1. Suna erinitsassutigisinnaavarput?

SAATANIP silarsuaata ullui kingulliit aallartipput 1914-imi Kristusi qilammi kunnginngortinneqarmat. Qilammi sorsuuttoqalernerup kingunerisaanik Jiisusip Diaavulu anersaapiluillu nunamut igippai. (Saqqummersitat 12:7-9 atuakkit). Saatanip nalunngilaa ‘piffissakillilluni’. (Saqq 12:12) Imaassinnaavorli ‘piffissakinnerup’ tamatuma naanissaa ilimagisatsinnit sivisunerusumik utaqqereeripput. Saatanip silarsuaata Jehovamit suujunnaarsinneqarnissaa utaqqitillugu erinitsappugut?

2. Apeqqutit suut allaaserisami matumani akineqassappat?

² Erinitsattoq isumaallioqqajaasarami ulorianartorsiorsinnaavoq. Taavami qanoq erinitsannaveersaarsinnaagatta? Allaaserisaq una iluaqutigisinnaavarput, apeqqutimmi uku akineqassapput: (1) Utaqqisinnaassutsimut tunngatillugu pruffiiti Mika qanoq ilinniarfigisinnaavarput? (2) Naggatissap qanillineranut pisussat suut nalunaaqutaassappat? (3) Jehovap utaqqisinnaassuseqarnera qujamasuutigalugu qanoq ersersissinnaavarput?

3. Mikap nalaani Israelimi pissutsit qanoq ippat?

³ Mika 7:2-6 atuakkit. Jehovap pruffiitiata Mikap takuai Israelikkut anersaakkut sanngiilliartuinnartut kunngillu Akazip naalakkersuinerata nalaani Jehovamut ilumuunngitsuliornerat ingasalluinnartoq. Mikap Israelikkut ilumoortuunngitsut orpikkanut kapinartulinnut assersuuppai. Soorlu kinaluunniit kakillarnaqutit orpikkalluunniit kapinartullit akornannut pisoq ajoqusinngitsoortanngitsoq taamatulli Israelikkut ajortunngorsimasut taakkua peqatigisartakkaminnik ajoqusiisarput. Allaat ilaqutariit asaqatigiikkunnaarsimapput. Mikap paasigamiuk pissutsinik allanngortitsisinnaanani qamannga pisumik Jehovamut qinuvoq. Taava erinitsajuilluni Jehovap iliuuseqarnissaa utaqqivaa. Mikap qularinngilluinnarpaa  Jehova piffissaq nammineq aalajangikkani nalliuppat aaqqiiumaartoq.

4. Suut nuanniilliuutigisarpavut?

⁴ Mikatulli aamma uagut inuit namminissarsiortut akornanni inuusariaqarpugut. Inuppassuit ‘qujasuitsuupput, mitalliisuupput asanniuitsuullutillu’. (2 Tim 3:2, 3) Suleqativut, atuaqativut sanilivulluunniit namminissarsioraangata nuanniittaqaaq. Guutimulli kiffaasut ilaat nuanniilliuuteqangaarnerupput. Jiisusi oqarpoq ajoqersukkani ilaquttaminnit akerlilersorneqassasut. Oqaasii oqaatsinut Mika 7:6-imi atorneqartunut eqqaanarput. Jiisusi ima oqarpoq: “Tikiuppunga akerleriilersinniarlugit angut ataataalu, panik anaanaalu, ukuaq sakialu arnaq; angutillu inoqutini akerarilissavai.” (Matt 10:35, 36) Ilaqutaasut Jehovamut kiffartortuunngitsut illaruaatigigaangatigut akerlilersoraangatigullu artornartarpoq. Taama atugaqarutta tatineqarnitsinni nakkaannarnata Jehovamut ilumoorfiginnittuartariaqarpugut pissutsinillu aaqqiinissaa erinitsajuilluta utaqqillugu. Guutimut ikioqqulluta qinujuarutta imminut aalajaattuarsinnaaqqulluta pisariaqartumik nakussatsillutalu ilisimassuseqalersissavaatigut.

5, 6. Jehovap Mika qanoq pilluaqquaa, Mikalli suut takunngilai?

⁵ Jehovap Mika utaqqisinnaassuseqarmat pilluaqquaa. Mika inuutillugu Hizkijap, Akazip ernerata, kunnginngorami pallorfiginninneq minguitsoq pilerseqqippaa. Aamma Mikap Samaria pillugu siulittuutip allatami eqquunnera takuaa Assyriamiut naalagaaffik avannarleq Israeli tiguarmassuk. — Mika 1:6.

