1, 2. (a) Gideonip angutitaasalu 300-t piner­tusaar­nerat qanoq ilin­niarfigisin­naavar­put? (Al­laaserisap aal­laq­qaataani as­siliaq takuuk). (b) Lukasip iivangkiiliua 21:19 naaper­torlugu sooq piner­tusaar­nis­saq pingaaruteqangaar­pa?

TAKORLUUK­KIT Israelik­kut sak­kutuui eq­qar­tuus­sisumit Gideonimit siulersor­neqar­tut akeq­qamin­nut ilungersorlutik sorsut­tut. Gideonip angutitamilu un­nuaq naal­lugu Midjanik­kut taak­kualu iligisaat 32 kilometerit mis­siliorlugit malersor­paat! Taava qanoq pisoqar­nera Biibilimi oqalut­tuarineqar­poq: “Gideoni angutitanilu 300-t Jordanimut pip­put ikaarlutil­lu. Qasusimap­put.” Sulili ajugaan­ngin­namik sak­kutuut 15.000-t akior­tariaqar­paat. Israelik­kut ukiualun­ni akeq­qamin­nit naqisimaneqaramik akiuuk­kun­naagin­narsin­naan­ngil­lat. Aap, Gideonip angutitaasalu akeq­qatik malersor­tuar­paat kiisamilu ajorsar­til­lugit! – Eq­q 7:22; 8:4, 10, 28.

² Uagut­taaq ilungersunar­tumik qasunar­tumil­lu akiuup­pugut. Akeq­qavut tas­saap­put Saatani, taas­suma silarsuaa naam­mal­luin­nan­ngis­suser­pul­lu. Ilat­ta akeq­qat taak­ku ukior­pas­suar­ni akiorsimavaat, Jehovalu ikior­tigalugu akiuun­ner­ni  ajugaasar­pugut. Sulili ajugaal­luin­nan­ngilagut. Ilaan­nik­kut akiuutikatas­sin­naasar­pugut silarsuul­luun­niit ajor­tup naggatis­saa utaq­qikatalersin­naal­lugu. Ul­lus­sani kingul­ler­ni misilin­neqangaas­sasugut akerlilersor­neqarsuataas­sasugul­lu Jiisusip paasitip­paatigut. Aam­mali oqar­poq piner­tusaarut­ta ajugaasin­naasugut. (Lukasi 21:19 atuaruk). Piner­tusaar­neq qanoq paasisariaqar­pa? Nikal­lujuis­sin­naaq­qul­luta suut iluaqutigisin­naavavut? Piner­tusaarsimasut qanoq ilin­niarfigisin­naavavut? Aam­ma ‘nikal­lujuin­neq suliamik naam­mas­sisitsil­luaq­qul­lugu’ susin­naavugut? – Jaak 1:4.

3. Piner­tusaar­neq qanoq paasisariaqar­pa?

³ Biibili naaper­torlugu piner­tusaar­neq tas­saagin­nan­ngilaq erloqinar­tunik naam­magin­niin­nar­neq. Aam­ma misilin­neqar­nitsin­nut tun­ngatil­lugu qanoq eq­qarsar­nersugut qanorlu misiginersugut pineqar­poq. Piner­tusaar­neq sapiis­suseqar­nis­samut, aalajaan­nis­samut kamagit­tar­nis­samul­lu iluaqutigisar­par­put. Ujarlerfis­siami al­las­simavoq piner­tusaar­neq nakimaatsumik neriuuteqalis­sutigisarip­put an­nikil­lioraangat­talu nikal­lor­naveersaar­nis­samut iluaqutigisarip­put. Piner­tusaarut­ta al­laat misilin­neqangaaraluarut­ta eq­qis­sisimal­luta aalajaat­tuarsin­naavugut. Piner­tusaar­nit­ta misilin­neqar­nitsin­ni ajugaasin­naan­ngor­tit­tar­paatigut, anguniak­katsin­nul­lu tun­ngatil­lugu isumal­lualer­tarat­ta naal­liun­ner­put nikal­lus­sutigineq ajor­par­put.

