1. Jiisusi pilliutigeriaannaanermut tunngatillugu qanoq maligassiuilluarnerpaava?

JIISUSI nunarsuarmiikkallarami imminut pilliutigeriaannaanermut tunngatillugu maligassiuilluarnerpaavoq. Taassuma nammineq ilorrisimaarnissaminit piumasaminillu Guutip piumasaa pingaarnerutippaa. (Joh 5:30) Nappakkami anniartitaaffimmi toqumut allaat aalajaannermigut ersersippaa imminut pilliutigeriaannaanini killeqanngitsoq. — Fil 2:8.

2. Imminut pilliutigeriaannaaneq qanoq ersersissinnaavarput, aamma sooq taamaaliortariaqarpugut?

² Jiisusimut ajoqersugaagatta aamma uagut imminut pilliutigeriaannaasariaqarpugut. Tamanna qanoq paasisariaqarpa? Inuk imminut pilliutigeriaannaasoq inuit allat ikiorumallugit imminut salliunneq ajorpoq. Jiisusip ajoqersukkani ima oqarfigai: “Uannik malinnikkumasoq imminut isumakkiissaaq.” (Matt 16:24) Imminut pilliutigeriaannaaneq namminissarsiornermit allaanerulluinnarpoq. Namminissarsiortuunnginneq allat misigissusiinik piumasaannillu salliutitsinissatsinnut iluaqutigissavarput. (Fil 2:3, 4) Jiisusi ilinniartitsivoq Guutimik pallorfiginninnermi namminissarsiortuunnginneq pingaarnerpaasunut ilaasoq. Kristumiutummi asanninneq Jiisusip ajoqersugaanut ilumoortunut ilisarnaataasoq kajumississutigalugu imminut pilliutigeriaannaavugut. (Joh 13:34, 35)  Nunarsuaq tamakkerlugu qatanngutigiissuarnut imminut pilliutigeriaannaasartunut ilaanerput pissutigalugu pilluaqqussutit eqqarsaatigeriakkit!

3. Suna imminut pilliutigeriaannaanitsinnut akornutaasinnaava?

³ Taamaakkaluartorli imminut pilliutigeriaannaajunnaariartortitsisinnaasumik unamminiagassaqarpugut. Tassaavoq namminissarsioqqajaasarnerput. Adamip Evallu namminissarsiornerat eqqarsaatigeriaruk. Eva namminissarsiorluni Guutitut ilerusuppoq, uialu namminissarsiorluni nuliaminit iluarineqarusuppoq. (1 Mos 3:5, 6) Diaavulup Adami Evalu Guutimik pallorfiginninnermit ilumoortumit tunussisereerlugit inuit namminissarsiornissaannut ussernartorsiortittuarpai. Allaat Jiisusi namminissarsiornissaanut ussernartorsiortippaa. (Matt 4:1-9) Ullumikkut Saatani tammartitsinermini inuit amerlanersaasa assigiinngitsorpassuartigut namminissarsiornissaannut iluatsitsisimavoq. Mianersunngikkutta silarsuup matuma namminissarsiornermik isiginnittaasianit sunnertissinnaavugut. — Ef 2:2.

4. (a) Namminissarsioqqajaasarnerput atorunnaarsissinnaavarput? Nassuiaagit. (b) Apeqqutit suut sammissavavut?

⁴ Namminissarsiorneq manngertornermut assersuunneqarsinnaavoq. Savimineq sivisuumik silamiillunilu imermit asserneqanngikkuni manngertornilersinnaavoq. Tamannalu ulorianartorujussuusinnaavoq. Manngertorniiarneqanngikkunimi manngertorneraluttuinnassaaq naggataatigullu savimineq arrussaaq. Tamatumunnga assingusumik naammalluinnanngissuserput namminissarsioqqajaasarnerpullu silarsuarmi matumani atorunnaarsinneqarsinnaanngikkaluartut akiortuartariaqarpavut. Mianersunngikkutta imminut pilliutigeriaannaanerput arrussaarlusooq. (1 Kor 9:26, 27) Namminissarsioqqajaalersimanerluta qanoq imminut misissorsinnaavugut? Imminullu pilliutigeriaannaanerput qanoq ineriartortissinnaavarput?

