1-3. (a) Otashi dulika Epsalme 147 la shangelwe naini? (b) Oshike hatu lihongo mokukonakona Epsalme 147?

NGEENGE umwe okwa wanifa po nawa oshinakuwanifwa osho a pewa ile a ulika oukwatya udidilikwedi wopaKriste, okwa wana okupandulwa. Ngeenge osho oshoshili shi na sha novanhu, mbela otu na omatomheno e fike peni okuhambelela Jehova Kalunga? Ohatu dulu oku mu hambelela omolweenghono daye dinenenene, ngaashi tadi monika meshito laye ile mokuungaunga nawa novanhu, ngaashi shi liwetikile mefiloshisho laye lekuliloyambo lOmona waye.

² Omushangi wEpsalme 147 okwa li e linyengifwa a hambelele Jehova. Okwa li yo a lombwela vamwe ve mu waimine mokuhambelela Jehova. — Lesha Epsalme 147:1, 7, 12.

³ Katu shii kutya olyelye a shanga epsalme olo, ashike omupsalme okwa li ko pefimbo olo Jehova a li a mangulula Ovaisrael moupongekwa waBabilon va shune kuJerusalem. (Eps. 147:2) Okushunifwa kwOvaisrael konhele yavo yelongelokalunga lashili okwa li kwe linyengifa omupsalme a hambelele Jehova. Natango okwa li yo a  tumbula omatomheno akwao oku mu hambelela. Elipi mbela? Ou na omatomheno elipi okwiingida ‘Halleluya’ monghalamwenyo yoye? — Eps. 147:1.

4. Eshi Ovaisrael ovo va li moupongekwa va mangululwa kohamba Kores, ova li ve udite ngahelipi, nomolwashike?

⁴ Diladila nghee Ovaisrael ovo va li moupongekwa va li ve udite eshi va li muBabilon. Ovo ve va tula moupongekwa ova li ve va pula va ti: “Tu imbileni po eimbilo limwe lomomaimbilo aSion!” Jerusalem omo va li hava longele Jehova nehafo osha li sha hanaunwa po. (Eps. 137:1-3, 6) Ovajuda kava li va hala okwiimba. Omitima davo oda li da teyauka, nova li va pumbwa ehekeleko. Ashike, exunganeko laKalunga ola li la wanifwa eshi a li a longifa Kores ohamba yaPersia i va mangulule. Okwa li a finda Babilon nokwa li a ingida a ti: “Omwene. . . okwa lombwela nge ndi mu tungile ongulu muJerusalem . . . Keshe umwe womoshiwana shaye, Omwene Kalunga kaye na kale naye, ndele na ye ko.” (2 Omaf. 36:23) Oshiningwanima osho kasha li tuu tashi hekeleke Ovaisrael ovo va li muBabilon!

5. Omupsalme okwa li a mona shike shi na sha neenghono daJehova dokuvelula?

⁵ Jehova ka li ashike a yandja ehekeleko koshiwana shaIsrael shi li ongudu ndele okwa li yo a hekeleka oohandimwe. Osho osha faafana nokunena. Omupsalme okwa shanga shi na sha naKalunga a ti: “Oha twamifa ava ve nomutima wa tekauka, ndele ta mange oipute yavo tai yehama.” (Eps. 147:3) Oshoshili kutya Jehova oha file oshisho ovo ve na omaupyakadi kutya nee opalutu ile opamaliudo. Kunena, Jehova okwa halelela oku tu hekeleka nokuvelula oipute yetu yopamaliudo. (Eps. 34:18; Jes. 57:15) Ohe tu pe ounongo neenghono tu dule okuungaunga noupyakadi keshe twa taalela. — Jak. 1:5.

6. Ongahelipi hatu dulu okumona ouwa mEpsalme 147:4 omo omupsalme a li a fa a lundulula oshikundafanwa? (Tala efano pehovelo loshitukulwa.)

