Jehovap oqaasia uumavoq

Tussiaatit immikkoortuisa pingajuannit sisamaannillu pingaarnersat

TUSSIAASIORTOQ Guutimut qinunikkut ima aperivoq: „Eqqartorneqarpa ilivermi ilumoorsutsit, unneqqarissutsillu uneriffimmi?“ (Tussiaat 88:12) Akissutaa soorunami naamiuvoq. Uumanngikkutta Jehova unnersiutigisinnaanngilarput. Jehovamik unnersiutiginninneq inuuinnarnissamut pissutissaalluarpoq, inuunerpullu taassuminnga unnersiutiginninnissamut pissutissaalluarpoq.

Tussiaatit immikkoortuisa pingajuat sisamaallu, Tussiaat 73-imiit 106-imut, Pinngortitsisitsinnik unnersiutiginninnissamut aqqanillu pilluaqqusinissamut uagutsinnik pissutissarpassuaqalersitsipput. Tussiaatinik taakkuninnga eqqarsaatiginneqqissaarneq ’Guutip oqaasianik’ pingaartitsinerulissutigisariaqarparput taassuminngalu unnersiutiginninnerulernissamut pitsaanerusumillu unnersiutiginninnissamut kajumississutigisariaqarlutigu. (Hebræerit 4:12) Tussiaatit immikkoortuisa pingajuat misissorneroriartigu.

„UANNUT PITSAANERPAAVOQ GUUTIMUT QANILLINEQ“

(Tussiaat 73:1–89:53)

Tussiaatit immikkoortuisa pingajuanni tussiaatit siulliit aqqanillit Asafimit taassumaluunniit kinguaavinit allataapput. Tussiaammi siullermi oqaluttuarineqarpoq Asafi kukkusumik eqqarsartaaseqalerluni tammartitaanissaraluaminit qanoq annaanneqartoq. Ajunngitsumik ima isummerpoq: „Uannut pitsaanerpaavoq Guutimut qanillineq.“ (Tussiaat 73:28, NV) Tussiaat 74 Jerusalemip aserugaanera pillugu upputaavoq. Tussiaat 75-imi, 76-imi 77-imilu Jehova Eqqartuussisutut naapertuilluartutut, qanilaartut Annaassisaattut qinnutinillu tusartartutut eqqartorneqarpoq. Tussiaat 78-imi Mosesip nalaaniit Daavip nalaata tungaanut Israelikkut oqaluttuarisaanerat oqaluttuareqqinneqarpoq. Tussiaat 79-imi naalaffiup aserugaanera upputigineqarpoq, taava Guutip innuttaasa pilerseqqinneqarnissaat qinnutigineqarpoq. Tussiaat 81 Jehovamut naalannissamut kajumissaarutaavoq. Tussiaatini tulliuttuni marlunni Jehova akeqqaminut eqqartuussisunullu peqquserluttunut eqqartuussutiminik naammassinneqqullugu qinnutigineqarpoq.

„Tarniga tumanngusimagaluarpoq kiperiffigalugit [Jehovap] silarliutai,“ Korap erneri erinarsorput. (Tussiaat 84:3) Tussiaat 85 aallarussaaqqanerminnit utertut Guutimit pilluaqquneqarnissaannik qinnutaavoq. Tussiaammi tassani erseqqissarneqarpoq anersaakkut pilluaqqussutit timikkut pilluaqqussutinit naleqarnerungaartut. Tussiaat 86-imi Daavip sernissoqqulluni siunnersoqqullunilu Guuti qinnuigaa. Tussiaat 87 Zioni tassanilu inunngortut pillugit erinarsuutaavoq tulleraalu Tussiaat 88-imi Jehovamut qinnut. Jehovap Daavimik angerusianut atatillugu Jehovap ilumoorfiginnilluni tunniusimanera Tussiaat 89-imi erseqqissarneqarpoq. Tussiaat taanna Etanimit, Salomop nalaani angutit ilisimassuseqangaartut sisamaasut arlarigunagaannit, allataavoq. — 1 Kunngit 4:31.