5. (a) Biibili tarrarsuummut qanoq assersuunneqarsinnaava? (Allaaserisap aallaqqaataani assiliaq takuuk). (b) Namminissarsiortuunerput paasiumallugu sunaveersaartariaqarpugut?

⁵ Soorlu tarrarsornitsigut qanoq isikkoqarnerput paasisinnaagipput, taamatuttaaq Biibili iluaqutigalugu inuttut qanoq ittuunerput paasisinnaavarput kukkussutivullu aaqqissinnaallutigit. (Jaaku 1:22-25 atuakkit). Isikkorissarniarlutali tarrarsorluartariaqarpugut. Assersuutigalugu tarrarsupallakkutta immaqa aaqqitassaq annikitsoorpasikkaluartoq takunngitsuussavarput. Imaluunniit tarrarsuut sangutilaarutsigu immaqa inuup allap tarraa takussavarput. Tamatumunnga assingusumik Biibili iluaqutigalugu aaqqitassarput, assersuutigalugu namminissarsiornerput, paasiumallugu Biibili atuapallaannassanngilarput imaluunniit atuakkavut allap kukkussutaanut naleqqiunnagit.

6. Qanoq inatsisinik naammalluinnartunik ‘aalajangiussisinnaavugut’?

⁶ Assersuutigalugu imaassinnaavoq ullut tamaasa Guutip oqaasia atuartaraluarlugu namminissarsioqqajaasarnerput maluginngitsooripput. Sooq taamaassinnaava? Una eqqarsaatigeriaruk: Jaakup tarrarsuummik assersuusiani inuup qimerluuinnginnera pineqanngilaq. Jaakumi allappoq inuk “tarrarsuutikkut qimerluuisoq”. Oqaaseq grækerisooq uani atorneqartoq misissueqqissaarnermik isumaqarpoq. Inuk taanna tarrarsorluaraluarluni suli ajornartorsiuteqarpoq. Jaaku ima nangippoq: ‘Qimagukkami qanoq isikkoqarnini erniinnaq puiorpaa.’ Aap, tarrarsorunnaarpoq takusanilu iliuuseqarfiginagit. Inulli iluatsitsisoq ‘kiffaanngissutsip inatsisaanik naammalluinnartunik isumaliutiginneqqissaarlunilu aalajangiussivoq’. Inatsisit Guutip oqaasianiittut puiornagit ‘aalajangiuppai’ Biibilimilu ajoqersuutigineqartut maleruartuarlugit. Aamma Jiisusi assingusumik erseqqissaavoq ima oqarluni: “Oqaasera aalajangiussimajuarussiuk  ilumut ajoqersugarissavassi.” — Joh 8:31.

7. Biibili iluaqutigalugu namminissarsioqqajaasarnerput qanoq paasisinnaavarput?

⁷ Taamaattumik namminissarsioqqajaasarnerit akiorumallugu Guutip oqaasia peqqissaartumik atuartariaqarpat. Taamaalioruit aaqqitassatit suunersut paasisinnaavat. Taamaaliornerilli naammanngilaq. Aamma misissueqqissaarit. Biibilimi oqaluttuaq atuaraangakku takorloortaruk pisuni eqqaaneqartuni najuullutit. Imatullu imminut aperigit: ‘Pisumi tamatumani qanoq iliussagaluarpunga? Eqqortumik iliussagaluarpunga?’ Pingaarnerpaamilli atuakkatit eqqarsaatigeqqissaareerukkit maleruarumallugit sapinngisat tamaat iliuuseqarit. (Matt 7:24, 25) Kunngi Sauli apustililu Petrusi pillugit oqaluttuat imminut pilliutigeriaannaajuarnissatsinnut qanoq iluaqutigisinnaagivut sammeriartigu.

