Eeshali dimwe odi na ondilo molwaashi otwe di pewa kuumwe oo e na eenghonopangelo ile kuumwe oo twa lenga neenghono. Eeshali dimwe nonande odi na ongushu inini, ohadi pandulwa molwaashi oda dja kovapambele vetu ovaholike ile kukaume ketu oo twe lineekela. Osho osha faafana noshali oyo ya li ya pewa Jordan kuRussell, oyo ya tumbulwa moshitukulwa sha tetekela. Ongahelipi osho tashi dulu okufaafanifwa noshali yekulilo?

Shotete, Ombiibeli oya ti kutya “Kalunga okwa tuma Omona waye Ewifa mounyuni, opo tu kale tu nomwenyo muye.” (1 Johannes 4:9) Oushili oo owa ningifa oshali oyo i kale i na ondilo. Kape na oo e na eenghonopangelo dinene e dule Kalunga. Omupsalme umwe Omuheberi okwa shanga shi na sha naye, a ti: “Oove ou to ifanwa Omwene, Ove auke u li po [Omukombadambada] medu alishe.” (Epsalme 83:18) Mbela ohatu dulu ngoo okupewa oshali komunamapangelo aeshe?

Oshitivali, Kalunga oye “Tate yetu.” (Jesaja 63:16) Ngahelipi mbela? Okwe tu pa omwenyo. Shikwao vali, ohe tu file alushe oshisho ngaashi ashike xe omunahole ha file ounona vaye oshisho. Eshi Kalunga a li ta popi novanhu vaye vamwe vopefimbo lonale, ngaashi Efraim, okwa li a pula a ti: ‘Efraim ke shi omumwange omuholike nokaana kehafo lange? Omwenyo wange owe mu tukulukila. Ame ondi noku mu fila onghenda.’ (Jeremia 31:20) Kalunga oha udile yo onghenda ovalongeli vaye vokunena. Ke fi ashike Omushiti wetu omunaenghono adishe ndele oku li yo Tate yetu yaalushe naKaume ketu. Mbela osho itashi tu ningifa tu kale twa lenga oshali keshe tai di kuye?

Eeshali dimwe odi na ondilo molwaashi oda yandjwa omolwohole yashili, ndele hamolwaashi omunhu e na oku shi ninga. Omunhu oo ha yandje shili nehalo liwa iha kala a teelela a pewe sha omolwouwa oo a longa.

Kalunga okwa yandja Omona waye omolwetu molwaashi oku tu hole. Ombiibeli otai ti: ‘Omo tuu omo ohole yaKalunga ye tu hololelwa, Kalunga eshi a tuma Omona waye Ewifa.’ Onelalakano lashike mbela? “Opo tu kale tu nomwenyo muye.” (1 Johannes 4:9) Mbela Kalunga okwa li e na oshinakuwanifwa shokuninga ngaho? Hasho nandenande! ‘Ekulilo eli lomuKristus Jesus’ otali ulike ‘efilonghenda’ laKalunga. — Ovaroma 3:24.

Omolwashike oshali yaKalunga i li euliko ‘lefilonghenda’? Ombiibeli oya popya ya ti: “Kalunga okwe tu hololela ohole yaye oku tu hola, Kristus eshi e tu fila fimbo twa li natango ovalunde.” (Ovaroma 5:8) Kalunga okwe linyengifwa kohole yokuheliholamwene opo a katuke onghatu omolwoulunde oo tu li muo. Inatu wana okuulikilwa ohole oyo, noitatu dulu oku mu futa. Oshali yaye inenenene oi li euliko lohole yaye mondjokonona.

Eeshali dimwe odi na ondilo molwaashi omuyandji wado okwa ninga omaliyambo manene. Ngeenge omunhu e na oshinima shaye shi na ondilo neenghono ndele te shi tu pe po nehalo liwa, ohatu kala twa lenga unene oshali oyo omolweliyambo olo a ninga.

Kalunga okwa ‘yandja Omona waye Ewifa.’ (Johannes 3:16) Okwa li ta dulu okukala ine tu pa omunhu oo e hole unene. Momukokomoko womido dihapudihapu odo Kalunga a kala ta shiti eshito alishe, Jesus okwa kala ta longo pamwe naye nokwa kala ta “danauka moipafi yaye alushe.” (Omayeletumbulo 8:30) Jesus ‘Omona’ waKalunga “omuholike” noye “olupe laKalunga iha monika.” (Ovakolossi 1:13-15) Kape na nande ekwatafano lopofingo la dula okukala pokati koishitwa ivali inaendunge ngaashi olo li li pokati kavo.

Ndele nande ongaho, Kalunga “ina xupifa Omona waye mwene.” (Ovaroma 8:32) Jehova okwe tu pa osho sha denga mbada. Kape na nande oshali imwe ye mu pula ondilo ya fa oyo.

Eeshali dimwe odi na ondilo molwaashi ohadi wanifa po omhumbwe lela yomunhu, nokuli nomhumbwe oyo ya endelela. Pashihopaenenwa, ito ka kala tuu wa pandula neenghono omunhu oo e liyamba okuxupifa omwenyo woye eshi a futa ouhaku oo wa li ito dulu okufuta nandenande! Oshali oyo otai dulu okukala i na ondilo lela kwoove, hasho mbela?

“Ngaashi aveshe tava file muAdam, osho yo aveshe tava ningwa ovanamwenyo muKristus.” (1 Ovakorinto 15:22) Tu li oludalo laAdam, atushe ohatu ‘fi,’ itatu dulu okuya onhapo ouyahame nefyo ile tu lihanganife fye vene naKalunga nokukala tuhe na ondjo kuye. Natango otu li ovanhu vongaho, nomolwaasho itatu dulu okulikaleka ‘nomwenyo’ nosho yo vamwe. Ombiibeli oya ti: ‘Kape na omunhu ta dulu okukulila omumwaina, nokuyandjela mukwao oikulila kuKalunga. Osheshi otai nyengana.’ (Epsalme 49:7, 8) Otwa pumbwa neenghono ekwafo molwaashi itatu dulu okufuta ofuto yekulilo. Itatu dulu okuninga po sha kufye vene.

Omolwohole yaye inene, Jehova okwa futa nehalo liwa ouhaku oo twa li twa pumbwa opo a xupife eemwenyo detu, eshi a yandja Jesus opo tu kale “ovanamwenyo.” Ongahelipi ekulilo le shi ninga tashi shiiva tu kale nomwenyo? ‘Ohonde yOmona waye Jesus oye  tu kosha omatimba aeshe.’ Eitavelo mohonde yaJesus oyo ya tika ola yeulula omhito yokudiminwa po omatimba noku ka mona omwenyo waalushe. (1 Johannes 1:7; 5:13) Ndele mbela ekulilo otali ka ningila shike oonakufya vetu ovaholike? “Osheshi efyo ngaashi le uya molwomunhu umwe, osho yo nenyumuko lovafi omolwomunhu umwe [Jesus].” — 1 Ovakorinto 15:21. *

Kaku na umwe e linyengifwa kohole inene ngaashi Jehova Kalunga oo e tu pa oshali yekuliloyambo laJesus. Nokape na oshali tai xumbile mekuliloyambo. Natango kape na oshali tai dulu okuwanifa po omhumbwe yetu inene i dule eyambo olo le tu mangulula moulunde nefyo. Osha yela kutya kape na oshali i na ongushu tai dulu okuyelekanifwa nongushu yekuliloyambo.