4. Sooq oqarsin­naavugut asan­nin­neq piner­tusaar­nis­samut kajumis­sis­sutaasar­toq?

⁴ Asan­nin­neq piner­tusaar­nis­samut kajumis­sis­sutigisar­par­put. (1 Korinthimiut 13:4, 7 atuakkit). Sutigut? Jehovamik asan­nin­neq kajumis­sis­sutigalugu misilin­neqar­ner­ni Jehovap akuerisaani qanorluun­niit it­tuni piner­tusaarsin­naavugut. (Luk 22:41, 42) Qatan­ngutitsin­nik asan­nin­neq iluaqutigisar­par­put taak­kua naam­mal­luin­nan­ngis­sutaasa naam­magit­tarfiginis­saan­nut. (1 Petr 4:8) Aap­par­put asagatsigu ajor­nar­torsioraangat­ta, aap­pariit pil­luar­tut aam­ma ‘ajor­nar­torsiorumaarmata’, nikal­lujuis­sin­naasar­pugut asan­nin­nerlu aap­pariit­tut nakus­satsis­sutigisar­par­put. – 1 Kor 7:28.

5. Sooq Jehova uagutsin­nik ikiuil­luar­ner­paasin­naava?

⁵ Nakus­satseq­qul­lutit Jehova qin­nuigiuk. Jehova Guutiuvoq ‘nikal­lujuitsuutitsisoq tup­pal­lersaasorlu’. (Rom 15:5) Jehova kisimi atuk­katsin­nik, misigis­sutsitsin­nik tunuliaqut­tatsin­nil­lu paasin­nil­luin­nar­tuuvoq. Tas­sa nalun­ngilaa piner­tusaarsin­naaq­qul­luta sunar­piaq pisariaqar­tin­nerip­put, soorlu al­las­simasoq: “Mianerin­nitsiminut kis­saataan­nik ilior­tar­poq, an­nikil­lior­nermin­ni nil­lianerat tusar­tar­paa an­naat­tarlugil­lu.” (Tus­s 145:19) Piner­tusaar­niar­nitsin­ni nakus­satseq­qul­luta qin­nutivut Guutip qanoq akisar­pai?

6. Biibilimi neriorsuutigineqar­tutut misilin­neqar­nitsin­ni Jehova qanoq ‘aniguif­fis­samik pilersitsisin­naava’?

⁶ Piner­tusaarsin­naaq­qul­luta Jehovamut ikioq­qugut­ta taas­suma neriorsor­paatigut ‘aniguif­fis­samik pilersitsis­sal­luni’. (1 Korinthimiut 10:13 atuaruk). Qanoq taamaalior­tar­pa? Ilaan­nik­kut Jehovap misilin­neqar­neq peer­tar­paa. Amerlaner­tigul­li nakus­satsit­tar­paatigut ‘nikal­lujuitsooq­qul­luta  kamagit­tar­tooq­qul­lutalu’. (Kol 1:11) Timik­kut, isumak­kut misigis­sutsik­kul­lu pisin­naasat­ta kil­leqar­neri nalun­ngil­luin­naramigit aalajaat­tuarun­naas­sutigisin­naasatsin­nik misilin­neqar­nis­sar­put akuerinavian­ngilaa.

