قۇداي تاعالانىڭ بىزگە جاساعان جاقسىلىعى قانداي؟
بىرەۋدى جاقسىراق تانۋ ٷشىن ونىڭ ومىردە جەتكەن جەتىستىكتەرى مەن ەڭسەرگەن قيىندىقتارى جايلى بىلگەنىمىز دە يگى. تاپ سولاي، قۇداي تاعالانى جاقسىراق تانۋ ٷشىن دە ونىڭ جاساعان ىستەرى جايلى بىلگەنىمىز دۇرىس. ونىڭ ادامزات ٷشىن بۇرىن قانشاما جاقسىلىق جاساعانىن بىلگەندە تاڭعالاتىن شىعارمىز. ٴبىز سول جاقسىلىقتاردىڭ يگىلىگىن قازىر دە، بولاشاقتا دا كورەمىز.
قۇداي ٴبارىن ٴبىز ٷشىن جاراتتى
ەحوبا قۇداي — ۇلى جاراتۋشى. ونىڭ «كوزگە كورىنبەيتىن قاسيەتتەرى... دۇنيە جاراتىلعاننان بەرى ايقىن. بۇلاردى ونىڭ جاراتىلىستارىنان كورىپ، تۇسىنۋگە بولادى» (ريمدىكتەرگە 1:20). «ول... قۇدىرەتىمەن جەردى جاراتقان، دانالىعىمەن قۇنارلى جەردى بەرىك ەتىپ ورناتقان، اقىل-پاراساتىمەن اسپان كەڭىستىگىن جايعان» (ەرەميا 10:12). اسەم جاراتىلىسىنان قۇداي تاعالا ٴبىزدىڭ قامىمىزدى ويلايتىنى دا كورىنەدى.
ەحوبا قۇداي ادام بالاسىن «وزىنە ۇقساس ەتىپ جاراتىپ»، باسقا جاراتىلىستان ەرەكشە ەتتى (مۇسانىڭ 1-جازباسى 1:27). ٴبىز ونىڭ اسقاق سيپات-قاسيەتتەرىنىڭ ۇشىعىن بولسا دا تانىتا الامىز. قۇداي بىزگە رۋحاني نارسەلەردى، ياعني ونىڭ ويلارى مەن قۇندىلىقتارىن تۇسىنەتىن قابىلەت دارىتقان. ەگەر ونىڭ ويلارى مەن قۇندىلىقتارىنا ساي ٶمىر سۇرۋگە تىرىسساق، عۇمىرىمىز الدەقايدا باقىتتى، الدەقايدا ماعىنالى بولماق. ەڭ باستىسى، اللا تاعالا بىزگە وزىمەن دوستاسۋ مۇمكىندىگىن سيلادى.
جەر بەسىگىمىز — قۇدايدىڭ بىزگە دەگەن ماحابباتىنىڭ بىردەن-ٴبىر دالەلى. كيەلى جازبالاردا: «[قۇداي] يگى ىستەرىمەن ٶزى جايلى كۋالىك بەرۋىن توقتاتپادى: اسپاننان جاۋىن جاۋدىرىپ، مەزگىلىمەن مول ٶنىم بەردى جانە كول-كوسىر اس-سۋ سيلاپ، جۇرەگىمىزدى قۋانىشقا تولتىرىپ كەلدى»،— دەلىنگەن (ەلشىلەردىڭ ىستەرى 14:17). جاراتۋشى تىرشىلىك ەتۋىمىزگە قاجەتتىنى عانا بەرىپ قويعان جوق. ول ومىردەن راقات الۋىمىز ٷشىن ٴبارىن سان الۋان ٵرى اعىل-تەگىل ەتىپ بەردى. الايدا بۇلار — قۇداي تاعالانىڭ بىزگە سيلاعىسى كەلگەننىڭ ٴبىر پۇشپاعى عانا.
ەحوبا قۇداي جەردى ادامزات ماڭگى جاساسىن دەپ جاراتتى. كيەلى جازبالاردا «جەردى ول ادام بالاسىنا بەرگەنى» ٵرى «ونى بەكەردەن-بەكەر ەمەس، مەكەندەۋ ٷشىن جاراتقانى» ايتىلعان (ٴزابۇر 115:16؛ يشايا 45:18). جەر بەتىندە كىمدەر جانە قانشا ۋاقىت مەكەندەيدى؟ «ادىلدەر جەردى مۇرا ەتەدى، وندا ماڭگى باقي ٶمىر سۇرەدى»،— دەلىنگەن جازبالاردا (ٴزابۇر 37:29).