8. Sauli kunnginngoqqammerami qanoq isiginnittaaseqarpa, tamannalu qanoq ersersippaa?

⁸ Kunngimik Saulimik oqaluttuamit erserpoq namminissarsiorneq qanoq imminut pilliutigeriaannaajunnaarsitsisinnaasoq. Sauli kunnginngoqqammerami maniguuttuullunilu anneruniajuitsuuvoq. (1 Sam 9:21) Israelikkut ilaasa kunngiussusia ajortumik oqaatigimmassuk Saulip Guutimit oqartussaassuseqartinneqarnini illersorniarlugu taakkuninnga pillaanissani eqqortuliortutut isigisinnaagaluarlugu pillarumanngilai. (1 Sam 10:27) Guutip anersaavanit ikiorneqarluni kunngip Saulip Israelikkut Ammonikkunnik ajugaaffiginninnissaannut siulersorpai. Tamatumalu kingorna Saulip maniguulluni ajugaanertik Jehovamut ataqqinaataatippaa. — 1 Sam 11:6, 11-13.

9. Sauli qanoq namminissarsiulerpa?

⁹ Kingusinnerusukkut Sauli uummatimigut namminissarsiulerlunilu makitaneruleriartorpoq, soorlu savimineq manngertorniiarneqanngikkaangami arrortartoq. Amalekikkut ajugaaffigigamigit nammineq piumasani Jehovap naalannissaanit pingaartinneruaa. Guutip ujajakkanik tamanik suujunnaarsitsinissamut peqqussutaa maleruarnagu Saulip ujajakkat piumatulluni pigilerpai. Saulilu pingaakujulluni imminut eqqaassutissiamik nappartitsivoq. (1 Sam 15:3, 9, 12) Pruffiitip Samuelip Saulip Jehovamit iluarineqannginnera paasitimmagu Saulip utoqqatsissutissarsiorlunilu Jehovap peqqussutaata ilaat malissimallugu eqqaavaa. Allaat inuit allat kukkunerminut pisuutippai. (1 Sam 15:16-21) Makitaneq pissutigalugu inunnit nuannarineqarnini Guutimit iluarineqarnerminit pingaartinneruaa. (1 Sam 15:30) Imminut pilliutigeriaannaajuarumalluta Saulimik oqaluttuaq tarrarsuutitullusooq atorlugu qanoq imminut misissorsinnaavugut?

10, 11. (a) Imminut pilliutigeriaannaanermut tunngatillugu Saulimik oqaluttuaq qanoq ilinniutigisinnaavarput? (b) Saulip maligassiuinerlunnera ilaarumanagu susinnaavugut?

¹⁰ Saulimik oqaluttuamit ilinniutigisinnaasarput siulleq tassaavoq imminut tatigivallaalersuunnginnissaq. Siornatigut imminut pilliutigeriaannaasimagatta imaanngilaq tamanna sulissutiginngikkutsigu imminut pilliutigeriaannaajuarsinnaasugut. (1 Tim 4:10) Eqqaamajuk Saulip siullermik Guutip iluarisaatut iliortup kingusinnerusukkut namminissarsioqqajaalernini akiunngikkaa. Naggataatigullu Saulip naalannginnera pissutigalugu Jehovap taanna iluariunnaarpaa.

¹¹ Ilinniutigisinnaasatta aappaat tassaavoq iliuuserisavut ajunngitsut kisiisa eqqarsaatiginagit sulissutigisariaqakkatsinnik eqqumaffiginninneq. Eqqumaffiginninngikkutta tarrarsorluni atisat nutaat alutorsaatigalugit tapalluni maluginninngitsuuinermut assersuunneqarsinnaavoq. Saulip makitaneratut makitanngikkaluarluta pissuserisat Saulitut pissusilersornissamik kinguneqarsinnaasut suulluunniit eqqumaffigisariaqarpavut. Oqaaqqissaarneqarutta utoqqatsissutissarsiornatalu allat pisuutissanngilavut. Pitsaanerungaassaaq oqaaqqissaarut kajumilluta akuerigutsigu. — Ussatit 25:12 atuaruk.

