PEFIMBO lOmbiibeli, eshi ya li tai shangwa, ovapambele aveshe vopavali ngeenge ova dimine ovanhu va hombole, ovapambele vokakadona ova li hava futwa oyoonda. Oyoonda oyo oya li hai dulu okukala oinima yondilo, oimuna, ile oimaliwa. Omafimbo amwe, omunhu okwa li ha dulu okulonga oshilonga shonhumba, ngaashi Jakob, oo a li a udafana a longele xe yaRakel oule womido heyali, opo a dule oku mu hombola po. (Gen. 29:17, 18, 20) Mbela elalakano ola li lashike lokufuta oyoonda?

Omuhongwanhu umwe wOmbiibeli, Carol Meyers, okwa ti: “Oyoonda oyo hai futwa ovapambele vomufuko oya li hai ulike kutya okakadona itaka ka dula vali okulonga oilonga oyo ka li haka longo moukwaneumbo wavo, unene tuu momaukwaneumbo oo a li haa longo oilonga yomomapya.” Oyoonda oya li yo hai pameke ekwatafano olo paife li li pokati komapata oo opavali. Oya li yo hai tula kumwe ovapambele ovo vopavali kutya otava ka kwafelafana pefimbo lomaudjuu. Shikwao vali, oyoonda oya li hai ulike kutya omukainhu oo okwa dja mo mefiloshisho laxe, nota ka filwa oshisho nokwaamenwa komushamane waye.

Oyoonda oyo hai futwa omufuko itashi ti kutya ngeno omukulukadi oku li oshinima osho hashi landwa, ile hashi dulu okulandifwa po. Embo Ancient Israel—Its Life and Institutions ola ti: “Oyoonda oyo hai futwa omukainhu, ile shimwe shi fike pwaasho osha ningifa ovanhu vamwe va tale ko eehombo dOvaisrael da fa da li hadi landwa. Ashike oyoonda ya tya ngaho, okuyandja sha ashike kovapambele vomukainhu, ndele kai fi ofuto oyo omukainhu a landwa nayo.”

Kunena, moilongo imwe, ovanhu ohava shikula onghedindjikilile yokupula oyoonda. Ngeenge ovadali Ovakriste tava pula oyoonda, ‘ovanhu aveshe nava shiive kutya ove na ondjele’ mokuhapula unene oyoonda ihapu. (Fil. 4:5; 1 Kor. 10:32, 33) Kungaho, otava ulike kutya kave fi “ovanalwisho voimaliwa.” (2 Tim. 3:2) Shikwao vali, ngeenge ovadali Ovakriste itava pula oyoonda ihapu neenghono, omushamane, oo ta hombola, itaka fininikwa a undulile komesho omafiku ohango yavo, opo a dule okufuta oyoonda oyo tai pulwa. Ile ngeenge oku li omukokolindjila wondjikilile ita ka kala e udite a fininikwa a efe po oilonga oyo, opo a dule oku ka konga oilonga yomboloto a fute oyoonda ihapu oyo tai pulwa.

Moitukulwa imwe, oyoonda oya tulwa po koveta. Monghalo ya tya ngaho, ovadali Ovakriste ove na okudulika keemhango odo. Omolwashike mbela? Omolwaashi Eendjovo daKalunga oda lombwela Ovakriste va “dulike kovapangeli” nokudulika keemhango odo itadi kondjifafana neemhango daKalunga. — Rom. 13:1; Oil. 5:29.