Annikilliornartuni Jehova tatigilluinnartariaqarparput

„Guuti tassa qimarnguffipput nakuussuterpullu, tamatigut ikiuiserput annikilliornartuni.“ — TUSSIAAT 46:2.

1, 2. (a) Assersuutip suup ersersippaa Guutimik tatiginninneraaneq naammanngitsoq? (b) Sooq Jehovamik tatiginninneraanermit iliuuseqarnerusariaqarpugut?

GUUTI tatigalugu oqartoqartarpoq, iliuuseqarnissarli allaalluinnarpoq. Assersuutigalugu ukiorpassuarni USA-mi aningaasat oqaasinnaamik imaattumik allannertaqarput: „Guuti tatigaarput“ * 1956-imi Amerikami inatsisartut inatsisiliorput nalunaarutiginnittumik oqariartaaseq taanna USA-mi inuiattut oqaasinnaarineqassasoq. Killormut sammisutut ittumik inuppassuit aningaasat pigissaarnerlu Guutimit tatigineruaat, USA-miinnaanngitsoq, silarsuarmili tamarmi. — Lukasi 12:16-21.

² Kristumiut ilumoortut oqaannassanngillat Jehova tatigalugu. Soorlu ’upperneq sulianik ilaqanngitsoq toqungasoq’, taamatuttaaq Guutimik upperinninneraanerigaluit tamarmik isumaqassanngillat iliuuseqanngikkutta. (Jaaku 2:26) Allaaserisap matuma siuliani ilinniarparput Jehovamik tatiginninnerput ersertartoq taassumunnga qinunitsigut, oqaasiani siunnersuutaasinnaasunik misissuinitsigut peqatigiiffianillu siulersortinnitsigut. Misissoriartigu iliuuserisassat taakku pingasut qanoq iluaqutigisinnaanerivut ajornartorsioraangatta annikkillioraangattalu.

Suliffeerukkaanni akissarsiakikkaanniluunniit

3. ’Ulluni atugarliungaarfiusuni’ makkunani Jehovap kiffai aningaasatigut qanoq ajornartorsiorpat, qanorlu nalunngilarput Guutip ikiorusukkaatigut?

³ ’Ulluni atugarliungaarfiusuni’ makkunani kristumiut aningaasatigut inuttut allatulli tatineqartarput. (2 Timotheusi 3:1) Taamaattumik suliffeeruteriataarsinnaavugut. Immaqaluunniit allatut ajornartumik akissarsiakilluta nalunaaquttap-akunnerpassuini sulisariaqarpugut. Pissutsini taamaattuni ’inoqutinik isumaginninneq’ ajornakusoorsinnaavoq. (1 Timotheusi 5:8) Piffissani taamaattuni Guutip Qutsinnerussaartup ikiorusuppaatigut? Aap, taamaalluinnarpoq. Soorunami pissutsit aaqqissuussaaneranni matumani ajornartorsiutaasunut tamanut sernissorneq ajorpaatigut, tatigigutsiguli oqaatsit Tussiaat 46:2-mi allassimasut ilumoorneri misigissavavut: „Guuti tassa qimarnguffipput nakuussuterpullu, tamatigut ikiuiserput annikilliornartuni.“ Qanorli ersersissinnaavarput aningaasatigut ajornartorsiorfiusuni Jehova tatigilluinnarlutigu?

