„Naalagaq, ajoqersortigut qanoq qinusassasugut“

„Ajoqersugaasa ilaata oqarfigaa: ’Naalagaq, ajoqersortigut qanoq qinusassasugut.’“ — LUKASI 11:1.

1. Sooq ajoqersukkat ilaata qanoq qinusarnissaminnik ilinniarteqqullutik Jiisusi qinnuigaa?

ILAANNI ukiumi 32-mi Jiisusi qinusoq ajoqersugaata isiginnaarpaa. Jiisusi Ataataminut qanoq oqarnersoq tusaasinnaanngilaa, ilimanarpormi nipaqanngitsumik qinusoq. Taamaattoq qinoreermat ajoqersukkap saaffigaa ima oqarluni: „Naalagaq, ajoqersortigut qanoq qinusassasugut.“ (Lukasi 11:1) Sooq ajoqersugaq qinunissamik ajoqersoqqua? Qinuneq juutit inuunerannut pallorfiginninnerannullu ilaalluinnarpoq. Allakkat Hebræerisuut, Tussiaatit-ni allanilu, qinnuterpaaluttaqarput. Tassa nalulluinnakkaminik misilissimanngisaannakkaminilluunniit ajoqersugaq ilinniarteqqunngilaq. Qularnanngitsumik juutit upperisarsiornikkut siuttuisa qinnutigisartagaat qalliinnarsiortut ilisimavai. Maannali Jiisusi qinusoq takoreerpaa, malugisimassagunarlugulu rabbinerit iluartuusaarlutik qinusarnerisa Jiisusillu qinusarnerata assigiinnginnerujussuat. — Matthæusi 6:5-8.

2. (a) Suup takutippaa Jiisusi isumaqanngitsoq qinnutip najoqqutassaasup oqaasertai issuaqqissaassagivut? (b) Sooq qanoq qinusarnissarput paaserusupparput?

² Ukiup aappaa qiteqqullugu tamatuma siorna Jiisusip qaqqami oqaluutsimini ajoqersukkani qinunermut najoqqutassippai. (Matthæusi 6:9-13) Imaassinnaavoq ajoqersugaq siuliani taaneqartoq taamani najuutinngitsoq, taamaattumillu Jiisusip qinnutip najoqqutassaasup pingaarnersai inussiarnerluni uteqqippai. Maluginiarnarpoq oqaasikkuutaarlugu issuaqqissaanngikkaa, tamatumami takutippaa ajoqersukkani naalagiarnermi aalajangersimasumik ileqqulersuutitut qinnummik alanngaagassinngikkai. (Lukasi 11:1-4) Ajoqersukkatut aqqatigut taaneqanngitsutut ilinniartinneqarusuppugut qinoriaatsimik Jehovamut qaninnerusumik attaveqalersitsisinnaasumik. Taamaattumik qinnutip najoqqutassaasup allanneqarnera sukumiinerpaaq misissoriartigu, tassa apustili Matthæusip allagaa. Tassani qinnutigineqartut arfineq-marluupput, taakkualu ilaat pingasut Guutip siunertaanut attuumassuteqarput sisamallu timikkut anersaakkullu pisariaqartitatsinnut attuumassuteqarlutik. Allaaserisami uani qinnutigineqartut siulliit pingasut sammissavavut.

Ataataq asannittoq

3, 4. Qanoq isumaqarpa Jehova ’Ataatatsinnik’ taagaangatsigu?

³ Aallarniinermigut Jiisusip takutippaa qinnutitta ersersittariaqaraat Jehovamut qanimut, ataqqinnittumilli, attaveqartugut. Jiisusip pingaarnertut saaffigai ajoqersukkani, qaqqap sivingarnani eqqamini katersuussimasut, oqarfigalugillu Jehova saaffigisassagaat ima: „Ataatarput qilanniittutit.“ (Matthæusi 6:9) Biibilimik misissueqqissaartartoq naapertorlugu Jiisusip oqaaseq „Ataataq“-mut atugaa, nalinginnaasumik hebræerisuujugaluarpat Aramæerisuujugaluarpalluunniit, meeqqap tunniusimasup ataatani pillugu atortagaanut assinguvoq. Jehova „Ataatarput“-mik taagaangatsigu, tassunga asannittumik tatiginnittumillu attaveqarnitsinnut ersiutaasarpoq.