7. Piner­tusaarsin­naaq­qul­luta sooq anersaak­kut nerisas­sat pisariaqar­tin­nerivut as­sersuusiorlutit nas­suiaruk.

⁷ Anersaak­kut nerisas­sat up­pernik­kut nakus­satsis­sutigisak­kit. Sooq anersaak­kut nerisas­sat pingaaruteqar­pat? As­sersuuteqariar­ta: Inuup Mount Everest qaqis­saguniuk ul­lormut kaloriat 6.000-t mis­saat pisariaqar­tip­pai, tas­sa anguniak­kani angus­saguniuk ul­lut pingasut sisamal­luun­niit ingerlaneran­ni nerisar­tak­kani ul­lormi ataatsimi nerisariaqar­tas­savai. Taamatut­taaq uagut piner­tusaarsin­naaq­qul­luta anguniagar­pul­lu angusin­naajumal­lugu anersaak­kut nerersuataar­tariaqar­pugut. Nam­mineq atuaq­qis­saar­tar­nerup ataatsimiin­neril­lu pif­fis­saqarfiginis­saat aalajangiusimal­luin­nar­tariaqar­par­put. Tamak­kumi up­perluar­tuujuar­nis­satsin­nut pisariaqar­put. – Joh 6:27.

8, 9. (a) Jobimik al­lak­kat 2:4, 5 naaper­torlugit misilin­neqaraangat­ta suna pineqar­tar­pa? (b) Atugarlioraangavit suut takorloor­tarsin­naavigit?

⁸ Guutimik ilumoorfigin­nin­nerit eqqaamajuk. Misilin­neqaraangat­ta naal­liut­tar­pugut. Aam­mami Guutimik ilumoorfigin­nin­ner­put misilin­neqar­tar­poq. Misilin­neqar­nermi qisuariar­nitsin­nit erser­tar­poq Jehova qilam­mi nunamilu naalagaasus­satuatut isiginerip­put. Tas­sa qanoq? Saatanip, Guutip naalagaanera akerlilersorlugu taas­sumun­nga akeran­ngor­tup, Jehova mitaatigaa inuit nam­minis­sarsior­ner­tik pis­sutigiin­narlugu Guutimut kif­far­tor­nerarlugit. Saatani ima oqar­poq: “Inuum­mi pigisani tamaasa akigeriaan­naasar­pai inuunini an­naajumanagu.” Jobilu pil­lugu ima oqar­poq: “Ataguli as­sat isatserias­sagit uin­nga saar­ngilu at­torlugit, taava kiin­nat toq­qavil­lugu perloq­qus­sagaluar­paatit!” (Job 2:4, 5) Saatani taamatut un­nerluutigin­nik­kamili al­lan­ngorsimava? Naamerluin­naq! Tamatuma kingor­na ukior­pas­suit qaangiut­tut Saatani qilam­miit igitaagami Guutip kif­faanik aalajaatsunik un­nerluutigin­nit­tuar­poq. (Saq­q 12:10) Sulilu ul­lumik­kut Saatanip inuit nam­minis­sarsior­ner­tik pis­sutigiin­narlugu Guutimut kif­far­tor­nerar­pai. Kis­saatigingaar­paa Guuti naalagariumas­san­ngik­kip­put kif­far­torfigiun­naas­sagip­pul­lu.

⁹ Misilin­neqarlutit naal­liuk­kaangavit takus­saan­ngitsut takorloor­tak­kit. Saatanip anersaapiluil­lu qanoq ilius­sanersutit paasiniarlugu nak­kup­paatsit tun­niutiin­nas­sanerarlutil­lu. Il­luatungaaniip­put Jehova, Kun­nger­put Jiisusi Kristusi, tanitat makititaasimasut aam­ma in­ngilit tuusintilip­pas­suit. Aam­ma taak­kua il­lit akiuun­nerit maluginiar­paat qiim­mas­sarlutil­lu nil­lerrat­tarlutik! Piner­tusaarlutit Jehovamik ilumoorfigin­nit­tuarsin­naasutit takul­lugu nuan­naarutigingaar­paat. Taavalu Jehovap nipaa tusaaler­pat: “Er­nera, ilisimasuuniarit taamalu uum­matiga nuan­naar­til­lugu, mital­lersik­ka akisin­naanias­savak­ka.” – Us­s 27:11.

