ەلشىلەردىڭ ىستەرى 16:1—40
-
پاۋىلدىڭ تىموتەنى تاڭداۋى (1—5)
-
ماكەدوندىق كىسى تۋرالى ايان (6—10)
-
فىلىپىدە ٴلۇديانىڭ شىندىقتى قابىلداۋى (11—15)
-
پاۋىل مەن سيلاستىڭ تۇرمەگە جابىلۋى (16—24)
-
تۇرمە باستىعى مەن ونىڭ ٷي ٸشىنىڭ شومىلدىرۋ راسىمىنەن ٶتۋى (25—34)
-
پاۋىلدىڭ جەرگىلىكتى باسشىلاردان كەشىرىم سۇراۋىن تالاپ ەتۋى (35—40)
16 پاۋىل دەربەگە، سوسىن ليستراعا باردى+. سول جەردە اناسى سەنۋشى ياھۋدي، ال اكەسى گرەك بولعان تىموتە+ ەسىمدى شاكىرت بار ەدى.
2 ليسترا مەن يقونياداعى باۋىرلاستار ول تۋرالى جاقسى پىكىردە بولاتىن.
3 پاۋىل تىموتەنى وزىمەن بىرگە الىپ جۇرگىسى كەلدى. ٴبىراق سول جەردەگى ياھۋديلەرگە بولا الدىمەن سۇندەتكە وتىرعىزدى+، ويتكەنى ولاردىڭ بارلىعى اكەسىنىڭ گرەك ەكەنىن بىلەتىن.
4 ولار قالالاردى ارالاعاندا، يەرۋساليمدەگى ەلشىلەر مەن اقساقالداردىڭ قابىلداعان شەشىمدەرىن جەتكىزىپ، سولاردى ۇستانۋ كەرەكتىگىن ايتىپ ٴجۇردى+.
5 وسىلايشا قاۋىمداعىلاردىڭ سەنىمى نىعايىپ، كۇننەن-كۇنگە سانى ارتا بەردى.
6 كيەلى رۋح قۇداي ٴسوزىن ازيا* ايماعىندا جاريالاۋعا تيىم سالعاندىقتان، ولار فريگيا مەن عالاتيا+ ولكەسى ارقىلى ٶتىپ،
7 ميزياعا كەلدى. سودان ٴبۇتىنياعا+ بارماق بولدى، ٴبىراق يسا كيەلى رۋح ارقىلى بۇعان رۇقسات بەرمەدى.
8 سوندىقتان ولار ميزيادان ٶتىپ، ترويا قالاسىنا كەلدى.
9 تۇندە پاۋىل ايان الىپ، ماكەدوندىق ٴبىر كىسىنىڭ: «ماكەدونياعا كەلىپ، بىزگە كومەكتەسە كور»،— دەپ جالبارىنىپ جاتقانىن كوردى.
10 پاۋىل وسى اياندى كورىسىمەن-اق، قۇداي ٴبىزدى سول ادامدارعا ىزگى حاباردى جاريالاۋعا شاقىردى دەگەن تۇجىرىمعا كەلىپ، ماكەدونياعا بارۋعا قام جاسادىق.
11 ترويادان تەڭىزگە شىعىپ، تۋرا ساموفراكقا كەلدىك تە، كەلەسى كۇنى نەاپولعا ٴجۇرىپ كەتتىك.
12 سول جەردەن ماكەدونيا ولكەسىنىڭ باستى قالاسى، ٴريمنىڭ قاراماعىنداعى فىلىپىگە+ كەلىپ، سوندا بىرنەشە كۇنگە توقتادىق.
13 دەمالىس كۇنى قالا قاقپاسىنان شىعىپ، دۇعا ەتەتىن ورىن بار دەگەن ويمەن وزەن جاققا باردىق. سول جەردە وتىرا قالىپ، جينالعان ايەلدەرگە ۋاعىز ايتا باستادىق.
