Jehova okwa lombwela Ovaisrael va kale oshiwana shiyapuki. Opo e va kwafele va kale ovayapuki, okwe va lombwela a ti: “Ino endaenda mokati kovanhu ngaashi omupopyaani. Ino nangela omwenyo wamukweni. Aame Omwene.” — Lev. 19:2, 16.

Outumbulilo “ino nangela,” oo wa toloka nawa oshitya shOshiheberi shopehovelo, owa hala kutya shike? Embo limwe lOshijuda, olo la popya shi na sha naLeviticus, ola ti: “Oshitukulwa osho shovelishe oyo . . . oshidjuu okuuda ko, molwaashi katu shii kutya omupopyofano wOshiheberi otau ti shike, oo wa tolokwa oshitya noshitya ‘ino kala popepi.’”

Ovahongwanhu vamwe otava diladila kutya outumbulilo oo owa pambafana novelishe 15, oyo ya ti: “Moihokolola ino popya eshi inashi yuka. Ino kala u nokatongotongo pokati kohepele nomufimanekwa. U nokutokola omukweni pauyuki.” (Lev. 19:15) Onghee hano, oshipango osho tashi hangwa movelishe 16, osho tashi ti kutya “ino nangela” omwenyo wamukweni, osha hala kutya Ovaisrael kave na okuungaunga navamwe shihe li pauyuki moinima i na sha noihokolola, nongeshefa, ile moukwaneumbo. Ovaisrael kava li ve na okupengifa oinima omolwouwa wavo. Oshoshili kutya katu na okuninga oinima oyo. Ashike ope na onghedi imwe ya denga mbada oyo tai dulu oku tu kwafela tu ude ko nawa outumbulilo oo u li movelishe 16.

Natu kundafaneni oshitukulwa shopehovelo shovelishe oyo. Kalunga okwa lombwela oshiwana shaye shiha endaende mokati kovanhu ngaashi omupopyaani. Oshoshili kutya ngeenge omunhu oku hole okwaamba vakwao, otashi dulu okweeta omaupyakadi. Ndele ngeenge omunhu ota lundile umwe, osho oshinima shii neenghono. (Omayel. 10:19; Omuud. 10:12-14; 1 Tim. 5:11-15; Jak. 3:6) Luhapu omulundili oha popi oipupulu nohe shi ningi nelalakano, opo a nyone po edina liwa laumwe. Omulundili ota dulu okuyandja ehokololo loipupulu li na sha nomunhu mukwao, nonande otashi dulu okutwalifa omunhu a tya ngaho moshiponga. Dimbuluka kutya ovanaipupulu ova li va yandja ehokololo loipupulu li na sha naNabot, olo le mu dipaifa nomamanya shihe li pauyuki. (1 Eeh. 21:8-13) Onghee hano, omunaipupulu ota dulu okunangela omwenyo womunhu mukwao, ngaashi sha tumbulwa moshitukulwa oshitivali shaLeviticus 19:16.

Shikwao vali, omunhu oo ta lundile mukwao ota ulike kutya oku tonde omunhu a tya ngaho. Ombiibeli oya popya mu 1 Johannes 3:15 ya ti: “Keshe ou e tonde omumwaxe oye omudipai, nomu shi shii kutya kape na omudipai ta ka mona omwenyo waalushe.” Konima eshi Kalunga a popya eendjovo odo tadi hangwa movelishe 16 okwa ti: “Omumwanyoko omulumenhu ino mu tonda momutima woye.” — Lev. 19:17.

Outumbulilo oo u hokwifa, oo wa longifwa muLeviticus 19:16, owa yandja omayele a kwata moiti kOvakriste. Otwa pumbwa okuhenuka omadiladilo aeshe mai nokatu na okulundila ovanhu vakwetu. Ngeenge otwa ‘nangele’ ovanhu vakwetu mokupitika outondwe, ile ondubo i tu ningife tu lundile umwe, osho otashi ulike kutya otu mu tonde filufilu. Ovakriste ove na okuhenuka filufilu okukala ve tonde ovanhu vakwao. — Mat. 12:36, 37.