10. Piner­tusaar­nerup akis­sarsias­sar­tai isiginiar­nerisigut Jiisusi qanoq ilaarsin­naaviuk?

 ¹⁰ Akis­sarsias­satit isiginiarneruniakkit. Takorlooriaruk angalal­lutit sul­lorsuak­kut takisoorujus­suak­kut pisut­tariaqar­tutit. Taar­tuin­naavoq, nalun­ngilal­li ingerlaan­naruit qaamaneq takoq­qis­sal­lugu. Inuuneq angalaner­tut taamaat­tutut is­sin­naavoq. Imaas­sin­naavoq ajor­nar­torsiutitit ar­torsaatigalugit taarsior­tutut misigisutit. Aam­ma Jiisusi taamatut misigisimasin­naavoq. Nap­pak­kami an­niar­titaaf­fim­mi toqutaalerluni mitaatigineqar­poq an­niangaarlunilu. Inuunerani taman­na ar­tor­nar­ner­paasimas­saaq! Piner­tusaar­nis­saminut suna iluaqutigaa? “Nuan­naar­nis­saq siunerminiit­toq” isigiuar­paa. (Hebr 12:2, 3) Jiisusip piner­tusaar­nermi akis­sarsias­sar­tai eq­qarsaatigai, tas­sa Jehovap aq­qanik il­ler­narsisitseqataanis­sani taas­sumalu kisimi oqar­tus­saanerata eq­qor­tuuneranik up­per­narsaaqataanis­sani pingaar­ner­paatip­pai. Nalun­ngilaa misilin­neqar­nini qaangiutis­sasoq qilam­milu akis­sarsias­sani naas­saan­ngitsumik atasus­saasoq. Ul­lumik­kut misilin­neqar­nin­ni ar­tuk­kerluin­nar­neqar­tutut misigisin­naavutit, qaangiuk­kumaar­torli eq­qaamajuk.

11. Sooq piner­tusaarsimasut misigisimasaat sam­mis­savavut?

¹¹ Piner­tusaar­nitsin­ni kisimiit­tariaqan­ngilagut. Kristumiut Saatanimit misilin­neqangaar­nermi piner­tusaaq­qul­lugit kajumis­saar­niarlugit apustilip Petrusip ima al­laf­figai: “Up­per­nik­kut aalajaal­lusi as­sor­torsiuk, ilisimavarsimi qatan­ngutisi silarsuarmiit­tut taamatut­taaq atugarlior­titaasar­tut.” (1 Petr 5:9) Piner­tusaarsimasut misigisaan­nit paasivar­put qanoq aalajaat­tuarsin­naanersugut, eq­qaasin­neqar­pugul­lu iluatsis­sin­naasugut ilumoorfigin­nit­tuarut­talu pil­luaq­quneqas­sasugut. (Jaak 5:11) Piner­tusaarsimasut ilaat sam­meriar­tigit. ^[1]

12. Kerubit naatsiivim­mi Edenimi inis­sin­neqar­tut qanoq ilin­niarfigaavut?

¹² Kerubit in­ngiliup­put qaf­fasis­sumik inis­sisimaf­fil­lit. Adamip Eval­lu ajor­tulior­nerata kingor­na Jehovap kerubit ilaat nunarsuarmi sulias­sip­pai. Suliariligaat qilam­mi suliarisar­tagaan­nit al­laanerul­luin­nar­poq. Taak­kualu maligas­saal­luar­neran­nit paasisin­naavar­put unam­miniar­nar­tumik sulias­sin­neqaraangat­ta qanoq piner­tusaarsin­naanersugut. Jehovap “kerubit panalu in­naal­lagis­satut naaralaar­toq naatsiiviup Edenip kangiani inis­sip­pai, or­pim­mut inuunar­tumut aq­qutaasoq nak­kutigeq­qul­lugu”. ^[2] (1 Mos 3:24) Biibilimi al­las­siman­ngilaq kerubit naam­magit­taal­lior­tut sulias­samil­luun­niit isumaginis­saanut pingaaruteqar­pal­laar­tutut  misigisut. Pik­kunaal­liun­ngil­lat tun­niutiin­nar­natil­lu. Aap, suliareq­quneqar­tup naam­mas­sinis­saata tungaanut, im­maqa ukiut 1.600-t sin­nerlugit ulersualer­nerata tungaanut, inis­sin­neqarfim­min­niip­put!

