ONDJOKONONA YONGHALAMWENYO
“Paife ondi hole oukalele!”
ONDA kulila modoolopa yaBalclutha, kokanhunhu ke li kolukadi laNew Zealand. Eshi nda li okaana, onda li ndi hole Jehova nonda li nda hala okukala Ondombwedi. Onda li handi hafele okuya kokwoongala, neongalo ola li onhele omo handi kala ndi udite ndi li meameno nonda hafa. Nonande onda li ndi na eehoni, onda li handi hafele okukufa ombinga moukalele oshivike keshe. Kanda li handi tila okuudifila ovanafikola vakwetu nosho yo ovanhu vakwetu. Onda li ndi udite etumba okukala ndi li umwe womEendombwedi daJehova nonda li nde liyapulila Jehova eshi nda li ndi na omido 11.
ONDA LI NDA KANIFA EHAFO
Shinyikifa oluhodi, eshi nda li mepupi lokamukondapweyu, ekwatafano lange naJehova ola li la hovela okunghundipala. Ovanafikola vakwetu ova li tava monika ve na emanguluko lihapu nonda li ndi wete ndi li konima yefiya. Onda li ndi wete eemhango dovadali vange, omifikamhango dopaKriste nosho yo oinima yopamhepo tai monika ya fa omutengi mudjuu. Nonande kanda li nda limbililwa kutya Jehova oko e li, kanda li ndi wete nda ehena popepi naye.
Kanda li nda efa po okuudifa filufilu, ndele onda li ashike handi ningi shimha handi ningi. Kanda li handi lilongekida ngeenge handi ka udifa. Onghee hano, onda li handi kala handi ongaonga okuhovela, ile okutwikila neenghundafana. Oshidjemo? Kanda li handi kala ndi na omalishuneko, ile omakonakonombiibeli, nokanda li handi hafele oukalele, naasho osha ningifa nge ndi kale ndi u tonde neenghono. Onde lipula kutya: ‘Ongahelipi omunhu ta dulu okuninga ngaho oshivike keshe, ile omwedi keshe?’
Eshi nda wanifa omido 17, onda li nda hala okukala moukakombolilifa. Onghee onda li nda longela eendjato dange, da fiya po eumbo, ndele handi tembukile koAustralia. Ovadali vange ova li va nyika oluhodi, eshi nda li ihandi di vali pamwe navo. Ova li tave lipula unene naame, ashike ova li tava diladila kutya ohandi ka twikila okulongela Jehova.
MoAustralia, oupamhepo wange owa li wa nghundipala neenghono. Onda li nda hovela okufaula kokwoongala. Onda li nda panga oukaume novanyasha vakwetu ovo va li ve na oikala ya fa yange, hava ongala omafiku amwe, vo amwe tava i keenhingo doufiku va ka nwe oikolwifa nokundanisha. Ngeenge handi diladila kefimbo olo, ondi wete kutya onda li handi kala omhadi imwe moshili, yo ikwao omounyuni. Ashike kanda li handi kala nda hafa.
OSHILIHONGOMWA SHA FIMANA OSHO NDA LI INANDI TEELELA
Konima yomido mbali lwaapo, onda li nda shakena nomumwameme umwe, oo a li ina didilika kutya okwe linyengifa nge ndi diladila konghalamwenyo yange. Onda li handi di meumbo limwe novamwameme vatano inava hombolwa. Otwa li twa shiva omupashukilishikandjo pamwe nomukulukadi waye, Tamara, ve uye va kale meumbo letu oule woshivike. Ngeenge omushamane waye e lipyakidila noinima yeongalo, Tamara okwa li hatu kala navo nokuhafela eenghundafana. Onda li handi shi hafele. Tamara okwa li e na emanguluko lokupopya nokwa li ha dulu okupopiwa naye noupu. Osha li sha kumwifa nge okumona omunhu e na oupamhepo muwa noha dulu okuhafela pamwe novanhu.
