1, 2. Guutimit iluarisaajumalluta qanoq inuuseqartariaqarpugut?

INUUP allat nammineq pilluni qanoq eqqarsartarnersut soqutigisarpaa. Kristumiutulli Jehova qilammi nunamilu qutsinnerpaallunilu ‘inuunerup puilaffigimmagu’ uagut pilluta qanoq eqqarsartarnersoq pingaartinnerungaarparput. — Tuss 36:10.

² Apustili Paulusi nassuiaavoq Jehovamit iluarisaassagutta ‘illernartuusariaqarlutalu Guutimik mianerinnittuusariaqartugut’. (2 Petrusi 3:11, NW, atuaruk). * Aatsaat sutigut tamatigut minguitsumik inuuseqarutta — tassa eqqarsartaaseqarutta, ileqqoqarutta Guutimillu pallorfiginnittarutta — ‘illernartuusinnaavugut’. Aamma Guutimik qamannga pisumik asanninnerput ataqqinninnerpullu pissutigalugit ‘Guutimik mianerinnittuusariaqarpugut’. Taamaattumik Guutip iliuutsivut pingaartiinnarnagit imminerminut misigissutsivut pingaartippai. Jehova ‘uummatinik paasiniaaqqissaartarami’ inuuserput illernartuunersoq taassuminngaluunniit pallorfiginniinnarnersugut nalunngilaa. — 1 Nal 29:17.

3. Imminut qanoq aperisariaqarpugut?

³ Saatanip Diaavulup Guutimit iluarineqartikkusunngilaatigut. Allaat sapinngisani tamaat Jehovamik ikinnguteqarunnaarsinniartarpaatigut. Saatanip Jehovamik pallorfiginnikkunnaarniassagatta tammartikkumalluta salloqittarniarsarisarpaatigut. (Joh 8:44; 2 Kor 11:13-15) Taamaattumik imminut ima aperisariaqarpugut: ‘Qanoq Saatanip inuit tammartinniartarpai? Jehovamik ikinnguteqarnera illersorumallugu susinnaavunga?’

4. Sataani Guutimik ikinnguteqarunnaarsikkumalluta susarpa, aamma sooq?

⁴ Ajoqersugaq Jaaku ima allappoq: “Kinaluunniit usserneqartarpoq nammineq pilerissutsiminit nassataritilluni kajumitsatsitaallunilu; pilerissutsillu ilumileraangami ajorti erniarisarpaa, ajortillu inersimaleraangami toqu erniarisarpaa.” (Jaak 1:14, 15) Saatanip Guutimik ikinnguteqarunnaarsikkumalluta uummaterput, kissaatigisatsinnut aallaaviusoq, saassuttarpaa.

5, 6. (a) Saatanip uummaterput qanoq sunnerniartarpaa? (b) Saatanip uummaterput kissaatipiloqalersinniarlugu pingasut suut atortarpai, taakkulu sunniuteqarluartumik qanoq atortarpai?

⁵ Saatanip uummaterput qanoq sunnerniartarpaa? Biibilimi allassimavoq ‘silarsuaq tamarmi Ajortumut naalatsigitittoq’. (1 Joh 5:19) Saatanip peqquserloriaasiinut ‘silarsuup pii’ ilaapput. (1 Johannesi 2:15, 16 atuakkit). Ukiuni tusindilinni Diaavulup silarsuaq inunnik tammartitsinissamut ilusilersoqqissaarsimavaa. Silarsuarmi tamatumani inuugatta taassuma peqquserloriaasiinut illersortariaqarpugut. — Joh 17:15.

⁶ Saatanip uummaterput kissaatipiloqalersinniartarpaa. Taama iliorniarluni ‘silarsuup pii’ uku pingasut, apustilip Johannesip eqqaasai, atortarpai: (1) “uinngup pilerigisai,” (2) “isit pilerigisaat,” aamma (3) ‘nunap piinik usorsisimaaruteqarneq’. Saatanip taakku pingasut tamaasa inoqajuitsumi Jiisusimik ussiiniarnermini atorpai. Saatanip peqquserloriaatsit taakku ukiorpassuarni misilittagaqarfigigamigit sunniuteqarluartumik atorsinnaanngornikuullugillu nalunngilluinnarpaa inunnut ataasiakkaanut sorleq atussanerlugu. Qanoq imminut illersorsinnaanitta samminnginnerani Diaavulu Evamik qanoq tammartitsisinnaasimasoq Guutilli erneranik sooq tammartitsisinnaasimanngitsoq sammeqqaassavarput.