 Allassimaffiit pillugit apeqqutit akineqartut:

73:9 — ’Qanertik qilaap tungaanut saatsikkaat, oqaallu nunarsuarmi tamanut aallaqattaartut’ qanoq paasisariaqarpa? Guutiitsut qilammiittunik nunamiittunilluunniit sunilluunniit ataqqinninnginnamik qanerminnik Guutimik mitalliinissartik oqqaminnillu inoqatiminnik ajortumik eqqartuinissartik tunuarsimaarfiginngilaat.

74:13, 14 — Qanga Jehovap ’uumasorujuit niaqui imaani sequmippai Livjatanillu niaqui sequtserlugit’? „Egyptenip kunngia, Farao“ taaneqartarpoq ’kuukkooriarsuarmik kuussuarni uninngaartumik’. (Ezekieli 29:3) Niaquisa sequmisitaaneranni pineqarunarpoq Jehovap Israelikkut Egyptenimi inussiaanerannit aniguisikkamigit Faraop sakkutuuisalu ajorsartitaarujussuarnerat.

75:5, 6, 11 — Oqariartaaseq ’nassuk’ qanoq isumaqarpa? Uumasup nassua sakkuulluartuuvoq. Taamaattumik oqariartaaseq ’nassuk’ pissaanermut, imaluunniit nukimmut, assersuutaavoq. Jehovap innuttami nassui massitsittarpai, tassa innuttani akitsisittarpai, ’iluanngitsulli nassui tamaasa killortarpai’. ’Nassutta qilaap tungaanut massitsinnissaannut’, tassa makitasuunngornissamut imaluunniit pingaakujuttunngornissamut, mianersoqquneqarpugut. Jehova tassaammat akitsisitsisoq ilagiinni akisussaaffik sunaluunniit taassumanngaaneersutut isigisariaqarpoq. — Tussiaat 75:8.

76:11, 1900/1961 — Inuit kamannerat Jehovamut qanoq nersornaataava? Guutip taassumunnga kiffaanerput pissutigalugu inunnit kamaanneqarnissarput akuerigaangagu ajunngitsumik kinguneqarsinnaasarpoq. Atugarliornerit suulluunniit ilinniarfigisinnaavavut. Taamatut atugarliornissarput ilinniarfigisinnaagutsigu aatsaat Jehovap akuerissavaa. (1 Petrusi 5:10) Guuti ’kamannerup sinneranik qiterutserpoq’. Taavami naalliuutivut toqumik kinguneqarpata? Tamanna aamma Jehovamut nersornaataasinnaavoq, aalajaannitsinnimmi takunnittut Jehovamik naalannarsisitsilersinnaapput.

78:24, 25 — Sooruna manna taaneqartoq „karrinik qilaap pigisaanik“ aamma ’inngilit timiusartugaannik’? Oqariartaatsit taakkua arlaannaalluunniit isumaqanngilaq inngilit mannatortartut. Manna tassaavoq ’karrit qilaap pigisai’ ima paasillugu qilamminngaaneersuuvoq. (Tussiaat 105:40) Inngilit qilammi najugaqarmata oqariartaaseq „inngilit timiusartugaat“ isumaqaannarsinnaavoq Guutimit, qilammi najugaqartumit, pilersinneqartoq. (Tussiaat 11:4) Jehovap aamma inngilit atorsimasinnaavai Israelikkut mannamik pilersoramigit.

82:1, 6 — ’Guutit’ aamma ’Qutsinnerussaartup erneri’ kikkuuppat? Oqariartaatsini marlunni taakkunani pineqarput Israelimi eqqartuussisut nunamiut. Taaguutit tulluartuupput eqqartuussisummi taakkua Jehovamut sinniisuupput taannalu sinnerlugu oqaaseqartartuullutik. — Johannesi 10:33-36.

83:3 — Oqariartaaseq „niaqqutik massitippaat“ qanoq isumaqarpa? Isumaqarpoq pissaanermik atuinissamut iliuuseqarnissamulluunniit, amerlanertigut arlaannik assortuiniarluni akerlilersuiniarluni naqisimanninniarluniluunniit, piareersimaneq.