⁴ „Ataatarput“-mik oqarnitsigut aamma ersersittarparput ilaqutariissuarnut angutinut arnanullu  Jehovap Inuunermik Tunisisuuneranik akuerinnittunut ilaalluta. (Esaja 64:7; Apustilit Suliaat 17:24, 28) Kristumiut anersaakkut kinguaassiarineqartut ’Guutip qitornaasut’ akuerisaapput, taamaattumillu ima ’torlulasinnaapput: Abba, Ataataq!’ (Romamiut 8:14, 15) Taakku millionilikkuutaanik ilumoorfiginnittunik suleqatitaarsimapput. Suleqataasut taakku inuunertik Jehovamut tunniulluinnarsimavaat tunniulluinnarnertillu kuisinnikkut takutillugu. Aamma ’savat allat’ taakku tamarmik Jiisusip aqqani Jehovamut palligussinnaapput ’Ataatamittullu’ taasinnaallugu. (Johannesi 10:16; 14:6) Ataatarput qilammiusoq qinunikkut qaqugukkulluunniit saaffigisinnaavarput unnersiutiginiarlugu, uagutsinnut ajunngissusianik qutsaviginiarlugu isumakuluutitsinnillu oqaluttuunniarlugu tatigalugu isumagiumaaraatigut. — Filippimiut 4:6, 7; 1 Petrusi 5:6, 7.

Jehovap aqqanut asanninneq

5. Qinnummi najoqqutassaasumi qinnutigineqartartoq siulleq sunaava, aamma sooq tamanna naleqquppa?

⁵ Qinnummi najoqqutassaasumi qinnutigineqartartoq siulleq aamma pingaarnerpaartaavoq. Ima allassimavoq: „Aqqit illernartitaali.“ (Matthæusi 6:9) Aap, Jehovap aqqata illernartitaanissaa uagutsinnut pingaaruteqangaartariaqarpoq asagatsigu aqqatalu kanngunarsaatigineqartuarneranik isiginnittuunnerput uumigigatsigu. Saatani pikitsitsigami inuillu siulliit Guutimut naalanngitsikkamigit Jehovap aqqa mamarlerpaa Guutip qilammi nunamilu kisimi oqartussaanerminik atueriaasia apeqquseramiuk. (1 Mosesi 3:1-6) Aammattaaq ukiuni hundredelikkuutaani Jehovap aqqa kanngunarsarneqarpoq taassumunnga sinniisuunerartut kanngunartuliornerisigut ajoqersuutaasigullu.

6. Jehovap aqqata illernartitaanissaanik qinnutitta qanoq iliuuseqarnaveersaartissavaatigut?

⁶ Jehovap aqqata illernarsisinneqarnissaa qinnutigigaangatsigu takutittarparput qilammi nunamilu kisimi oqartussaaneq pillugu akerleriissut qanoq isumaqarfiginerlutigu — tassa Jehovap qilammi nunamilu naalagaasussaanera tapersersorluinnarlutigu. Jehovap kissaatigaa qilak nunarsuarlu najugarineqartuaannassasut pinngortitanik silassorisunik piumassuseqarlutik nuannaarlutillu kisimi oqartussaaneranut naapertuilluartumut naalattunik taanna aqqanullu tunngasut tamaasa asagamikkik. (1 Nalunaarsuutit 29:10-13; Tussiaat 8:2; 148:13) Jehovap aqqanik asanninnerput atermut illernartumut tamatumunnga kanngunarsaataasinnaasumik iliuuseqarnaveersaarnissatsinnut iluaqutigissavarput. (Ezekieli 36:20, 21; Romamiut 2:21-24) Qilammi nunamilu taakkunanilu ineqartut akornanni eqqissinissamut Jehovap aqqata illernarsisitaanissaa inuillu Guutimut asanninnertik pissutigalugu taassuma kisimi oqartussaaneranut naalatsigitinnerat apeqqutaammata, ’aqqata illernartitaanissaanik’ qinnuterput Jehovap nersornaatissaanut siunertaata naammassineqarumaarneranik upperinninnitsinnut ersiutaavoq. — Ezekieli 38:23.