⁷ Inuit tamarmik inuuinnarumallutik nerisariaqarput. Pinngortitsisup nunarsuaq nerisassanik sinnilissuarmik pilersuisussanngorlugu pinngortippaa. Saatanip nererusussuseqarnerput atornerlullugu Guutip iluarinngisaanik iliuuseqarnissatsinnut usserniartarpaatigut. Evamut tunngatillugu qanoq taama iliortoq sammeriartigu. (1 Mosesi 3:1-6 atuakkit). Saatanip Eva oqarfigaa paarnaq orpimmit ‘ajunngitsumik ajortumillu ilisimalersitsisumeersoq’ neriguniuk toqunavianngitsoq, Guutisulli ilerumaartoq. (1 Mos 2:9) Diaavulu Evamut oqamisaarpoq inuuinnarumalluni Guutimut naalattariaqanngitsoq. Tamanna ingasattumik salluliorneruvoq! Eva Diaavulumit  taama eqqarsaatissinneqareerluni marlunnik periarfissaqalerpoq: Eqqarsaat itigartissinnaavaa, imaluunniit eqqarsaatigiinnalersinnaavaa paarnamillu nerinissaminut pilerissutsini ineriartortillugu. Orpiit allat neriffigisinnaagaluarlugit orpik naatsiiviup qeqqaniittoq eqqarsaatigiuarniarlugu aalajangerami paarnaq nerivaa. Pinngortitsisup inerteqqutigisaanik iliuuseqarnissamut Saatanip pilerissuseqalersippaa.

8. Saatanip Jiisusi usserniarlugu “uinngup pilerigisai” qanoq atorpai, aamma sooq ussiinera iluatsinngila?

⁸ Saatanip aamma Jiisusimut tunngatillugu peqquserloriaaseq taanna atorpaa. Jiisusi inoqajuitsumiittoq ullunilu 40-ni unnuanilu 40-ni nerisaqanngitsoq Saatanip taassuma nererusussusia atorlugu usseriarpaa. Saatani ima oqarpoq: “Guutip ernerippatit ujarak una timiusanngoqqujuk.” (Luk 4:1-3) Jiisusi marlunnik periarfissaqarpoq: Nerinissaminut pisariaqartitsinerminik matussusiiniarluni pissaanini atorniarnagu imaluunniit atorniarlugu aalajangersinnaavoq. Jiisusip nalunngilaa pissaanini namminissarsiorluni atortussaanagu. Kaakkaluarluni Guutimik ikinnguteqarnini nerisassanit pingaarnerutippaa. Jiisusi ima akivoq: “Allassimavoq: ‘Inuup timiusaannaq inuussutissarinngilaa, oqaaserli sunaluunniit Guutip qarnanit anisoq.’” — Matt 4:4; Luk 4:4.

9. “Isit pilerigisaat” qanoq paasisariaqarpat, Saatanilu Eva pilerigisaqalersinniarlugu qanoq iliorpa?

⁹ Johannesip “isit pilerigisaat” Saatanip peqquserloriaasiinut ilaanerarpai. Inuk isiginnaarneriinnarmigut pilerisaqalersinnaavoq. Saatanip Eva pilerisaqalersinniarlugu ima oqarfigaa: ‘Isisi uisitaajumaarput.’ Evap paarnaq sivisunerusumik isiginerujartortillugu nererusunnerulerpaa. Evap takuaa orpik ‘isigiuminartuusoq’.

10. Saatanip Jiisusi usserniarlugu “isit pilerigisaat” qanoq atorpai, Jiisusillu qanoq akivaa?

¹⁰ Saatanip Jiisusimik ussiiniarnermini “isit pilerigisaat” qanoq atorpai? Saatanip uisoriinnaq nunarsuarmi naalagaaffiit tamaasa Jiisusimut qimerloortippai “oqarfigalugulu: ‘Pissaaneq tamanna tamaat alutornassuserlu ilinnut tunniukkumavakka.’” (Luk 4:5, 6) Jiisusip nunarsuarmi naalagaaffiit tamaasa takunngilai, taakkuali alutornassusiat takuaa. Saatani eqqarsarsimassaaq Jiisusip takusani usserneqaatigissagai. Jiisusi ima oqarfigaa: “Pallorfigiumagumma tamakku tamaasa pigilersinnaavatit.” (Luk 4:7) Jiisusi Saatanip kissaatigisaatut inoorusunngilluinnarpoq. Ingerlaannaq ima akivaa: “Allassimavoq: ‘Naalagaq Guutit pallorfigissavat taannalu kisiat kiffartuullugu.’” — Luk 4:8.

