Oshikundaneki shimwe osha ti:“Okulunduluka kwonghalo yomhepo okwa etifa oiponga. Omutalelo wedu kau hokwifa vali.”

 Ovanhu otava mono oixuna omolwomaupyakadi oo have lietele vo vene. Ovanongononi ova popya kutya oinima oyo hai ningwa kovanhu ohai kumu onghalo yomhepo. Ngeenge onghalo yomhepo oya londo pombada ohashi eta oilanduliko ya kwata moiti. Osho osha kwatela mo oinima tai shikula:

•   Onghalo yomhepo ngeenge oya lunduluka ohai etifa oupyu wa londa pombada, oshikukuta nosho yo oihomo, oyo hai etifa efundja nepeya.

•   Ohai ningifa oikangwa yomeva i hengumuke.

•   Ohai ningifa omeva efuta a ye pombada.

 Okulunduluka kwonghalo yomhepo okwa kuma edu alishe. Konima eshi kwa popiwa shi na sha nonghalo yoilongo 193, o-New York Times oya popya ya ti: “Epulaneta oya pumbwa ekwafo.” Omolwefyo nosho yo okumona oixuna oko kwa etifwa kokulunduluka kwonghalo yomhepo, Ehangano lOukalinawa mOunyuni ola popya kutya “onghalo oyo oi li eshongo la kula koukolele wovanhu.”

 Ashike nande ongaho, otu na eteelelo li na sha nonakwiiwa. Ombiibeli oya xunganeka shi na sha noiningwanima oyo tu wete kunena, nanghee twa teelela Kalunga a ka katuke onghatu noku tu amena monakwiiwa.

 Heeno. Okulunduluka kwonghalo yomhepo otaku tu kumwe noiningwanima oyo ya xunganekwa kOmbiibeli, oyo tai ningwa pefimbo letu.

 Exunganeko: ‘Momafiku axuuninwa otapa ka kala omafimbo madjuu okukaliwa muo. Osheshi ovanhu otava ka kala ve lihole vo vene, ovanalwisho voimaliwa, vehe fi ovadiinini, vehe na elongelokumwe, ovakengeleledi nove na omitwe dikukutu.’ — 2 Timoteus 3:1-4.

 Ombiibeli oya xunganeka kutya oikala nelihumbato lovanhu otai ka etifa okulunduluka kwonghalo yomhepo. Omapangelo novanangeshefa ova pitifa komesho oimaliwa, ponhele yokulipula noshiwana shokomongula. Nonande ova kundafane opo va kalelele okulunduluka kwonghalo yomhepo, ihava fiki pediladilotwokumwe.

 Exunganeko olo inali popya kutya ovanhu otava ka lundulula oikala yavo nokwaamena edu. Ponhele yaasho, Ombiibeli oya ti ovanhu otava ka kala ve lihole vo vene, naasho otashi ke va ningifa va xume “komesho mokulonga owii.” — 2 Timoteus 3:13.

 Ombiibeli oya ulika kutya Jehova a Kalunga, Omushiti wetu, ota ka fila oshisho nawa opulaneta yetu nosho yo oishitwa yaye aishe oyo i li ko. Tala keevelishe nhatu dOmbiibeli, odo tadi ulike kutya Kalunga ota ka katuka onghatu.

1.  1. Kalunga “ine li shita [edu] li kale ombuwa, ndelenee okwe li ma li kalwe.” — Jesaja 45:18.

    Kalunga ota ka wanifa po elalakano laye li na sha nedu. (Jesaja 55:11) Ita ka efa li hanaunwe po, ile li kale ombuwa.

2.  2. “Ovananheni vo otava ka fyuulula edu, ndele tava ka hafela ombili inene. Ovayuki, vo otava ka fyuulula oshilongo, ndele tava kala mo alushe.” — Epsalme 37:11, 29.

    Kalunga okwa udaneka kutya ovanhu otava ka kala kombada yedu fiyo alushe ve na ombili.

3.  3. “Ovahenakalunga tava ka dudwa mo moshilongo.” — Omayeletumbulo 2:22.

    Kalunga okwa udaneka oku ka hanauna po ovakolokoshi, mwa kwatelwa naavo hava nyono edu.

 Kalunga ota ka wanifa po ngahelipi eudaneko laye li na sha nedu? Ote ke shi ninga okupitila mepangelo laye olo tali ka pangela ounyuni aushe, olo li li Ouhamba waKalunga. (Mateus 6:10) Ouhamba oo otau ka pangela okudja meulu. Itali ka kundafana nomapangelo opanhu shi na sha nanghee tau ka pangela edu. Ponhele yaasho, Ouhamba waKalunga otau ka pingena po omapangelo aeshe opanhu. — Daniel 2:44.

 Ouhamba waKalunga ou li onghundana iwa kovanhu aveshe nosho yo keshito lovene. (Epsalme 96:10-13) Diladila kwaasho Jehova Kalunga ta ka ninga okupitila mOuhamba waye.

•   Ota ka wapekulula edu

   Osho Ombiibeli tai ti: “Ombuwa nomalondo otaa ka hafa, nofuka tai ka nyakukwa pombada, otai liwapaleke ngaashi onhemo yedo.” — Jesaja 35:1.

   Osho onakwiiwa yetu tai ka kala: Jehova ota ka wapeka edu, mwa kwatelwa neenhele adishe odo da nyonwa neenghono kovanhu.

•   Ota ka pangela onghalo yomhepo keshe

   Osho Ombiibeli tai ti: “[Jehova] okwa lotifa oshikungulu, pa pepa okamhepo kawa, nomandudumo omakufikufi okwa mwena.” — Epsalme 107:29.

   Osho onakwiiwa yetu tai ka kala: Jehova oku na eenghono dokupangela onghalo yomhepo keshe. Ovanhu itava ka monifwa vali oixuna kudo.

•   Ota ka honga ovanhu nghee ve na okufila oshisho nawa edu

   Osho Ombiibeli tai ti: “Onda hala ndi ku longe, ndi ku udikile ondjila, ei u nokweenda nayo.” — Epsalme 32:8.

   Osho onakwiiwa yetu tai ka kala: Jehova okwa pa ovanhu oshinakuwanifwa shokufila oshisho edu. (Genesis 1:28; 2:15) Ote ke tu honga nghee tu na oku li fila oshisho noku li hafela filufilu.