12. Ingasattumik ajortuliorutta imminut pilliutigeriaannaanerput qanoq iluaqutigisinnaavarput?

 ¹² Ingasattumilli ajortuliorutta sussaagut? Saulip allanit tusaamanerlugaalerusunnginnini Jehovamik attaveqarluaqqilernissaminut akornutigaa. Uagulli qanorluunniit kanngusutsigigaluarluta imminut pilliutigeriaannaanerput ikiortissarsiornissatsinnut kajumississutigisinnaavarput. (Uss 28:13; Jaak 5:14-16) Assersuutigalugu qatanngut angut aqqaneq-marlunnik ukioqarluni pornografiimik isiginnaartalerpoq ukiullu qulit sinnerlugit isertorluni isiginnaartarluni. Ima oqarpoq: “Nuliannut utoqqaanertanullu nassuernissara sapernartittorujussuuara. Nassuereeramali ilorraallaatigeqaara. Ikinngutima ilaasa ilagiinni kiffartorunnaarnera pakatsissutigeqaat, soorlu taakku ilaginnarikka. Taamaakkaluartorli nalunngilara Jehovap maanna kiffartornera pornografiimik isiginnaartarallarama kiffartorninnit iluarinerugaa. Jehovallu isiginnittaasia pingaaruteqarnerpaajuvoq.”

13, 14. Petrusi qanoq namminissarsioqqajaava?

¹³ Apustili Petrusi Jiisusimit ilinniartinneqarami imminut pilliutigeriaannaavoq. (Luk 5:3-11) Namminissarsioqqajaasarninili suli akiortariaqarpaa. Assersuutigalugu apustilit Jaakup Johannesillu Guutip naalagaaffiani qaffasinnerusumik inissisimaffeqarnissamik Jiisusi qinnuigimmassuk Petrusi mamiasuppoq. Jiisusi siusinnerusukkut oqarsimammat Petrusi pingaarutilimmik suliassaqassasoq imaassinnaavoq Petrusi taakkua qinnutigisaannik inissisimaffeqassasorisoq. (Matt 16:18, 19) Jiisusip Jaaku, Johannesi, Petrusi apustilillu allat namminissarsiulinnginnissaannut qatanngutiminnillu pitsaanerusutut pissusilersulinnginnissaannut mianersoqquai. — Mark 10:35-45.

¹⁴ Jiisusip Petrusip eqqarsartaasia naqqikkaluaraa Petrusi suli namminissarsioqqajaavoq. Jiisusip apustilit qimakkallarumaaraanni oqarfigimmagit Petrusip kisiartaalluni aalajaattuarumaarluni oqarnermigut apustileqatini isiginerlugaalersippai. (Matt 26:31-33) Taama imminut tatigitigisimassanngikkaluarpoq, unnuamimi tassani Petrusip imminut pilliutigeriaannaanini ersersinngilaa. Imminut illersorniarluni Jiisusi pingasoriarluni miserratigaa. — Matt 26:69-75.

15. Sooq Petrusimik oqaluttuaq uagutsinnut qiimmaallannarpa?

¹⁵ Petrusi akiugassarpassuaqaraluarlunilu  arlaleriarluni kukkusaraluartoq taassuminnga oqaluttuaq uagutsinnut qiimmaallannarpoq. Nammineq ilungersornini Guutillu anersaavata ikiuinera iluaqutigalugit Petrusip namminissarsioqqajaanini akiorsinnaasimavaa. Kingusinnerusukkut imminut naalakkersinnaanini imminullu pilliutigeriaannaalluni asanninnini ersersippai. (Gal 5:22, 23) Misilinneqarnerit arlallit immaqa siornatigut naammagalugit atorsinnaanngisani nikallujuilluni atorpai. Assersuutigalugu Paulusip Petrusi allat najuutsillugit avoqqaarimmani maniguuppoq. (Gal 2:11-14) Petrusi avoqqaarineqareerluni puttarsinngilaq tusaamanerlugaalersutullu misiginani. Kingusinnerusukkullu Petrusip Paulusi ‘qatanngutitut asasatut’ allaatigaa. (2 Petr 3:15) Petrusip maligassiaa imminut pilliutigeriaannaanermik ineriartortitsinissatsinnut iluaqutigisinnaavarput.