⁶ Omupsalme okwa li ta yandje elitulemo koinima yopombada, nokwa popya kutya Jehova oha “pangelele eenyofi omuvalu apa u fike, ndele te di tu adishe komadina.” (Eps. 147:4) Omolwashike oshikundafanwa tashi monika sha fa sha lundululilwa komalutu omeulu? Diladila kwaashi: Omupsalme okwa li ha mono eenyofi nomesho aye okomutwe, ashike ka li e shii kutya odi li ngapi lela. Oule womido, omuvalu weenyofi odo hatu mono ohau hapupala neenghono. Vamwe ohava diladila kutya momuhalavili wetu, oo hau ifanwa Milky way omu na eenyofi omabiliyona. Otashi dulika natango mewangadjo mu na omihalavili omamiliyona omayovi. Oshoshili kutya fye ka tu shii omuvalu weenyofi. Ashike Omushiti adishe okwe di luka omadina. Osho osha hala kutya kuJehova onyofi keshe oye likalekelwa. (1 Kor. 15:41) Ongahelipi shi na sha novanhu vaye ovo a shitila kombada yedu? Kalunga oo e shii apa pu na onyofi keshe efimbo keshe, oku shii yo keshe umwe pauhandimwe apa u li, eshi u udite, noku shii yo kondadalunde osho wa hala efimbo keshe.

7, 8. (a) Ngeenge Jehova ta xupifa oshiwana shaye momayeleko, oshike ha tale kusho? (b) Yelifa nghee Jehova omunalukeno ha kwafele ovanhu inava wanenena.

⁷ Jehova ke na ashike ohokwe mwoove u li omunhu ndele oku na yo eenghono nolukeno olo la pumbiwa opo e ku kwafele momaupyakadi onghalamwenyo. (Lesha Epsalme 147:5.) Otashi dulika u kale u udite kutya onghalo yoye oidjuu neenghono noi li omutengi udjuu okuhumbata. Kalunga oku shii omangabeko oye, nota ‘dimbulukwa nokutya ove ondwi yedu.’ (Eps. 103:14) Okukala inatu wanenena ohaku tu ningifa omapuko a faafana oikando noikando. Ihatu lipe tuu oushima omolwoinima oyo hatu popi inai yuka, omahalo opambelela oo hae uya po ile omahalo okukala twa twila vamwe olwisho!  Jehova iha ningi nande omapuko a tya ngaho, ashike, oku shii nawanawa okudula kwetu. — Jes. 40:28.

⁸ Otashi dulika u na nale oshimoniwa sha nghee eke laJehova enaenghono le ku kwafela u finde omayeleko amwe oo wa shakeneka. (Jes. 41:10, 13) Pashihopaenenwa, diladila kuKyoko, omumwameme omukokolindjila oo a li a teka omukumo konima eshi a mona oshinakuwanifwa shipe. Ongahelipi Jehova a ulika kutya oku shii omaupyakadi aye? Monghalo yaye ipe, Kyoko okwe lihanga a dingililwa koohandimwe ovo va li ve udite ko omaliudo aye. Okwa li e udite Jehova a fa te mu lombwele ta ti: “Ondi ku hole, hasheshi ashike u li omukokolindjila, ndele omolwaashi ove omonakadona wange nowe liyapulila nge. Onda hala u hafele onghalamwenyo yoye u li umwe womEendombwedi dange.” Monghalo yoye, ongahelipi Omunaenghono adishe a ulika kutya “omayele aye kae na oshiyelekifo?”

9, 10. Oshike hashi uya tete ngeenge Jehova te tu pe ekwafo? Shi yelifa.

⁹ Omafimbo amwe oipumbiwa yoye otashi dulika i kale yopalutu. Pashihopaenenwa, otashi dulika u kale wa limbililwa kutya ito ka kala u na oikulya ya wana. Ashike, Jehova oye a shita oimeno oyo hai twiyukifa eendja, nokuli noyomakolwena oo ohae mu kwenene. (Lesha Epsalme 147:8, 9.) Ngeenge ota twikile okupa omakola eendja, naave oto dulu okukala nelineekelo kutya Jehova ote ke ku pa oipumbiwa yoye. — Eps. 37:25.