4. Aningaasatigut ajornartorsioraangatta suna qinnutigisinnaavarput, qinnutillu taamaattut Jehovap qanoq akisarpai?

⁴ Jehovamik tatiginnilluta ilaatigut takutissinnaavarput qinunikkut saaffigalugu. Sunali qinnutigisinnaavarput? Aap, aningaasatigut ajornartorsioraangatta immaqa aatsaat taama pisariaqartitsigisarparput ilisimassuseq atoriaannaasoq, tassa ilisarsinermik, paasinninnermik siuneqassusermillu eqqortumik atuisinnaassuseq. Taamaattumik qinnutiginissaa nangaassutigeqinagu! Jehovap oqaatsimini ima neriorsorpaatigut:  „Ilisimassutsimigut inorsartumik ilaqarussi taassuma qinnutigissavaa ilisimassuseq Guutimit avoqqaarlernani naammalluinnartunik tamanut tunisisartumit, taava piumaarpaa.“ (Jaaku 1:5) Aap, ilisimassuseq Jehovamut qinnutigisigu silatusaartumik ajunngitsunillu aalajangiisinnaaqqulluta. Ataatarput qilammiusoq asannittoq neriorsuivoq qinnutit taamaattut tusartarumallugit. Uummammik iluunngaannit imminut tatiginnittut aqqutaannik nalimmatserinissamut piumassuseqartuaannarpoq. — Tussiaat 65:3; Ussatit 3:5, 6.

5, 6. (a) Sooq aningaasatigut ajornartorsiutit iliuuseqarfiginiarlugit Guutip oqaasiani iluaqutigisinnaasatsinnik misissuisinnaavugut? (b) Suliffeerukkaanni isumakuluutikinneruniarluni qanoq iliortoqarsinnaava?

⁵ Aammattaaq Jehova tatigalutigu takutissinnaavarput oqaasiani isumassarsiarititaasumi siunnersuutaasinnaasunik misissuilluta. Biibilimi Jehovap oqaaqqissaarutai silatusaartut ’ilumuungaarput’. (Tussiaat 93:5, 1961) Biibililu ukiut 1900-t sinnerlugit matuma siorna naammassineqaraluartoq, siunnersuuteqarpoq silatuusaartunik siuneqarluartunillu ullumikkut aningaasatigut ajornartorsiutinik pitsaanerusumik iliuuseqarfiginninnitsinnut iluaqutigisinnaasatsinnik. Ilisimassusermut atatillugu Biibilimeersunik assersuuteqariarta.

⁶ Qangarsuaq kunngi Salomo silatooq ima malugisaqarsimavoq: „Sulisartoq sinilluartarpoq nerilluarsimagaangami nerisakilaarsimagaluaraangamiluunniit. Angulli pisooq pisuussutaasa sinitsaaliortarpaat.“ (Oqaluussisartup oqaasii 5:12) Pigisanik iluarsaassineq, aserfallatsaaliineq, eqqiaaneq paarsinerlu piffissartornarpoq aningaasartornarlunilu. Taamaattumik suliffimmik annaasaqaraanni inooriaatsimik eqqarsaatiginneqqinnissamut pisariaqartitallu kissaatillu immikkoortinniarnissaannut periarfissaasinnaavoq. Isumakuluutissakinnerulerluni allannguineq silatusaarnerusinnaavoq. Assersuutigalugu pisariinnerusumik inuulersinnaavit minnerusumik initaarlutit pigisatilluunniit atorfissaqartinngisatit pigiunnaarlugit? — Matthæusi 6:22.

7, 8. (a) Inuit ingasattajaartumik isumakuloqqajaasarnerat Jiisusip eqqumaffigigaa qanoq nalunngilarput? (Aamma takuuk ataani ilanngussaq.) (b) Pisariaqanngitsumik isumakulunnginnissaq eqqarsaatigalugu Jiisusi silatuumik qanoq siunnersuiva?

⁷ Qaqqami oqaluutsimini Jiisusi ima siunnersuivoq: „Inuunersi isumakuluutigeqinasiuk, suna nerissagissi, suna imissagissi imaluunniit timissigut suna atissagissi.“ (Matthæusi 6:25) * Jiisusip nalunngilaa inuit naammalluinnanngitsut tunngaviusumik pisariaqartitaminnik ulapputiginninnissaat pissusissamisoorluinnartoq. Tamakkuli qanoq ’isumakuluutigiunnaarsinnaavavut’? ’Guutip . . . naalagaaffia ujaqqaarsiuk,’ Jiisusi oqarpoq. Qanorluunniit ajornartorsiuteqaraluarutta Jehovamik pallorfiginninneq salliutittuartariaqarparput. Taamaaliorutta ulluinnarni pisariaqartitavut Ataatatsinnit qilammiusumit ’ilanngullugit uagutsinut tunniunneqassapput’. Inuunermi pisariaqartitavut arlaatigut matussutississavai. — Matthæusi 6:33.