⁶ Jehovap Mika isumassarsisillugu siulittuisittarpaa, Mikalli siulittuutit ilaannaasa eqquunnerat nammineq takuai, takunngisaasalu una ilagaat: “Ullussani kingullerni qaqqaq Naalakkap naalaffiata inaa aalajaalluni qaqqanit allanit portunerulerumaarpoq qattorngit tamaasa portussutsimigut akimussallugit. Tassunga inuiaat ornigutissapput, inuiappassuillu tassunga ingerlaassapput oqassallutillu: ‘Qaa, majuarta Naalakkap qaqqaanut.’” (Mika 4:1, 2) Mikap, inuit avatangiisiminiittut qanorluunniit ilioraluarpata, allaat toqussi tikillugu Jehovamut ilumoorfiginnittuarnissani aalajangiusimavaa. Ima allappoq: “Inuiaat allat tamarmik inuupput namminneq guutimik aqqanni; uagulli inuujumavugut ... Guutitta aqqani naassaanngilluinnartumik.” (Mika 4:5) Jehovap neriorsuutini tamaasa eqquutitissagai upperilluinnaramiuk pissutsit nuanniikkaluartut Mika erinitsajuilluni utaqqivoq. Aap, pruffiitip aalajaatsup taassuma Jehova tatigalugu neriuffigaa.

7, 8. (a) Sooq Jehovamik tatiginnissinnaavugut? (b) Sugutta piffissaq ingerlalertupallattutut issava?

⁷ Mikap Jehovamik tatiginninneratut tatiginnippugut? Tatiginninnissatsinnut pissutissaqarluarpugut. Mikammi siulittuutaata eqquunneranik takunnittuuvugut. Ulluni kingullerni makkunani inuit millionilikkuutaat inuiaqatigiinnit, naggueqatigiinnit inuiannillu immikkut oqaasilinnit tamaneersut ‘qaqqamut Naalakkap naalaffiata inaanut’ majuarput. Jehovamik pallorfiginnittut taakkua inuiaqatigiinnit akersuutikulasuneersuugaluarlutik ‘panatik saffiorpaat assallatserummut sorsunnissamullu sungiusarunnaarlutik’. (Mika 4:3) Jehovap innuttaanut eqqissisimasunut ilaanerput ataqqinaataangaarpoq!

⁸ Tamatta kissaatigaarput Jehovap pissutsit aaqqissuussaanerat ajortoq qanittukkut piuneerutissagaa. Uagut erinitsajuilluta utaqqissagutta Jehovap eqqarsartaasiatut eqqarsartariaqarpugut. Taassuma Jiisusi Kristusi inunnik eqqartuussisussatut toqqarpaa ullorlu eqqartuussiffissaa aalajangereerlugu. (ApS 17:31) Ullorli tamanna nalliutsinnagu Guutip inuit tamaasa ‘sallusuissummik eqqorluartumik ilisimasaqalernissaannut’, ilinniakkaminnik maleruaanissaannut annaanneqarnissaannullu periarfissippai. Inuit inuunerat navianartorsiortut  eqqaamasariaqarparput. (1 Timotheusi 2:3, 4 atuakkit). * Qanittukkut naggatissaq nalliutissaaq. Jehovamik ilisarisimannilersitsiniarneq ulapputigigutsigu naggatissap tungaanut piffissaq ingerlalertupallattutut issaaq. Naggatissarlu nalliuppat oqaluussineq ulapputigisimagatsigu nuannaarutigissavarput!

9-11. Thessalonikamiunut allakkat siulliit 5:3 eqquutereerpa? Nassuiaruk.

⁹ Thessalonikamiunut allakkat siulliit 5:1-3 atuakkit. Qanittukkut ‘sumilluunniit aarlerinartoqannginerarlugu’ oqartoqassaaq. Taama oqartoqarneranit nakutitaarusunngikkutta anersaakkut ‘eqqumasariaqarpugut aalakoornatalu’. (1 Th 5:6) Taamatut pingaarutilimmik nalunaaruteqarnissaq sioqqullugu pisimasut ilaat maanna sammissavavut.

