Kristusitut inersimalluartigilernissat ilungersuutigaajuk?
‘Tassaalerit inuk ima alliartorsimasoq Kristusip peqangaassusianut ineqarfiussalluni naammaattunngorluni.’ – EF 4:13.
1, 2. Kristumiut tamarmik suna anguniagaraat? Assersuuteqarit.
ILLUMI ningiuusup naatitaarniarfimmi naatitanik pisiniaraangami suna maluginiartarpaa? Anginersiornagillu akikinnersiornagit naatitat tikki mamarunarnerilu maluginiartarpai. Naatitat inerissimasut piumasarpai.
Kristumiu inersimalluartoq eqqortunik eqqunngitsunillu immikkoortitsisinnaajumalluni Biibilimi najoqqutassarsiortuarpoq
2 Inuup Jehovamut tunniulluinnareerluni kuisinnermi kingorna Guutimut attaveqarnini nakussatsikkiartortuartarpaa. Kristumiutut inersimalluartuulernissani anguniagarisarpaa. Taamatut inersimalluartuuneq qanoq utoqqaatiginermut tunngassuteqanngilaq. Anersaakkut inersimallualeriartornermut, tassa Jehovamut qaninnerujartuinnartumik attaveqarnermut, tunngavoq. Apustilip Paulusip kristumiut Efesosimiut inersimalluartunngornissaat kissaatigaa. Kajumissaarpai uppernikkut ataasiussuseqaqqullugit Jiisusilu pillugu ilinniartuaqqullugit tassaalerniassammata “inuk inerluarsimasoq, tassa ima alliartorsimasoq Kristusip peqangaassusianut ineqarfiussalluni naammaattunngorluni”. – Ef 4:13.
3. Ilagiit Efesosimiut ullumikkullu Jehovap innuttai qanoq assigiissuteqarpat?
3 Ilagiit Efesosimiut ukiorpaalunni pioreersut Paulusip allaffigai. Ilagiinni taakkunaniittorpassuit kristumiuupput misilittagaqarlutillu inersimalluartuusut. Ilaqarpulli Jehovamut attaveqarnertik nakussatsinniarlugu sulissutiginninnerusariaqartunik. Aamma ullumikkut qatannguterpassuatta ukiorpassuarni Jehova kiffartorfigaat kristumiutullu inersimalluartuulersimallutik. Ilagiinniittulli allat suli inersimalluartuulersimanngillat. Assersuutigalugu ukiut tamaasa tuusintilikkuutaat kuisittarput, tassa ilaat inersimallualernissaq suli anguniagarisariaqarpaat. Illimmi? –KRISTUMIUTUT INERIKKIARTORNEQ
4, 5. Kristumiut inersimalluartut sutigut assigiinngillat, tamarmilli suna assigiissutigaat? (Allaaserisap aallaqqaataani assiliaq takuuk).
4 Naatitaarniarfimmi naatitat inerissimasut takugaangakkit malugisarunarpat assigeeqqissaanngitsut. Inerissimanerannulli assigiimmik ilisarnaateqarput. Aamma kristumiut inersimalluartut assigeeqqissaanngillat. Nunanit assigiinngitsuneersuupput tunuliaquttamikkullu assigiinnatik. Ukioqatigiinngillat aamma nuannarisaat nuannarinngisaallu assigiinngillat. Kristumiulli inersimalluartut tamarmik inersimalluartuunerminnut assigiinnik ilisarnaateqarput. Taakkua ilaat sammeriartigit.
‘Jiisusi ilaarnerujumallugu sutigut allannguisinnaavunga?’
5 Kristumiup inersimalluartup Jiisusi ilaartarpaa peqqissaartumillu ‘tumai atuarlugit’. (1 Petr 2:21) Jiisusi oqarpoq Jehovamik uummatikkut, tarnikkut isumakkullu iluunngarluni asanninneq tullermillu immisut asanninneq pingaaruteqangaartut. (Matt 22:37-39) Kristumiup inersimalluartup peqqussut tamanna ilungersorluni naalanniartarpaa. Jehovamut attaveqarnerminik inunnillu allanik asanningaarnerminik pingaartitsingaarnera inooriaasianit takuneqarsinnaavoq.