Naalagaaffik qinnutigisartagarput

7, 8. (a) Naalagaaffik suna qinnutigisaqqullugu Jiisusip ilinniartippaatigut? (b) Naalagaaffik taanna pillugu Danielimik allakkat aamma Saqqummersitat sumik ilinniarfigaavut?

⁷ Qinnummi najoqqutassaasumi qinnutigineqartup  aappaa imaappoq: „Naalagaaffiit tikiulli.“ (Matthæusi 6:10) Qinnutigineqartumut siullermut attuumassuteqarluinnarpoq. Jehovap aterminik illernarsisitsiguni atugassaa tassaavoq naalagaaffik Missiarsikkoortoq, qilammi naalagaaffik erneranik, Jiisusi Kristusimik, inatsisinut naapertuuttumik kunngilik. (Tussiaat 2:1-9) Danielip siulittuutaani naalagaaffik Missiarsikkoortoq ’ujaqqattut qaqqamit kaanngartutut’ allaatigineqarpoq. (Danieli 2:34, 35, 44, 45) Qaqqaq tassaavoq Jehovap qilammi nunarsuarmilu kisimi oqartussaanera, taamaattumillu „ujarak“, naalagaaffik Missiarsikkoortoq, tassaavoq Jehovap qilammi nunarsuarmilu kisimi oqartussaaneranik ersiut nutaaq. Siulittuummi ujarak „qaqqarsuanngorpoq nunarsuaq tamakkerlugu“, tamatumalu ersersippaa naalagaaffik Missiarsikkoortoq Guutip kisimi oqartussaaneranut sinniisuussasoq nunarsuarmullu tamarmut naalagaassasoq.

⁸ Kristusip qilammi naalagaaffimmeeqatigai 144.000-t allat, ’inunnit immikkoortinneqarsimasut’ kunngitut palasitullu naalakkersueqatigissagamikku. (Saqqummersitat 5:9, 10; 14:1-4; 20:6) Danielip taakku ’Qutsinnerussaartup illernartortaanik’ taavai, taakkununngalu, niaquannullu Kristusimut, tunniunneqassapput „kunngiussuseq naalagaassuserlu pissaaneqassuserlu kunngeqarfiit qilaap ataaniittut tamarmik . . . Taakkua kunngeqarfiat soraarfeqassanngilaq, pissaanillillu tamarmik taakku kiffartorfigalugillu naalassavaat.“ (Danieli 7:13, 14, 18, 27) Qilammi naalagaaffik taanna tassaavoq Kristusip ajoqersukkaminut qinnutigisaqqullugu ilinniartitsissutigisaa.

Sooq naalagaaffik taanna suli qinnutigisassavarput?

9. Guutip naalagaaffiata tikiunnissaata qinnutiginissaa sooq pissusissamisoorpa?

⁹ Qinunermut najoqqutassiamini Kristusip ilinniartippaatigut Guutip naalagaaffiata tikiunnissaa qinnutigisassagipput. Biibilimi siulittuutit eqquunerisa takutippaat naalagaaffik Missiarsikkoortoq 1914-imi qilammi pilersinneqartoq. * Taamaammat naalagaaffiup tamatuma ’tikiunnissaata’ qinnutiginissaa suli pissusissamisoorpa? Aap, taamaalluinnarpoq. Danielimmi siulittuutaani naalagaaffik Missiarsikkoortoq, ujaqqamut assersuunneqartoq, inuit politikkikkut naalakkersuisunut, inuusaliarujussuarmut assersuunneqartumut, aporaluttuartutut ippoq. Ujarak suli inuusaliap taassuma tungaanukarpoq, imalu sakkortutigisumik eqqussavaa pujoralaannanngortillugu. Danielip siulittuutaani ima allassimavoq: „Kingorna inuiaat allat kunngiussutsimik pilersitsisinnaassanngillat. Guutip naalagaaffiata kunngeqarfiit allat tamaasa aserortissavai suujunnaarsillugillu, namminerli soraajuitsumik atassaaq.“ — Danieli 2:44.

