Utoqqarnik isumassuineq
“Qitornaasusi, oqaasiinnartigut oqaannakkulluunniit pinnata suliatsigulli sallusuinnikkullu asannittuuniarta!” — 1 JOH 3:18.
1, 2. (a) Unamminiarnartut apeqqutillu qanoq ittut ilaqutariippassuit nalaattarpaat? (b) Angajoqqaat qitornaasullu pissutsit allanngornissaannut qanoq piareersarsinnaappat?
ANGAJOQQAATIT nukittusimasut nammineersinnaasimasullu nammineersinnaajunnaarsimanerat paasillugu artornarsinnaavoq. Imaassinnaavoq anaanavit ataatavilluunniit orlulluni siffiiarsimaneranik, paatsiveerussimaneranik tammarsimaneranillu imaluunniit perulunnartumik nappaateqalersimaneranik ilisimatinneqartutit. Akerlianilli utoqqaat aamma nammineersinnaanerminnut killiliisumik peqqissutsimik atukkamilluunniit allanngornerat akueriuminaatsissinnaavaat. (Job 14:1) Ikiorniarlugit qanoq iliorsinnaavugut? Qanoq isumassorneqarsinnaappat?
2 Utoqqarnik isumassuineq pillugu allaaserisami eqqaaneqarpoq ilaqutariit utoqqaliartorneq pillugu oqaloqatigiinnikkut pilersaarusiorluarsimagunik, naak taamaaliornissaq ajornakusoorsinnaagaluartoq, siunissami peqqissutsimut tunngatillugu aalajangiiffissami eqqortumik aalajangiisinnaasut. Paasisariaqarparput utoqqaliartornermi ajornartorsiutit avaqqunneqarsinnaannginnerat. Taamaattuminguna ilaqutariittut piareersarnissaq pingaaruteqartoq. Aalajangigassat sapernartut taakku ilaqutariit qanoq asannillutik suleqatigiissutigisinnaavaat?
‘ULLUNUT AJORTUNUT’ PIAREERSARNEQ
3. Angajoqqaat utoqqalisimasut ikiorneqarnissaminnik pisariaqartitsinerulerpata ilaqutaasut susariaqarpat? (Allaaserisap aallaqqaataani assiliaq takuuk).
3 Piffissap ilaani angajoqqaat imminut isumassorsinnaajunnaassallutillu ikiorneqarnissaminnik pisariaqartitsilissapput. (Oqaluussisartup oqaasii 12:1-7 atuakkit). Angajoqqaat utoqqalisimasut nammineersinnaajunnaarunik qanoq pitsaanerpaamik ikiuisoqassallunilu aaqqiissutit akissaqarfigineqartut suut atorneqassasut qitornatillu aalajangertariaqarpaat. Qanoq ikiorneqarnissamik pisariaqartitsisoqarnersoq, qanoq ikiuisoqassanersoq qanorlu ilaqutaasut tamarmik suleqataasinnaanerat oqaloqatigiissutiginiarlugu ilaqutariittut ataatsimiittoqarpat silatusaarnerussaaq. Ilaqutaasut tamarmik sapinngisamik piviusorsiortuusariaqarlutillu unneqqarissumik oqaloqatigiittariaqarput. Angajoqqaajusut isumannaatsumik namminneq najugaqarsinnaappat? * Angajoqqaajusut pisariaqartitaminnik isumassorneqarsinnaaniassammata ilaqutaasut ataasiakkaat susinnaanerat eqqartorsiuk. (Uss 24:6) Ilaat ulluinnarni isumassuinermikkut ikiuussinnaapput, allallu immaqa peqqissutsikkut isumassuinermut aningaasartuutit akilertarsinnaavaat. Ilaqutaasut tamarmik sulerissanerlutik ilisimasariaqarpaat, piffissalli ingerlanerani suliassat allanngorsinnaapput ilaqutaasulluunniit akisussaaffimminnik allannguisinnaapput.