⁸ Taava Jiisusi ima siunnersuivoq: „Aqagussaq isumakuluutigeqinasiuk; aqagussaq nammineq piminik isumakuluutissaqassaaq.“ (Matthæusi 6:34) Silatusaarnerussanngilaq ingasattajaartumik isumakuluutigissallugu aqagussamut qanoq pisoqarsinnaanera. Biibilimik misissueqqissaartartoq ima oqarsimavoq: „Siunissaq qaqutiguinnaq takorluukkatsitut ajortigisarpoq.“ Eqqortumik pingaarnersiuinissamik ullullu ataasiakkaarlugit inuunissamik Biibilimi siunnersuutit maniguulluta malikkutsigik, pisariaqanngitsumik isumakulussanngilagut. — 1 Petrusi 5:6, 7.

9. Atuagassiat ’kiffap ilumoortup silatuullu’ saqqummersittagai aningaasatigut ajornartorsioraangatta qanoq iluaqutigisinnaavavut?

⁹ Aningaasatigut ajornartorsioraangatta Jehova tatigalutigu aamma takutissinnaavarput, atuagassiani ’kiffap ilumoortup silatuullu’  saqqummersittagaani siunnersuutaasinnaasunik misissuilluta. (Matthæusi 24:45) Ilaannikkut Iteritsi!-mi allaaserisaqartarpoq aningaasatigut unamminiarnartunut atatillugu iluaqutaasunik siunnersuutitalinnik. Allaaserisami „Arbejdsløs - Hvad kan man gøre?“-mi (kalaallisuujunngitsumi, „Suliffissaaleqigaanni qanoq iliortoqarsinnaava?“-mi) Vågn op! 8. aggusti 1991-imoortumi atoriaannaasunik arfineq-pingasunik siunnersuuteqarpoq inuppassuit suliffissaaleqinermik nalaanni aningaasatigut misigissutsimikkullu oqimaaqatigiissaariuarnissaminnut iluaqutigisaannik. * Soorunami siunnersuutigineqartut aningaasanillu eqqortumik isiginnittaaseqarneq oqimaaqatigiissinneqartariaqarput. Tamanna Vågn op!-ip normuani tassani „Penge er ikke alt“-mik (kalaallisuujunngitsumi, „Aningaasat pingaarnerunngilat“-mik) qulequtalimmi sammineqarpoq. — Oqaluussisartup oqaasii 7:12.

Peqqiilliuutinik naalliuuteqaraanni

10. Ilungersunartumik nappaateqaraanni Jehovamik tatiginninnissaq piviusorsiortuusoq kunngi Daavimik oqaluttuami qanoq ersersinneqarpa?

¹⁰ Ilungersunartumik nappaateqaraanni Jehovamik tatiginninnissaq piviusorsiornerua? Ilaana! Jehovap innuttani napparsimasut misiginneqatigingaarpai. Tamannaannaanngilarli: aamma ikiorusuppai. Assersuutigalugu kunngi Daavi eqqarsaatigeriaruk. Immaqa nammineq ilungersunartumik nappaateqarpoq Guutip naapertuilluartoq nappaammik eqqorneqartoq qanoq isumassortarneraa allaatigigamiuk. Ima allappoq: ’[Jehovap] nakussatsikkumaarpaa napparsimaffiani innangatillugu, nalaffia tamaat allanngortippat napparsimanerani.’ (Tussiaat 41:2, 4, 8, 9, 1961) Daavip Jehova tamatigut tatigilluinnartarpaa, kiisamilu peqqissivoq. Peqqissutsikkulli ajornartorsiuteqalissagutta Jehova tatigalugu qanoq takutissinnaavarput?

