Okakadona kamwe komido 13 osho ka li ke udite ngaho eshi ka li ka pewa oshali yokambwa. Omukainhu umwe omunangeshefa ha pondola okwa ti kutya okombiyuta oyo a li a pewa kuxe ofimbo a li kofikola yopombada oi li oshali oyo ya lundulula onghalamwenyo yaye. Omushamane umwe opo a hombola okwa li e udite kutya ina pewa nande onale oshali ya denga mbada ya fa okakalata oko a ningilwa komukulukadi waye eshi va wanifa omudo umwe mohombo.

Omudo keshe, ovanhu vahapu ohava ningi eenghendabala opo va kongele ookaume kavo ile ovapambele vavo eeshali da denga mbada peemhito de likalekelwa. Navahapu ohava kala va hala okuuda eendjovo da yukila kwaado da popiwa pehovelo. Ongahelipi kombinga yoye? Mbela owa hala okuyandja ile okupewa oshali i shii okupandulwa?

Atushe osho hatu kala twa hala ngaho, ashike okuyandja oshali ihashi kumu ashike oo te i pewa, ndele ohashi kumu yo naku i yandja. Ombiibeli oya ti: “Okuyandja oku nelao komesho yokutambula.” (Oilonga 20:35) Omunhu ota dulu okumona ehafo mokuyandja ngeenge nakupewa oshali okwe i lenga neenghono.

Ndele mbela ongahelipi okuyandja oshali taku dulu okukala odjo yehafo lashili kwoove nokwaao wa pa? Nongeenge ino yandja nale oshali ya denga mbada, oshike to dulu okuninga po opo oshali yoye i kale ya pandulwa?