11. Eva Saatanimit qanoq tammartinneqarpa?

¹¹ Johannesip ‘nunap piinik usorsisimaaruteqarneq’ kingullertut eqqaavaa. Adami  Evalu nunarsuarmi kisimiillutik inuugallaramik pigisatik allanut usorsisimaarutigisinnaanngilaat. Makitalerpulli. Eva Guutip pisassaraluaminik nuannersumik tuninaveersaarneqartutut Saatanip isumaqalersippaa. Diaavulup Eva oqarfigaa “orpik ajunngitsumillu ajortumillu ilisimalersitsisoq” neriffigiguniuk ‘Guutisut ilerumaartoq ajunngitsoq ajortorlu nalujunnaassallugit’. (1 Mos 2:17; 3:5) Saatanip Eva Jehovamut naalatsigitinngikkuni inuulluarnerusinnaasutut isumaqalersinniarpaa. Evap ilaatigut makitanini pissutigalugu taamatut salluliorneq upperisimasinnaavaa. Paarnaq nereqqusaanngitsoq nerivaa isumaqarlunilu toqunaviarnani. Kukkulluinnarporli!

12. Saatanip Jiisusi qanoq usseriaraluarpaa, Jiisusillu qanoq akivaa?

¹² Eva assiginagu Jiisusi maniguunnermik maligassiuilluarpoq! Saatanip Jiisusi allat tupigusuutigisassaannik iliuuseqaqqullugu Guutimillu misileeqqullugu usseriaraluarpaa. Jiisusip itigartilluinnarpaa nalunnginnamiuk taama iliorneq makitanerussasoq! Jiisusi paatsuugassaanngitsumik toqqaannartumillu ima akivoq: “Imaattunik oqaaseqarpoq: ‘Naalagaq Guutit misilissanngilat.’” — Lukasi 4:9-12 atuakkit.

¹³ Ullumikkuttaaq Saatanip Evamut Jiisusimullu tunngatillugu peqquserloriaatsit atukkani uagutsinnut atortarpai. Inuit kinguaassiuutitigut inuunerlunnissamut imaluunniit nerivallaarnissamut imerpallaarnissamullu usserniarlugit “uinngup pilerigisai” atortarpai. Inuit pornografiimik, ingammik internetikkut, isiginnaarnissaannut usserniarlugit “isit pilerigisaat” atortarpai. Inuit makitalernissaannut, pissaaneqarusulernissaannut, tusaamasanngorusulernissaannut amerlanerusunillu pigisaqalerusunnissaannut usserniarlugit ‘nunap piinik usorsisimaaruteqarusunneq’ atortarpaa.

13, 14. Ullumikkut Saatanip qanoq tammartinniartarpaatigut?

¹⁴ Aalisartup neqitanik atuisarneratut Saatanip ‘silarsuup pii’ atortarpai. Neqitaq aalisakkamut pilerinartuuvoq, neqitalli iluani qarsorsaqarpoq. Taamatuttaaq Saatanip nalinginnaarpasissut pisariaqarpasissinnaasullu atorlugit Guutip inatsisaanik unioqqutitsisinniartarpaatigut. Saatanip isumaqalersinniartarpaatigut inuttut pisariaqartitatsinnik isumaginninnerput inuunitsinnillu ilorrisimaarnartuutitsiniarnerput  Guutip piumasaanit pingaarnerusut. Illit Saatanimit tammartinneqarsinnaavit?