11. Nappaammik eqqorneqaraangatta Ataatarput qilammiusoq sumik qinnuigisinnaavarput?

¹¹ Nappaammik eqqorneqangaangatta, Jehovamik tatiginninnerput ersersissinnaavarput iliuuseqarfiginissaanut ikioqqulluta kimigiisernikkut. ’Ilisimassuseq atoriaannaasoq’ qinnutigisinnaavarput pissutsit atukkavut naapertorlugit peqqinnerpaajuarniarluta. (Ussatit 3:21) Aamma qinnuigisinnaavarput nikallujuinnissatsinnut naammagittarnissatsinnullu ikioqqulluta. Pingaarnerpaamillu Jehova qinnuigisariaqarparput qanorluunniit pisoqaraluarpat aalajaattuarnissatsinnut oqimaaqatigiissaariunnaannginnissatsinnullu nakussatsilluta tapersersoqqullutalu. (Filippimiut 4:13) Guutimut attaveqaannarneq ullumikkut inuuginnarnermit pingaaruteqarnerungaarpoq. Assuarnaatsuujuaannarutta, Jehova Guutip inuunermik naassanngitsumik peqqilluinnarnermillu tunissavaatigut. — Hebræerit 11:6.

12. Biibilimi najoqqutassiat suut iluaqutigissavavut nakorsaariaatsinut atatillugu silatusaarluta qinersinissatsinnut?

 ¹² Aammattaaq Jehovamut tatiginninnitta oqaasiani, Biibilimi, atoriaannaasunik siunnersuutinik misissuinnissatsinnut killissavaatigut. Biibilimi najoqqutassiat nakorsaariaatsimik silatusaarluta qinersinissatsinnut iluaqutigisinnaavavut. Assersuutigalugu nalunngilarput anersaalerineq Biibilimi assuarineqartoq, taamaattumillu nappaammik paasiniaanermi periaatsit nakorsaariaatsillu anersaalerinermut atassuteqarsinnaasut tamaasa ingalassimassavavut. (Galatiamiut 5:19-21; 5 Mosesi 18:10-12) Aajunalu assersuut alla Biibilimi ilisimassutsip tutsuiginartuuneranut: „Misilittagaqanngitsup tatigisarpai oqaaserineqartut suut tamaasa, silatuup alloriarnini sianigeqqissaartarpai.“ (Ussatit 14:15) Taamaattumik nakorsaatinik katsorsaaneq sorleq akuerissanerlugu eqqarsaatigigaangatsigu silatusaarnerussaaq katsorsaariaaseq pillugu tutsuiginartunik paasissutissarsiorutta, „oqaaserineqartut suut tamaasa“ tatiginagit. Taamatut „silatusaarluta“ iliuuseqarutta, iluaqutigissavarput periarfissatta assigiinngitsut eqqarsaatigilluarnissaannut paasisaqareerlutalu qinersinissatsinnut. — Titusi 2:12.

13, 14. (a) Napasuliaq Alapernaarsuiffik-mi Iteritsi!-milu peqinnissaq nappaatillu pillugit paasissutissaalluartunik sunik allaaserisaqarpa? (Qupperneq 18-imi ungalusaq takuuk.) (b) Vågn op! 22. januaari 2001-imoortumi katsorsarneqarsinnaanngitsumik nappaatilinnut qanoq siunnersuuteqarpa?

¹³ Aammattaaq Jehovamik tatiginnilluta ersersissinnaavarput inussiap aalajaatsup uagutsinnut atuagassiissutigisartagaani siunnersuutaasinnaasunik misissuilluta. Ilaannikkut atuagassiani Napasuliaq Alapernaarsuiffik-mi Iteritsi!-milu peqqissutsikkut ajornartorsiutit nappaatillu pillugit paasissutissaalluartunik allaaserisaqartarpoq. * Ilaannikkullu atuagassiani aamma oqaluttuaqartarpoq nappaatiminnik, naalliuutiminnik innarluutiminnillu assiginngitsunik iluatsittumik iliuuseqarfiginnittunik. Aammattaaq allaaserisaqarpoq katsorsarneqarsinnaanngitsunik peqqissutsikkut ajornartorsiuteqarnerup qanoq naammagalugu atornissaanut Biibilimeersunik atoriaannaasunillu siunnersuutitalinnik.