6, 7. (a) Pissuserineqartussat allat sorliit kristumiup inersimalluartup ilisarnaatigai? (b) Imminut qanoq aperisinnaavugut?
6 Asanninneq kristumiup inersimalluartup ersersittagaa anersaap inerititaanut ilaavoq. (Gal 5:22, 23) Kristumiu inersimalluartoq aamma saamasuuvoq, imminut naalakkersinnaavoq kamajasuunanilu. Taamaattunik pissuseqarnikkut akueriuminaatsoqaraangat uumitsannani aliatsannartunillu pakatsinartoqaraangat neriuutaarunnani tamaasa anigorsinnaavai. Kristumiu inersimalluartoq Biibilimik atuaqqissaarluni suup eqqortuuneranik suullu eqqunngitsuuneranik paasinninnissaminut iluaqutissaminik najoqqutassarsiortuarpoq. Taava nalunngeqatiginnissutsi Biibili tunngavigalugu ilinniartitaasoq atorlugu silatusaartumik aalajangiisinnaasarpoq. Kristumiu inersimalluartoq maniguuttuuvoq, taamaattumik Jehovap siulersuinera najoqqutassiaalu nammineq isummaminit pitsaanerujuaannartuunerat upperaa. * Aallussilluarluni nutaarsiassaq nuannersoq oqaluussissutigisarpaa ilagiillu ataasiussuseqartuarnissaat ilungersuutigisarlugu.
7 Qanorluunniit sivisutigisumik Jehovamut kiffartorsimagaluarutta imminut ima aperisinnaavugut: ‘Jiisusi ilaarnerujumallugu sutigut allannguisinnaavunga? Arlaannik pitsanngorsaasinnaavunga?’
“TAMUASARISSAT NERINEQARTUSSAAPPUT INERSIMASUNNGORLUARSIMASUNIT”
8. Jiisusip Biibili qanoq ilisimalluartigalugulu paasilluartigaa?
8 Jiisusip Kristusip Allakkat ilisimalluarlugillu paasilluarpai. Aqqaneq-marluinnarnik ukioqaraluarluni naalaffimmi Luk 2:46, 47) Inersimasuulluni Guutip oqaasianik atuillaqqilluni akeqqani nipangersippai. – Matt 22:41-46.
ilinniartitsisut oqaloqatigigamigit Allakkat atorpai. “Tusarnaartut tamarmik ilisimassusia akissutaalu ajasoorutigeqaat.” (9. (a) Kristumiu inersimalluartoq atuaqqissaarnissamut qanoq pilersaaruteqartarpa? (b) Sooq Biibilimik atuaqqissaartarpugut?
9 Kristumiup inersimalluartunngorumasup Jiisusip maligassiaa malittarpaa sapinngisaminillu Biibili paasiniartarlugu. Biibilimi sallusuissutit itisuut paasiniartarpai nalunnginnamiuk ‘nerisassat tamuasarissat nerineqartussaasut inersimasunngorluarsimasunit’. (Hebr 5:14) Kristumiup inersimalluartup Biibili eqqorluartumik ilisimasaqarfigerusuppaa. (Ef 4:13) Taamaattumik imminut ima aperigit: ‘Ullut tamaasa Biibilimik atuartarpunga? Pilersaarutiga malillugu atuaqqissaartarpunga? Sapaatit-akunneri tamaasa ilaqutariittut atuaqqissaaqatigiittarpugut?’ Biibilimik atuaqqissaaraangavit Jehovap qanoq eqqarsartarneranik misigissuseqarneranillu paasinnissutigisinnaasannik ujarlertarit. Paasisatillu tunngavigalugit aalajangiisarit. Taamaaliornerit Jehovamut qaninnerulissutigissavat.