15. Jiisusitut qanoq Saatanimit tammartinneqarnaveersaarsinnaavugut?

¹⁵ Saatanip ussiiniutai Evap nakkaannarfigigai Jiisusip iluatsilluartumik akiorpai. Jiisusi Saatanimit usserniarneqaraangami tamatigut Biibili tunngavigalugu akisarpoq imalu oqartarluni: “Allassimavoq “ imaluunniit “ima oqaaseqarpoq”. Biibilimik atuaqqissaallaqqikkutta tamatumani allassimasut ilisimallualissavavut usserneqaraangattalu allassimaffiit eqqaamasinnaassallutigit. (Tuss 1:1, 2) Guutip kiffaanik aalajaatsunik eqqaamannittarnerput taakkunatut ilumoorfiginninnissatsinnut iluaqutigissavarput. (Rom 15:4) Jehovamik ataqqinningaarneq, tassa taassuma nuannarisaanik nuannarinninneq uumigisaanillu uumiginninneq, illersuutigissavarput. — Tuss 97:10.

16, 17. Silaqassuserput kinaassutsitsinnut qanoq sunniuteqarsinnaava?

¹⁶ Apustilip Paulusip silarsuartut eqqarsartaaseqarumanata Jehovatut eqqarsartaaseqalernissatsinnut silaqassuserput atoqqullugu siunnersorpaatigut. (Rom 12:1, 2) Eqqarsaatigisartakkatsinnut tunngatillugu mianersortariaqarnitsinnik Paulusi ima oqarluni eqqaasippaatigut: “Tassa suujunnaarsittarpavut isumaliutersuutaannaasut anneruniarnerillu Guutimik ilisimasaqarnermut assortuisut suulluunniit; eqqarsaatit tamaasa Kristusimi tigusaasutut naalattunngortittarpavut.” (2 Kor 10:4, 5) Eqqarsartaaserput kinaassutsitsinnut sunniuteqartorujussuusarmat Guutip iluarisaanik eqqarsaateqarniartuartariaqarpugut. — Fil 4:8.

¹⁷ Illernartoorusukkutta eqqarsaatit kissaatillu eqqunngitsut itigartittariaqarpavut. Jehova “uummammit minguitsumit” asasariaqarparput. (1 Tim 1:5) Uummaterpulli tatigisassaanngitsuummat ‘silarsuup piinit’ qanoq sunnertinneqartigisarnerput paasiuminaatsissinnaavarput. (Jer 17:9) Taamaattumik Paulusip siunnersuutaanik matuminnga maleruaanissarput pingaaruteqarpoq: “Immissinnik paasiniaaffiginiaritsi uppernermiinnersusi! Immissinnik misiligitsi!” Biibilimik atuaqqissaaraangatta imminut ima aperisariaqarpugut: ‘Eqqarsaatikka kissaatikkalu Guutimut iluarinartuuppat?’ — 2 Kor 13:5.

18, 19. Sooq Jehovap kissaatigisaatut inuuniartuarnissarput ilungersuutigisariaqarparput?

¹⁸ Aamma Johannesip oqaasii uku ‘silarsuup piinik’ itigartitsinissatsinnut iluaqutigisinnaavavut: “[Silarsuaq] piumatussusialu nungussapput, Guutilli piumasaanik iliortoq naassaanngitsumik atassaaq.” (1 Joh 2:17) Saatanip pissutsinik aaqqissuussinera qaqugorsuarmut atuuttussaarpasissinnaavoq. Ullulli ilaanni atuukkunnaartussaavoq. Ullut ilaanni silarsuarmi matumaniittut tamarmik atuukkunnaangajalernerannik eqqaamanninnerput Saatanimit tammartinneqannginnissatsinnut iluaqutigisinnaavarput.

¹⁹ Apustili Petrusi allappoq Guutip iluarisaanik inuusariaqartugut “Jehovap ullussaata nalliuffissaa, qilaat ikumasut suujunnaarumaarfissaat pinngoqqaartullu kissassimaqisut aakkumaarfissaat, utaqqitillugu eqqarsaatigiuartillugulu!” (2 Petr 3:12, NW) Ulloq taanna nalliutingajalerpoq, Jehovallu Saatanip silarsuaaniittut tamaasa suujunnaarsissavai. Tamannali nalliutserlugu Saatanip Evamik Jiisusimillu usseeriartarnermisut ‘silarsuup pii’ atorlugit usserniartuassavaatigut. Eva, kissaatiminik taamaallaat angusaqarniartoq, ilaarusunngilarput. Taassumatut iliorutta Saatani uagutsinnut guutinngortissavarpullusooq. Jiisusi ilaartariaqarparput usserneqarnivullu, Saatanip qanorluunniit pilerinarsaraluarpagit, itigartittarlugit. Jehovap kissaatigisaatut inuuniartuarnissarput ilungersuutigisariaqarparput.