Omolweenghendabala dokuudifila “evangeli” ovanhu ‘vomomapata nomalaka aeshe novomoiwana aishe,’ ohatu nyanyangida oileshomwa momalaka e dule po 700. (Ehololo 14:6) Ohatu shi ende ngahelipi opo tu wanife po oilonga oyo tai pula eenghendabala da mana mo? Otu na ovashangi ve li moilongo i lili noku lili nosho yo ovatokoli 3 300 lwaapo. Aveshe ovo hava longo oilonga oyo ove li Eendombwedi daJehova.

Oileshomwa yetu ohai shangwa tete mOshiingilisha. Olutuwiliki ohali pashukile oilonga yOshikondo shOkushanga osho shi li kombelewa yetu ya kula. Oshikondo osho osho hashi unganeke ovashangi ovo ve li kombelewa ya kula nosho yo ovo ve li koitaimbelewa imwe. Molwaashi ovashangi vetu ova dja moilongo i lili noku lili nomomaputuko a yoolokafana, ohashi kwafele ehangano letu li shange oikundafanwa oyo ya kuma omaputuko e lili noku lili notai hokwifa ovanhu vomoiwana aishe.

Oitukulwa yOshiingilisha ohai tuminwa ovatoloki. Konima ngeenge oitukulwa yonhumba ya pu okushangwa noya popilwa kOlutuwiliki, ohai tuminwa ovatoloki mounyuni aushe paelektronika, ovo have i toloka noku i tyeka nosho yo oku i leshulula. Ovatoloki ohava kendabala okuhoolola ‘eendjovo doshili, da shangwa da yuka,’ odo tadi yandje ediladilo lOshiingilisha le lixwapo. — Omuudifi 12:10.

Eekompiuta ohadi endelelifa oilonga. Eekompiuta ihadi longo po oilonga yovashangi ile yovatoloki. Ashike ohadi va kwafele va longe oilonga yavo neendelelo molwaashi otava dulu okulongifa omamboitya nokukonga noupu omauyelele e lili noku lili oo a tuvikilwa paelektronika meekompiuta. Eendombwedi daJehova oda nduluka po omukalo wopaelektronika wokunyanyangida oileshomwa i na omafano e na omaluvala hau ifanwa Multilanguage Electronic Publishing System (MEPS), oo hau dulifa ehangano letu li nyanyangide oshita oileshomwa momalaka e lili noku lili.

Omolwashike ehangano letu hali ningi eenghendabala adishe odo, nokuli nonande omalaka amwe ohaa popiwa ashike kovanhu omayovi manini? Omolwaashi Jehova okwa hala “ovanhu aveshe va xupifwe nova fike meshiivo loshili.” — 1 Timoteus 2:3, 4.

• Oishangomwa yetu ohai shangwa ngahelipi?

• Omolwashike hatu toloka oishangomwa momalaka mahapu?