اللا تاعالا و باستا ادام اتا مەن حاۋا انانى جاراتىپ، جۇماق باعىن كۇتىپ-باعۋ ٷشىن ولاردى سوندا قونىستاندىردى (مۇسانىڭ 1-جازباسى 2:8، 15). ٴسۇيتىپ، ەكەۋىنە مىناداي قىزىقتى تاپسىرما بەردى: «ٶسىپ-ٶنىپ كوبەيىڭدەر، ۇرپاقتارىڭ جايىلىپ، جەر بەتىن تولتىرىڭدار، ٵرى ونى وڭدەڭدەر» (مۇسانىڭ 1-جازباسى 1:28). دەمەك، ادام مەن حاۋانىڭ جەر بەتىندە ماڭگى ٶمىر سۇرۋگە ٷمىتى بولدى. ٴبىر وكىنىشتىسى، ولار قۇدايعا مويىنسۇنعىسى كەلمەدى، سول سەبەپتەن جەردى ماڭگى مۇرا ەتۋ مۇمكىندىگىنەن قول ٷزىپ قالدى. الايدا ولاردىڭ بۇل ارەكەتى ەحوبا قۇدايدىڭ بىزگە جانە جەرگە قاتىستى وي-ماقساتىنا ەش توسقاۋىل بولا المادى، بۇل جايىندا الدا بىلەتىن بولامىز. ال قازىر قۇدايدىڭ ٴبىز ٷشىن جاساعان تاعى ٴبىر جاقسىلىعىنا توقتالايىق.
قۇداي ٴبىز ٷشىن ٶز ٴسوزىن جازدىردى
قۇداي ٴسوزى كيەلى كىتاپ جانە كيەلى جازبالار دەپ تە تانىمال. ەحوبا قۇداي ونى بىزگە نە ٷشىن بەردى؟ ەڭ باستى سەبەبى — ونى تانىپ-ٴبىلۋىمىز ٷشىن (ناقىل سوزدەر 2:1—5). راس، كيەلى كىتاپ قۇدايعا قاتىستى تۋىندايتىن ٵربىر سۇراعىمىزعا جاۋاپ بەرمەيدى، الەمدە ونداي كىتاپ جوق تا (ۋاعىزداۋشى 3:11). الايدا وندا جازىلعاندار اللا تاعالانى تانۋ ٷشىن جەتكىلىكتى. وسى كىتاپتان ونىڭ ادامدارعا قالاي قارايتىنىن ٴبىلىپ، بولمىسىن جاقسىراق تۇسىنەمىز. وعان كىمدەر ۇنامدى، كىمدەر ۇنامسىز ەكەنىن كورەمىز (ٴزابۇر 15:1—5). ونىڭ عيباداتقا، ونەگەلىلىك پەن دۇنيە-مۇلىككە دەگەن كوزقاراسىن دا بىلەمىز. سونىمەن قاتار كيەلى كىتاپتا ەحوبا قۇدايدى تانۋدىڭ ەڭ كورنەكتى جولى سۋرەتتەلگەن: ونىڭ بولمىسى ٶزىنىڭ ۇلى يسا ٴماسىحتىڭ سوزدەرى مەن ٸس-ارەكەتتەرىنەن كورىنىس تاپقان (جوحان 14:9) a.
قۇدايدىڭ ٶز ٴسوزىن بەرۋىنىڭ تاعى ٴبىر سەبەبى — ٴبىزدىڭ باقىتتى دا ٴماندى ٶمىر ٴسۇرۋىمىز ٷشىن. كيەلى كىتاپ بەتتەرى ارقىلى ەحوبا قۇداي باياندى وتباسىن قۇرۋدىڭ، قاناعاتشىل بولۋدىڭ جانە ۋايىم-قايعىمەن كۇرەسۋدىڭ جولىن كورسەتەدى. وسى جۋرنالدان بىلەتىنىڭىزدەي، كيەلى كىتاپ «دۇنيەدە قايعى-قاسىرەت نەگە كوپ؟ بولاشاعىمىز قانداي بولماق؟» سىندى ومىرلىك ماڭىزى بار سۇراقتارعا جاۋاپ بەرەدى. سونداي-اق وندا قۇداي تاعالانىڭ اۋەل باستاعى وي-ماقساتىن جۇزەگە اسىرۋ ٷشىن نە ىستەگەنى تۇسىندىرىلەدى.