16. Pisuni artornartorsiorfiusuni qanoq imminut pilliutigeriaannaasinnaavugut?

¹⁶ Eqqarsaatigeriaruk pisuni artornartorsiorfiusuni qanoq pisarnersutit. Petrusi apustililu oqaluussinertik pissutigalugu parnaarussaallutillu unatarneqaraluarlutik “Jiisusip aqqa pillugu narrunarsagaanissamut qinngaqqunnartitaannginnamik” nuannaarput. (ApS 5:41) Illittaaq malersorneqarneq Petrusi ilaarlugu imminut pilliutigeriaannaanikkut Jiisusip tumaanik atuaanissannut periarfissatut isigisinnaavat. (1 Petrusi 2:20, 21 atuakkit). Taamatut isiginnittaaseqarneq allaat utoqqaanertanit oqaaqqissaarneqarutta iluaqutigisinnaavarput. Aap, qanortoq tamatta ajuallannata Petrusip maligassiuilluarnera malittuartigu. — Oqal 7:9.

17, 18. (a) Anersaakkut anguniagassatsinnut tunngatillugu qanoq imminut aperisinnaavugut? (b) Namminissarsioqqajaalersimanerput malugigutsigu susinnaavugut?

¹⁷ Aamma Petrusip maligassiuilluarnera anersaakkut anguniagaqarninnut iluaqutigisinnaavat. Imminut pilliutigeriaannaanikkut anguniagassat taakku anguniarsinnaavatit. Allanit pingaartinneqarniaannarlutit anguniagaqarneq mianersuutigissavat. Imminut ima aperigit: ‘Sooq Jehovamut kiffartorninni pikkorinnerulerusullungalu iliuuseqarnerulerusuppunga? Jaakup Johannesillu kissaatigisaattut allanit nersorneqarnissara oqartussaassuseqarnerulernissaralu kissaatigaakka?’

¹⁸ Uummatinni namminissarsioqqajaalernerit malugigukku eqqarsaativit misigissutsivillu aaqqinnissaannut ikioqqullutit Jehovamut qinugit. Jehova naalannarsisinniarlugu imminut naalannarsisinniarnak ilungersorlutit iliuuseqarit. (Tuss 86:11) Aamma anguniagaqarsinnaavutit ilinnik pingaartitsilinngitsunik. Assersuutigalugu anersaap inerititaata ilaata ersersinnissaa ajornakusoortikkukku ineriartortikkumallugu sulissutigisinnaavat. Ataatsimiinnerni pisassannut piareersarluartaruit naalagaaffilersaarfimmili eqqiaaneq nuannarinngikkukku siunnersuutip uuma maleruarnissaa sulissutigisinnaavat: “Imminut eqqarsaatigisarnissitut allat eqqarsaatigiuarsigit; makitaqinasi, nikagineqartulli noqqaassutigisigit. Imminut silatuusoreqinasi.” — Romamiut 12:16, NW.

19. Guutip oqaasia iluaqutigalugu imminik misissuinitsinni paasisavut nikallussutigissanngikkutsigit qanoq iliorsinnaavugut?

¹⁹ Guutip oqaasia tarrarsuutitut atorlugu imminut misissorutta aaqqitassaqarnerput namminissarsioqqajaasarnerpullu paasigutsigu imaassinnaavoq nikallussutigigivut. Nikallulissaguilli Jaakup assersuusiani inuk iluatsitsisoq eqqarsaatigiuk. Inuup taassuma piffissaq qanoq annertutigisoq atorlugu aaqqitassani aaqqinnerai imaluunnit allaat aaqqitassaminik tamanik aaqqiinersoq Jaakup allaatiginngilaa. Eqqaavaali ‘inatsisinik naammalluinnartunik aalajangiussisoq’. (Jaak 1:25) Inuup tarrarsuummi takusani eqqaamajuarlugillu sulissutigiuarpai. Taamaattumik isumalluartumik isiginnittaaseqartuarlutillu tamatta naammalluinnanngitsuunerput eqqaamajuaruk. (Oqaluussisartup oqaasii 7:20 atuaruk). Jehovap anersaakkut qatannguterpassuarnik ikiuisimanermisut ikiorumavaatit. Biibilimi ajoqersuutigineqartut maleruarukkit imminullu pilliutigeriaannaaneq ersersittuarukku Guutimit iluarisaallutillu pilluaqquneqarumaarputit.