Saulus okwa li omukalimo womuRoma, a dalelwa muTarsus. Okwa li Omufarisai e shii Omhango yOshijuda, nokwa li e tonde Ovakriste. Okwa li ha kokolola Ovakriste momaumbo avo ndele te va tulifa modolongo. Okwa li nokuli ta tale eshi ongudu ya handuka tai dipaa Stefanus nomamanya.

Ashike Saulus kali ashike a hala okukwata po Ovakriste muJerusalem amuke. Okwa li a pula omupristeri omukulunhu e mu pe epitikilo a ye kuDamaskus opo a ka konge Ovakriste. Fimbo Saulus a li popepi naDamaskus, okwa li a dingililwa kouyelele wa twa, ndele ta wile pedu. Okwa li a uda ondaka tai ti: ‘Saulus, omolwashike to hepeke nge?’ Saulus okwa pula a ti: ‘Oove lyelye?’ Omunhu okwe mu nyamukula a ti: ‘Aame Jesus. Inda kuDamaskus opo u ka ude osho u na okuninga.’ Diva, Saulus okwa ninga omupofi, nokwa li a twalwa moshilando e kwetwe komhango.

MuDamaskus omwa li Omukriste omudiinini wedina Ananias. Jesus okwe mu lombwela memoniko a ti: ‘Inda keumbo laJudas, kondjila ei hai ifanwa ya yuka, u ka konge Saulus.’ Ananias okwa ti: ‘Omwene, ondi shii ashishe kombinga yomulumenhu oo. Ota tulifa ovahongwa voye modolongo.’ Ashike Jesus okwa ti: ‘Inda kuye. Onda hoolola Saulus a udifile oiwana ihapu onghundana iwa.’

Onghee hano, Ananias okwa li a ka konga Saulus noku mu lombwela ta ti: ‘Omumwatate Saulus, Jesus okwa tuma nge ndi uye ndi ku twikulule.’ Diva, Saulus okwa li e wete ko vali. Okwa li e lihonga kombinga yaJesus ndele ta ningi omushikuli waye. Eshi Saulus a ninga Omukriste a ninginifwa, okwa li a hovela okuudifa moinagoga pamwe nOvakriste vakwao. Ovajuda kava li tuu va kumwa eshi va mona Saulus ta hongo ovanhu kombinga yaJesus! Ova ti: ‘Omulumenhu ou oye ngoo ou a li ha kongo ovahongwa vaJesus?’

Saulus okwa kala ta udifile ovanhu muDamaskus oule womido nhatu.  Ovajuda ova li ve tonde Saulus nova li va tokola oku mu dipaa. Ashike ovamwaxe ova li va uda kombinga yoshinima osho ndele tave mu kwafele a ye onhapo. Ova li ve mu tula moshimbaba ndele tave mu kulukifile pedu okupitila mombululu yekuma loshilando.

Eshi Saulus a ya kuJerusalem, okwa li a kendabala okuya kovamwaxe. Ashike ova li ve mu tila. Opo nee omuhongwa wedina Barnabas okwa li a twala Saulus kovayapostoli ndele te va yelifile kutya Saulus okwa lunduluka shili. Saulus okwa li a hovela okuudifa onghundana iwa nouladi pamwe neongalo muJerusalem. Lwanima, okwa ka shiivika nedina Paulus.