13. Jobi misilin­neqar­nermini qanoq piner­tusaarsimava?

¹³ Angut aalajaatsoq Jobi. Ikin­ngutivit ilaqut­tavil­luun­niit ilaata nikal­lor­nar­tumik oqaaseqar­nera pis­sutigalugu ajual­lak­kuit, perulun­nar­tumik nap­parsimaguit asasan­nil­luun­niit toqusoor­neq aliasuutigingaaruk­ku Jobimik oqalut­tuaq tup­pal­lersaatigisin­naavat. (Job 1:18, 19; 2:7, 9; 19:1-3) Nalugaluarlugu sooq tas­san­ngaan­naq misilin­neqangaar­nerluni Jobi tun­niutiin­nan­ngilaq. Suna piner­tusaas­sutigaa? Pingaar­ner­paamik Jehovamik asan­nin­nini mianerin­nin­ninilu. (Job 1:1) Atugaris­saarfiusuni atugarliorfiusunilu Guutimit iluarisaarusup­poq. Aam­ma Jehovap pis­saanini maluginiaq­qul­lugu pin­ngor­titami tupin­nar­tut ilaat pil­lugit Jobi oqalut­tuup­paa. Jobip taman­na pis­sutigalugu up­perineruler­paa misilin­neqar­nini Jehovap pif­fis­saq eq­qorlugu unitsik­kumaaraa. (Job 42:1, 2) Taamatorluin­narlu pisoqar­poq. Jobip “atugarisai Naalak­kap al­lan­ngor­tip­pai. Pigisarisimasaasa marloriaataan­nik pigisaqalersip­paa.” Jobi nalerisimaarluni inuuneq­qor­tuvoq. – Job 42:10, 17.

14. Korinthimiunut al­lak­kat aap­paat 1:6 naaper­torlugu Paulusip piner­tusaar­nera al­lat qanoq iluaqutigaat?

¹⁴ Apustili Paulusi. Il­lit akerlilersor­neqar­pit peq­qar­niitsumil­luun­niit malersor­neqar­pit? Ilagiin­ni utoq­qaaner­taavit nak­kutil­liisuuil­luun­niit angalasar­toq akisus­saaf­fip­pas­suar­nik ar­torsin­neqalersutut misigisoq? Taamaap­pat Paulusimik oqalut­tuaq iluaqutigisin­naavat. Taan­na peq­qar­niitsumik malersor­neqar­poq qatan­ngutinilu ilagiin­niit­tut er­numas­sutigiuarlugit. (2 Kor 11:23-29)  Taamaak­kaluar­torli nikal­lujuil­luni tun­niutiin­nan­ngilaq, maligas­siaalu al­lat nakus­satsis­sutigaat. (2 Korinthimiut 1:6 atuaruk). Aam­ma il­lit nikal­lujuil­lutit aalajaan­nerit al­lat piner­tusaar­nis­samut iluaqutigisin­naavaat.

15, 16. (a) ‘Suliaq’ nikal­lujuin­nerup naam­mas­sil­luagaa suua? (b) ‘Nikal­lujuin­neq suliamik naam­mas­sisitsil­luaq­qul­lugu’ susin­naavugut?