10. Sooq Guutip naalagaaffiata tikiunnissaa erinigaarput?

¹⁰ Guutip naalagaaffiata tikiukkuni Saatanip pissutsinik aaqqissuussineranut ajortumut akuliunnissaa erinigaarput, tamannami Jehovap aqqanik illernarsisitsinerussaaq Guutillu kisimi oqartussaaneranut akerliusunik tamanik piuneerussinerussalluni. Qamannga pisumik ima qinuvugut: „Naalagaaffiit tikiulli,“ apustili Johannesillu  oqaasii issuarlugit ima oqarpugut: „Amen, aggerniarit Naalagaq Jiisusi!“ (Saqqummersitat 22:20) Aap, qanortoq Jiisusi tikiulli Jehovap aqqanik illernarsisitsiartorluni kisimilu oqartussaaneranik akitsisitsiartorluni, tussiaasiortup oqaasii eqquuteqqullugit: „Paasitserlugu illit kisivit — aqqit tassaasoq Jahve — Qutsinnerussaartuusutit nunarsuarmi tamarmi.“ — Tussiaat 83:19.

„Piumasat . . . pili“

11, 12. (a) Suna qinnutigisarparput ima qinugaangatta: „Piumasat qilammisut nunamissaaq pili“? (b) Jehovap piumasaata pinissaa qinnutigigaangatsigu aamma suna ersersittarparput?

¹¹ Taava Jiisusip ajoqersukkani ima qinunissaannik ilinniartippai: „Piumasat qilammisut nunamissaaq pili.“ (Matthæusi 6:10) Jehovap piumasarimmagu avataarsua nunarsuarlu pinngorput. Pinngortitat pissaasut qilammiittut Jehovamut ima suaarput: „Illit, Naalagarput Guuterpullu, qinngaqqunnanngillat pigissallugit naalannaat ataqqinaallu pissaanerlu; illimmi suut tamaasa pinngortippatit, illit piumasakkut piulerput pinngortitaallutillu.“ (Saqqummersitat 4:11) „Qilammiittut nunamiittullu“ Jehovap siunertaqarfigai. (Efesosimiut 1:8-10) Guutip piumasaata pinissaa qinnutigigaangatsigu Jehova qinnuigisarparput siunertaminik piviusunngortitseqqullugu. Aammattaarlu ersersittarparput Guutip piumasaata avataarsuani nunarsuarmilu tamarmi pinissaa erinigalutigu.

¹² Taamatut qinunikkut aamma ersersittarparput Jehovap piumasaa naapertorlugu inoorusulluta. Jiisusi ima oqarpoq: „Uanga nerisassara tassaavoq aallartitsisima piumasaa malillugu iliornissaq suliassarititaatalu naammassinissaa.“ (Johannesi 4:34) Kristumiutut tunniulluinnarsimasutut Guutip piumasaatut iliuuseqarnerput Jiisusip nuannaarutiginninneratut nuannaarutigaarput. Jehovamut erneranullu asanninnerput kajumississutigalugu ’inuit pilerissusii piunnaarlugit Guutip piumasaa malissavarput’. (1 Petrusi 4:1, 2; 2 Korinthimiut 5:14, 15) Jehovap piumasaanut akerliusumik iliuuseqarnaveersaarpugut. (1 Thessalonikamiut 4:3-5) Biibilimik atuarnissamut atuaqqissaarnissamullu piffissarsinikkut ’paasiuarsinnaavarput suna Jehovap piumasarigaa’, piumasaanullu ilaavoq „naalagaaffimmik iivangkiiliu“ pillugu oqaluusseqataanissarput. — Efesosimiut 5:15-17; Matthæusi 24:14.