Tamara oku na ondjungu, e hole oshili nosho yo oukalele. Oha kala a hafa ngeenge ta pe Jehova osho sha denga mbada, ofimbo ame handi kala nda nyemata, molwaashi onda li ashike handi ningi shimha handi ningi. Omaukwatya aye mawa nosho yo ehafo laye lashili oya kuma neenghono onghalamwenyo yange. Oshihopaenenwa shaye shiwa osha diladilifa nge oshili ya fimana oyo kutya: Jehova okwa hala atushe tu mu longele twa ‘hafa nokukuwilila.’ — Eps. 100:2.
NDA HOVELA VALI OKUKALA NDI HOLE OUKALELE
Onda li nda hala okukala nda hafa ngaashi Tamara, ashike opo ndi mone ehafo olo, onda li ndi na okuninga omalunduluko manene. Osha pula efimbo opo ndi ninge omalunduluko, ashike onda li nda hovela okuninga omalunduluko kanini nakanini. Onda li nda hovela okukala handi lilongekidile oukalele nokukufa oukwafelikokolindjila omafimbo nomafimbo. Osho osha li sha kwafela nge ndi kale ndihe na oumbada nosha twa nge omukumo. Molwaashi onda li handi longifa Ombiibeli moukalele luhapu, osha li sha etela nge ehafo linene. Diva konima yaasho, onda li handi hafele oukwafelikokolindjila omwedi keshe.
Onda li nda hovela okupanga oukaume novanhu vomido da yoolokafana, ovo va li tave shi endifa nawa moshili nova li hava hafele okulongela Jehova. Oshihopaenenwa shavo shiwa osha kwafela nge ndi talulule osho nda pitifa komesho nokulitulila po elandulafano lokulipalula pamhepo. Onda li nda hovela okuhafela oukalele shi dulife nale, nomokweendela ko kwefimbo onda li nda ninga omukokolindjila wondjikilile. Osha li oshikando shotete okukala nda hafa nondi udite ouumbo eshi ndi li oshitukulwa sheongalo.
NDA MONA OMUKOKOLINDJILA TA KALELELE
Omudo wa shikula ko, onda li nda shakena naAlex, oo a li e na olukeno, e hole Jehova nosho yo oukalele. Okwa li omuyakuliongalo nokwa kala ta kokola ondjila oule womido hamano. Omafimbo amwe, Alex okwa li ha ka longa koMalawi, oko ku na omhumbwe inene yovaudifi. Koshilongo osho, okwa kala ha endafana novatumwa ovo va li ve mu nwefa mo nawa nova li have mu ladipike a twikile okupitifa komesho oinima yOuhamba.
Otwa hombola naAlex mo 2003, nokudja opo otwa twikila noilonga yefimbo li yadi. Otwe lihonga oilihongomwa ihapu itunhula, na Jehova okwa li e tu nangeka noupuna meenghedi dihapu.
JEHOVA E TU NANGEKA NOUPUNA NEENGHONO
Tu li moukalele moGleno, moTimor-Leste
Mo 2009, otwa li twa shivwa tu ka longe tu li ovatumwa moTimor-Leste, okalongo kanini ke li mokanhunhu kaIndonesia. Otwa li twa hafa neenghono, twa tunhukwa nopefimbo opo tuu opo otwa li tu na oumbada. Konima yeemwedi nhano, otwa li twa fika moshilandopangelo Dili.
Etembu ola li le tu etela omalunduluko manene monghalamwenyo yetu. Otwa li tu na okwiikilila eputuko lipe, elaka, oikulya nosho yo onghalo. Otwa li hatu mono ovanhu moukalele va hepa neenghono, inava hongwa nova fininikwa. Otwa li yo hatu mono ovanhu va monifwa oixuna palutu nopamaliudo koita nosho yo kominyonena. *
Oukalele owa li tau ende nawa! Pashihopaenenwa, pomhito imwe onda li nda shakeneka okakadona kedina Maria, komido 13, ka nyika oluhodi. * Ina yako okwa fya konima ashike yomido dinini, nokaka li naanaa haka mono xe. Ngaashi ashike ounona vakwao vepupi laye, Maria naye ka li e na elalakano lasha monghalamwenyo. Ohandi dimbuluka oshikando shimwe a li ta lili eshi ta mbubulile nge omaliudo aye. Ashike kanda li ndi shii kutya ota popi shike, molwaashi kanda li handi popi nawa elaka laye. Onda ilikana kuJehova a kwafele nge ndi mu twe omukumo, nonda li nda hovela oku mu leshela omushangwa wetwomukumo. Omido dinini da ka shikula ko, onda li nda mona nghee oshili ya kwafela Maria a lundulule oikala yaye, onghedi yaye yokudjala nokuliwapeka nosho yo onghalamwenyo yaye aishe. Okwa ninginifwa, nopaife oha konakona navamwe Ombiibeli. Maria paife oku na oukwaneumbo wa kula wopamhepo noku udite kutya oku holike.