¹⁵ Ajoqersugaq Jaaku isumas­sarsisin­neqarluni ima al­lap­poq: ‘Nikal­lujuin­neq suliamik naam­mas­sisitsil­luas­saaq tas­saaq­qul­lusi naam­mal­luin­nar­tut pis­suseril­luar­tul­lu sumik inorsarfeqan­ngitsut.’ (Jaak 1:4) Nikal­lujuin­neq uatsin­ni “suliamik” qanoq naam­mas­sisitsisin­naagami? Misilin­neqar­nitsin­ni imaas­sin­naavoq paasilerip­put kamagit­tar­nermut, qujamasun­nermut asan­nin­nermul­luun­niit tun­ngatil­lugu ‘inorsar­tugut’. Misilin­neqar­nitsin­nilu piner­tusaarut­ta pis­suserineqar­tus­sat taak­kua ersersin­nerunis­saat ilik­kas­savar­put, taamaalil­lutalu kristumiuul­luar­nerulis­saagut.

¹⁶ Piner­tusaar­neq kristumiuul­luar­nerulis­sutigisaratsigu misilin­neqar­ner­put unitsin­niaan­narlugu Jehovap inatsisaa unioq­qutik­kusun­ngilar­put. As­sersuutigalugu kinguaas­siuutitigut ajor­tulior­nis­samik eq­qarsaatik­kut akiugaqaruit us­ser­nar­tumut tun­niutiin­naqinak! Eq­qarsaatipiluit itigar­tin­nis­saan­nut Jehovamut ikioq­qugit. Ilaqut­tan­nit akerlilersor­neqar­pit? Tun­niutiin­naqinak! Jehovap kif­far­torfigiuar­nis­saa aalajangiusimajuk. Taamaalioruit Jehova tatiginerulis­savat. Eq­qaamajuk: Guutimit iluarisaas­sagut­ta piner­tusaar­tariaqar­pugut. – Rom 5:3-5; Jaak 1:12.

17, 18. (a) Naggatis­saq tikil­lugu piner­tusaar­nis­sap pingaaruteqas­susia as­sersuusiorlutit nas­suiaruk. (b) Naggatis­saq qanil­liar­tor­til­lugu suna up­peril­luin­narsin­naavar­put?

¹⁷ Naggatissaq tikillugu, pif­fis­sami aalajangersimasuin­naan­ngitsumi, piner­tusaar­tariaqar­pugut. Umiarsuaq kivilersoq takorlooruk. Ilaasut an­nak­kumal­lutik nunamut nalut­tariaqar­put. Nalul­luni aal­lar­tilaagin­narluni uniin­nar­toq ipil­luni toqus­saaq. Taamatul­li nunamut apuutilivil­luni uniin­nar­toq aam­ma ipis­saaq. Silarsuar­taas­sami inoorusuk­kut­ta piner­tusaar­tuar­tariaqar­pugut. Apustilitut Paulusitut isumal­luar­tuusa, taan­na ima al­lap­poq: “Nikal­lun­ngilagut.” – 2 Kor 4:1, 16.

¹⁸ Paulusitul­li up­peril­luin­nar­par­put Jehovap naggatis­samut piner­tusaar­nis­satsin­nut ikius­sagaatigut. Paulusi ima al­lap­poq: “Asasitsigut taas­sumuuna ajugaal­luin­naqaagut. Qularin­ngil­luin­nar­parami toqul­luun­niit inuunerul­luun­niit, in­ngilil­luun­niit pis­saaneqaqataasaluun­niit, maan­nak­kut it­tul­luun­niit piumaar­tus­sal­luun­niit, pis­saaneril­luun­niit, qutsis­sul­luun­niit atsis­sul­luun­niit pin­ngor­tital­luun­niit al­lat avis­saar­tis­sin­naan­ngik­kaatigut Guutip asan­nis­susianit Kristusi-Jiisusimi Naalak­katsin­ni.” (Rom 8:37-39) Ilumoor­poq ilaan­nik­kut qasusar­tugut. Gideonili angutitaalu ilaar­tigit. Taak­ku “qasusimap­put akeq­qat malersor­tuarsimagamik­kit”. Nikal­lun­ngil­lal­li. – Eq­q 8:4.