¹⁰ Sorsunnersuup siulliup kingulliullu kingorna inuiaat eqqissinissaq kissaatigingaarpaat. Sorsunnersuup siulliup kingorna Folkeforbundi eqqissisitsisussatut pilersinneqarpoq. Kingusinnerusukkullu, sorsunnersuup kingulliup kingorna, Naalagaaffiit Peqatigiit eqqissisitsiumaarnerat neriuutigineqarpoq. Naalakkersuisut upperisarsiornikkullu siuttut peqatigiiffinnik taakkuninnga marlunnik tatiginnipput. Assersuutigalugu Naalagaaffiit Peqatigiit 1986 nunarsuarmi eqqissinerup ukiuatut suaarutigaat. Ukiumi tamatumani politikkikkut upperisarsiornikkullu siuttorpassuit eqqissineq qinoqatigiissutiginiarlugu ilagiit katuullit qullersaannik naapeqateqarput.

¹¹ Siulittuulli ‘sumilluunniit aarlerinartoqannginneraanissaq’ Thessalonikamiunut allakkat siulliit 5:3-mi allassimasoq suli eqquutinngilaq. Sooq 1986-ip nalunaarutigineqarnera nalunaarutillu tamatumunnga assingusut siulittuutip eqquunnerinngilai? ‘Perlussaq tassanngaannaq tikiuttussaq aniguiffiusussaanngitsorlu’ suli nalliutinngimmat.

12. ‘Sumilluunniit aarlerinartoqannginneraanissaq’ pillugu suna ilisimavarput?

 ¹² ‘Sumilluunniit aarlerinartoqannginnerarlugu’ nalunaarutiginninnissaq maluginiarnartoq tamanna kikkut nalunaarutigissavaat? Kristumiuunerartut upperisarsiortullu allat siuttui tamatumani nalunaarutiginneqataassappat? Naalakkersuisummi? Tamakku pillugit Biibilimi allassimasoqanngilaq. Nalunngilarpulli qanorluunniit nalunaarutigineqaraluarpat qanorluunniillu uppernarpasitsigigaluarpat ‘sumilluunniit aarlerinartoqanginneraaneq’ piviusumik eqqissinerunavianngitsoq. Saatanimmi pissutsit aaqqissuussaanerat manna suli pissaaneqarfigissavaa. Aaqqissuussinerlu tamanna ajorluinnartuullunilu allanngornavianngilaq. Saatanip tammartitsiniarnera upperissagaluarutsigu kalluunnaveersaanngikkaluaruttalu alianassagaluaqaaq!

13. Sooq inngilit anorinik aseruisunik noqitsippat?

¹³ Saqqummersitat 7:1-4 atuakkit. Siulittuutip Thessalonikamiunut allakkat siulliit 5:3-miittup eqquunnissaanik utaqqitilluta inngilit pissarsuit annikilliortitaangaarnerup anoraanik aseruisunik noqitsipput. Sooq taamaaliorpat? Apustilip Johannesip allaatigisaatut “Guutitta kiffai” tanitat inaarutaasumik naqissuserneqarnissaat utaqqigamikku. * Tanitat taamatut naqissuserneqareerpata aatsaat anorit aseruisut iperarneqassapput. Taava susoqassava?

14. Babylonersuup suujunnaarsinneqangajalerneranut suna ersiutaava?

¹⁴ Babylonersuaq, eqqunngitsumik upperisarsiornerup silarsuarmi tamarmi naalagaaffissua, pisassamisut suujunnaarsinneqassaaq. Kimilluunniit aniguisinneqarsinnaassanngilaq. Naggatissaata qaninnera takuneqarsinnaalereerpoq. (Saqq 16:12; 17:15-18; 18:7, 8, 21) Upperisarsiortut tamakkunanilu siuttuusut nutaarsiassani isornartorsiorneqaraangata tapersersorneqartanngitsut takusalereerparput. Taamaakkaluartoq upperisarsiornikkut siuttut navianartorsiorsorinngillat. Kukkorujussuarput! ‘Sumilluunniit aarlerinartoqannginneraasoqareerpat’ naalakkersuisut tassanngaannaq upperisarsiorneq eqqunngitsoq saassutissavaat suujunnaarsilluinnarlugu. Babylonersuaq piuleqqinngisaannassaaq! Aap, ilumut pisussanik pingaarutilinnik tamakkuninnga erinitsajuilluni utaqqineq imminut akilersinnaavoq. — Saqq 18:8, 10.

15. Sooq Jehova utaqqisinnaassuseqarpa?

¹⁵ Jehovap aqqi inunnit ataqqinninngitsuliorfigineqaraluartoq iliuuseqarnissaminut piffissaq eqqortoq erinitsajuilluni utaqqiuarpaa. Jehovap kissaatiginngilaa inuk eqqortuliorusuttoq kinaluunniit piuneerunneqassasoq. (2 Petr 3:9, 10) Aamma uagut taama misigivugut? Naggatissaq nalliutsinnagu Jehovap erinitsajuinneranik qujamasunnerput assigiinngitsutigut ersersissinnaavarput.