¹⁴ Assersuutigalugu Vågn op! 22. januaari 2001-imoortumi „Trøst til de syge“-mik (kalaallisuunngortitaanngitsunik, „Napparsimasunut tuppallersaat“-mik) qulequtalinnik allaaserisaqarpoq. Allaaserisani eqqaaneqarput Biibilimi najoqqutassiat iluaqutaasinnaasut, aamma angutit arnallu ukiorpassuarni innarluuteqalissutigisaminnik nappaateqarnertik pillugu oqaaserisaat eqqarsaallannartut piviusorsiortullu allassimapput. Allaaserisami „Hvordan man kan lære at leve med sin sygdom“-imi (kalaallisuunngortitaanngitsumi, „Nappaateqarnerup naammagalugu atornissaa qanoq ilikkarneqarsinnaasoq“-mi) ima siunnersuuteqarpoq: Nappaatit pillugu sapinngisannguannik paasiniaagit. (Ussatit 24:5) Anguniagaqarninni piviusorsiortuugit, ilaatigut allanik ikiuininni, paasiulli allat anguniagaattulli immaqa anguniagaqarsinnaanngitsutit. (Apustilit Suliaat 20:35; Galatiamiut 6:4) Immikkoorniartooqinak. (Ussatit 18:1) Pulaarneq pulaartunnut nuannersuutiguk. (Ussatit 17:22) Pingaarnerpaamik Jehovamut ilagiinnullu qanittumik attaveqartuarit. (Nahumi 1:7; Romamiut 1:11, 12) Jehovap peqatigiiffini aqqutigalugu siunnersuutigisartagaasa qujamasuutiginissaannut pissutissaqarluarpugut, ilaa?

Nammineq naammalluinnanngissutsimik akiugaqaraanni

15. Apustili Paulusi uinimmi naammalluinnanngitsup sanngiissutai qanoq ajugaaffigai, sunalu qularinngissinnaavarput?

¹⁵ ’Uininni ajunngitsoqanngitsoq,’ apustili Paulusi allappoq. (Romamiut 7:18) Paulusip nammineq misigaa uinngup naammalluinnanngitsup kissaatai sanngiissutaalu qanoq akioruminaatsigisut. Aammattaarli akiuunnermi ajugaasinnaalluni tatigaa. (1 Korinthimiut 9:26, 27) Qanoq? Jehovamik tatiginnilluinnarnikkut. Taamaattuminguna Paulusi ima allattoq: „Uangannguakkuluk! Kia kiffaajunnaarsissavaanga timimit matumannga toqup pianit? Guutili qujanarsili Jiisusi-Kristusikkut Naalakkatsigut!“  (Romamiut 7:24, 25) Uagummi? Uaguttaaq uinikkut sanngiissutit akiortariaqarpavut, akiuunnermilu ajugaanissaq qularileriaannaavarput. Aap, immaqa ajugaaffiginngisaannassallugu isumaqalerpugut. Jehovalli ikiussavaatigut, Paulusip tatiginninneratut, tatigilluinnarutsinni, nammineq nakuussuserput tatiginagu.

16. Suna qinnutigisariaqarparput uinikkut sanngiissut ajugaaffigiuminaatsikkutsigu, sanngiilleqqikkuttalu qanoq iliussaagut?

¹⁶ Sanngiiffipput sanngiiffigeqqittuaannarutsigu, Jehova tatigalugu takutissinnaavarput qinunikkut saaffigalugu. Jehovamut qinusariaqarpugut, aap, allaat kimigiisertariaqarpugut, anersaavanik illernartumik nakussatseqqulluta. (Lukasi 11:9-13) Immikkut taallugu imminut naalakkersinnaaneq ineriartortinniarlugu ikioqqulluta qinusinnaavugut. (Galatiamiut 5:22, 23) Sanngiilleqqikkuttami? Taava pingaarnerpaavoq akiuukkunnaannginnissarput. Qatsutinngisaannartigu isumakkeerfigeqqullutalu ikioqqullutalu maniguulluta Guutitsinnut nallittuisumut qinunikkut saaffiginnittarnerput. Jehovap ’peqqissimisumik artorsaateqangaartumillu’ uummatilik sumiginnanngisaannassavaa ajattunngisaannassalluguluunniit. (Tussiaat 51:19) Ilumoortumik peqqissimisumillu uummateqarluta Jehovamut qinugutta, ussernartut akiornissaannut ikiussavaatigut. — Filippimiut 4:6, 7.

