Aalajaalluinnarta qulanngilluinnarlutalu

’Takusigit! Amerlangaartut!’

UKIUNI qulikkuutaani apeqqut aalajangersimasoq Jehovap kiffaasa eqqarsaatigisimavaat. Biibilimi akissutissarsiortuarsimagaluarpaat, tamannalu oqaloqatigiinnerpassuarnut pissutaasimalluni. Kiisamilu akissut Biibilimi nassaarineqarpoq, 1935-milu Washington, D.C.-mi ataatsimeersuarnermi qiimmattaatigineqangaarluni.

Apeqqut tunngaviusoq unaavoq: ’Amerlangaartut’ Saqqummersitat 7:9-mi pineqartut kikkuuppat? Taakku qilaliassappat?

Apeqqut suli akineqanngitsoq

Apustilip Johannesip nalaanili ulluvut tikillugit kristumiut eqqarsaatigiuarsimavaat ’amerlangaartut’ kikkuunersut. Biibilimik atuaqqissaartartut isumaqarsimapput amerlangaartut tassaasut qilaliartussat pingaannginnerusut, Biibilimit ilisimasallit, kisiannili oqariartuutaata siammarternissaanut suliniuteqarpiaratik.

Inoqarporli kristumiunut tanitanut ilanngussimasunik, oqaluussinermi tamaviaarlutik aallussillualersunik. Qilaliarnissamik kissaateqanngillat. Neriuutigisaalli oqalugiaammut tamanut ammasumut naapertuuppoq „Inuit millionillit maannakkut inuusut toqunngisaannassapput“, 1918-imit 1922-mut Jehovap innuttaanit oqalugiaatigineqartartoq. Inuit taakkua nunami inuunermik naassaanngitsumik pilluaqquneqassapput.

Napasuliaq Alapernaarsuiffik-mi 1923-imi decembarimoortumi Jesusip savanik savaasanillu assersuusiaa nassuiarneqarpoq. Ima allassimavoq: „Savat tassaapput inuit inuiaqatigiinneersut tamarmik anersaakkut kinguaassaanngitsut, kisianni isumaat naapertuilluassutsimut sammisut, ilorpiamikkut Jiisusi Kristusimik Naalakkatut akuerinnittut, Naalakkersuineratalu ataani piffissamik pitsaanerusunik neriullutillu utaqqisut.“ — Mattæusi 25:31-46.

Qaammariartorpoq

1931-imi Det store Opgør (kalaallisuunngortitaanngitsoq) atuakkami siullermi Ezekielip allagaani kapitali 9-mi sammineqarpoq ersersinneqarlunilu silarsuup naggatissaani annannissamut qaamikkut nalunaaqutserneqartut, tassaasut savat Jesusip assersuusiaaniittut. Det store Opgør-imi atuakkat pingajuanni 1932-mi saqqummersumi, Jonadabip Israelikkuunngitsup naapertuilluartuunerminut ilisarnaataa oqaluttuarineqarpoq, Israelip kunngianut tanitamut Jehumut ilannguttoq, ilagalugulu Israelimi Ba’alisiortunik nungutitsiniarluni ilungersornera takuniaraa. (2 Kunngit 10:15-28) Atuakkami allassimavoq: „Jonadabi sinniisuusoq imaluunniit assersuutaasoq inunnut maannakkut nunami inuusunut . . . Satanip peqatigiiffianut isumaqataanngitsunut, naapertuilluarnermilli tapersersuisunut, tassaasut Harmagedonimi sorsunnermi Naalakkamit sernigineqartussat, annikilliornartumit tassannga annaatissavai tunillugillu nunarsuarmi inuunermik naassaanngitsumik. Taakkuupput assersuummi ’savatut’ saqqummiunneqartut.“

1934-imi Napasuliaq Alapernaarsuiffik-up ilisimatitsissutigaa kristumiut nunami inuunermik neriuutillit Jehovamut tunniulluinnassasut kuisullutillu. Qaamaneq nunamiittussanut amerlangaartunut tunngasoq qaammariartorusaarpoq. — Ussatit 4:18.