Ilinniarfigisinnaasavut:

73:2-5, 18-20, 25, 28. Guutiitsut pigissaarmata sinngagilissanngilagut ajortuliaallu ilaarniassanagit. Guutiitsut ’aqqutini quasartuniipput’ qularnanngivipporlu ’aserorsimassusermut orlutitaanissaat’. Inuit naammalluinnanngitsut naalakkersuinerat ajussuseerutsitsisinnaanngimmat,  ajussuseerutsitsiniarnerigaluagut tamarmik asuliinnaassapput. Ajussuseqaraluartoq Asafitut pinertusaarsinnaavugut ’Guutimut qanillinitsigut’ taassumunngalu qanittumik attaveqarnitsinnik nuannaarutiginninnitsigut.

73:3, 6, 8, 27. Anneruniartuuneq, mitallersuuneq, makitasaartuuneq allanilluunniit iluanaarniarfiginninneq — aamma pitsaaquteqarsorinaraluarpat — mianersorfigisariaqarparput.

73:15-17. Arlaannik eqqissiunnaarutigisaqarutta paasinngisaqaruttaluunniit kikkunnut tamanut oqaluuserisariaqanngilavut. Taamatut oqalunneq allat nikallussutigiinnassavaat. Eqqarsaatiginneqqissaarneq uppeqatitsinnillu katerisimaaqateqarnikkut ajornartorsiummik aaqqiineq pitsaaneruvoq. — Ussatit 18:1.

73:21-24. Guutiitsut ingerlalluarpasinnerannik uummatikkut narrutsaatiginninneq nersummut sianiitsumut, imaluunniit paasisimasaqanngitsumut, assersuunneqarsinnaavoq. Taamatut misigineq misigissutsit kisiisa tunngavigalugit eqqarsaqqaarnani iliuuseqarneruvoq. Taamaannata Jehovap siunnersuutai malittariaqarpavut tatigilluinnarlugu ’talerpipput tigussagaa’ ikiussagaatigullu. Taava Jehovap ’naalannassusermukaatissavaatigut’, tassa imminut qanittumik attaveqalernissamut ikiussavaatigut.

77:7. Anersaakkut sallusuissutinik qamannga pisumik eqqarsaatiginnittassagaanni killisiuisassagaannilu atuaqqissaarnissamut eqqarsaatiginneqqissaarnissamullu piffissaqartariaqarpoq. Kisimiilluni eqqarsaatiginneqqissaarneq pingaaruteqarpoq.

79:9. Jehovap qinnutivut tusarnaartarpai, ingammik aterminik illernarsisitsinermut tunngagaangata.

81:14, 17. Jehovamut tusarnaarneq aqqutigeqqusaatigullu ingerlaneq pilluaqqussutissartarpassuaqarpoq. — Ussatit 10:22.

82:2, 5. Naapertuilluanngitsuliornerit ’nunap tunngaviinik’ patajalersitsisarput. Naapertuilluanngitsuliornerit innuttaaqatigiinnik allanngujasunngortitsisarput.

84:2-5, 11-13. Tussiaasiortut Jehovamut pallorfiginnittarfinnik kiffartornermilu immikkut pisinnaatitaaffimminnik pingaartitsingaarput taamaattumillu uagutsinnut maligassaalluarput.

86:5. Jehovap ’isumakkeerfiginnikkumasarnera’ qujamasuutigisariaqarparput! Inuit ajortuliaminnik peqqissimissutiginninnerannut ersiutaasinnaasut taamaalillutillu nallittuinissaminut tunngavissaqalersitsisut tamaasa maluginiartarpai.

87:5, 6. Nunami paratiisimi inuusussanit qilammut makititaasut aqqi qaqugumulluunniit paasineqassappat? Versit taakkua naapertorlugit taamaalluarsinnaavoq.

88:14, 15. Ajornartorsiummut aalajangersimasumut tunngatillugu qinnuterput akineqanngilertorpat, imaassinnaavoq Jehovap kissaatigigaa tunniusimanermik ilumoortumik ersersitsivigissagitsinni.