17. (a) Sooq iluaqutaassava sanngiiffik immaqa akiugarput Jehovap qanoq isigineraa eqqarsaatigigutsigu? (b) Kamajasuugutta, oqarput aqukkuminaatsikkutsigu aliikkutassialluunniit ajorsinnaasut kajungerigutsigik allassimaffiit suut alanngaarsinnaanerat iluaqutaassava?

¹⁷ Aamma takutissinnaavarput Jehovamik tatiginnilluta iluaqutigisinnaasatsinnik oqaasiani misissuilluta. Bibelordbogi (kalaallisuunngortitaanngitsoq) imaluunniit Register til Vagttårnets publikationer (tamakkernagu kalaallisuujusoq) atorlugu apeqqut una akissutissarsisinnaavarput: ’Sanngiissut akiugara Jehovap qanoq isumaqarfigaa?’ Jehovap tamanna qanoq isigineraa eqqarsaatigigutsigu, nuannaartinnissaa kissaatiginerulissavarput. Jehovatut misigilissaagut uumigisaalu uumigilerlugit. (Tussiaat 97:10) Ilaasa iluaqutigingaarsimavaat sanngiissummut akiukkaminnut tunngasumik versinik Biibilimeersunik alanngaarsinnaaneq. Kamajasuuneq akiugaraarput? Taava immaqa pitsaassaaq Biibilimi versit Ussatit 14:17 aamma Efesosimiut 4:31 alanngaarsinnaagaanni. Oqarpullu aqukkuminaatsikkutsigu Ussatit 12:18-imi aamma Efesosimiut 4:29-mi  oqaatsit eqqaaqqinnerat iluaqutaassaaq. Aliikkutassiat ajorsinnaasut kajungeraavut? Taava Efesosimiut 5:3-mi aamma Kolossemiut 3:5-imi oqaatsit eqqaamaniarsinnaavavut.

18. Sooq sanngiiffitta ajugaaffiginissaannut ikioqqulluta utoqqaanertanut saaffiginninnissamut ittoorneq tunuarsimaarutigissanngilarput?

¹⁸ Aammattaaq Jehovamik tatiginnilluta takutissinnaavarput ilagiinni utoqqaanertanut, anersaaq illernartumit toqqarneqartunut, ikiortissarsiorluta. (Apustilit Suliaat 20:28) ’Inuit tunissutaasut’ taakku Jehovap Kristusi aqqutigalugu ilagiinnut tunniuppai savanik sernissuisussatut illersuisussatullu. (Efesosimiut 4:7, 8, 11-14, NV) Nassuerutigisariaqarpoq sanngiiffimmik akiugaqaraanni allat saaffiginissaat ikioqqullunilu qinnuiginissaat oqitsuujuaannanngitsoq. Immaqa ittoorpugut annilaangassutigalugulu utoqqaanertanit ajortumik isummerfigineqarnissarput. Qularutissaanngilarli angutit inersimalluartut anersaakkut ittunik pingaartitsisut taakkua ataqqissagaatigut ikioqqunissatsinnut sapiissuseqaratta. Aammattaaq utoqqaanertat Jehovap pissusii savaatinut ersersinniartarpaat. Siunnersuutaat qiimmaallannartut atoriaannaasullu Guutip oqaasianik tunngaveqartut immaqa tassarpiaapput nukissaqalersitseqqittut sanngiiffitta ajugaaffiginissaannut pisariaqartut. — Jaaku 5:14-16.

19. (a) Pissutsit aaqqissuussaaneranni matumani inuunerup piunngitsuussusia Saatanip qanoq atornerlunniarpaa? (b) Tatiginninneq ilaatigut qanoq isumaqarpa, sunalu aalajangiulluinnartariaqarparput?

