Anniita * qatanngutaavoq arnaq 30-t sinnerlugit ukiulik. Utoqqaanertanit pulaarneqartussaanini ernumagilaarpaa imalu eqqarsarluni: ‘Utoqqaanertat qanoq oqarfigissavaannga? Ataatsimiigianngitsuullattaarsimavunga, kisianni ulloq naallugu suliffinni utoqqarnik sullissereerlunga angerlaraangama qasusorujussuusarpunga.’ Aamma Anniitap anaanani peqqiilliortoq isumakuluutigaa.

Utoqqaanertaaguit Anniitamut pulaartussaq taanna qanoq qiimmassarsinnaaviuk? “Qasusoq” taanna pulaartinnagu qanoq piareersarsinnaavit? — Jer 31:25.

Tamatta sulisarnerput kristumiutulluunniit akisussaaffivut pissutigalugit qasulersinnaasarpugut. Assersuutigalugu pruffiiti Danieli ‘nukillaartutut’ misigivoq paasisinnaanngisaminik takorruuisinneqarami. (Dan 8:27) Suna iluaqutigaa? Guutip inngilini Gabrieli Danielimut aallartippaa takorruugaanik nassuiaakkiartortillugu qinnutaatalu Jehovamit tusarneqarsimanera oqaatigiartoqqullugu. Inngilip Danieli aamma oqarfigaa Jehovamit “nuannarineqangaartoq”. (Dan 9:21-23) Kingusinnerusukkut inngilip allap Danieli qiimmassarniarlugu assingusumik oqaaseqarluni saqqummerfigaa. — Dan 10:19.

Ilagiinniittoq qasusoq nikallungasorluunniit illit pulaassagukku taamatuttaaq qiimmassarsinnaavat. Qatanngutit pulaartinnagu taassuma atugai eqqarsaatigeqqaakkit. Unamminiarnartut suut atugarai? Unamminiarnartut taakku suut ingammik nikalluutigisarpai? Sunik ajunngitsunik pissuseqarpa? Richard ukiut 20-t sinnerlugit utoqqaanertaasoq oqarpoq pulaannginnermini qatanngutip  pissusii ajunngitsut eqqarsaatiginiaqqaartarlugit. Aamma qatanngutip atugaasa eqqarsaatigeqqissaarnerisigut paasisinnaavaa qanoq pitsaanerpaamik qatanngummik qiimmassaasinnaanerluni. Illit utoqqaanertarlu alla pulaarniarlusi pilersaarusiorussi pitsaassaaq pulaannginnissinni pulaagassassi atugai oqaloqatigiissutigeqqaarussigit.

Qatanngutit misigissutsitik pillugit utoqqaanertanik oqaloqateqarnissamut qusasinnaapput. Qanoq ilillutit qatanngutit eqqissiallatsisinnaaviuk? Iluaqutaasinnaavoq qungujullutit nuannersumik oqaaseqaqqaaruit. Michaeli ukiut 40-t sinnerlugit utoqqaanertaasoq pulaaraangami imatupajaaq oqaqqaartarnerarpoq: “Nalunngiliuk utoqqaanertatut immikkut pisinnaatitaaffitta nuannernerpaasa ilagigaat qatanngutit pulaarnerisigut ilisarisimallualernissaat? Taamaattumik ilinnut pulaarnissara qilanaarisimavara.”

Pulaarlutit isereeruit qatanngut qinoqatigeqqaarsinnaavat. Qinnutinni qatanngutip pissusii ajunngitsut, assersuutigalugu uppernera, asannittuunera pinertusaarneralu, eqqaasinnaavatit. Apustili Paulusi qatanngutini qinnukkamigit taamaaliorpoq. (1 Th 1:2, 3) Taamatut qatanngutit qinoqatigigukku illit qatanngutillu ajunngitsumik qiimmassaataasumillu oqaloqatigiinnissassinnut iluaqutaassaaq. Qinnutit aamma qatanngutinnut tuppallersaataasinnaavoq. Ray utoqqaanertaq misilittagalik ima oqarpoq: “Ilaannikkut naammassisavut ajunngitsut puiortoortarpavut, taamaattumik naammassisatsinnik eqqaasinneqaraangatta nakussatsinneqartarpugut.”

