Meeqqanik perorsaaneq unamminiagassarujussuaq

UNNUPPOQ kingusilluni, neriniartarfiutilillu matunissaminut angerlarnissaminullu piareersarpoq. Kisianni arnat marluk meerarlu takkupput nerisassanillu inniminniillutik. Neriniartarfiutilik qasusorujussuuvoq oqarusunnerugaluarlunilu neriniartarfik matusoq, aalajangerporli pisitinniarlugit. Arnat taakkua marluk nerillutik oqaloqatigiitsillugit, meeraq neriniartarfimmi uteqattaarluni arpaqattaarpoq, kaageeqqat natermut nakkaatippai tullaaralugillu. Meeraq unitsinniarlugu arnaa iliuuseqanngilaq qungujulaannarlunili. Isersimasut kiisami animmata, neriniartarfiutillip qasusup meeqqap nakkaatitai salippai.

Soorlu ulluinnarni pisup annikitsup takutikkaa, ilaqutariinni amerlasuuni meeqqanik perorsaaneq pingaartinneqanngilaq. Assigiinngitsut pissutaasinnaapput. Angajoqqaat ilaat assut maleruutiasuupput meeqqallu piumasaannik iliortittarlugit, isumaqaramik meeqqat kiffaanngissuseqartariaqartut. Aamma imaassinnaavoq ilaat ulapinneq pissutigalugu meeqqamik pisariaqartitaannik samminissaannut ilitsersornissaannullu piffissaqanngitsut. Angajoqqaat allat meeqqamik atuarnerat ernumassutigineruaat killeqanngingajattumillu kiffaanngissuseqartillugit, atuarfimmi angusarissaarpata universitetimilu atuarpata naammagalugu.

Ilaalli isumaqarput angajoqqaat inuiaqatigiillu tamarmik piviusorsiornerusunik eriagisariaqartunik najoqqutaqartariaqartut. Tamatumunnga tunngavilersuutigaat meeqqat pinerluttuliornerni assigiinngitsorpassuarni peqataalersinneqartut takussaammata, atuarfinnilu nakuuserneq ingasatsikkiartorluni. Tamanna tunngavigalugu, Seoulimi Koreami kujallermi atuarfiup ittuata, pissuserissaarnerup ilinniarneqarnissaata pingaaruteqarnera inuppalaartumillu ajunngitsunik pissuseqarnerup pigilernissaa erseqqissarpaa. Taanna oqarpoq: „Pissuserissuuneq ilisimasanit pingaarnerusariaqarpoq.“

Angajoqqaat amerlasuut meeqqamik ilinniarteqqitaanissaannik angusaqarluarlutillu atorfeqarnissaannik kissaatigisaqartut, mianersoqqussutit tusaajumanngilaat. Ataataaguit anaanaaguilluunniit, taava meeqqavit qanoq ittunngornissaa kissaatigaajuk? Inersimasut akisussaassusermik pingaartitsisut ileqqup suup eqqortuuneranut misikkarissut? Allanik innimiginnittut, sungiussiasut oqaluukkuminartullu? Taava ilanngutassiap tulliuttup atuarnissaa soqutigissagunarpat.