Осы кітапшадан білгеніңіздей, Киелі кітапта өзіңізге де, отбасыңызға да пайдасын тигізетін көптеген ақыл-кеңес бар. Ехоба Құдай сізді бақытты болса екен дейді. Егер оған ғибадат етуді өмірде басты орынға қойсаңыз, сізге қажеттінің “бәрін қосып беретінін” Құдай уәде етеді (Матай 6:33). Ол сізбен дос болуды қалайды. Сондықтан онымен жақындататын кез келген мүмкіндікті қалт жібермеңіз. Расында да, Құдаймен дос болу — адам баласына берілген теңдесі жоқ қазына (Матай 22:37, 38).

КИЕЛІ КІТАПТА НЕ ЖАЗЫЛҒАН? “Мен Әкелерің, ал сендер ұл-қыздарым боласыңдар”,— дейді Ехоба Құдай (Қорынттықтарға 2-хат 6:18). Ол сізбен әке мен баладай жақын қарым-қатынаста болуды қалайды. Бұған қол жеткізудің бір жолы — дұға ету. Ехоба сізді өзіне “ұдайы дұға етуге” шақырады (Салоникалықтарға 1-хат 5:17). Ол мұң-шеріңіз бен тілек-қалауыңызды тыңдауға даяр (Філіпіліктерге 4:6). Отбасыңызбен бірге дұға еткенде, олар Құдайдың сіз үшін тірі Тұлға екенін көреді.

Құдайға жүрегіңіздегіні ақтарып қана қоймай, оны тыңдай білуіңіз де қажет. Бұл үшін оның Сөзін және оған негізделген әдебиеттерді оқу керек (Зәбүр 1:1, 2). Оқығандарыңызды ой елегінен өткізіңіз (Зәбүр 77:11, 12). Құдайды тыңдау дегенге қауым кездесулеріне үзбей бару да жатады (Зәбүр 122:1—4).

Құдаймен қарым-қатынасыңызды нығайтудың тағы бір маңызды жолы — ол туралы өзгелерге айту. Ол жайлы неғұрлым көп айтсаңыз, соғұрлым оған жақындай түсесіз (Матай 28:19, 20).

ПАЙДАЛЫ КЕҢЕС

• Құдай Сөзін оқуға және дұға етуге күнде уақыт бөліңіз.

• Отбасыңыз үшін рухани іс-шаралар көңіл көтеру мен демалудан жоғары тұрсын.

КИЕЛІ КІТАПТА НЕ ЖАЗЫЛҒАН? “Құдайға жақындаңдар, сонда ол да сендерге жақындайды”,— делінген Құдай Сөзінде (Жақып 4:8). Отбасылық ғибадат a кестесін жасап, оны жүйелі түрде өткізудің маңызы зор (Мұсаның 1-жазбасы 18:19). Бірақ отбасымен бірге Құдайға ғибадат ету мұнымен шектелмей, күнделікті өмірлеріңіздің ажырамас бөлігіне айналу керек. Сондықтан отбасы мүшелерінің Құдаймен қарым-қатынасы нығаюы үшін, ол жөнінде “үйде отырғанда да, жол жүргенде де, жатқанда да, тұрғанда да айтатын болыңыз” (Мұсаның 5-жазбасы 6:6, 7). Сіздің де мақсатыңыз Құдайдың ежелдегі қызметшісі Ешуанікіндей болсын. Ол: “Ал мен болсам үй ішіммен Ехобаға қызмет етемін”,— деген (Ешуа 24:15).

ПАЙДАЛЫ КЕҢЕС

• Отбасы мүшелерінің әрбірінің қажеттілігін ескере отырып, отбасылық ғибадатты жақсылап ойластырып, жүйелі түрде өткізіңіз.