14 ايەلدەردىڭ اراسىندا تياتيرادان+ كەلگەن ٵرى كۇلگىن ماتا ساتاتىن* ٴلۇديا ەسىمدى ايەل بار ەدى. قۇدايعا عيبادات ەتەتىن بۇل ايەل پاۋىلدى تىڭداپ وتىرعاندا، ايتىلعانداردى قابىل الۋى ٷشىن ەحوبا ونىڭ جۇرەگىن اشتى.
15 ٴلۇديا بۇكىل ٷي ىشىمەن شومىلدىرۋ راسىمىنەن وتكەن سوڭ+: «مەنى ەحوباعا ادال دەپ ەسەپتەسەڭىزدەر، ۇيىمە كىرىپ، قوناق بولىڭىزدار»،— دەپ قويار دا قويماي وتىنگەندىكتەن، ٴبىز كەلىستىك.
16 بىردە دۇعا ەتەتىن ورىنعا بارا جاتىپ، بويىندا جىنى بار+ ٴبىر قىزمەتشى قىزدى كەزدەستىردىك. بۇل قىز كورىپكەلدىكپەن اينالىسىپ، قوجايىندارىنا كوپ تابىس اكەلەتىن.
17 ول پاۋىلدىڭ جانە ٴبىزدىڭ سوڭىمىزدان قالماي: «بۇلار اللا تاعالانىڭ قۇلدارى+. ولار قۇتقارىلۋ جولىن جاريالاپ ٴجۇر!»— دەپ ايقايلاي بەردى.
18 ول بىرنەشە كۇن وسىلاي ەتكەندىكتەن، ابدەن مەزى بولعان پاۋىل ارتىنا بۇرىلدى دا، زۇلىم رۋحقا: «يسا ٴماسىحتىڭ اتىمەن بۇيىرامىن، شىق ودان!»— دەدى. سول ساتتە رۋح الگى قىزدىڭ بويىنان شىعىپ كەتتى+.
19 قىزدىڭ قوجايىندارى تابىس كوزىنەن ايىرىلعاندارىن ٴتۇسىنىپ+، پاۋىل مەن سيلاستى ۇستاپ الدى دا، بازار الاڭىنداعى بيلەۋشىلەرگە سۇيرەپ اپاردى+.
20 ٴسۇيتىپ، جەرگىلىكتى باسشىلاردىڭ الدىنا اكەلىپ: «مىنا ياھۋديلەر قالانى دۇرلىكتىرىپ+،
21 بىزگە، ريمدىكتەرگە، قابىلداۋعا دا، ۇستانۋعا دا بولمايتىن داستۇرلەردى ۇيرەتىپ ٴجۇر»،— دەپ ايىپتادى.
22 جينالعان جۇرت تا ەكەۋىنە قارسى شىقتى. جەرگىلىكتى باسشىلار ولاردىڭ كيىمدەرىن جۇلىپ الىپ، شىبىقپەن دۇرە سوعۋدى بۇيىردى+.
23 قاتتى ساباتقان سوڭ، ولاردى تۇرمەگە جاپتى دا، تۇرمە باستىعىنا جاقسىلاپ كۇزەتۋدى ٵمىر ەتتى+.
24 وسىنداي بۇيرىق العان سوڭ، ول ەكەۋىن ەڭ تۇپكى بولمەگە قاماپ، اياقتارىن بۇعاۋلاپ تاستادى.
25 ٴتۇن ورتاسىندا پاۋىل مەن سيلاس دۇعا ەتىپ، قۇدايدى انمەن ماداقتادى+. مۇنى وزگە تۇتقىندار ەستىپ جاتتى.
26 كەنەتتەن جەر قاتتى سىلكىنىپ، تۇرمەنىڭ ىرگەتاسى شايقالىپ كەتتى. سول ساتتە بارلىق ەسىكتەر اشىلىپ، ٴبارىنىڭ بۇعاۋلارى سىپىرىلىپ ٴتۇستى+.
