Ovanhu ovo ve li mefano ou va shii?— Ovo Mateus, Markus, Lukas, Johannes, Petrus, Jakob, Judas naPaulus. Aveshe ova li ko pefimbo eshi Jesus a li kombada yedu nova shanga kombinga yaye. Natu ke lihonge shihapu kombinga yavo.

Vatatu vomuvo ova li ovayapostoli, ovo va li hava udifa pamwe naJesus. Ovayapostoli ovo ou shii kutya ovelipi po?— OMateus, Johannes naPetrus. Omuyapostoli Mateus nosho yo Johannes ova li ve shii Jesus nawanawa, nakeshe  umwe womuvo okwa shanga embo li na sha nonghalamwenyo yaJesus. Omuyapostoli Johannes okwa shanga yo embo lEhololo nosho yo eenhumwafo nhatu odo hadi ifanwa Johannes Wotete, Johannes Omutivali nosho yo Johannes Omutitatu. Omuyapostoli Petrus okwa shanga eenhumwafo mbali odo di li oshitukulwa shOmbibeli. Ohadi ifanwa Petrus Wotete nosho yo Petrus Omutivali. Petrus okwa shanga monhumwafo yaye onhivali shi na sha nefimbo opo Jehova a li a lombwela Jesus a ti: ‘Ou omona wange, ondi mu hole nondi udite etumba omolwaye.’

Vamwe ovo ve li mefano navo ova shanga omambo oo taa dulu oku tu honga kombinga yaJesus. Umwe womuvo oMarkus. Otashi dulika Markus opo a li eshi Jesus a li a kwatwa po, nokwa mona ashishe osho sha ningwa po. Umwe vali oLukas. Lukas okwa li ondokotola notashi dulika a li a ninga Omukriste konima eshi Jesus a fya.

Ovashangi vakwao vOmbibeli vavali ovo ve li mefano ova li eendenge daJesus. Mbela ou shii omadina avo?— Ovo Jakob naJudas. Potete kava li va itavela muJesus. Ova li nokuli tava diladila kutya Jesus omupwidi. Ndele konima yefimbo, ova ka itavela muJesus nova ninga Ovakriste.

Omushangi wOmbibeli oo waxuuninwa mefano oPaulus. Fimbo ina ninga Omukriste, okwa li ha ifanwa Saulus. Okwa li e tonde Ovakriste nokwa li he va hepeke nonyanya. Mbela ou shii kutya osha enda ngahelipi opo Paulus a ninge Omukriste?— Efiku limwe, Paulus okwa li a ya molweendo. Ohaluka, okwa uda ondaka tai di meulu. Ondaka oyo oya li yaJesus. Jesus okwa pula Paulus a ti: ‘Omolwashike to hepeke ovashikuli vange?’ Okudja opo, Paulus okwa lunduluka ndele ta ningi Omukriste. Okwa shanga omambo Ombibeli 14, Ovaroma fiyo Ovaheberi.

Ohatu lesha Ombibeli efiku keshe, hasho mbela?— Ngeenge otwa kala hatu lesha Ombibeli, ohatu kelihonga shihapu kombinga yaJesus. Mbela ino hala okulihonga shihapu kombinga yaJesus?—