EENGHUNDAFANA NOMUNEUMBO
Mbela Kalunga oku na ko ngoo nasha nafye eshi hatu mono oixuna?
Eenghundafana tadi landula otadi ulike kunghee Eendombwedi daJehova hadi kundafana navamwe. Natu tye nee ngeno Ondombwedi yedina Michelle otai kundafana nomuneumbo wedina Sophia.
OMOLWASHIKE A EFA ESHI SHI NINGWE?
Michelle: Nena ohandi kundafana okafo aka nakeshe umwe moshitukulwa omu, ke na oshipalanyole Mbela owa hala okushiiva oshili? Tambula koye.
Sophia: Otaka popi kombinga yelongelokalunga?
Michelle: Heeno. Tala komapulo ahamano oo eli kombada yokafo. Lilipi lomomapulo oo—
Sophia: Nandi ku kwate melaka. Ondi wete kutya oto mane po ashike efimbo loye eshi to popi naame.
Michelle: Omolwashike to tile ngaho?
Sophia: Oushili oyoo kutya, nghi shii naanaa ngeenge onda itavela muKalunga.
Michelle: Eewa, nandi ku pandule eshi wa lombwela nge oshili. Mbela alushe osho ho kala u udite ngaho?
Sophia: Ahowe, onda putuka handi i kongeleka. Ndele onda ninga efimbo lile inandi ya ko.
Michelle: Oo. Otwa ya ashike nado inandi ku lombwela edina lange. Aame Michelle.
Sophia: Ame lange oSophia.
Michelle: Onda hafa eshi twa shakena naave, Sophia.
Sophia: Naame onda hafa eshi twa shakena.
Michelle: Ame inandi uya ndi ku fininikile eitavelo lange, Sophia. Ndele onda hala ashike okuuda kutya mbela ope na oshinima shonhumba kondadalunde osho she ku limbililika kombinga yokukala po kwaKalunga?
Sophia: Heeno. Meme okwa li moshiponga shohauto omido 17 da ka lupuka.
Michelle: Ombili unene kwaasho. Okwa li a yahamekwa?
Sophia: Heeno, okwa lemanena mo.
Michelle: Oshi nyikifa oluhodi shili. Oshi na okukala she ku nyemateka.
Sophia: Heeno, osha nyemateka nge. Nomolwaasho nda limbililwa ngeenge Kalunga oko ngoo eli, omolwashike a efa osho shi ningwe? Omolwashike Kalunga a efa tu mone oixuna ngaho?
MBELA OSHA PUKA OKUPULA KUTYA OMOLWASHIKE KALUNGA A EFA OKUMONA OIXUNA KU KALE PO?
Michelle: Oshi li paushitwe okukala u udite ngaho nomapulo oye inaa puka nandenande. Ngeenge hatu mono oixuna, oshi li paushitwe okukala hatu lipula kutya omolwashike. Nokuli novalumenhu novakainhu ovadiinini vamwe vopefimbo lOmbibeli ova li have lipula kombinga yaasho.
Sophia: Oshoshili?
Michelle: Heeno. Mbela itashi ka kala shiwa ngeenge onde ku ulikile oshihopaenenwa okudja mOmbibeli?
Sophia: Oshili nawa.
Michelle: Didilika osho omuprofeti omudiinini Habakuk a li a pula Kalunga, tashi hangwa muHabakuk, etukulwa 1, ovelishe 2 no-3, tadi ti: “Akutu omwene, fiyo naini ame ndi nokwiingida ekwafo, ndelenee Ove ito udu ko? Handi ku ingida: Oukolokoshi! Ndelenee Ove ito kwafa? Oshike ove ho talifa nge osho inashi yuka?” Mbela omapulo oo inaa faafana naao wa li to pula?
Sophia: Okwa faafana.
Michelle: Kalunga ka li a hanyena Habakuk eshi a pula omapulo oo ile ngeno e mu lombwele ashike kutya okwa pumbwa eitavelo la kola.
Sophia: Osho oshihokwifa.
JEHOVA OKU TONDE OKUMONA OIXUNA
Michelle: Ombibeli otai hongo kutya Kalunga oku wete okumona oixuna kwetu nonokutya ohe tu file oshisho.
Sophia: Owa hala okutya ngahelipi?
Michelle: Handi ya ndi ku ulikile oshihopaenenwa shi li muExodus 3:7. Oto dulu okulesha ovelishe oyo?
Sophia: Heeno. Otai ti: “Nomwene ta ti: Ame onda mona okuhepekwa kuoshiwana shange, eshi shi li muEgipti. Naame nda uda ekemo lavo molwovafininiki, heeno, ndi wete oudjuu wavo.”