4. Pissutsit allanngorpata ilaqutaasut kikkunnut ikioqqusinnaappat?
4 Isumassuileruit angajoqqaavit nappaataa pillugu ilisimasaqarlualernissannut piffissaqassaatit. Angajoqqaat perulunnerulissappat tullissaani qanoq pisoqarumaarnera paasiniaruk. (Uss 1:5) Najukkanni pisortaqarfiit utoqqarnik isumaginninnermik suliallit attavigikkit. Isumaginninnermi aaqqiissutit sorliit angajoqqaannut pitsaanerunersut imaluunniit illit isumassuininnik oqinnerulersitsissanersut paasiniaruk. Imaassinnaavoq unamminiarnartunik taakkuninnga eqqarsaatiginninnerit nuanninngitsunik misigissuseqalissutigigit, soorlu nikallussutigigit, tupassutigigit paatsiveerussutigigilluunniit. Taamatut misigileruit ikinngutit tatigisat eqqarsaatitit pillugit oqaloqatigisinnaavat. Pingaarnertulli uummammiugisatit Jehovamut oqaluttuarikkit. Atukkavit qanoq ittuusulluunniit akueriniarneranni qaangerniarnerannilu eqqissinermik pisariaqartitannik tunisinnaavaatit. — Tuss 55:23; Uss 24:10; Fil 4:6, 7.
5. Sooq piffissaqqissumi peqqissutsikkut aaqqiissutit pillugit misissuinissaq pitsaassava?
5 Utoqqaat taakkualu qitornaat piffissaqqissumi peqqissutsikkut aaqqiissutit pillugit misissuippata pitsaassaaq. Imaassinnaavoq angajoqqaap ernerminut panimminulluunniit nuuppat, utoqqaat illuannut nuuppat periarfissanilluunniit allanik atuippat ajunnginnerussasoq paasigaat. Taamaalillutik ilaqutariit utoqqalinermi “naalliunnartoq ajunaarnerlu” nalaanneqartartoq piareersimaffigissavaat. (Tuss 90:10) Ilaqutariit pilersaarusiorsimanngitsut ajornartorsiuteqalerpat tuaviupiluullugu aalajangertariaqalersinnaapput. Ilisimatooq ima oqarpoq: ‘Piffissami tamatumanerpiaq tamakku pillugit aalajangiineq amerlanertigut silatusaarneruneq ajorpoq.’ Tuaviupiluullugu aalajangiisoqaraangat ilaqutaasut uippakajaalersinnaallutillu iliuuserineqartussat isumaqatigiinngissutigilersinnaavaat. Pilersaarusiorsimaguttali allannguinernut naleqqussarnissarput ajornannginnerulissaaq. — Uss 20:18.
Qanoq ikiuisoqarnissaa ataasiakkaallu qanoq iliorsinnaanerat oqaloqatigiissutiginiarlugit ilaqutariit ataatsimiissinnaapput (Immikkoortut 6-imiit 8-mut takukkit)
6. Angajoqqaat utoqqaligunik qanoq sumilu inuuniarnerat pillugu oqaloqatigiinneq sooq iluaqutaasarpa?
6 Angajoqqaavit angerlarsimaffianni allannguinissaq angajoqqaatilluunniit ullut ilaanni nuuttariaqarnerat pillugu oqaloqatiginissaat sapernarpasissinnaavoq. Amerlasuulli tamakku pillugit oqaloqatigiinneq kingusinnerusukkut iluaqutiginerarsimavaat. Sooq? Artornartut oqaloqatigiissutiginissaat, tusarnaarnissaq ajornartorsiuteqalinnginneranilu pilersaarusiornissaq ajornannginnerulissagami. Ilaqutariit eqqissisimasunik avatangiiseqarunik kajungerinerusatik unneqqarissumik oqaloqatigiissutigisinnaallugillu imminnut qaninnerusutut misigissallutillu asaqatigiinnertik eqqaamassavaat. Imaassinnaavoq utoqqaat sapinngisamik sivisunerpaamik namminneq ineqarusuttut. Angajoqqaat isumassueriaatsit kajungerinerusatik pillugit qitornaminnik oqaloqateqarsimanerat ilaqutaasut qanoq isumassuisoqarnissaanik aalajangiilerunik iluaqutigingaassavaat.
7, 8. Ilaqutariit suut oqaloqatigiissutigisariaqarpaat, aamma sooq?
7 Angajoqqaajususi taamatut eqqartuinermi ilaquttasi sunik kissaateqarnissinnik, qanoq aningaasaateqartiginissinnik periarfissanillu sunik atuerusunnerunissinnik oqaluttuussigit. Taava ullut ilaanni nammineq aalajangiisinnaajunnaaruit kissaatitit malillugit aalajangiisinnaalissapput. Kissaatinnik ataqqinninnissaat namminiiginnarsinnaanissannillu sapinngisaminnik sulissutiginninnissaat ilimanarpoq. (Ef 6:2-4) Assersuutigalugu qitornavit ilaannut nuunnissat naatsorsuutigaajuk, imaluunniit allamik piumasaqarpit? Piviusorsiortuugit eqqaamallugulu ilaquttatit ilinnit allaanerusumik isiginnittaaseqarsinnaanerat. Angajoqqaat qitornaasullu eqqarsartaatsiminnik naleqqussaanerat sivisusinnaavoq.