16, 17. (a) Sooq unittooqqasunik ikiuerusussuseqartariaqarpugut? (b) Sooq unittooqqasut Jehovamut uternissaat nukinginnarpa?

¹⁶ Unittooqqasut ikiukkit. Jiisusi oqarpoq savap tammarsimasup ataatsip nassaarineqarnera qilammi nuannaarutigineqartartoq. (Matt 18:14; Luk 15:3-7) Jehovap imminik asanninnermik ersersitsisimasut, allaat maannakkut kiffartorfiginngikkaluaraanni, asangaarpai. Inuit taamaattut ilagiinniilerseqqillugit ikioraangatsigit Jehovap inngilillu nuannaarutigisarpaat.

¹⁷ Illit maannakkut Guutimut kiffartortuunngitsut ilagaatsit? Imaassinnaavoq ilagiinniittumit ajuallatsinneqaravit ataatsimiigiartarunnaarsimasutit. Immaqalu unittooqqanerit sivitsorpoq. Imminut ima aperigit:  ‘Maannakkut inuunera pitsaanerua, nuannaarneruvunga? Kia ajuallatsippaanga — Jehovap inuulluunniit naammalluinnanngitsup? Jehova Guuti uanga ajoqutigisannik iliuuseqarnikuua?’ Jehovap ajunngitsumik piuaannarpaatigut. Allaat maannakkut taanna kiffartorfigiumallugu neriorsuutitsinnik eqqortitsinngikkaluartugut tunissutiminik ajunngitsunik nuannaarutiginnissinnaatippaatigut. (Jaak 1:16, 17) Qanittukkut Jehovap ullussarsua nalliuttussaammat maanna Ataatatta qilammiusup asannittup ‘taliinut’ siaarsimasunut ilagiinnullu uternissamut piffissanngorpoq. Tamannami ulluni kingullerni makkunani qimarnguffissatuaavoq. — 5 Mos 33:27; Hebr 10:24, 25.

18. Sooq siulersortivut tapersersortariaqarpavut?

¹⁸ Siulersortivut ilumoorfiginnillutit tapersersukkit. Jehovap paarsisutut asannittutut siulersorlutalu sernissorpaatigut. Erni savaatinik paarsisuunerpaatut toqqarsimavaa. (1 Petr 5:4) Utoqqaanertat ilagiinni 100.000-init amerlanerusuniittut Guutip savaatai inuttut ataasiakkaatut soqutigalugit isumassortarpaat. (ApS 20:28) Siulersortivut ilumoorfiginnilluta tapersersortarutsigit ersersissavarput Jehova Jiisusilu uagutsinnut iliuuserisimasarpassui pillugit qujamasuffigalutigit.

19. Qanoq immitsinnut qanillisinnaavugut?

¹⁹ Qatanngutinnut qanilligit. Qanoq? Itsaq sakkutuut sungiusarluarsimasut saassunneqaraangamik akunneerullutik imminnut qanillisarput illersoqatigiissinnaajumallutik. Saatanip Guutip innuttaanik saassussinini sakkortusisarpaa. Taamaattumik qatanngutitsinnut akeqqersimaarnissaq sianiitsuliornerussaaq. Maanna immitsinnut qanillinissamut, qatanngutitta naammalluinnanngissutaannik isiginngitsuusaarinissamut Jehovamillu tatiginninnissamut piffissaavoq.

20. Maanna susariaqarpugut?

²⁰ Jehovamut attaveqarnerput nakussatsittuarlugulu utaqqisinnaassuseqarta. ‘Sumilluunniit aarlerinartoqannginneraanermik’ nalunaartoqarnissaa tanitallu inaarutaasumik naqissuserneqarnissaat erinitsajuilluta utaqqitigit. Tamakku pereerpata inngilit sisamat anorit aseruisut iperassavaat, Babylonersuarlu piuneerussaassaaq. Pisussat allannguutaasussat tamakku pinissaat utaqqitillugit Jehovap peqatigiissortaani siulersuisussatut toqqakkat iliuusereqqusaat maleruartigit. Peqatigiilluta Diaavulu anersaapiluillu akiortigit! Maanna piffissaavoq tussiaasiortup kajumissaarutaata matuma maleruarnissaanut: “Nikallornasi tatitusaaritsi, tamassi Naalakkamik neriuffiginnittusi!” — Tuss 31:25.