كيەلى كىتاپتىڭ قۇدايدىڭ قولىنان شىققان ەرەكشە تۋىندى ەكەنىنە باسقا دا دالەل كوپ. بۇل كىتاپتى 1600 جىل ارالىعىندا شامامەن 40 ەر ادام جازعان. دەسە دە ونى قۇداي تاعالانىڭ ٶزى جازدىرعاندىقتان، بۇكىل كىتاپتا ٴبىر عانا تاقىرىپ وربىگەن (تىموتەگە 2-حات 3:16). باسقا كونە ەڭبەكتەردەن ەرەكشەلىگى — كيەلى جازبالار عاسىرلار بويى ەش وزگەرىسسىز جەتكەن. مۇنى كيەلى كىتاپتىڭ مىڭداعان كونە قولجازبالارى راستايدى. ونى اۋدارىپ، تاراتۋعا، وقۋعا قانشاما كەدەرگى جاسالسا دا، جويىلماي، ەڭسەسى بيىك بولدى. بۇگىنگى تاڭدا ول سەكىلدى ەڭ كوپ تارالعان جانە تارجىمەلەنگەن كىتاپ جوق. كيەلى كىتاپتىڭ وسى ۋاقىتقا دەيىن ساقتالىپ كەلگەنى — «قۇدايىمىزدىڭ ٴسوزى ماڭگى قالاتىندىعىنىڭ» بۇلتارتپاس ايعاعى (يشايا 40:8).
قۇداي وي-ماقساتىن ورىندايتىنىنا كەپىلدىك بەردى
قۇداي تاعالانىڭ جاساعان تاعى ٴبىر جاقسىلىعى — بىزگە قاتىستى وي-ماقساتىن جۇزەگە اسىرۋ ٷشىن ەرەكشە شارا جاسادى. جوعارىدا ايتىلىپ كەتكەندەي، قۇداي ادامداردىڭ جەر بەتىندە ماڭگى ٶمىر كەشكەنىن قالاعان. ٴبىراق ادام اتا قۇدايعا مويىنسۇنباي، كۇنا جاساعاندا، ٶزىن عانا ەمەس، كەلەر ۇرپاعىن دا ماڭگى ٶمىر ٴسۇرۋ مۇمكىندىگىنەن قۇرالاقان قالدىردى. بۇل تۋرالى كيەلى جازبالاردا: «ٴبىر ادام ارقىلى دۇنيەگە كۇنا، ال كۇنا ارقىلى ٶلىم كەلدى، وسىلايشا ادامداردىڭ ٴبارى ولەتىن بولدى، سەبەبى ٴبارى كۇنا جاسادى»،— دەلىنگەن (ريمدىكتەرگە 5:12). وسىلاي قۇدايدىڭ اۋەل باستاعى ماقساتى جۇزەگە اساتىنىنا كۇمان تۋدى. ەحوبا قۇداي نە ىستەمەك ەدى؟
ەحوبا ٶزىنىڭ اسىل قاسيەتتەرىنە ساي ٸس-ارەكەت جاسادى. ول ادام مەن حاۋانى كۇناسى ٷشىن ٵدىل تۇردە جاۋاپقا تارتتى. ال سۇيىسپەنشىلىگى ولاردىڭ ۇرپاقتارى ٷشىن بەلگىلى ٴبىر شارا جاساۋعا تالپىندىردى. اسقان دانالىعىنىڭ ارقاسىندا ەحوبا تۋىنداعان قيىندىقتىڭ امالىن تاۋىپ، ونىڭ شەشىمىن بىردەن جاريا ەتتى (مۇسانىڭ 1-جازباسى 3:15). ول ٶز ۇلى يسا ٴماسىح ارقىلى ادامزاتتى كۇنا مەن ٶلىمنىڭ قۇرساۋىنان بوساتپاق ەدى. قالايشا؟
قۇداي ادامزاتتى ادام اتانىڭ بۇلىگى اكەلگەن زارداپتان ازات ەتۋ ٷشىن، يسا ٴماسىحتى جەرگە جىبەردى. ول ادامدارعا ومىرگە باستايتىن جولدى كورسەتىپ، سولار ٷشىن «جانىن تولەم رەتىندە بەردى» b (ماتاي 20:28؛ جوحان 14:6). ادام اتا سياقتى ٴمىنسىز، كەمەلدى بولعاندىقتان، يسا ادامزاتتىڭ تولەم قۇنىن وتەي الدى. الايدا ادام اتادان وزگەشەلىگى — ول ولە-ولگەنشە قۇدايعا قالتقىسىز مويىنسۇندى. ولىمگە لايىق بولماعاندىقتان، ەحوبا يسانى كوكتە ٶمىر ٴسۇرۋ ٷشىن قايتا ٴتىرىلتتى. وسىلايشا ول ادام اتا ىستەي الماعاندى ىستەدى، دالىرەك ايتقاندا، ٴتىلالعىش ادامدارعا ماڭگى ٶمىر ٴسۇرۋ مۇمكىندىگىن سيلاي الدى. قۇداي سوزىندە جازىلعانداي، «ٴبىر كىسىنىڭ مويىنسۇنباۋى كوپ ادامدى كۇناكار ەتسە، ٴدال سولاي، ٴبىر كىسىنىڭ مويىنسۇنۋى كوپ ادامدى ٵدىل قىلادى» (ريمدىكتەرگە 5:19). يسانىڭ تولەم قۇرباندىعىنىڭ ارقاسىندا قۇداي تاعالا ادامزاتقا شەكسىز ٶمىر سيلايمىن دەگەن ۋادەسىن جۇزەگە اسىرادى.
