Omwedi keshe, ohatu kala twa teelela nodjuulufi eeprograma nouvidio ovo hava pitifwa ko-JW Broadcasting. Ashike ovamwatate vahapu moAfrica ihava dulu okutapa eeprograma odo kointaneta. Omolwashike mbela?

 Eenhele dihapu moAfrica kadi na ointaneta. Nopeenhele opo pe na ointaneta, luhapu ohai kala i na ondilo, ile hai ende kashona. Pashihopaenenwa, omupashukilishikandjo umwe wokoMadagascar okwa li a tapa o-JW Broadcasting yokomwedi pokafitola konhumba opo hapa monika ointaneta. Okwa futa eedola daNamibia 234.56 ofuto oyo i dule nokuli noyuuyemo yavahapu koshivike.

 Nonande ope na eenghalo odo didjuu, paife ovamwatate omamiliyona moAfrica otava dulu okutala o-JW Broadcasting nopehe na okulongifa ointaneta. Ngahelipi mbela?

 Okudja mo 2017, opa ningwa omalongekido opo ovo ve li koitukulwa yo sub-Sahara moAfrica va dule okutala oprograma okudilila kosatelite. Otava dulu oku i tala efiku keshe nopehe na okufuta sha noi li ko momalaka 16.

 Eendombwedi daJehova oda pula oshitaashi yo-tv i kale tai ulike eeprograma dayo okudilila kosatelite. Osatelite ohai longifwa opo va dule okuulika eeprograma moilongo 35 yomo sub-Sahara. Ohava futu eedola daNamibia 175 920 komwedi. Omafimbo amwe, ohava weda ko kofuto yavo opo va pewe oshitaashi ya wedwa po oko haku ulikwa oiningwanima yopefimbo. Kungaho, ovamwatate omayovi ohava hafele oyoongalele neeprograma de likalekelwa di na sha nomatalelepo okoitaimbelewa.

 Ovanhu vahapu, mwa kwatelwa naavo vehe fi Eendombwedi, ohava tale eeprograma odo kee-tv momaumbo avo. Ashike, ovamwatate vamwe kave na oikwanoipangifo opo va dule okutala eeprograma odo. Opo tu va kwafele, otwa tula oikwanoipangifo mOmalupale Ouhamba e dulife 3 670 opo ovamwatate novamwameme va dule okutala o-JW Broadcasting yokomwedi. Oikwanoipangifo oyo ohai kosho eedola daNamibia 1 026.20 lwaapo ngeenge mOlupale omu na nale o-tv, ile o-projector. Ngeenge kamu na sha, oikwanoipangifo aishe kumwe oto hange tai kosho eedola daNamibia 7 769.80.

 Ovamwatate novamwameme ova pandula omafiloshisho oo. Omukulunhuongalo umwe wokoCameroon okwa ti: “Oukwaneumbo wetu owa fa ashike wa pewa omana pefimbo loluteni.” Omumwatate wedina Odebode, wokoNigeria okwa ti: “Ohatu tale oprograma tu li oukwaneumbo lutatu moshivike. Ovana vange ohava kala va teelela nodjuulufi eemhito da tya ngaho. Luhapu ngeenge hatu tale o-tv, oto hange tava pula tu lundulule koshitaashi yo-JW.” Rose, omumwameme yo wokoNigeria okwa ti: “Onda hafela neenghono oshitaashi yo-JW, molwaashi oya pingena po eenghundana odo nda li ndi hole okutala. Onda li handi kala handi mbilingwa koinima oyo tai ulikwa keenghundana, nohandi lihange ndi na ohonde ya londa. Ashike ko-JW Broadcasting ohaku ulikwa ashike oinima oyo tai tungu notai hekeleke. Ondi i hole neenghono. Oi li enangekonoupuna la dja kuJehova.”

 Omupashukilishikandjo umwe wokoMozambique okwa popya kutya momaongalo omoshikandjo shaye omwa tulwa oikwanoipangifo opo ovamwatate va dule okutala eeprograma odo. Ovamwatate vomomaongalo oo ohava fiki pokwoongala komesho yefimbo, opo va dule okutala o-JW Broadcasting.

 Poshoongalele shopaiwana shomo 2019 osho sha li mo Johannesburg, shaSouth Africa, osatelite oya li ya longifwa opo ku tumwe oipopiwa, mwa kwatelwa naayo ya yandjwa koshilyo shOlutuwiliki, koilongo omuwoi ya yoolokafana. Sphumelele, oo ha longo koshikondo shoikwamawi nouvidio koshitaimbelewa shaSouth Africa okwa ti: “Nale otwa li hatu tumu oipopiwa okupitila kointaneta. Ashike osho ohashi pula ointaneta tai longo nawa nou na yo okulanda ee-data. Ashike osatelite ohai longo nawa noi shii okulineekelwa.”

 Omolwomayambidido eni ehalo liwa, paife ovamwatate novamwameme vahapu moAfrica otava dulu okutala o-JW Broadcasting okudilila kosatelite. Ohatu mu pandula neenghono omolwomayambidido eni ehalo liwa, oo hamu yandje okupitila meenghedi odo tadi hangwa ko donate.ps8318.com.