XE YAJOHN okwa ninginifwa e li Ondombwedi yaJehova mo 1950 nasha, mokadoolopa kanini ke li moGujarat, sha-India. Ashike John nosho yo ovamwainamati novamwainakadona vatano naina ova kala ovadiinini muKatolika kaRoma nova li hava pataneke eitavelo laxe.

Efiku limwe John okwa li a tumwa kuxe a twale onhumwafo kuumwe womeongalo. Ashike ongula oyo, John okwa li e liteta nai komunwe waye eshi a li ta patulula ondoloma. Molwaashi okwa li a hala okudulika kuxe, okwa li a manga omunwe waye noshilapi, oo wa li tau di ohonde, ndele ta twala onhumwafo.

Eshi John a fika peumbo olo, okwa hanga mo ashike omukulukadi oo a tambula ko onhumwafo, oo naye a li Ondombwedi yaJehova. Eshi a tambula ko onhumwafo, okwa li a mona kutya John okwe limonifa oshiponga komunwe ndele te mu kwafele. Okwa li a kufa okandjato kaye kekwafo lopaulumomhumbwe (first-aid kit), ta wapaleke oshipute nospilatus ndele omunwe te u mange nelapi. Lwanima okwe mu ningila otee, ofimbo a li ta kundafana naye nombili kombinga yOmbiibeli.

Pomhito oyo, John ka li vali e na okatongo ke na sha nEendombwedi. Onghee okwa li e mu pula oinima ivali omo eitavelo laxe la li la yooloka ko kulaye, kutya Jesus oye ngoo Kalunga nosho yo ngeenge Ovakriste ove na ngoo okwiilikana kuMaria. Eshi Ondombwedi ya mona kutya John odalele yomoGujarati, oya li ye mu nyamukula okudja mOmbiibeli ndele tai mu pe okambo “Ondaka Ei Iwa yOuhamba.”

Konima eshi John a lesha okambo oko, okwa li e udite a fa opo ta udu oshili yOmbiibeli oshikando shotete. Okwa li a ya komupristeli waye ndele te mu pula omapulo a faafana. Omupristeli okwa li a handuka diva ndele ta kupula John Ombiibeli, te mu ula ta ti: “Ove owa ninga Satana. Ulikile nge kutya openi Ombiibeli ya ti kutya Jesus haye Kalunga. Ulikile nge kutya openi ya ti kutya ino ilikana kuMaria. Ulikile nge shili!” John okwa li a kuminwa onghedi omo omupristeli a li e linyenga ndele te mu lombwele kutya, “Ita ndi lyata mo tuu vali omhadi mongeleka yaKatolika.” Ndele osho a li a ninga shili.

John okwa li a hovela okukonakona nEendombwedi, okwa kala e netaleko liwa nelongelokalunga lashili nokwa hovela okulongela Jehova. Mokweendelako kwefimbo, oilyo imwe yomoukwaneumbo nayo oya ninga sha faafana. Fiyo okunena John oku na oshivadi komunwe omutine wokeke lokolulyo oko a li e liteta omido 60 lwaapo da pita. Oha dimbuluka alushe onghedi imwe omo Omukriste umwe a li e mu ulikila olune oyo ye mu ehenifa popepi nelongelokalunga la koshoka. — 2 Kor. 6:4, 6.