27 تۇرمە باستىعى ويانىپ كەتىپ، ەسىكتەردىڭ اشىق تۇرعانىن كوردى. ول تۇتقىندار قاشىپ كەتتى دەپ ويلاپ، سەمسەرىن سۋىرىپ الدى دا، ٶزىن ولتىرمەك بولدى+.
28 الايدا پاۋىل: «وزىڭە قول جۇمساما، ٴبارىمىز دە وسىندامىز!»— دەپ قاتتى داۋىستادى.
29 سوندا تۇرمە باستىعى جارىق اكەلۋدى بۇيىردى دا، ىشكە جۇگىرىپ كىرىپ، دىرىلدەپ-قالشىلداپ پاۋىل مەن سيلاستىڭ اياعىنا جىعىلدى.
30 سوسىن ولاردى تىسقا الىپ شىعىپ: «مىرزالار، قۇتقارىلۋىم ٷشىن نە ىستەۋىم كەرەك؟»— دەپ سۇرادى.
31 ولار: «يەمىز يساعا سەن. سوندا ٶزىڭ دە، ٷي ٸشىڭ دە قۇتقارىلادى»+،— دەدى.
32 ەلشىلەر وعان جانە ۇيىندەگىلەردىڭ بارىنە ەحوبانىڭ ٴسوزىن ايتىپ بەردى.
33 ٴتۇننىڭ سول ۋاقىتىندا تۇرمە باستىعى ولاردى وزىمەن بىرگە ەرتىپ اپارىپ، جارالارىن جۋدى. سوسىن كىدىرمەستەن بۇكىل ٷي ىشىمەن بىرگە شومىلدىرۋ راسىمىنەن ٶتتى+.
34 ٴسۇيتىپ، ەلشىلەردى ۇيىنە شاقىرىپ، ولارعا ارناپ داستارقان جايدى. ول قۇدايعا سەنگەنىنە قۋانىپ، بۇكىل ٷي ىشىمەن شات-شادىمان بولدى.
35 ەرتەسىنە جەرگىلىكتى باسشىلار قىزمەتشىلەرىن جىبەرىپ: «الگىلەردى بوساتىڭدار»،— دەپ ايتۋدى تاپسىردى.
36 تۇرمە باستىعى ولاردىڭ سوزدەرىن پاۋىلعا جەتكىزىپ: «جەرگىلىكتى باسشىلار ادامدارىن جىبەرىپ، ەكەۋىڭىزدى بوساتسىن دەپتى. ەندى شىعىپ، ەمىن-ەركىن جۇرە بەرىڭىزدەر»،— دەدى.
37 ٴبىراق پاۋىل الگىلەرگە: «ريم ازاماتتارى+ بولساق تا، ولار ەش سوت جۇرگىزبەي، جۇرتتىڭ كوزىنشە دۇرە سوقتىرىپ، ٴبىزدى تۇرمەگە تاستادى. ال ەندى جاسىرىن تۇردە شىعارىپ جىبەرمەكشى مە؟ جوق، ٴبىزدى وزدەرى كەلىپ شىعارسىن!»— دەپ ايتتى.
38 الگى قىزمەتشىلەر بۇل سوزدەردى جەتكىزگەندە، جەرگىلىكتى باسشىلار ولاردىڭ ريم ازاماتتارى ەكەنىن ەستىپ، قورقىپ كەتتى+.
39 ٴسۇيتىپ، وزدەرى بارىپ، پاۋىل مەن سيلاسقا جالىنا باستادى. ولاردى سىرتقا شىعارعان سوڭ، قالادان كەتۋلەرىن ٶتىندى.
40 الايدا ەكەۋى تۇرمەدەن شىققاننان كەيىن، ٴلۇديانىڭ ۇيىنە باردى. سوندا باۋىرلاستاردى كورىپ، ولاردى جىگەرلەندىردى+. بۇدان كەيىن جولعا شىقتى.
سىلتەمەلەر
^ «ازيا» دەپ ريم يمپەرياسىنىڭ پروۆينسياسى جونىندە ايتىلىپ تۇر.
^ نەمەسە «كۇلگىن بوياۋ ساتاتىن».
