula koshi yeemhadi deni. Efilonghenda lOmwene wetu Jesus nali kale pamwe nanye.
21 Timoteus, omulongi pamwe naame, ote mu kundile po nosho yo Lukius, Jason naSosipater, ovapambele vange.
22 Ame, Tertius, ou nda shanga onhumwafo ei palombwelo laPaulus, ohandi mu kundile po mOmwene.
23 Gaius, oo a li a yakula nge meumbo laye nosho yo eongalo alishe, ote mu kundile po. Erastus, omudiinini weliko loshilando,* ote mu kundile po nosho yo omumwaxe Kwartus.
24 ——
25 Onghundana iwa oyo handi udifa nosho yo etumwalaka li na sha naJesus Kristus otai ulike kutya Kalunga ota dulu oku mu pameka. Onghundana oyo oi na sha nokuuda ko oshiholekwa shiyapuki osho Kalunga a holola. Oshiholekwa osho osha kala sha holekwa oule wefimbo.
26 Paife oshiholekwa osho osha hololwa, noiwana aishe oye lihonga kombinga yasho okupitila momishangwa dopaxunganeko. Osho oshi li metwokumwe noshipango shaKalunga oo e li ko fiyo alushe nokwa hala ovanhu ve mu itavele nova dulike kuye.
27 Onghee hano, Kalunga, oo oye aeke omunaendunge a shiya ko, na fimanekwe fiyo alushe okupitila muJesus Kristus. Amen.