Michelle: Tangi. Okutala komushangwa oo, mbela Kalunga oku wete eshi oshiwana shaye tashi mono oixuna?
Sophia: Heeno, okwa fa ngoo e shi wete.
Michelle: Nokuli iha kala ashike e wete osho tashi ningwa, tala vali oshitukulwa shaxuuninwa shovelishe oyo. Kalunga okwa ti: ‘Ndi wete oudjuu wavo,’ ile tu tye, ondi shii oudjuu wavo. Mbela Eendjovo odo otadi ulike kutya kalunga ke na ko nasha nomukwanyanya?
Sophia: Ahowe, hasho nandenande.
Michelle: Kalunga iha kala ashike e wete omaupyakadi etu, ndele oha kala yo e udite nai ngeenge tu li moupyakadi.
Sophia: Oshoshili.
Michelle: Tu na oushili oo momadiladilo, natu tale vali koshihopaenenwa shimwe shi na sha noshiwana shaKalunga eshi sha li tashi mono oixuna. Otashi hangwa muJesaja 63:9. Oshitukulwa shotete shovelishe oyo osha ti: ‘Momaluhepo avo aeshe okwe va nyikila oluhodi.’ Mbela kasha li sha kuma Kalunga eshi oshiwana shaye sha li tashi mono oixuna?
Sophia: Osha li she mu kuma.
Michelle: Sophia, oushili oyou kutya, Kalunga ohe tu file oshisho lelalela noku tonde okutala okumona oixuna kwetu. Ngeenge hatu yahama, naye oha kala ta yahama pamwe nafye.
OMOLWASHIKE ITA NINGI PO SHA PAIFE?
Michelle: Onda hala tu kundafane vali ediladilo limwe manga inandi ya.
Sophia: Oshili nawa.
Michelle: Tala osho Ombibeli tai tu lombwele kombinga yeenghono daKalunga. Omushangwa oo oJeremia 10:12. Oto dulu okukwafela nge u leshe po?
Sophia: Heeno. Otau ti: “Oye tuu ou a shita edu neenghono daye mwene, nounyuni e u pameka nounongo waye. Neulu okwe li valela komayele aye.”
Michelle: Tangi. Natu diladile oule wokafimbo kovelishe oyo. Mbela Kalunga okwa li a pumbwa eenghono dihapu opo a shite eshito linenenene nakeshe shimwe shi li mo?
Sophia: Heeno, osho lela.
Michelle: Ngeenge Kalunga oku na eenghono dokushita keshe shimwe she tu dingilila, mbela osho itashi ulike kutya oku na eenghono inadi ngabekwa mwa kwatelwa odo dokuxulifa po okumona oixuna?
Sophia: Otashi ulike kutya oku di na.
Michelle: Diladila vali kombinga yameme woye. Omolwashike hashi ku nyemateke okukala u wete ta mono oixuna?
Sophia: Omolwaashi ondi mu hole nosho yo kutya oye meme wange.
Michelle: Ngeno okwa li u na eenghono doku mu velula nena, ngeno ito shi ningi?
Sophia: Ngeno osho handi ningi.
Michelle: Diladila kutya osho osha hala okutya ngahelipi. Ombibeli otai hongo kutya Kalunga oku wete okumona oixuna kwetu, oku tu uditile onghenda noku na eenghono dinenenene. Diladila ashike kutya otashi pula Kalunga elipangelo li fike peni opo aha katuke onghatu diva nokuxulifa po okumona oixuna kwetu?
Sophia: Inandi shi diladila nande onale monghedi oyo.
Michelle: Mbela ke na otomheno liwa eshi ina xulifa po natango omaupyakadi etu? a
Sophia: Hmm, ondi wete kutya oku na etomheno liwa.
Michelle: Ondi udite otelefona yoye tai kwena, ohandi aluka vali moshikando tashi uya tu uye tu kundafane moule kombinga yaasho.
Sophia: Tangi unene. Ohandi ke shi hafela. b
Mbela ou na oshikundafanwa shonhumba shopaMbibeli osho ho lipula nasho? Mbela oho kala wa limbililwa shi na sha neitavelo ile oilonga yopalongelokalunga yEendombwedi daJehova? Ngeenge osho, ino ongaonga okupula umwe womEendombwedi daJehova. Ota ka kala a hafa okukundafana oshinima osho naave.
a Opo u mone ouyelele muhapu, tala etukulwa 11 lembo Ombibeli otai hongo lela shike?, la nyanyangidwa kEendombwedi daJehova.
b Oshitukulwa shomonakwiiwa shomoitukulwa ei ya pambafana otashi ka kundafana kutya omolwashike Kalunga a efa okumona oixuna ku kale po.