8 Pilersaarusiorluarutta unneqqarissumillu oqaloqatigiittarutta ajornartorsiuterpassuit pinngitsoortissinnaavavut. (Uss 15:22) Nakorsartittarnerit kajungerisatillu pillugit ilaquttatit oqaloqatigikkit. Taamatut oqaloqatigiinnermi Jehovap Nalunaajaasuisa nakorsartinneq pillugu aalajangersagaq piginnaatitsissullu atortagaanni paasissutissat atorneqartariaqarput. Inuit tamarmik nakorsaariaatsit pillugit ilisimatinneqarnissaminnut pisinnaatitaaffeqarput, aamma nakorsaariaatsimik akuerinninnissaminnut itigartitsinissaminnulluunniit pisinnaatitaaffeqarput. Nakorsartinneq pillugu allagartami inuup kissaatai atuarneqarsinnaapput. Inuk tatigisat piginnaatitatut toqqakkat pisariaqartitsiffinni naleqquttumik illit sinnerlutit aalajangiisinnaavoq. Utoqqaat, isumassuisut piginnaatinneqartullu Nakorsartinneq pillugu allagartap assilineqarneranik peqartariaqarput. Utoqqaat ilaasa Nakorsartinneq pillugu allagartartik allakkanut pingaarutilinnut ilisarpaat, taakkununnga ilaapput kingornussassialiaq, sillimmasiinermut, aningaasaqarnermut, pisortanullu isumaqatigiissutinut tunngasut ilaallu ilanngullugit.
PISSUTSINUT NALEQQUSSARNEQ
9, 10. Qaqugukkut angajoqqaajusut qitornaminnit ikiorneqarnissaminnik pisariaqartitsinerulersinnaappat?
9 Utoqqaat sapinngisamik sivisunerpaamik namminiiginnarnissaat amerlanertigut ilaqutaasut tamarmik kissaatigisarpaat. Angajoqqaat namminneq nerisassiorsinnaappata, eqqiaasinnaappata, nakorsaatitorsinnaappata attaveqaqateqarluarsinnaappatalu qitornaasut angajoqqaamik inuuneranni sutigut tamatigut akuusariaqanngillat. Piffissalli ingerlanerani angajoqqaat pitsorlulerpata, namminneq pisiniarsinnaajunnaarpata imaluunniit puiutoorujussuanngorpata qitornaasut iliuuseqarnerusariaqalersinnaapput.
10 Imaassinnaavoq utoqqaat paatsiveeruttut isumatsaqqalertulluunniit. Tutsarlulersinnaapput, isigiarsulersinnaapput, puiutuunngorsinnaapput iloqqutsisalersinnaallutilluunniit. Taakkua ilaat ajornartorsiutigineqalerpata nakorsaatitorneq iluaqutaasinnaavoq. Tamakku ajornartorsiutigineqalerpata piaarnerpaamik nakorsiarit. Qitornaasut angajoqqaamik nakorsiarnissaat taakkununngaluunniit tunngasut allat isumagisariaqarsinnaavaat. Qitornaasut angajoqqaamik pitsaanerpaamik isumassorneqarnissaat qulakkeerniarlugu angajoqqaatik sinnerlugit oqaluttariaqarsinnaapput, allakkanut tunngatillugu ikiuussinnaapput, angajoqqaaminnik ingerlatsisarsinnaapput ilaallu ilanngullugit. — Uss 3:27.