„QUTSAVIGISIUK; AQQA UNNERSIUTIGISIUK“

(Tussiaat 90:1–106:48)

Jehovap unnersiutiginissaanut pissutaasut assigiinngitsut tussiaatit immikkoortuisa sisamaanni eqqaaneqartut malugikkit. Tussiaat 90-imi Mosesip Guutip naassaanngitsumik piunera inuup sivikitsuinnarmik inuuneranut sanilliuppaa. (1 Timotheusi 1:17) Tussiaat 91:2-mi Mosesip Jehova ’qimarnguffimmisut pallittaalisamisullu’ — toqqissisimaffissarsiffimmisut — taavaa. Tussiaatini tulliuttuni Guutip pissusii nuannersut, eqqarsaatai qutsissut suliaalu nuanningaartut eqqartorneqarput. Tussiaatini pingasuni oqariartaaseq una aallarniutigineqarpoq: „[Jehova] kunngiuvoq“. (Tussiaat 93:1; 97:1; 99:1) Tussiaasiortoq allappoq Jehovap pinngortikkaatigut kajumissaarlutalu taanna ’qutsavigissagipput aqqalu unnersiutigissagipput’. — Tussiaat 100:4.

Naalakkersuisoq Jehovamik mianerinnittoq naalagaaffimmut tunngasunik qanoq ingerlatsissava? Tamanna Tussiaat 101-imi, kunngi Daavimit allataasumi, akineqarpoq. Tussiaatip tulliani oqaluttuunneqarpugut Jehovap ’tamaqanngitsut qinnutaat qiviassagaa, qinnutaat sumiginnassanngikkaa’. (Tussiaat 102:18) Tussiaat 103-mi Jehovap ajunngissusia imaluunniit ilumoorfiginnilluni tunniusimanera naakkinnittuuneralu malugeqquneqarput. Guutip nunarsuarmi pinngortitarpassuinut tunngatillugu tussiaasiortoq ima oqarpoq: „Amerlangaarput pinngortitatit,  [Jehova]! Pinngortippatit tamaasa ilisimasuullutit.“ (Tussiaat 104:24) Tussiaatit immikkoortuisa sisamaanni tussiaatini kingullerni marlunni Jehova tupinnartuliai pillugit unnersiutigineqarpoq. — Tussiaat 105:2, 5; 106:7, 22.

Allassimaffiit pillugit apeqqutit akineqartut:

91:1, 2 — ’Qutsinnerussaartup toqqorsimaffia’ suua, tassanilu qanoq ’ineqarsinnaavugut’? Tassaavoq assersuutaasumik sumiiffik anersaakkut isumannaatsuusoq toqqissisimaffiusorlu, anersaakkut ajoqutaasinnaasunut illersugaaffiusoq. Toqqorsimaffiuvoq ima paasillugu Guutimik tatiginninngitsunit ilisimaneqanngitsoq. Uagut Jehova ineqarfigissavarput qimarnguffitsitut pallittaalisatsitullu isigineratigut, qilammi nunamilu kisimi oqartussaalluni Naalagaasutut unnersiutigineratigut Guutillu naalagaaffia pillugu nutaarsiassamik nuannersumik oqaluussissutiginninnikkut. Anersaakkut isumannaatsumiittutut misigivugut nalunnginnatsigu Jehova uagutsinnik ikiuinissaminut piareersimajuartoq. — Tussiaat 90:1.

92:13 — Qanoq ililluni ’iluartoq naajartussava palmisut’? Palmi naggorissutut ilisimaneqarpoq. Inuk naapertuilluartoq palmisut ippoq, ima paasillugu ileqqussatigut isiginnittaasia narlusuujusoq, tassa Jehovap isaani ileqqorissuusoq ’ajunngitsunillu inerititaqartuarluni’, inerititanullu taakkununnga ilaapput ajunngitsuliornerit. — Matthæusi 7:17-20.