¹⁰ Osho sha fimanenena oshosho kutya Jehova ohe tu pe eendja dopamhepo odo hadi tu pe ‘ombili yaKalunga ei i dule eendunge adishe.’ (Fil. 4:6, 7) Pashihopaenenwa, diladila kuMutsuo nokomukulukadi waye ovo va mona eenghono daJehova dinenenene konima yoshikungulu osho sha li muJapan mo 2011. Ova li va ya onhapo oshikungulu osho mokulonda kombada yeumbo lavo. Ashike, efiku olo ova kanifa hanga oinima yavo aishe. Ova kala momilaulu, monduda ya talala oyo i li pombada meumbo lavo olo la dengwa koshikungulu. Efimbo longula, ova li tava kongo etwomukumo lopamhepo. Ndele ova li ashike va mona 2006 Yearbook of Jehovah’s Witnesses (embo lokomudo lEendombwedi daJehova). Diva, Mutsuo okwa li a mona oshipalanyole “Oshikungulu osho sha nyika oshiponga inashi monika nande onale.” Mo 2004, muSamatra omwa li mwa dengwa kekakamo ledu olo la li la etifwa koshikungulu osho sha li sha hanauna neenghono inashi monika nale mondjokonona. Mutsuo nomukulukadi waye ova li tava lili eshi tava lesha oshimoniwa osho. Ova li ve udite ekwafo laJehova olo li li efiloshisho lopahole mokupewa etwomukumo lopamhepo la wapala pefimbo olo va li ve li pumbwa. Jehova okwa li yo te va file oshisho palutu. Ova li va mona oikwafa okupitila movamwaxe vopamhepo. Ashike osho sha li she va pameka unene etalelepo leongalo olo la li la ningwa kovakalelipo vehangano laJehova. Mutsuo okwa ti: “Onda li ndi udite kutya Jehova oku li pukeshe umwe womufye nohe tu file oshisho. Itashi hekeleke tuu!” Tete Kalunga ohe tu pe eendja dopamhepo, opo nee te tu pe oipumbiwa yetu yopalutu.

11. Ovo va hala okumona ouwa meenghono daJehova dokuxupifa ova teelelwa va ninge shike?

¹¹ Jehova okwe lilongekida alushe okuya mo olunyala ‘nokukaleka ovakwanaluhepo ofika.’ (Eps. 147:6a) Ndele ongahelipi hatu dulu okumona ouwa mehalo laye lokukatuka onghatu ponhele yetu? Otu na okukala tu na ekwatafano liwa naye. Opo tu kale tu li na, otwa pumbwa okukulika elininipiko. (Sef. 2:3) Ovalininipiki ohava teelele Kalunga oye a pukulule epuko  keshe nokuvelula ouyahame oo ve na. Jehova oha kala a hokwa ovanhu va tya ngaho.

12, 13. (a) Opo tu mone ouwa mekwafo laKalunga, otu na okuhenuka shike? (b) Jehova oha hokwa oolyelye?

¹² Shikwao vali, Kalunga okwa ‘undulila eembudi poshi.’ (Eps. 147:6b) Eendjovo odo oda kwata moiti neenghono. Opo tu mone ouwa mohole yaJehova i na oudiinini notu henuke ehandu laye, otu na okukala tu tonde osho e tonde. (Eps. 97:10) Pashihopaenenwa, otu na okukala tu tonde oluhaelo. Osho osha hala kutya otu na okukala kokule nakeshe shimwe osho tashi tu ningifa omapuko a tya ngaho, mwa kwatelwa omafano oipala. (Eps. 119:37; Mat. 5:28) Otashi dulika osho shi kale shidjuu okukondjifa, ashike okukala tu na omanangekonoupuna aJehova okwa fimana ku dulife onghendabala keshe hatu ningi.

¹³ Mekondjo olo, otwa pumbwa okuliameka kuJehova, ndele hakufye vene. Mbela ota ka kala ngoo a hafa ngeenge otwa kendabala okulixupifa fye vene ‘neenghono deenghambe,’ oko ovanhu hava ka konga ekwafo? Ahowe! Katu na okuliameka ‘keenghono domaulu omulumenhu,’ twa fa oko hatu mono exupifo ile tu wete kutya ngeno ovanhu vamwe ovo tava dulu oku tu etela exupifo. (Eps. 147:10) Ponhele yaasho, natu kale hatu popi naJehova, hatu mu indile e tu kwafele. Mepingafano novayandjimayele, ye iha loloka okupwilikina komailikano etu, nonande ohatu mu pula e tu kwafele lwoikando noikando. “Omwene oha hokwa ava, have mu tila, ovava hava tula elineekelo lavo mouwanghenda waye.” (Eps. 147:11) Ohatu dulu okukala nelineekelo kutya omolwohole yaye i na oudiinini, ota ka kala pamwe nafye note ke tu kwafela tu finde omahalo etu a puka.

