نەگىزگى تاقىرىپ | قۇدايدان الىستاتاتىن جالعان ۇعىمدار
قۇدايدى قۇپيا ەتىپ كورسەتەتىن جالعان ۇعىم
كوپ ادام نە نارسەگە سەنەدى؟
«ريمدىك كاتوليسيزم، شىعىس پراۆوسلاۆ پەن پروتەستانتيزم دەگەن حريستيان ٴدىنىنىڭ ٷش نەگىزگى اعىمى قۇداي ٷش تۇلعادان — اكە قۇداي، ۇل قۇداي جانە كيەلى رۋح قۇدايدان — تۇرادى دەگەنگە سەنەدى. حريستيان تەولوگياسى بويىنشا، وسى ٸلىم ٷش تۇلعانى جەكە دارا قۇدايلار دەپ ەمەس، ۇشەۋى دە ٴبىر قۇدايدى قۇرايدى دەپ تۇسىندىرەدى» («جاڭا بريتانيا ەنسيكلوپەدياسى»).
كيەلى كىتاپتا جازىلعان شىندىق.
قۇدايدىڭ رۋحاني ۇلى يسا ەشقاشان دا ٶز دارەجەسىن اكەسىنىكىمەن تەڭ نە بىردەي دەپ ساناماعان. قايتا، ول: «اكەمە بارا جاتقانىما قۋانار ەدىڭدەر، سەبەبى اكەم مەنەن ۇلى»،— دەگەن (جوحان 14:28). سونداي-اق يسا ٶز ٸزباسارلارىنىڭ بىرىنە: «مەن ٶزىمنىڭ جانە سەندەردىڭ اكەلەرىڭە، ٶزىمنىڭ جانە سەندەردىڭ قۇدايلارىڭا كوتەرىلەمىن»،— دەگەن بولاتىن (جوحان 20:17).
كيەلى رۋح تۇلعا ەمەس. ەرتەدەگى ماسىحشىلەر «كيەلى رۋحقا كەنەلگەن» بولاتىن جانە ەحوبا قۇداي: «كيەلى رۋحىمدى ٵربىر ادامعا توگەمىن»،— دەگەن (ەلشىلەردىڭ ىستەرى 2:1—4، 17). كيەلى رۋح ۇشتىكتىڭ ٴبىر بولىگى ەمەس، قايتا، قۇدايدىڭ قۇدىرەتتى كۇشى بولىپ تابىلادى.
نەگە مۇنى ٴبىلۋ ماڭىزدى؟
كارل رانەر جانە حەربەرت فورگريملەر ەسىمدى كاتوليك ٴدىنىن زەرتتەگەن عالىمدار ادامداردىڭ ۇشتىك ٸلىمىن «ايان بەرىلمەسە، تۇسىنە المايتىنىن، ٴتىپتى ايان العاننىڭ وزىندە ونى تولىقتاي ۇعىنا المايتىنىن» ايتقان. ٴسىز تانىپ-ٴبىلۋ نە ٴتۇسىنۋ مۇمكىن ەمەس ادامدى سۇيە الار ما ەدىڭىز؟ ۇشتىك ٸلىمى قۇدايدىڭ قانداي ەكەنىن بىلۋگە جانە ونى جاقسى كورۋگە كەدەرگى ەتەدى.
الدىڭعى ماقالادا سوزدەرى كەلتىرىلگەن ماركو ۇشتىك ٸلىمىنىڭ قۇدايدى تانىپ-بىلۋىنە كەدەرگى ەتكەنىن ايتتى. ول بىلاي دەيدى: «قۇداي مەنەن ٶز بولمىسىن جاسىرعانداي بولدى، ٵرى بۇل ٸلىم ماعان قۇدايدى تىم الىس، قۇپياعا تولى ٵرى وعان جاقىنداۋ مۇمكىن ەمەستەي ەتىپ كورسەتتى». الايدا كيەلى كىتاپتا قۇداي جايلى: «ول ٴارقايسىمىزدان الىس ەمەس»،— دەلىنگەن (ەلشىلەردىڭ ىستەرى 17:27). ول بىزدەن ٶزىنىڭ قانداي قۇداي ەكەنىن جاسىرمايدى، قايتا، ٶزىن تانىپ-بىلگەنىمىزدى قالايدى. يسا پايعامبار: «ٴبىزدىڭ عيباداتىمىز بىلىمگە نەگىزدەلگەن»،— دەدى (جوحان 4:22).
ماركو ٴسوزىن جالعاپ: «قۇداي ۇشتىكتىڭ ٴبىر بولىگى ەمەس ەكەنىن بىلگەنىمدە، ونىمەن جەكە قارىم-قاتىناس دامىتا الدىم»،— دەيدى. ەگەر ەحوبا قۇدايعا قۇپياعا تولى بەيتانىس بىرەۋ دەپ ەمەس، دارا تۇلعا رەتىندە قارايتىن بولساق، ونى ٴسۇيۋ بىزگە الدەقايدا جەڭىل بولادى. كيەلى كىتاپتا بىلاي دەلىنگەن: «سۇيمەيتىن ادام قۇدايدى بىلمەيدى، ويتكەنى قۇداي — سۇيىسپەنشىلىك» (جوحاننىڭ 1-حاتى 4:8).
