وقىرمان ساۋالدارى
سالونيكالىقتارعا 2-حات 3:14 تەگى «نازارعا الىڭدار» دەگەن نۇسقاۋ اقساقالدارعا ايتىلعان با، الدە قاۋىمداعى ٵربىر ماسىحشىگە مە؟
ەلشى پاۋىل سالونيكاداعى ماسىحشىلەرگە بىلاي دەپ جازعان: «كىمدە-كىم وسى حات ارقىلى ايتقاندارىمىزعا قۇلاق اسپايتىن بولسا، سونى نازارعا الىڭدار» (سال. 2-ح. 3:14). بۇعان دەيىن ٴبىز بۇل سوزدەر اقساقالدارعا بەرىلگەن نۇسقاۋ دەپ ويلاپ كەلدىك. ەگەر بىرەۋ قايتا-قايتا كەڭەس بەرىلگەنىنە قاراماستان كيەلى كىتاپ پرينسيپتەرىن بۇزىپ جۇرسە، ونى نازاردا ۇستاۋ ٷشىن اقساقالدار قاۋىمدا ەسكەرتۋ بايانداماسىن ايتاتىن. سودان كەيىن قاۋىمداعى باۋىرلاستار نازارعا الىنعان سول اداممەن ارالاسپاي قوياتىن.
الايدا بۇعان قاتىستى تۇسىنىگىمىز ەندى وزگەردى. پاۋىلدىڭ ايتقان سوزدەرىنە قاراساق، ونىڭ كەڭەسى قاۋىمداعى ٵربىر ماسىحشىگە قاتىستى ەكەنىن كورەمىز. سوندىقتان بۇدان بىلاي اقساقالدارعا قاۋىمدا ەسكەرتۋ بايانداماسىن ايتۋدىڭ قاجەتى جوق. بۇنداي وزگەرىسكە نە سەبەپ بولدى؟ قازىر پاۋىلدىڭ ايتقان سوزدەرىنىڭ ٴمانماتىنىن قارايىق.
پاۋىل قاۋىمداعى كەيبىرەۋلەردىڭ «ٴتارتىپ بۇزىپ» جۇرگەنىن بايقاعان. ولار قۇداي سوزىنە نەگىزدەلگەن كەڭەسكە قۇلاق اسپاعان. ويتكەنى پاۋىل وسىعان دەيىن كەلگەن كەزىندە ولارعا: «ەڭبەك ەتكىسى كەلمەيتىن ادام ٸشىپ جەمەسىن»،— دەگەن نۇسقاۋ بەرگەن. سوعان قاراماستان ولار جاعدايى كەلىپ تۇرسا دا، وزدەرىن اسىراۋ ٷشىن جۇمىس ىستەمەگەن. سونداي-اق ولار وزگەلەردىڭ ىسىنە ارالاسىپ جۇرگەن. بۇنداي ٴتارتىپ بۇزۋشىلارعا قاۋىمداعىلار قالاي قاراۋ كەرەك ەدى؟ (سال. 2-ح. 3:6، 10—12).
پاۋىل ونداي ادامداردى «نازارعا الىڭدار» دەپ كەڭەس بەرگەن. «نازارعا الۋ» دەپ اۋدارىلعان گرەك ٴسوزى ادامدى بايقاپ، ىقپالىنا بەرىلمەۋ ٷشىن ودان ساق بولۋ دەگەندى بىلدىرەدى. پاۋىل بۇل نۇسقاۋدى تەك اقساقالدارعا عانا ەمەس، بۇكىل قاۋىمعا ايتقان (سال. 2-ح. 1:1؛ 3:6). دەمەك، قاۋىمدا ٴبىر ٴماسىحشى بىرەۋدىڭ قۇداي سوزىندەگى كەڭەستەرگە قۇلاق اسپاي جۇرگەنىن بايقاسا، سول ٴتارتىپ بۇزۋشىمەن ارالاسپاۋدى شەشە الاتىن.
پاۋىلدىڭ نۇسقاۋى نازارعا الىنعان ادامعا قاۋىمنان الاستاتىلعان ادامعا قاراعانداي قاراۋ كەرەك دەگەندى بىلدىرگەن بە؟ جوق. پاۋىل ونداي ادامعا قاتىستى: «باۋىرلاس رەتىندە اقىل-كەڭەس بەرە بەرىڭدەر»،— دەگەن. دەمەك، قاۋىمداعى باۋىرلاستار نازارعا الىنعان اداممەن قاۋىم كەزدەسۋلەرىندە، قىزمەتتە ارالاسا بەرگەن. ٴبىراق وتىرىستاردا، دەمالىستاردا ولارمەن ارالاسپاۋ كەرەك بولعان. نە ٷشىن؟ «ٶز قىلىعىنا ۇيالۋ ٷشىن»،— دەگەن پاۋىل. نازارعا الىنعاننىڭ ارقاسىندا ٴتارتىپ بۇزعان ٴماسىحشى ٶز ىسىنە ۇيالىپ، ٴجۇرىس-تۇرىسىن وزگەرتۋى مۇمكىن ەدى (سال. 2-ح. 3:14، 15).
ال بۇگىندەگى ماسىحشىلەر پاۋىلدىڭ كەڭەسىن قالاي قولدانۋ كەرەك؟ الدىمەن پاۋىل «ٴتارتىپ بۇزۋشى» دەپ كىمدەردى ايتقانىن ٴتۇسىنىپ الۋىمىز كەرەك. پاۋىل ار-ۇجداندارىنا نە جەكە تالعامدارىنا ساي بىزدەن باسقاشا ارەكەت ەتەتىن ادامدارعا قاتىستى ايتپاعان. ونىڭ سوزدەرى ٴبىزدى رەنجىتىپ قويعان ادامدارعا دا قاتىستى ەمەس. پاۋىل كيەلى كىتاپتا انىق ەتىپ جازىلعان نۇسقاۋلارعا ادەيى مويىنسۇنباي جۇرگەن ادامدارعا قاتىستى ايتقان.
قاۋىمدا وسىنداي بۇلىكشىل رۋح تانىتىپ جۇرگەن باۋىرلاستى بايقاساق a، ونىمەن وتىرىستاردا، دەمالىستاردا ارالاسامىز با، جوق پا — ونى ٶزىمىز شەشەمىز. بۇل جەكە شەشىم بولعاندىقتان، ول جايلى ٷي ىشىندەگىلەردەن باسقا ەشكىممەن تالقىلاۋدىڭ قاجەتى جوق. ٴبىراق ٴبىز ول اداممەن قاۋىم كەزدەسۋلەرىندە نە ۋاعىزعا شىققاندا ارالاسا بەرەمىز. ال ادام ٴجۇرىس-تۇرىسىن وزگەرتكەن كەزدە، ونىمەن قايتادان بۇرىنعىداي ارالاسا بەرەمىز.
a مىسالى، ٴماسىحشى شاماسى كەلىپ تۇرسا دا، ٶزىن اسىراۋ ٷشىن جۇمىس ىستەمەي قويۋى مۇمكىن، سەنۋشى ەمەس اداممەن كەزدەسىپ ٴجۇرۋى مۇمكىن، يا بولماسا ىرىتكى سالاتىن اڭگىمەلەر نە وسەك تاراتىپ جۇرگەن بولۋى مۇمكىن (قور. 1-ح. 7:39؛ قور. 2-ح. 6:14؛ سال. 2-ح. 3:11، 12؛ ٴتىم. 1-ح. 5:13). وسىنداي ارەكەتىن قويمايتىن ادام «ٴتارتىپ بۇزۋشىعا» جاتادى.