Biibili, allaat allassimaffik ataasiinnaq, atorlugu qatanngutit ‘anersaap tunissutaanik ilangiisissinnaavat’, imaluunniit qiimmassarsinnaavat. (Rom 1:11) Assersuutigalugu qatanngut isumatsassimasoq naleqanngitsutut misigisinnaavoq. Immaqa tussiaasiortup ‘poorutsitut pujoorneqassalluni nivinngakkatut’  misigisup oqaasiinik atuffassinnaavat. Tussiaasiortoq taamatut misigigaluarluni ima allappoq: ‘Inatsisitit puiorsimanngilakka.’ (Tuss 119:83, 176) Allassimaffik nassuiareerukku qatanngut Guutip ‘inatsisaanik puiuisimannginnera’ qularutiginagu oqarfigisinnaavat.

Qatanngut arnaq unittooqqasoq oqaluussinermiluunniit aallussilluarpiarunnaarsimasoq Biibili iluaqutigalugu qanoq nakussatsissinnaaviuk? Immaqa aningaasannguamik tammaasamik assersuut atorlugu qiimmassarsinnaavat. (Luk 15:8-10) Imaassinnaavoq aningaasannguaq taanna ujammip erligisap aningaasannguanik nuisap ilagigaa. Assersuut tamanna eqqartuutigalugu qatanngutip arnap ilagiinni naleqangaartuunera paasitinniarsinnaavat. Immaqalu Jehovap savaaraatinnguatut taassuminngalu isumassorneqangaartutut ittuuneranik paasinnissinnaaqqullugu ikiorsinnaavat.

Uppeqatitta allassimaffiit atuarsimasatik pillugit eqqartuineq nuannarisarpaat. Taamaattumik tusarnaartarit! Allassimaffik atuareerussiuk oqaaseq aalajangersimasoq oqaaseqatigiilluunniit aalajangersimasut oqaaseqarfigisinnaanerai aperisinnaavat. Assersuutigalugu Korinthimiunut allakkat aappaat 4:16 atuareerlugu ima aperisinnaavutit: “Jehovap illit qanoq ‘nutaanngortissimavaatit’, imaluunniit qanoq nakussatsissimavaatit?” Taamatut aperigukku ineriartuutaasumik oqaloqatigiilluarnissassinnik kinguneqarsinnaavoq. — Rom 1:12.

Aamma Biibilimi oqaluttuarineqartoq qatanngutip atugaatut atugaqarsimasinnaasoq eqqartorlugu qiimmassaasinnaavutit. Imaassinnaavoq isumatsassimasoq Hannatut imaluunniit Epafroditusitut misigisoq. Taakku isumatsaqqasimagaluarlutik Guutip isaani naleqangaartuarput. (1 Sam 1:9-11, 20; Fil 2:25-30) Biibilimi oqaluttuarineqartorpassuit allat eqqartorsinnaavatit.

Qatanngutinnik soqutiginninnerit pulaareernerup kingorna ersersittuaruk. (ApS 15:36) Assersuutigalugu ingerlatinnak oqaluusseqatigiinnissassinnut isumaqatigiissuteqarfigisinnaavat. Bernardip utoqqaanertap misilittagallip qatanngutit qanittukkut pulaarsimasani naapikkaangamigit siunnersuutini pillugu ima aperisarpai: “Siunnersuutigisimasara atorsinnaaviuk?” Taamatut soqutiginnittuujuaruit qatanngut ikiorumallugu iliuuseqarnerusinnaanerlutit paasisinnaavat.

Qatanngutitta soqutigineqarlutik, paasineqarlutik asaneqarlutillu misigitinneqarnissartik aatsaat taama pisariaqartitsigaat. (1 Th 5:11) Taamaattumik qatanngutit pulaartinnagu atugai eqqarsaatigeqqaakkit. Pulaarnissarpit iluatsinnissaa qinnutigiuk. Allassimaffiit pulaakkamut naleqquttut toqqakkit. Taava oqaatsikkut “qasusoq” nakussatsissinnaavat!