Erseqqissumik paasinninneq

Saqqummersitat 7:9-miit 17-imut tamakkiisumik paasinissaanut piffissanngorsimavoq. Qaamaneq akisugulluinnalerpoq. (Tussiaat 97:11) Napasuliaq Alapernaarsiffik-up tuluttuuani oqaatigineqarsimavoq neriullutik Washington D.C.-mi USA-miittumi maajip 30-aniit juunip 3-anut ataatsimeersuarnissaq pilersaarutigineqartoq najuuttunut Jonadabimut assersuutaasunut „ilumut tuppallersaataalluarlunilu iluaqutaajumaartoq“. Taamaalivorlu!

 Ataatsimeersuarnermi oqalugiaammi kajumissinartumi „Amerlangaartut“-nik qulequtalimmi, najuuttunut 20.000-it missaaniittunut, J. F. Rutherfordip saqqummiuppai uppernarsaatissat Biibilimeersut „savat allat“ maannakkut ittut tassaasut „amerlangaartut“ Saqqummersitat 7:9-miittut. (Johannesi 10:16) Oqalugiaatip pingaarnersaa tikikkamiuk oqalugiartoq aperivoq: „Nunami naassaanngitsumik inuunissamik neriuuteqartut tamarmik nikuissinnaappat?“ Katersuussimasuni ikigisassaanngitsut nikuimmata, J.F. Rutherford nalunaarpoq: „Takusigit! Amerlangaartut!“ Nipaaqqaarallarpoq, taava qiimmattangaarnersuaq tutsiuppoq. Aqaguani nalunaajaasut nutaat 840-it kuisipput, amerlanerillu amerlangaartunut ilaapput.

Amerlangaartut maluginiarnartut

1935 kingoqqullugu Biibilip oqariartuutaanik ilassinnittut, tusagassamillu nuannersumik ilungersorlutik oqaluussissutiginnittut amerliartuinnartut, nunami paratiisiusumi naassaangitsumik inuunissamik neriuuteqarnerarput. Qilaliarnissaminnik kissaateqanngillat, neriuummik taamaattumik Guutip tuninngimmatik. 1935-imi paasineqarmat savat allat amerlangaartunut ilaasut, paasineqarportaaq kristumiut tanitat 144.000-it toqqarneqarnerat naammassisimagunartoq. — Saqqummersitat 7:4.

Sorsunnersuit aappaata aallartinnerata nalaani, Saatan Diaavulup kamalluni amerlangaartunut ilaasussat katersorneqarnerat unitsinniaraluarpaa. Nunani amerlasuuni oqaluussineq killilersorneqalerpoq. Ulluni taakkunani taartuni, 1942-mi januaarimi toqunissani sioqqutilaarlugu, J.F. Rutherford oqaloqatigineqarluni oqarpoq: „Aap, . . . amerlangaartut amerlasoorsuanngortussaagunanngillat.“

Qujanartumilli Guutip pilluaqqusineratigut ineriartorneq allaaneruvoq. „Aalajaalluinnarlutik qulanngilluinnarlutillu“ tanitat suleqataasalu, savat allat, ajoqersuganngortitsinissamik peqqussut naammassivaat. (Kolossemiut 4:12; Matthæusi 24:14; 28:19, 20) 1946-mi Jehovap Nalunaajaasui silarsuaq tamakkerlugu 176.456-inik amerlassuseqalersimapput — amerlanerit amerlangaartunut ilaallutik. Siorna nalunaajaasut 6.000.000-init amerlanerusut nunani nunallu ilaani 235-ni aalajaallutik Jehovamut kiffartorput — ilumut amerlangaartut! Sulilu amerliartorlutik. (wE 15/5 01)