Ilinniarfigisinnaasavut:

90:7, 8, 13, 14. Eqqunngitsulioraangatta Guutimut ilumoortumut attaveqarnitsinnut ajoqutaajuaannarpoq. Isertorluni ajortuliat taassumunnga isertorneqarsinnaanngillat. Ilumoorlutali allamik isumataarutta eqqunngitsuliortarunnaarlutalu Jehovamit iluarisaaqqilissaagut, ’ajunngissutsiminik’ imaluunniit ilumoorfiginnilluni tunniusimanerminik ’qaarsillartilluta’.

90:10, 12. Inuuneq sivikeqimmat ’ulluvut kisittariaqarpavut’. Qanoq? ’Uummatitsigut ilisimassuseqalernikkut’, tassa inuunitsinni ullut kingulliit asiutinnagit ilisimassuseqarluta atorlugit, Jehovamulli nuannaarutaasumik atorlugit. Taamaassagaanni anersaakkut ittut salliutittariaqarpavut piffissarlu silatuumik atorlugu. — Efesosimiut 5:15, 16; Filippimiut 1:10.

90:17. ’Assatta suliaat pissatseqqullugu’ oqaluussinerpullu pilluaqqoqqullugu Jehovamut qinuneq pissusissamisoorpoq.

92:15, 16. Qatanngutit arnat angutillu utoqqaat eqiasuillutik Guutip oqaasia atuaqqissaaraangamikku Jehovallu innuttaanik katerisimaaqateqaraangamik „uummaasutut qorsuusutut“ ittuaannarsinnaapput, tassa anersaakkut nukittuujujuaannarsinnaapput ilagiinnullu pilluaqqussutaangaarsinnaallutik.

94:19. ’Eqqarsaatitta eqqissiviilliortitsinerannut’ sunaluunniit pissutaagaluarpat, Biibilimik atuarneq ’tuppallersaatigisinnaasatsinnillu’ tassaniittunik eqqarsaatiginneqqissaarneq qiimmassaatigingaassavarput.

95:7, 8. Siunnersuutit Biibilimeersut tusarnaaraangatsigik kajumillutalu naalakkaangatsigik, uummaterput manngertunngussanngilaq. — Hebræerit 3:7, 8.

106:36, 37. Versini taakkunani ’guutilianik’ pallorfiginninneq anersaapilunnut pilliinermut tunngatinneqarpoq. Tamatuma takutippaa guutipilunnik atuineq anersaapilunnit sunnersimaneqarnermik kinguneqarsinnaasoq. Biibilimi ima mianersoqqussuteqarpoq: „Guutipilunnut mianersoritsi.“ — 1 Johannesi 5:21.

Jah unnersiutigisiuk!

Tussiaatit immikkoortuisa sisamaanni erinarsuutini kingullerni pingasuni ima kajumissaaruteqarpoq: „Halleluja“, isumaqartoq „Jah unnersiutigisiuk“. Tussiaatini taakkunani tussiaat kingulleq aamma taama aallartippoq. (Tussiaat 105:1; 106:1) Oqaaseq „Halleluja“ tussiaatit immikkoortuisa sisamaanni arlaleriarluni atorneqarpoq.

Ilumut Jehovamik unnersiutiginninnissamut pissutissaqarluarpugut. Tussiaatini 73-imiit 106-imut eqqarsaatigisassarpassuagut Ataatatsinnullu qilammiusumut qujamasuutissarpassuagut eqqartorneqarput. Uagutsinnut iliuusereriigai siunissamilu iliuuseriumaagai eqqarsaatigigaangatsigik ’Jah unnersiutigerusungaartarparput’, ilaa? (wE 7/15 06)

[Qupp. 8-mi assiliartaq]

Ajussuseqaraluartoq ’Guutimut qanillinikkut’ Asafitut pinertusaarsinnaavugut

[Qupp. 9-mi assiliartaq]

Farao Immami Aappalaartumi ajorsarpoq

[Qupp. 9-mi assiliartaq]

Nalunngiliuk sooq manna ’inngilit timiusartugaannik’ taaneqarnersoq?

[Qupp. 11-mi assiliartaq]

’Eqqarsaatitta eqqissiviilliortilerpatigut’ suna iluaqutigisinnaavarput?