“Keshe oshipewa shiwa, nokeshe oshali sha wanenena, ohashi di kombada, okuXe yomauyelele.” (Jakob 1:17) Omushangwa oo otau ulike kutya Tate yetu womeulu, Jehova Kalunga, oha yandje nehalo liwa. Ashike nande ongaho, meeshali adishe odo Kalunga a pa ovanhu, omu na imwe oyo ya denga mbada i dule eeshali adishe. Oshali oyo oilipi? Eendjovo daJesus odo da shiivika nawa di li muJohannes 3:16, otadi ti: “Osho Kalunga a kala e hole ounyuni, Oye a yandja Omona waye Ewifa, opo keshe ou te mu itavele aha kane, ndelenee a kale e nomwenyo waalushe.”

Kalunga okwe tu pa oshali yOmona waye ewifa, oyo i li oshali ya denga mbada meeshali adishe odo e tu pa opo tu mangululwe moupika woulunde, woukulupe nefyo. (Epsalme 51:5; Johannes 8:34) Nonande otu ninge eenghendabala, itatu dulu okulimangulula mo fye vene moulunde. Ashike nande ongaho, omolwohole yaye inenenene, Kalunga okwe tu pa osho twa pumbwa opo tu dule oku ka manguluka mo. Jehova Kalunga okwe tu pa Omona waye ewifa, Jesus Kristus, e li ekuliloyambo, naasho osha pa ovanhu ovaduliki eteelelo loku ka mona omwenyo waalushe. Ekuliloyambo oshike naanaa? Omolwashike la pumbiwa? Nongahelipi hatu dulu okumona ouwa mulo?

Ekuliloyambo ondado oyo hai futile po oshinima shonhumba osho sha kana ile yokufutila omunhu a mangululwe moukwatwa. Ombiibeli oya yelifa kutya Adam naEva ova li va shitwa va wanenena, ve na etimaumbwile lokuhafela onghalamwenyo fiyo alushe moparadisa kombada yedu pamwe noludalo lavo. (Genesis 1:26-28) Shinyikifa oluhodi, ova kanifa keshe shimwe omolwokuhadulika kuKalunga, nokungaho ova ninga ovalunde. Oshidjemo osha li shike? Ombiibeli oya ti: “Ngaashi oulunde wa etwa mounyuni komunhu umwe, nefyo okoulunde, osho nee efyo ole uya movanhu aveshe, shaashi aveshe va nyona.” (Ovaroma 5:12) Oludalo laAdam ola fyuulula kuye oulunde nefyo ponhele yomwenyo wa wanenena.

Ofuto yekuliloyambo oi na okukala i fike poshinima osho sha kanifwa. Eshi Adam a hoolola okuhadulika nandenande kuKalunga, okwa nyona, nokungaho okwa kanifa omwenyo wa wanenena. Ombiibeli oya popya kutya osho osha ningifa oludalo laAdam li kale moupika woulunde nefyo. Onghee hano, Jesus e li omunhu a wanenena okwa li e na okuyamba po omwenyo waye noku u yandja u li ekuliloyambo opo tu mangululwe moupika. (Ovaroma 5:19; Ovaefeso 1:7) Kalunga okwa yandja ekuliloyambo opo ovanhu va kale ve na etimaumbwile olo la kanifwa kuAdam naEva, lokukala nomwenyo waalushe moparadisa kombada yedu. — Ehololo 21:3-5.

Oshali ya denga mbada ya dja kuKalunga, oyo i dule eeshali adishe, oye shi ningifa tashi shiiva opo tu dule oku ka mona omwenyo waalushe. Opo tu ude ko kutya ekuliloyambo ‘oshali ya wanenena,’ natu ka taleni nghee la wanifa po monghedi ya denga mbada omaukwatya oo haa kala a pumbiwa oo taa ningifa oshali i kale tai ti sha ngaashi twa kundafana metetekelo.

Otai wanifa po osho twa hala. Tu li ovanhu, otu na ehalo lokukala nomwenyo fiyo alushe. (Omuudifi 3:11) Nonande itatu dulu okuliwanifila po ehalo olo kufye vene, ekuliloyambo ole shi ningifa tashi shiiva opo tu ka kale nomwenyo. Ombiibeli oya ti: “Osheshi ondjabi youlunde oyo efyo, ndelenee oshalinghenda yaKalunga oyo omwenyo waalushe muKristus Jesus, Omwene wetu.” — Ovaroma 6:23.

 Otai wanifa po omhumbwe yetu. Ovanhu itava dulu okuyandja ekuliloyambo. Ombiibeli oya ti: “Osheshi okufutila omwenyo oifuta apa i fike, otai nyengana, ye ke na oku shi hetekela vali fiyo alushe.” (Epsalme 49:8) Onghee hano, otwa li twa pumbwa filufilu Kalunga e tu kwafele opo tu mangululwe moupika woulunde nefyo. Ashike, Kalunga okwe tu pa naanaa osho twa li twa pumbwa, “oshali okefilonghenda laye omolwekulilo eli lomuKristus Jesus.” — Ovaroma 3:23, 24.

Otwe i pewa pefimbo la wapala. Ombiibeli oya ti: “Kristus [okwe] tu fila fimbo twa li natango ovalunde.” (Ovaroma 5:8) Molwaashi Kalunga okwe tu pa ekuliloyambo “fimbo twa li natango ovalunde,” oli li euliko lohole yaye yomoule nonande otwa dalwa moulunde. Nonande otu na okulididimikila oilanduliko youlunde, ole tu pa etimaumbwile li na sha nonakwiiwa.

Ohai holola elinyengotomheno la yuka nolokuheliholamwene. Ombiibeli oya popya kutya oshike she linyengifa Kalunga a yandje Omona waye ekuliloyambo, ya ti: “Omo tuu omo ohole yaKalunga ye tu hololelwa, Kalunga eshi a tuma Omona waye Ewifa mounyuni, opo tu kale tu nomwenyo muye. Opo tuu opo ope nohole, fye eshi twa kala tu hole Kalunga, ndelenee Oye a kala e tu hole.” — 1 Johannes 4:9, 10.

Ongahelipi to dulu okuulika kutya owa pandula oshali oyo ya denga mbada i dule eeshali adishe? Dimbuluka eendjovo daJesus odo di li muJohannes 3:16 odo da popya kutya ovovo ashike ve na ‘eitavelo’ tali longo muye tava ka xupifwa. Ombiibeli oya ti eitavelo olo “elineekelo la pama okulineekela osho tashi teelelwa.” (Ovaheberi 11:1) Otwa pumbwa eshiivo lashili opo tu kale tu na elineekelo la tya ngaho. Omolwetomheno olo, ohatu ku ladipike u konge efimbo opo u lihonge kombinga yaJehova Kalunga, Omuyandji ‘woshali iwa,’ nou mone kutya owa pumbwa okuninga po shike opo u dule oku ka hafela omwenyo waalushe oo wa ningifwa tashi shiiva omolwekuliloyambo laJesus.

Oto dulu okulihonga oinima aishe oyo mokukonakona ouyelele oo wa kanghamena kOmishangwa tau hangwa kointaneta ko-www.ps8318.com. Eendombwedi daJehova otadi ka kala da hafa oku ku kwafela. Otwe lineekela kutya eshi to lihongo nokumona ouwa omolwoshali oyo ya denga mbada, oto ke linyengifwa u tye: “Kalunga na pandulwe omolwaJesus Kristus.” — Ovaroma 7:25.