Jehovap qilammi piumasaa

13. Saatani suli pikitsitseqqajanngitsoq Guutip piumasaa qanoq piva?

¹³ Jehovap piumasaa qilammi pivoq ernerisa anersaajusut ilaat pikitsitsilluni suli Saataninngoqqajanngitsoq. Ussatit-ni Guutip angajulliliaa ilisimassutsitut kinaassusilikkatut allaatigineqarpoq. Tassani erserpoq Guutip Ernitua ukiorparpassuarni amerlassusii ilisimaneqanngitsuni Guutip ’kiinaata saani qitittuartoq’ Ataatami piumasaatut iliornerminik nuannaarutiginnittuulluni. Kingusinnerusukkut Jehovap „qilanni nunamilu, takussaasut takussaanngitsullu“ tamaasa pinngortiortuleramigit Jiisusi ’suliortumisut’ (NV) atorpaa. (Ussatit 8:22-31; Kolossemiut 1:15-17) Jehovap Jiisusi atorpaa „Oqaaseq“-misut, imaluunniit oqaaseqartartumisut. — Johannesi 1:1-3.

14. Tussiaat 103 naapertorlugu Jehovap qilammi piumasaa inngilinit qanoq naammassineqartarpa?

¹⁴ Tussiaasiortup ersersippaa Jehova qilammi nunamilu kisimi oqartussaasoq inngilerpassuillu oqaasii tusaagaat peqqussutaalu naalallugit. Ima allassimavoq: „[Jehovap] issiavissaarsuani qilammi aalajaatsumik inissippaa, kunngisullu tamaasa naalagaaffigai. [Jehova] nersorsiuk, ilissi inngilii, ilissi sorsuttartut peqqusaanik naammassisitsisartut oqaasii naalallugit. [Jehova] nersorsiuk, katersai tamassi, ilissi kiffai naammassisitsisartut piumasaanik. [Jehova] nersorsiuk, pinngortitai tamassi naalagaaffiani [kisimi oqartussaaffiani] sumiluunniit ittusi.“ — Tussiaat 103:19-22.

15. Guutip piumasaata qilammi naammassineqarnissaanut Jiisusip kunnginngornera qanoq sunniuteqarpa?

¹⁵ Jobimik allakkani ersersinneqartutut Saatani pikitsitsinermi kingorna suli qilammiissinnaatitaavoq. (Jobi 1:6-12; 2:1-7) Saqqummersitatnili siulittuutigineqarpoq Saatani inngilipiluilu qilammit igitaajumaartut. Erseqqilluinnarpoq tamanna Jiisusi Kristusip 1914-imi kunnginngornerata kinguninngua pisoq. Taamanimiilli pikitsitsisut taakku qilammi inissaarupput. Nunarsuup  eqqaa taamaallaat sunniuteqarfigisinnaavaat. (Saqqummersitat 12:7-12) Maanna qilammi eqqissiviilliortitsisoqarunnaarpoq; ’Savaaqqamik’, Jiisusi Kristusimik, nersuisut maniguullutillu Jehovamik unnersiutiginnittut nipaat kisimik tusarsaapput. (Saqqummersitat 4:9-11) Aap, Jehovap piumasaa qilammi pivoq.

Jehovap nunarsuaq pillugu piumasaa

16. Qinnut najoqqutassaasoq kristumiuunerartut inuiaat neriuutaannik ajoqersuutaasa eqqunngitsuunerannut qanoq uppernarsaataava?

¹⁶ Kristumiuuneraqatigiit nunarsuaq Guutip siunertaani inissaqarsorinngilaat, isumaqaramik inuit ajunngitsut tamarmik qilaliassasut. Jiisusilli ilinniartippaatigut ima qinussasugut: „Naalagaaffiit tikiulli, piumasat qilammisut nunamissaaq pili.“ (Matthæusi 6:10) Maanna taama nakuusertoqartigisoq, naapertuilluanngitsuliortoqartigisoq, nappaateqartoqartigisoq toqusoqartartigisorlu ullumikkut Jehovap piumasaa nunarsuarmi pinerarlugu oqartoqarsinnaanngilluinnarpoq! Taamaattumik qamannga pisumik qinnutigisariaqarparput Guutip piumasaata nunarsuarmi pinissaa, neriorsuummut apustili Petrusip allagaanut uunga naapertuuttumik: „Neriorsuutaa naapertorlugu ilimagisaraavut qilaat nutaat [naalagaaffik Missiarsikkoortoq Jiisusimik kunngilik] nunalu nutaaq [innuttaaqatigiit naapertuilluartuusut] iluassutsip najugarisassai.“ — 2 Petrusi 3:13.