14. Oshike sha li sha pameka omupsalme?

¹⁴ Jehova okwe tu pa ekanghameno lokukala twa tomhwa kutya ota ka kwafela oshiwana shaye ngeenge sha pumbwa ekwafo. Okudiladila kombinga yokutungululwa kwaJerusalem, omupsalme okwa imba shi na sha naJehova a ti: “Osheshi Ye okwa pameka oiidilifo yoivelo yoye, nounona vomwoove e va nangeka noupuna. Ombili ote i yandje meengaba doye.” (Eps. 147:13, 14) Kasha li tuu sha shilipaleka omupsalme a shiive kutya Kalunga ota ka pameka omivelo doshilando opo a amene ovalongeli vaye!

15-17. (a) Omafimbo amwe otashi dulika tu kale tu udite ngahelipi kombinga yomayeleko etu, ndele ongahelipi Jehova ha longifa Eendjovo daye di tu kwafele? (b) Yelifa nghee ‘ondaka yaKalunga hai tondoka oshidudu.’

¹⁵ Otashi dulika wa taalela omaupyakadi oo taa dulu oku ku ningifa u kale u na oshisho. Jehova ota dulu oku ku pa ounongo u ungaunge nonghalo oyo. Omupsalme okwa popya shi na sha naJehova a ti kutya “ondaka yaye ote i tumine kedu: oshipango shaye otashi tondoka oshidudu shinene.” Onghee hano, omupsalme okwa pula ta ulike kuJehova kutya ‘ota yaumuna oshihemime, omundele otau tokaulwa, nota kupula eemhawe pedu,’ a ti: “Olyelye te lididimikile meandu laye?” Okwa ti vali Jehova “ota tumu ondjovo yaye, ndele oyo tai hekulula.” (Eps. 147:15-18) Kalunga ketu Omunaendunge nomunaenghono adishe, oo ta pangele eemhawe noshihemime, ota dulu oku ku kwafela u finde omaupyakadi keshe to shakeneke.

¹⁶ Kunena, Jehova ohe tu wilike nEendjovo daye, Ombiibeli. ‘Nondaka yaye otai tondoka oshidudu’ mokukala a hala oku tu pa omalombwelo opamhepo ngeenge twe a pumbwa. Diladila nghee ho mono ouwa mokulesha Ombiibeli, mokukonakona oishangomwa ‘yomupiya omudiinini nomunaendunge,’ mokutala o-tv yehangano, mokuya ko-jw.org, mokupopya novakulunhuongalo nomokweendafana nOvakriste vakweni. (Mat. 24:45) Mbela ku wete kutya Jehova ota endelele oku ku pa ewiliko?

¹⁷ Simone okwa mona eenghono dEendjovo daKalunga. Okwa li e lifya ounye, mokukala te  li pe oushima kutya ye omunhu oo ina hokiwa kuKalunga. Ashike pefimbo olo a li a teka omukumo, okwa kala ha ilikana ta kongo ekwafo kuJehova. Okwa kala yo e lipyakidila nekonakonombiibeli laye lopaumwene. Okwa ti: “Inandi kala nande onale monghalo omo nda li ndi wete Jehova ita pameke nge nokuwilika nge.” Osho osha li she mu kwafela a kale e na etaleko la yuka.

18. Omolwashike u udite wa hokiwa kuKalunga, nomatomheno elipi u na okwiingida “Hambeleleni Omwene!”?

¹⁸ Omupsalme okwa li e shii nghee oshiwana shonale sha li sha hokiwa kuKalunga. Osho ashike sha li oshiwana sha pewa ‘eendjovo neemhango nomapangelo aye.’ (Lesha Epsalme 147:19, 20.) Kunena, otwa nangekwa noupuna okukala ofye atuke hatu ifanwa nedina laKalunga kombada yedu. Okukala tu shii Jehova nokutula moilonga Eendjovo daye monghalamwenyo yetu, ohatu ka hafela oufembanghenda wokukala nekwatafano naye. Ngaashi omushangi wEpsalme 147, mbela ku na omatomheno mahapu okwiingida “Hambeleleni Omwene!” nokuladipika vamwe navo va ninge sha faafana?