Kala wa tokola toko

“Okukala wa tokola toko okweefa po okushila omakaya osho hashi kwafele omunhu e a efe po.” — “Okweefa okushila omakaya diva!”

OKU shi popya paunafangwa, ngeenge owa hala shili okweefa po okushila omakaya, ou na okukala wa tokola toko oku shi ninga. Ongahelipi to dulu okukala wa tokola toko? Oshinima shimwe, diladila konghalo nghee tai ka kala i li xwepo ngeenge owa efa po okushila omakaya.

Oto ka xupifa oimaliwa. Okapakete oko ho lande keshe efiku, kodula oho longifa oimaliwa omayovi. Gyanu, wokoNepal okwa ti: “Kanda li ndi shii ngeenge onda hepeka oimaliwa aishe oyo momakaya.”

Oto ka hafela onghalamwenyo. “Onghalamwenyo yange oya xwepopala ashike eshi nda efa po okushila omakaya, noya twikila okuxwepopala.” (Regina, wokoSouth Africa) Ngeenge omunhu okwa efa po okushila omakaya, oyuuditifi yaye ngaashi yokulola, okuuda omadimba, ohai xwepopala lela, oha kala e na eenghono dihapu noha hovele okumonika nawa kolutu.

Oukolele nao ohau xwepopala. O-The U.S. Centers for Disease Control and Prevention oya ti: “Okweefa po omakaya ohaku eta meendelelo omauwa mahapu e na sha noukolele kovalumenhu novakainhu vomapupi aeshe.”

Oto ka kala u na omukumo. “Onda efa po omakaya shaashi inandi hala a pangele nge. Onda hala aame mwene ndi pangele olutu lange.” — Henning, wokoDenmark.

Vambuleni nookaume koye otava ka mona ouwa. O-American Cancer Society oya ti kutya: “Okushila omakaya . . . ohaku nyono po oukolele waava ve ku dingilila. . . . Ovakonakoni ova ti kutya omwifi oo hau i momhepo ngeenge omunhu ta shili omakaya ohau etifa omafyo omudo keshe omolwokangela yokomapunga nomikifi domutima.”

Oto ka hafifa Omushiti woye. “Ovaholike, . . . tu likosheni kedilo keshe lombelela.” (2 Ovakorinto 7:1) “Yandjeni omalutu eni onga eyambo liyapuki, li na omwenyo nola hokiwa kuKalunga.” — Ovaroma 12:1.

“Eshi nda shiiva kutya Kalunga ina hokwa oinima oyo hai nyateke olutu, onda efa po okushila omakaya.” — Sylvia, wokoSpain.

Luhapu, okukala ashike tu na ehalo inashi wana. Otashi dulika yo twa pumbwa ekwafo lavamwe, mwa kwatelwa ovapambele vetu nookaume. Oshike osho tava dulu okuninga?