„Ullumimiit Guuteqarnera upperilerpara“

ALEXANDRA Ukrainemiuuvoq, Pragimili Tjekkiamiittumi najugaqarluni. Ullut ilaanni suliffimminiit angerlartilluni sporvognit unittarfiata eqqaani takulerpaa taskeeraq nunamiittoq inunnit isimmikattaarineqartoq. Tigullugu ammaramiuk takusani upperinngingajappai — taskeeqqap imarai aningaasat 5000-korunat qilertat! Taskeq ujarneqarpasinngilaq. Alexandrap Tjekkiami nunami allamiuulluni inuuniutissaqarniarnini ajornakusoortippaa. Qanoq iliussava?

Angerlarami taskeq panimminut, Victoriamut, takutippaa. Piginnittup atianik najugaqarfianillu allassimasoqarnersoq takugaluarpaat, allassimasoqanngilarli. Pappiararli kisitsisitalik nassaaraat. Pappiaqqami allassimavoq kontonormu, illuatungaanilu kisitsisit allat allassimallutik. Aamma taskemiippoq bankimut ungasinngitsumiittumut adresseq, pappiaqqamilu allassimavoq „330.000 koruna“ (60.000 kronit missaat), aningaasat taskemiittut nalerpiaat.

Neriulluni normup aappaa bankip oqarasuaataanut normuussasoq Alexandra tassunga sianerpoq, iluatsinngilarli. Taamaattumik paninilu bankimukarput susoqarneranik nassuiaajartorlutik. Kontonormu taskemi nassaartik apeqqutigaat. Normuli taanna bankimi nalunaarsugaatigineqanngilaq. Aqaguani Alexandra normu taskemiittoq alla nassarlugu bankimukaqqippoq. Ilumullumi, banki sullitaqarpoq arnamik taama kontonormoqartumik. Alexandrap Victoriallu arnaq attaveqarfigaat, taannalu taskemik katataqarsimanerarpoq. Kiisamilu naapikkamik arnap qutsavigerujussuarpai imalu aperalugit: „Aningaasat utertikkassigik sumik akilissavassi?“

Victoriap ima akivaa: „Akilerneqarusunngilagut. Aningaasat perusussimagaluarutsigit utertissimanavianngikkaluarpavut.“ Oqaatsit Tjekkiamiutut nalunngisatuannguani atorlugit ima nassuiaavoq: „Aningaasat ilinnut utertippavut Jehovamut nalunaajaasuugatta. Nalunngeqatiginnissuterput Biibili tunngavigalugu ilinniartinneqarsimammat piginngisavut tigummiinnarsinnaanngilavut.“ (Hebræerit 13:18) Arnap tamanna tusaramiuk nuannaarutigaa imalu oqarluni: „Ullumimiit Guuteqarnera upperilerpara.“ (wE 7/15 06)