Opaasa oya yelifwa mo-Encyclopædia Britannica kutya oi li “oshivilo sha fimanenena keengeleka dOukwakriste odo hadi dana enyumuko laJesus Kristus.” Ndele mbela Ovakriste vashili ove na ngoo oku li dana?

Opo omunhu a mone oushili woshinima shonhumba oku na oku shi konakona moule. Sha faafana, nafye opo tu mone kutya Ovakriste ove na okudana Opaasa ile hasho, osha fimanenena tu konakone moule shi na sha noudilo wOpaasa.

Shididilikwedi, Jesus okwa li a lombwela ovashikuli vaye va dimbuluke efyo laye ndele hanyumuko laye. Omuyapostoli Paulus okwa ifana oshiningwanima osho ouvalelo wOmwene ile “oshililo shOmwene.” — 1 Ovakorinto 11:20; Lukas 22:19, 20.

Shikwao vali, o-Britannica oya ti kutya eenghedindjikilile dihapu dOpaasa “inadi pamba nandenande” enyumuko laJesus, “ndele oda dja meenghedindjikilile dovanhu.” Pashihopaenenwa, shi na sha nomadidiliko Opaasa oo haa longifwa kuvahapu, ngaashi ei nosho yo ndiba, o-Encyclopedia of Religion oya ti: “Ei inali tendulwa otali faneke efyo nongeenge la tendulwa otali faneke omwenyo mupe oo wa dja mefyo.” Oya weda ko ya ti: “Ndiba okwa talika ko e li oshinamwenyo osho hashi dala unene (shi na okakwiyu), nomolwaasho ota faneke okuuya kokwenye,” efimbo olo oimeno hai twiyuka.

Philippe Walter, omushangi kapyoko wondjokonona yonalenale okwa yelifa nghee eenghedindjikilile odo da ninga oshitukulwa shedano lOpaasa. Okwa ti kutya “pefimbo olo eshi omaitavelo oshipaani a tambulwa ko kOvakriste,” osha li shipu okukwatakanifa oshivilo shoshipaani shokuhambelela “eshi okufu taku pu ko ko okwenye taku hovele” nenyumuko laJesus. Walter okwa weda ko kutya osha li onghatu inene yokuweda mokalindeli kovapaani omadano opaKriste opo shi kale shipu oku va ninga Ovakriste.

Onghatu oyo yokuninga ovapaani Ovakriste kaya li ya katukwa pefimbo opo ovayapostoli va li natango momwenyo molwaashi ova li va ‘imba,’ ile tu tye, va ya moshipala oupaani. (2 Ovatessaloniki 2:7) Omuyapostoli Paulus okwa li a popya kutya konima ngeenge okwa ‘di po’ otapa ka holoka ovalumenhu “tava popi oinima inai yuka, ve lishilile ovalongwa.” (Oilonga 20:29, 30) Ndele lwanima mefelemudo lotete, omuyapostoli Johannes okwa shanga kutya ovalumenhu vamwe ova li nale va hovela okupukifa Ovakriste. (1 Johannes 2:18, 26) Okudja opo Ovakriste ova li va tambula ko eenghedindjikilile doshipaani.

Ndele otashi dulika vamwe va kale ve udite kutya kasha li sha puka okutambula ko eenghedindjikilile dimwe dOpaasa, molwaashi osha li tashi kwafele ovapaani va ude ko nawa eityo lenyumuko laJesus. Ashike ngeno Paulus oko a li ngeno ina tambula ko oshinima sha tya ngaho. Nonande okwa li a dingililwa keenghedindjikilile doshipaani dihapu fimbo a li momalweendo mouhamba waRoma, ka li a tambula ko nande oimwe yomudo opo ngeno a dule okukwafela ovanhu va ude ko nawa kombinga yaJesus. Mepingafano naasho, okwa li a londwela Ovakriste a ti: “Inamu humbata ondjoko imwe pamwe naava ve he neitavelo; osheshi ouyuki ou noukumwe washike nouhenouyuki? Ile ouyelele ou nekwatafano lashike nomulaulu? Onghee: Djeni mo mokati kavo nye mu liyoolole mo muvo, Omwene osho ota ti, nye inamu kuma eshi sha nyata; opo Ame ohandi mu tambula.” — 2 Ovakorinto 6:14, 17.