11. Angajoqqaat allannguutinut naleqqussarnissaannut suut ajornannginnerulersitsisinnaappat?
11 Angajoqqaatit katsorsarneqarsinnaanngitsumik peqqiilliuuteqarpata isumassorneqarnerannut angerlarsimaffiannulluunniit tunngatillugu allannguisariaqarsinnaavutit. Annertunngitsumik allannguisoqarpat naleqqussarnissartik ajornannginnerutissagunarpaat. Angajoqqaannit ungasissumi najugaqaruit nalunaajaasup saniliusulluunniit angajoqqaannut pulaakulasarnissaa taakkualu qanoq innerat pillugu ilinnik ilisimatitsisarnissaa imaassinnaavoq naammattoq. Nerisassiornermuinnaq eqqiaanermuinnarlu tunngatillugu ikiorneqarnissaminnik pisariaqartitsippat? Angerlarsimaffianni annertunngitsumik allannguinikkut ajornannginnerusumik isumannaannerusumillu angerlarsimaffimminniissinnaalissappat, uffarsinnaalissappat ilaallu ilanngullugit? Imaassinnaavoq angajoqqaat angerlarsimaffimminniiginnarniarlutik angerlarsimaffimmi ikiorteqarnissartik pisariaqartiinnaraat. Isumannaatsumilli angerlarsimaffimminniissinnaanngikkunik ingerlaavartumik ikiorneqarnissartik pisariaqartissinnaavaat. Angajoqqaatit qanorluunniit atugaqaraluarpata illoqarfinni isumaginninnikkut aaqqiissutit suunersut paasiniakkit. * — Ussatit 21:5 atuaruk.
ILAAT UNAMMINIARNARTUNUT QANOQ AAQQIISSUTEQARSIMASUT
12, 13. Qitornaasut inersimasut ilaat angajoqqaatik ungasissumi najugallit ataqqiniarlugit isumassorniarlugillu susimappat?
12 Angajoqqaavut asagatsigit toqqissisimanissaat ilorrisimaarnissaallu kissaatigaarput. Angajoqqaatta isumassorneqarnerannik ilisimanninnerput qamuuna eqqississutigisarparput. Qitornarpassuilli inersimasut angajoqqaaminnit ungasissumi najugaqarput. Qitornaasut ilaasa angajoqqaatik ikiorniarlugit suliassallu angajoqqaamik suliarisinnaajunnaarsimasaat isumaginiarlugit sulinngiffeqarnerminni tikeraartarpaat. Qitornaasut aamma angajoqqaaminnut akulikitsumik ullulluunniit tamaasa sianertarnermikkut, allattarnermikkut e-mailertarnermikkulluunniit asanninnertik ersersissinnaavaat. — Uss 23:24, 25.
13 Ilaquttatit ungasissumi najugaqaraluarpataluunniit ulluinnarni angajoqqaavit qanoq isumassorneqartarnissaat aalajangiiffigisariaqarsinnaavat. Angajoqqaannit ungasissumi najugaqaruit taakkulu nalunaajaasuuppata angajoqqaavit ilagiivini utoqqaanertat oqaloqatigisinnaallugillu siunersiorsinnaavatit. Tamanillu pingaarnerusumik angajoqqaatit pillugit Jehovamut qinusarit. (Ussatit 11:14 atuaruk). Angajoqqaatit nalunaajaasuunngikkaluarpataluunniit ‘ataatat anaanallu ataqqissavatit’. (2 Mos 20:12; Uss 23:22) Soorunami ilaqutariit tamarmik assigiimmik aalajangiinavianngillat. Ilaat aalajangertarput angajoqqaaq utoqqalisimasoq najugaqatiginiarlugu imminerminnulluunniit qaninnerusumut nuutsinniarlugu. Tamannali ilaannikkut periarfissaaneq ajorpoq. Angajoqqaat ilaasa qitornatik inersimasut ilaquttatillu najugaqatigerusunneq ajorpaat. Imaassinnaavoq nammineq najugaqarusunnerullutillu qitornaminnut nanertuutaarusunngitsut. Ilaat immaqa angerlarsimaffimmi isumassorneqarnissartik namminneq akilerusunnerussavaat. — Uss 10:15.
14. Isumassuinerusut suut ajornartorsiutigilersinnaavaat?
14 Ilaqutariippassuarni ernerusoq paniusorluunniit angajoqqaaminnut qaninnerusumi najugaqartoq isumassuinerorpasittarpoq. Isumassuisulli angajoqqaamik pisariaqartitaannik ilaquttamillu pisariaqartitaannik isumaginnittut oqimaaqatigiissaarisariaqarput. Inuit ataasiakkaat piffissaat nukiilu killeqarput. Isumassuisup atugai allanngorpata ilaqutaasut pissutsit nalilersoqqittariaqalersinnaavaat. Ilaqutaasut ilaat akisussaaffeqarpallaarpa? Qitornaasut allat, immaqa paarlakaajaallutik isumassuinermikkut, iliuuseqarnerusinnaappat?
