Omuyapostoli Paulus okwa shangela Ovakriste vomuTessalonika a ti: ‘Ngeenge ope na umwe ita dulika keendjovo detu edi di li monhumwafo ei, mu didilikeni.’ (2 Tes. 3:14) Monakudiwa, otwa li twa popya kutya ovakulunhuongalo ovo ve na oku shi ninga. Nale, ngeenge umwe okwa kala ta pewa omayele, ndele ita tula moilonga omafinamhango Ombiibeli, ovakulunhuongalo ova li hava dulu okuyandja oshipopiwa shelondwelo. Opo nee ovaudifi itava ka endafana vali naye.

Ashike paife otu shi udite ko kutya, omayele aPaulus okwa yukifwa ketokolo olo Omukriste keshe pauhandimwe meongalo e na okuninga, she likolelela keenghalo. Onghee inashi pumbiwa ovakulunhuongalo va yandje oshipopiwa shelondwelo. Omolwashike tapa ningilwa elunduluko? Natu ka tale kutya Paulus okwa li ta popi kombinga yashike, eshi a li ta yandje omayele oo.

Paulus okwa li a didilika kutya vamwe meongalo kava li ve “na elandulafano.” Kava li hava dulika kEendjovo daKalunga. Eshi a li e va talela po pomhito imwe, okwa li e va lombwela a ti: “Ou ina hala okulonga ina lya.” Ndele natango vamwe kava li hava longo, opo ve liyambidide, nonande ova li tava dulu oku shi ninga. Natango, ova li tave lidopo moinima yavamwe. Ovakriste ova li ve na okuungaunga ngahelipi naavo vehe na elandulafano? — 2 Tes. 3:​6, 10-12.

Paulus okwa ti: ‘Mu didilikeni.’ Oshitya shOshigreka oshi na ediladilo olo kutya omunhu a tya ngaho na lungamenwe. Paulus okwa li ta lombwele eongalo alishe, ndele havakulunhuongalo ashike. (2 Tes. 1:1; 3:6) Omukriste pauhandimwe, oo a didilika kutya Omukriste mukwao ina dulika kEendjovo daKalunga, ota dulu okuhoolola aha ‘endafane’ vali naye.

Mbela osho osha hala okutya omunhu oo okwa li ha ungaungiwa naye ngaashi omunhu a kufwa mo meongalo? Hasho nandenande. Paulus okwa weda ko a ti: “Twikileni oku mu pukulula e li omumwaxo.” Ovakriste ova li tava dulu okweendafana naye natango pokwoongala nomoukalele, ndele kave na okweendafana naye moinima imwe, ile momalihafifo. Omolwashike? Paulus okwa ti: “Opo a fye ohoni.” Ngeenge Omukriste a tya ngaho okwa didilikwa, ota ka fya ohoni elihumbato laye, nota ka lundulula. — 2 Tes. 3:​14, 15.

Omayele a tya ngaho otaa dulu ngahelipi okutulwa moilonga kunena? Tete otu na okushilipaleka ngeenge omunhu ke na shili “elandulafano,” ngaashi Paulus a popya. Ka li ta popi kombinga yaavo ve na omataleko a yooloka ko kwaao etu, e likolelela keliudo, ile e na sha noinima yopaumwene. Noka li ta popi kombinga yaavo tashi dulika ve tu udifa nai. Ponhele yaasho, Paulus okwa li ta popi kombinga yaavo va pewa omayele okudja mEendjovo daKalunga, ashike natango itava dulika kuo.

Kunena, ngeenge otwa didilike kutya Omukriste mukwetu oku na omhepo yokuhadulika, a ohatu ka tokola pauhandimwe tuha endafane naye moinima imwe, ile momalihafifo. Molwaashi osho etokolo lopaumwene, itatu ke shi kundafana naumwe oo ehe fi womoukwaneumbo wetu. Ashike ohatu ka twikila okweendafana naye pokwoongala nosho yo moukalele. Ngeenge okwa lundulula elihumbato laye, ohatu ka hovela okweendafana naye vali moinima yakwalukeshe.