Мұсаның 1-жазбасы 6:1—22
6 Адамдар жер бетінде көбейе бастады, олардан қыздар да туылды.
2 Періштелер*+ адам қыздарының сұлу екенін көріп, таңдағандарын әйелдікке ала берді.
3 Сонда Ехоба былай деді: “Менің рухым адам баласына мәңгі төзе бермейді+, ол — небәрі пенде*. Сондықтан оның ғұмыры 120 жыл болады”+.
4 Сол кезде де, содан кейін де алыптар* жерде өмір сүрді. Періштелер адам қыздарымен жақындасып, олардан сол алыптар туылды. Қара күштің иесі болған бұлар ежелде аты шыққан адамдар еді.
5 Ехоба адам баласының жер бетінде жасаған зұлымдығы орасан зор екенін және олардың есіл-дерті жамандық істеу екенін көрді+.
6 Сонда Ехоба өзі жаратқан адамдарға қарап қынжылып, жүрегі ауырды+.
7 Сондықтан Ехоба: “Мен жер бетінен өзім жаратқан адамдарды, олармен қоса малдарды, бауырымен жорғалаушылар мен аспандағы қанаттыларды құртамын. Өйткені өзім жаратқан адамдарға қарап қатты қынжыламын”,— деді.
8 Ал Нұхқа Ехоба ықыласын түсірді.
9 Нұх жөнінде:
Нұх әділ* кісі еді+. Ол замандастарының арасында мінсіз болып, Құдай жолымен* жүрді+.
10 Нұхтың Шам, Хам, Япші деген үш ұлы болды+.
11 Құдайдың көз алдында дүние бұзылған әрі зұлымдыққа толы еді.
12 Иә, Құдай дүниенің әбден бүлінгенін көрді+. Себебі жер бетіндегі пенде атаулы азғын жолға түскен болатын+.
13 Сонда Құдай Нұхқа мынаны айтты: “Мен бүкіл тіршілік атаулыны жоюды ұйғардым, өйткені адамдардың кесірінен жер беті зұлымдыққа толды. Сондықтан оларды құртып, жерді тып-типыл етемін+.
14 Сен шайырлы ағаштан* кеме* соқ+. Оның ішіне бөлмелер жасап, іші-сыртын қарамаймен* сыла+.
15 Оны былай жаса: ұзындығы 300, ені 50, биіктігі 30 шынтақ* болсын.
16 Ал ішіне жарық түсіп тұру үшін, шатырдың астынан биіктігі бір шынтақ етіп терезе* жаса. Есігін бүйірінен шығар+, сондай-ақ кеменің төменгі, ортаңғы және жоғарғы қабаты болсын.
17 Мен жер бетіне топан су қаптатып+, аспан астындағы кеудесінде демі* бардың бәрін құртамын. Жер бетіндегінің бәрі жойылады+.
18 Ал сенімен келісім жасасамын. Өзің, ұлдарың, әйелің мен келіндерің кемеге кіресіңдер+.
19 Жан-жануарлар+ аман қалу үшін, әрқайсысынан екі-екіден өзіңмен бірге кемеге алып кір. Олардың біреуі еркек, біреуі ұрғашы болсын+.
20 Тіршілігін жалғастыру үшін қанаттылардың, үй жануарлары мен бауырымен жорғалаушылардың әр түрінен қос-қостан ішке кіргіз+.
21 Сонымен қатар өзіңе және жан-жануарларға арнап жеуге жарамды түрлі азықтан+ қор жинап ал”.
22 Нұх бәрін Құдайдың бұйырғаны бойынша жасады. Құдай қалай айтса, дәл солай істеді+.
Сілтемелер
^ Сөзбе-сөз “Құдай ұлдары”.
^ Немесе “ол пендешілікпен әрекет етеді”.
^ Сөзбе-сөз “нефилимдер”. Бұл өзгелерді “сұлатып салатындар” дегенді білдірсе керек.
^ Сөзбе-сөз “Құдаймен бірге”.
^ Яғни Құдайдың талаптарына сай өмір сүретін.
^ Немесе “смоламен”.
^ Сөзбе-сөз “жәшік”. Нұхтың кемесі жәшік пішінді болған.
^ Сөзбе-сөз “гофер ағашынан”. Бұл кипарис болуы мүмкін.
^ 1 шынтақ 44,5 см-ге тең. Ә14 қосымшасын қараңыз.
^ Еврейше “цохар”. Бұл сөз терезені емес, биіктігі 1 шынтақ болатын қиғаш шатырды білдіруі мүмкін.
^ Немесе “өмір рухы”.