¹⁹ Puiunngisaannaruk Saatanip piffissakissutsi nalunngikkaa. (Saqqummersitat 12:12) Kissaatigaa inuunerup piunngitsuussusia pissutigalugu nikallussasugut akiuukkunnaassasugullu. Oqaatsilli Romamiut 8:35-39-mi allassimasut tatigilluinnarsinnaavavut: „Kia Kristusip asannissusianit avissaartissavaatigut? Naalliunnartut siooranartulluunniit? Qinugisaanerup, kaannerup tamaqanngitsuunerulluunniit? Navianartorsiortitaanerup panalluunniit? . . . Tamakkuli tamaasa atortaraluarlugit asasitsigut taassumuuna ajugaalluinnaqaagut. Qularinngilluinnarparami toqulluunniit inuunerulluunniit, inngililluunniit pissaaneqaqataasaluunniit, maannakkut ittulluunniit piumaartussalluunniit, pissaanerilluunniit, qutsissulluunniit atsissulluunniit pinngortitalluunniit allat avissaartissinnaanngikkaatigut Guutip asannissusianit Kristusi-Jiisusimi Naalakkatsinni.“ Jehovamik tatiginningaarami! Misigissusiinnaanngilarli. Naagga, tatiginninneruvoq ulluinnarni eqqarsaatigilluakkanik qinersinikkut ersertartoq. Taamaattumik aalajangiulluinnartigu annikilliorfiusuni Jehovamik tatiginnilluinnarnissarput. (wE 9/1 03)

[Quppernerup ataani ilanngussat]

Eqqaamavigit?

• Aningaasatigut ajornartorsiorutta Jehova tatigalugu qanoq takutissinnaavarput?

• Nappaammik naalliuuteqarutta Guuti tatigigalugu qanoq takutissinnaavarput?

• Sanngiiffimmik akiugaqarutta Jehova tatigilluinnarlugu qanoq takutissinnaavarput?

[Atuaqqissaarnermi apeqqutit]

[Qupp. 18-mi ungalusaq]

Allaaserisat uku eqqaamavigit?

Peqqiilliornerput pissutigalugu nikallungagaangatta, qiimmaallannarsinnaavoq atuarlugu allat tarnikkut naalliuutit, nappaatit innarluutillu qanoq iliuuseqarfigisimaneraat. Allaaserisat uani eqqaaneqartut Napasuliaq Alapernaarsuiffik-mi Iteritsi!-milu saqqummersinneqarnikuupput.

„Puaasamiinnerataluunniit oqaluussisarnera unitsissinnaanngilaa.“ — Iteritsi! oktobari-decembari 1993-imoortoq.

„Mia Jehovalu kiserngorupput.“ Tassani lupus allaaserineqarpoq. — Iteritsi! apriili-juuni 1995-imoortoq.

„Andrew sumik ilikkagaqarfigigipput.“ Tassani Downs syndrome allaaserineqarpoq. — Iteritsi! januaari-marsi 1996-imoortoq.

„Ilissi aqagussamik siuneqanngitsusi.“ Tassani allaaserineqarpoq maniodepressiv psykose naammagalugu qanoq atorneqarsinnaasoq. — Napasuliaq Alapernaarsuiffik 1. decembari 2000-moortoq.

„Qaqugukkulluunniit Jehovamit napatinneqarneq.“ Tassani nukillaarneq allaaserineqarpoq. — Napasuliaq Alapernaarsuiffik 1. apriili 2001-imoortoq.

„Ernereernermi nikallortoornermut akiuunnera.“ — Iteritsi! oktobari-decembari 2002-moortoq.

[Qupp. 16-mi assiliartaq]

Suliffeerukkaanni silatusaarnerussaaq inooriaatsip eqqarsaatigeqqinnissaa

[Qupp. 19-mi assiliartaq]

Sanngiiffivut ajugaaffiginiarlugit ikioqqunissarput ittoorutigisariaqanngilarput