15. Isumassuisup nukissaarukkiartornissaa qanoq pinaveersaartinneqarsinnaava?
15 Angajoqqaaq utoqqalisimasoq piffissaq tamaat ikiorneqarnissaminik pisariaqartitsippat annerusumik isumassuisoq nukissaarukkiartulersinnaavoq. (Oqal 4:6) Qitornaasut asannittut sapinngisaminnik iliuuseqarusuttarput, angajoqqaaminnilli isumassuinertik ilungersunarilersinnaavaat. Taamatut pisoqarpat isumassuisut piviusorsiortuusariaqarlutillu allanut ikioqqusariaqarsinnaapput. Isumassuisut ilaannikkut ikiorneqartarnermikkut angajoqqaatik utoqqaat illuannut siusissukkut nuutsinngikkaluarlugit isumassuisinnaasarput.
16, 17. Qitornaasut angajoqqaaminnik utoqqalisimasunik isumassuinerminni qanoq misigilersinnaappat, misigissutsiminnillu paasinninnissaminnut oqimaaqatigiissaarisuunissaminnullu suut iluaqutigisinnaavaat? (Aamma takuuk ungalusaq “Qujamasunnermik isumassuineq”).
16 Angajoqqaatta asasatta utoqqaliartornerup sunniutaanik anniaateqarnerat takullugu alianarpoq. Isumassuisut ilaannikkut nikallungasarput, ernumasarput, isumatsaqqasarput, kamattarput, pisuusutut misigisarput imaluunniit allaat narrutsassimasarput. Angajoqqaaq utoqqalisimasoq ilaannikkut inussiarniissinnaallunilu qujasuissinnaasarpoq. Taamatut pineqaruit ajuallannaveersaarit. Sianissutsikkut peqqissuseq pillugu ilisimatooq oqarpoq aliasunnartunik misiginerput akuereqqaassagipput taakkuninngalu misigissuseqarnerput nikallungassutiginaveersaassallugu. Misigissutsit tamakku pillugit uiit nulialluunniit, ilaquttat ikinngutilluunniit tatigisat oqaloqatigiuk. Tamakku pillugit oqaloqateqartarnerit misigissutsinnik paasinninnissannut oqimaaqatigiissaarisuunissannullu iluaqutigissavat.
17 Imaassinnaavoq piffissap ilaani asasatta angerlarsimaffimmi pisariaqartitaanik isumaginnissinnaajunnaartugut. Asasap utoqqaat illuanni paaqqutarineqartariaqarnera ilaqutaasut aalajangertariaqalersinnaavaat. Qatanngutip arnap kristumiup anaanani utoqqaat illuannut ullut tamangajaasa pulaartarpaa. Ima oqarpoq: “Ulloq unnuarlu anaanatta pisariaqartitaanik isumaginnissinnaajunnaarpugut. Utoqqaat illuanni paaqqutarineqarnissaanik akuersineq imaannaanngitsuuvoq. Misigissutsikkut assut artorsarpunga. Aaqqiissulli tamanna qaammatini kingullerni inuuffiini pitsaanerpaavoq, namminerlu aaqqiissummik akuersivoq.”
18. Isumassuisut suna qularinngilluinnarsinnaavaat?
18 Angajoqqaanik ukioqqortusiartortunik isumassuinermik akisussaaffeqarneq pisariusinnaallunilu misigissutsikkut artornarsinnaavoq. Utoqqarnik isumassuinermi aaqqiissutit inuit ilaannut naleqqunneq ajorput. Pilersaarusiorluartaruilli, ilaquttannik suleqateqartaruit, attaveqaqateqarluartaruit tamanillu pingaarnerusutut Jehovamut qinusaruit akisussaaffitit eqqortissallugillu asasatit ataqqinarsisissavatit. Taamaaliortaruit asasatit pisariaqartitaannik isumassortarlugillu paaqqutarisarakkit tulluusimaarsinnaavutit. (1 Korinthimiut 13:4-8 atuakkit). Pingaarnertut qamuuna eqqississaatit Jehovamillu pilluaqquneqarlutit. — Fil 4:7.
^ par. 3 Nunat ilaanni angajoqqaat qitornaminni inersimasuni najugaqartarnerat nalinginnaavoq, imaassinnaavorlu tamanna kajungerinarnerutinneqartoq.
^ par. 11 Angajoqqaat angerlarsimaffimminni suli najugaqarpata isumassuisut tatigisatit angajoqqaavit angerlarsimaffiannut, ajornartoortoqartillugu atorsinnaasaannik, matuersaateqarnissaat qulakkeeruk.