Jehova okwa nangeka noupuna oilonga yokuudifa moTimor-Leste. Nonande ovaudifi vahapu ova ninginifwa momukokomoko womido omulongo da pita, vahapu vomuvo ove li ovakokolindjila, ovayakuliongalo novakulunhuongalo. Vamwe ohava longo meembelewa dokutoloka nohava kwafele mokutoloka oishangomwa ya kanghamena kOmbiibeli. Ohashi hafifa nge neenghono okuuda tava imbi pokwoongala, tave limemesha nokumona nghee tava ningi exumokomesho lopamhepo.
Tu li naAlex hatu di moshitukulwa osho ihashi longwa naanaa, oko twa li twa ka shiva ovanhu kEdimbuluko
KANDA LI NDI SHII NGEENGE ONANDI KA KALE NDA HAFA MONGHALAMWENYO
Oshinakuwanifwa shetu moTimor-Leste okwa li sha yooloka ko neenghono kwaasho shomoAustralia, notwa li twe shi hafela. Omafimbo amwe otwa li hatu mbwangwa mokabesa mu yadi ovanhu, mu na eeshi dikukutu nosho yo oikwambidi yokomatala. Omafiku amwe otwa li hatu konakonene Ombiibeli momaumbo manini mu na oupyu, a kaka pedu nomu na eexuxwa tadi tondoka momudingonoko. Nonande opa li omashongo a tya ngaho, onda li handi lipopile kutya ‘Otashi ende nawa!’
Twa finda koshitukulwa oko hatu ka udifila
Ngeenge handi diladila konakudiwa, ohandi pandula ovadali vange eshi va ninga ngaashi tava dulu opo va honge nge kombinga yaJehova nokuyambidida nge, nokuli nopefimbo olo la li lidjuu lokamukondapweyu. Omayeletumbulo 22:6 okwa wanifilwa nge. Meme natate ove tu uditile etumba fye naAlex, nova hafa eshi hatu longifwa kuJehova. Okudja mo 2016 otwa kala hatu longo moilonga youpashukilishikandjo moitukulwa oyo i li koshi yoshitaimbelewa shaAustralasia.
Handi ulikile ounona Ovatimorese okavidio kaKaleb naSofia
Otashi monika shidjuu okwiitavela kutya kanda li handi hafele oukalele. Paife ondi hole oukalele! Kashi na nee mbudi kutya oshike tashi tu ningilwa monghalamwenyo yetu, onda mona kutya ehafo lashili ohali di mokulongela Kalunga nomutima aushe. Omido 18, odo twa kala hatu longele Jehova pamwe naAlex, oda kala omido dehafo monghalamwenyo yange. Paife ondi udite ko oushili weendjovo domupsalme David, odo a popya shi na sha naJehova, eshi a ti: “Aveshe ava ve ku lineekela, nave ku hafele; alushe nava kuwilile . . . notave ku tanhele ava ve hole edina loye.” — Eps. 5:11.
Kashi hafifa tuu okukonakona Ombiibeli novanhu ovalininipiki!
^ okat. 21 Okudja mo 1975, moTimor-Leste omwa li mwa tukuluka oita, oyo ya kwata omido di dule pomilongo mbali, molwaashi oshiwana osha li tashi kondjifa okuumba ko koshipundi ongudu yopapolotika oyo ya li tai pangele.
^ okat. 22 Edina olo halo lomunhu oo lelalela.