17. Jehovap nunarsuaq sumik siunertaqarfigaa?

¹⁷ Jehova nunarsuarmik pinngortitsigami siunertaqarpoq. Pruffiiti Esaja isumassarsisillugu ima allatsippaa: „Ima oqarpoq [Jehova], qilammik pinngortitsisoq, Guutiusoq, nunamik ilusiliisoq pilersitsisorlu tunngaviliisorlu; soqanngitsussanngorlugu pinngortinngilaa, kisianni najugaqarfissanngortillugu: Uanga [tassaavunga Jehova], allamik taamaattoqanngilaq.“ (Esaja 45:18) Guutip aappariit siulliit naatsiivimmut paratiisimut inisippai imalu peqqullugit: „Kinguaassiorlusi amerliartoritsi nunarsuaq tamakkerlugu ilissinnullu naalatsigitillugu.“ (1 Mosesi 1:27, 28; 2:15) Erseqqippoq Pinngortitsisup siunertarigaa nunarsuaq najugarineqassasoq inunnit naapertuilluartunit naammalluinnartunit nuannaarlutik kisimi oqartussaaneranut naalattunit paratiisimilu, aamma Jiisusip eqqaasaani, naassaanngitsumik inuusussanit. — Tussiaat 37:11, 29; Lukasi 23:43.

18, 19. (a) Qanoq iliortoqartariaqarpa Guutip piumasaa nunarsuarmi tamakkiisumik pisinnaassappat? (b) Jiisusip qinnutaata najoqqutassaasup immikkoortui allat suut allaaserisami tulliuttumi sammissavavut?

¹⁸ Jehovap nunarsuaq pillugu piumasaa tamakkiisumik pisinnaanngilaq anguteqartillugu arnaqartillugulu kisimi oqartussaaneranik akerlilersuisunik. Taamaattumik Guutip pinngortitat anersaajusut pissaanillit Kristusimit siulersorneqartut atorlugit ’aserussavai nunarsuarmik aseruisut’. Saatanip pissutsinik aaqqissuussinera ajortoq tamarmi, upperisarsiorneri ilumuunngitsut, politikkerii peqquserluttut, niuertui piumatuut unneqqaserluttullu sakkutooqarneralu aserorsaataasoq ilanngullugit, naassaanngitsumik piuneerunneqassaaq. (Saqqummersitat 11:18; 18:21; 19:1, 2, 11-18) Jehovap kisimi oqartussaanera qutsissisinneqassaaq aqqalu illernartoq illernarsisinneqassalluni. Tamakku tamaasa qinnutigisarpavut ima oqaraangatta: „Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.“ — Matthæusi 6:9, 10.

¹⁹ Qinnutimigulli najoqqutassaasukkut Jiisusip takutippaa immitsinnut tunngasut aamma qinnutigisinnaagivut. Allaaserisami tulliuttumi tamanna pillugu Jiisusip siunnersuutaa sammissavarput.

[Quppernerup ataani ilanngussaq]

Uteqqiineq

• Sooq naleqquppa Jehovamut saaffiginnikkaangatta ima oqarnissarput: „Ataatarput“?

• Sooq pingaaruteqarluinnarpa Jehovap aqqata illernarsisinneqarnissaanik qinusarnerput?

• Sooq Guutip naalagaaffiata tikiunnissaa qinnutigisarparput?

• Guutip piumasaata qilammisut nunamissaaq pinissaanik qinunermi suut ilanngullugit qinnutigineqartarpat?

[Atuaqqissaarnermi apeqqutit]

[Qupp. 11-mi assiliartaq]

Jiisusip qinnutai farisiiarit iluartuusaarlutik qinnutaannit allaanerulluinnarput

[Qupp. 12-mi assiliartaq]

Kristumiut qinnutigisarpaat Guutip naalagaaffiata tikiunnissaa, aqqata illernartitaanissaa piumasaatalu pinissaa