ادام اتانىڭ ٴتىلازارلىعىنىڭ كەسىرىنەن تۋىنداعان قيىندىقتى قالاي شەشكەنىنەن ەحوبا قۇداي تۋرالى بىلەرىمىز كوپ. ەحوباعا باستاعان ٸسىن اياقتاۋىنا ەشتەڭە دە توسقاۋىل بولا المايدى، ونىڭ ٴسوزى «مىندەتتى تۇردە» جۇزەگە اسادى (يشايا 55:11). سونداي-اق ەحوبانىڭ بىزگە دەگەن ماحابباتى عالامات. كيەلى كىتاپتا بىلاي دەلىنگەن: «قۇداي بىزگە دەگەن سۇيىسپەنشىلىگىن بىلاي كورسەتتى: جالعىز ۇلىن وسى دۇنيەگە جىبەردى. وسىلايشا سول ارقىلى ومىرگە يە بولۋىمىزعا جول اشتى. بۇل سۇيىسپەنشىلىكتىڭ ٴمانى مىنادا: قۇدايدى سۇيگەن ٴبىز ەمەس، قايتا، ول ٴبىزدى ٴسۇيدى، سوندىقتان كۇنالارىمىز ٷشىن ۇلىن وزىمەن تاتۋلاستىراتىن قۇرباندىق رەتىندە جىبەردى» (جوحاننىڭ 1-حاتى 4:9، 10).
قۇداي تاعالا «ٶز ۇلىن اياماي، ٴبىز ٷشىن ولىمگە قيدى». ەندەشە، ول بىزگە ۋادە ەتكەندەرىنىڭ ٴبارىن قالايشا سيلامايدى؟! (ريمدىكتەرگە 8:32). ونىڭ سول ۋادەلەرى جايىندا كەلەسى ماقالادان وقىپ كورىڭىز.
قۇدايدىڭ بىزگە جاساعان جاقسىلىعى قانداي؟ ەحوبا قۇداي ادام بالاسىن جەر بەتىندە ماڭگى جاساسىن دەپ جاراتتى؛ ٶزىن جاقسىراق تانۋىمىز ٷشىن كيەلى جازبالاردى بەردى؛ يسا ٴماسىحتىڭ ٶمىرىن تولەم رەتىندە قيىپ، ٶز وي-ماقساتىن جۇزەگە اسىراتىنىنا كەپىلدىك بەردى
a قۇداي يسانى تىكەلەي ٶزى جاراتقاندىقتان، ول قۇداي ۇلى دەپ اتالادى. بۇعان قاتىستى كوبىرەك مالىمەتتى jw.org تور بەكەتىندەگى «نەلىكتەن يسا ٴماسىح قۇدايدىڭ ۇلى دەپ اتالادى؟» دەگەن ماقالادان وقۋعا بولادى (كيەلى كىتاپ تالىمدەرى/كيەلى كىتاپ. سۇراقتار مەن جاۋاپتار).
b تولەم جايىندا كوبىرەك مالىمەتتى ەحوبا كۋاگەرلەرى باسىپ شىعارعان «مٵڭگٴى باقي ٶمىردىڭ راقاتىن كورىڭىز!» دەگەن كىتاپتىڭ 27-ساباعىنان بىلۋگە بولادى. بۇل كىتاپ www.ps8318.com سايتىندا دا بار.
قىزىقتى بولار مالىمەتتەر
كۇزەت مۇناراسى
قۇداي تاعالانىڭ نەندەي وي-ماقساتى بار؟
قۇدايدىڭ ۇكىمەتى بيلىك ەتكەندە، جەر بەتىنە قانداي جاعداي جاسايتىنىن ٴبىلىڭىز.
ESSENTIAL BIBLE TEACHINGS
كيەلى كىتاپتىڭ اۆتورى كىم؟
ەگەر كيەلى كىتاپتى ادامدار جازعان بولسا، ونى قۇداي ٴسوزى دەۋگە بولا ما؟ كيەلى كىتاپتا كىمنىڭ ويى جازىلعان؟
كيەلى كىتاپ. سۇراقتار مەن جاۋاپتار
قالاي يسانىڭ قۇرباندىعى «كوپتەگەن ادامدار ٷشىن تولەم» بولدى؟
تولەم قۇرباندىعى قالاي كۇنادان ازات ەتەدى؟
