Oto dimbuluka?
Mbela owa lesha ngoo nawanawa Eeshungonangelo odo opo da piti? Ngeenge owe di lesha, kendabala okunyamukula omapulo aa taa landula apa:
Okulongifa Ombibeli onga oshiketi osha hala okutya shike, nOvakriste ove na okutala ko ngahelipi oshinima osho?
Ovanhu vamwe ohava pandje Ombibeli keshe opo va pandje, vo tava lesha ovelishe oyo tava fikile puyo tava diladila kutya otai ke va pa ewiliko olo va pumbwa. Ovakriste vashili ihava longifa Ombibeli meenghedi doumhulile. Ndele ponhele yaasho, ohava konakona Ombibeli opo va mone eshiivo lashili newiliko laKalunga. —12/15 epandja 3.
“Ounyuni” oo tau ka xula po oshike?
“Ounyuni” oo tau ka xula po ovanhu vomounyuni ovo onghedi yavo yokukalamwenyo ihe li metwokumwe nehalo laKalunga. (1 Joh. 2:17) Edu nosho yo ovanhu ovadiinini otava ka xupa. — 1/1, epandja 5-7.
Ongahelipi Abel ta popi natango nafye nande okwa fya? (Heb. 11:4)
Osho ote shi ningi okupitila meitavelo. Ohatu dulu okulihonga koshihopaenenwa shaye sheitavelo nokuhopaenena eitavelo laye. Oshihopaenenwa shaye otashi longo nokunena nohatu dulu oku shi landula. — 1/1, epandja 12.
Oinima ilipi oyo tuhe na okweefa i tu ehenife kokule naKalunga?
Imwe yomuyo ongaashi: oilonga yetu ile eifano, omalihafifo oo hatu hoolola, ekwatafano nomupambele oo a kondwa, okulongifa oikwaelektronika, okulipula shi na sha noukolele wetu, etaleko la puka li na sha noimaliwa nosho yo okukala twa lenga unene omataleko etu ile eendodo. — 1/15, epandja 12-21.
Oshike hatu li hongo moshihopaenenwa shaMoses shelininipiko?
Moses okwa kala e lineekela muKalunga ndele hamuye mwene, ponhele yokukwatwa kounhwa omolweenghonopangelo odo a li e na. Inatu efa nande eenghono, eenghonopangelo ile okudula kwetu kwopalutu ku tu ningife tu kwatwe kounhwa, ndele natu kale twe lineekela muJehova. (Omayel. 3:5, 6) — 3/1, epandja 5.
Oonakufya otava ka nyumuka va ka kale peni?
Ovanyumunwa 144 000 otava ka kala meulu. Ashike vahapu ovo tava ka nyumunwa otava ka kala kombada yedu, ve na etimaumbwile lokukala nomwenyo fiyo alushe. — 5/1, epandja 6.
Osha hala okutya shike eshi taku ti Ovaisrael kava li va ‘pita etanda komitima’? (Jer. 9:26)
Ova li ovanashibofa nova li va pumbwa okweefa po omadiladilo, omahalo ile omalinyengotomheno mai oo hae va ningifa va nyone oipango yaKalunga. (Jer. 5:23, 24) — 3/15, epandja 9-10.
Ongahelipi Noa nomukulukadi waye va dula okutekula ovana vavo mounyuni omo oukolokoshi wa li wa hapupula?
Noa nomukulukadi waye ova li va amena ovanamati vavo kenwefemo lii lovanhu ovo va li ve va dingilila. Kava li tava dulu okuholeka ovana vavo vaha mone oilonga aishe oyo tai longwa kovatongolume, ndele ova li ashike tava dulu oku va honga oshili ihokwifa kombinga yaJehova Kalunga, oo e tonde oukolokoshi keshe. Ovanamati vavo ova kula ve li ovalumenhu ovatilikalunga. — 5/1, epandja 11.
Oshitukulwa shehangano laJehova shokombada yedu osha kwatela mo shike?
Osha kwatela mo Olutuwiliki, eekomitiye doitaimbelewa, ovapashukili ovaendi, olutu lovakulunhuongalo, omaongalo nosho yo ovaudifi pauhandimwe. — 4/15, epandja 29.
‘Okutukauka pokati’ kwomhunda yeemono okwa hala okutya shike?
“Omhunda yeemono” oyo tai faneke ounamapangelo waJehova womeshito alishe, oya tukauka pokati meityo olo kutya Jehova okwa dika po epangelo limwe vali. Epangelo olo olo Ouhamba wopaMessias, na Jesus Kristus oye Ohamba yalo. (Sak. 14:4) — 2/15, epandja 19.
Mbela Ovaisrael ova li hava endjelelifa ovalongi vominyonena komuti?
Ahowe. Oiwana imwe yopefimbo lonale osho ya li hai ningi ngaho, ndele Ovaisrael hasho va li hava ningi. Ashike pefimbo lOmishangwa dOshiheberi, omunyoni okwa li e na tete okudipawa, nande onomamanya. (Lev. 20:2, 27) Opo nee, oshimhu shaye tashi endjelelekwa koshiti opo shi ninge elondwelo kuvamwe. — 5/15, epandja 13.
Omolwashike ombili ya pumba mounyuni?
Nonande ovanhu ova dula okupondola shihapu, itava dulu okuyukifa eenghatu davo. (Jer. 10:23) Satan oye ta pangele ounyuni, nomolwaasho ovanhu itava dulu okweetifa po ombili. (1 Joh. 5:19) — 7/1, epandja 16.
