Nalunngeqatiginnissummik ilinniartinneqarsimasumik pisariaqartitsineq

Air New Zealandip timmisartuanut Antarktisimukartumut, Timmisartornermut 901-imut ilaallutik takusassarsiorianut inuttanullu ulloq puigunaatsuussagunarpoq. DC-10-p nunavik qaqortoq qanilliartormagu ilaasut qiimmakkiartorput, assiliivitik piareeqqallugit pukkitsumi timmilluni alutornangaartup takunissaa qilanaaralugu.

NAALAGAA timmisartortartutut nalunaaquttap-akunneri 11.000-t sinnerlugit timmisartoreerpoq. Aallartinnatik timmisartup ingerlavissaa timmisartup qarasaasiaanut immiuppaa, ilisimanagu naleqqat imaluunniit paasissutissat nalunaarutigineqartut kukkusuusut. DC-10-p 600 meterisut qutsitsigisumiilluni pujortoq qaqqamut innermik anitsisartumut Mount Erebusimut aporpoq, timmisartumilu issimasut 257-it tamarmik ajunaarlutik.

Soorlu timmisartut ullutsinni timminerminni aqqutissiuisinnaasunik qarasaasiaqartut, taamatuttaaq inuit nalunngeqatiginnissuseqarput inuunerup aqqutaani aqqutissiuisinnaasumik. Timmisartornermut 901-imut tunngatillugu pisimasup alianartup nalunngeqatiginnissut pillugu pingaarutilimmik ilinniartissinnaavaatigut. Soorlu sumiissusersiutit eqqortuunerat naleqqallu eqqorluartumik immiunneqarnerat timmisartornerup isumannaassusianut aalajangiisuusut, taamatuttaaq anersaakkut, ileqqussatigut timikkullu peqqissuserput nalunngeqatiginnissusermik malussarissumik, ileqqussatigut naleqqanik eqqortunik siulersorneqartumik, aalajangerneqarpoq.

Ullutsinni silarsuarmi naleqqat taamaattut ajoraluartumik sumiginnarneqartarput — naleraqanngivilluniluunniit. „Ullutsinni tusartuartarparput atuartut atuarsinnaanatillu allassinnaanngitsut, Frankrigilu nunap assingani nassaariuminaatsittaraat,“ ilinniartitsisoq Amerikamiu oqarpoq. „Sunalu eqqortuunersoq eqqunngitsuunersorluunniit immikkoortikkuminaatsippaat. Atuarfimmi atuarsinnaannginnerup allassinnaannginnerullu ajornartorsiutaaneranut ilanngunneqartariaqarpoq ileqqussatigut paatsiveerusimaarneq. . . . . Inuusuttut ullutsinni ileqqussatigut iseriattumiipput,“ nangilluni oqarpoq. „Suna ’eqqortuunersoq eqqunngitsuunersorlunniit’ aperineqaraangamik nalornileriasaarlutillu nipangeriasaarlutillu eqqissiveeruteriasaartarput . . . Gymnasiami atualernermik kingorna nakimaannerulertanngillat.“

Nalorninermut pissutaaqataavoq ileqqussat allanngorartuuneragaanerat — kina isummernersoq, suminngaanneernersoq sunaluunniit pitsaanerutinneqarnersoq apeqqutaatinneqarluni. Takorlooruk timmisartortartut sumiissusersiutaanni toraagassaat aalajangersimanngitsoq, assigiinngitsumik nikerartoq ilaatigullu tammavittartoq. Taava qularnanngitsumik Mount Erebusimi pisimasutut ajunaartorpassuaqassagaluarpoq. Ileqqussatigut najoqqutassiat siornatigut akuerisaasut ullutsinni akuerisaajunaarnerat toqusut naalliungaartullu amerliartornerannut pissutaaqataavoq, soorlu allasiorneq peqqutigalugu ilaqutariit avissaartuunnerat, millionillit aidsimik imaluunniit kinguaassiuutitigut atoqatigiinnermi nappaatipalaanik tunillatsinnerat.

Ileqqussat allanngorartuuneragaanerannik isuma nutaajunngilaq. Taamatut isiginnittaaseqartut itsaq Ninevemi najugaqartut ’talerpimmik saamimmillu paatsiveqartitsinngitsut’ assigilluinnarpaat. Ileqqussanik allangorartuuneraasut, Israelikkut tunussisut „ajortumik ajunnginneraasut ajunngitsumillu ajorneraasut“ assigaat. — Jona 4:11; Esaja 5:20.

Inatsisit najoqqutassallu paatsuugassaanngitsut nalunngeqatiginnissusitsinnik ilinniartitsisinnaasut eqqissisimanartullu sumi nassaarisinnaavavut? Millionillit isumaqarput  pisariaqartitsineq tamanna Biibilimit tamakkiisumik matussuserneqarsinnaasoq. Kinguaassiuutitigut suliffimmiluunniit ileqqorissaarneq, meeqqanik perorsaaneq imaluunniit guutisiorneq pillugit Biibilimi ilitsersuuteqarpoq. (2 Timotheusi 3:16) Tatiginartuunera ukiut hundredellit ingerlaneranni uppernarsisinneqarpoq. Ileqqussatigut najoqqutassiat Biibilimiittut oqaasissaqarnerusumit, inuit Pinngortitsisuannit aalajangerneqarput, taamaattumik tamanut pingaaruteqarput. Suna eqqortuunersoq sunalu eqqunngitsuunersoq ilisimanagu inuusariaqanngilagut.

Nalunngeqatiginnissuserput nalitsinni aatsaat taama saassunneqartigaaq. Sooruna saassunneqartoq? Qanoq ililluta illersorsinnaavarput? Saassussinernut kina tunuliaqutaanersoq, periaaserlu suna atorneraa paasiniaqqaariartigu. Tamanna allaaserisami tulliuttumi sammissavarput.