10. Kristumiup inersimalluartup Guutip peqqussutai najoqqutassiaalu qanoq igai?
10 Kristumiup inersimalluartup Biibilimi allassimasut ilisimaannarusunngilai. Guutip peqqussutai najoqqutassiaalu nuannarisariaqarpai. Taamatullu nuannarinninnini ersersittarpaa nammineq piumasani pinnagu Jehovap piumasaatut iliorusunnermigut. Allaat inuunini, eqqarsartaatsini iliuuserisartakkanilu allanngortippai. Assersuutigalugu Jiisusi ilaartarpaa “atillugulu inuttut pissuseq nutaaq Guutip piumasaa naapertorlugu ilumoortumik naapertuilluarnikkut ilumoorfiginninnikkullu pinngortitaq” (NW). (Efesosimiut 4:22-24 atuakkit). Guutip anersaani illernartoq atorlugu Biibilimik atuartartut siulersortarai eqqaamassallugu pingaaruteqarpoq. Taamaattumik kristumiu ilisimasaqarneruleqqullugu, asanninneruleqqullugu Jehovamullu qaninneruleqqullugu Biibilimik atuaqqissaaraangami anersaamit illernartumit ikiorneqartarpoq.
ATAASIUSSUSEQARNERULERSITSEQATAAGIT
11. Jiisusi nunamiitilluni suna misigaa?
11 Jiisusi inuttut naammalluinnartuuvoq. Inuilli naammalluinnanngitsut akornanniippoq. Angajoqqaavi, nukai najaalu tamarmik naammalluinnanngitsuupput. Allaat ajoqersukkat qaniginerpaasai ilaannikkut makitasuujusarput namminissarsiorlutillu. Assersuutigalugu aqagumut toqusussaasoq unnukkut ajoqersugaasa “kina arlartik ilaminit annerusutut naatsorsuunneqassanersoq” oqqassutigaat. (Luk 22:24) Jiisusip nalunngilaa ajoqersukkani eqqunngitsumik eqqarsartaaseqaraluartut kristumiutut inersimallualerumaartut ilagiinnillu ataasiussuseqartunik pilersitsissasut. Unnummi tamatumani ataasiussuseqaqqullugit Ataataminut qilammiusumut ima qinnuppai: “Naalannassuseq uannut tunniussat taakkununnga tunniuppara ataasioqatigeeqqullugit, soorlu uagut ataasioqatigiittugut.” – Joh 17:21, 22.
12, 13. (a) Kristumiutut suna anguniagaraarput? (b) Qatanngutip ataasiussuseqarnerulersitsisinnaaneq qanoq ilikkarpaa?
12 Kristumiu inersimalluartoq ilagiinni ataasiussuseqarnerulersitsisarpoq. (Efesosimiut 4:1-6, 15, 16 atuakkit). Kristumiutut ‘ataqatigiissinneqarneq’, tassa ataasiussuseqarluni suleqatigiinneq, anguniagaraarput. Taamatut ataasiussuseqassagaanni kristumiut maniguuttuusariaqarput. Aamma allat naammalluinnanngissutaannik sunnerneqaraluarluni kristumiup inersimalluartup ilagiit ataasiussuseqarnerat innarlernaveersaartarpaa. Taamaattumik imminut ima aperigit: ‘Qatanngutit kukkugaangata ajuallatsinneqaraangamaluunniit qanoq qisuariartarpunga? Inuk taanna oqaluukkusukkunnaartarpara? Attaveqatigiinnerpulluunniit aaqqinniartarpara?’ Kristumiu inersimalluartoq allanik ajornartorsiortitsinani ajornartorsiutinik aaqqiiniartarpoq.
13 Uwe pillugu oqaluttuaq sammeriartigu. Siornatigut uppeqatimi naammalluinnanngitsuunerat narrujuummissutigisarpai. Taava Biibili aamma Indsigt i den Hellige Skrift atorlugit Daavip inuunera pillugu atuaqqissaarniarluni aalajangerpoq. Sooq Daavi pillugu? Daavi Guutip kiffaasa ilaannit aamma ajornartorsiortinneqartarmat. Assersuutigalugu kunngip Saulip Daavi toqunniaraluarpaa, inuit allat ujaqqanik milloorniarlugu sioorasaarpaat nuliatalu illaruaatigaa. (1 Sam 19:9-11; 30:1-6; 2 Sam 6:14-22) Daavi allanit qanorluunniit iliorfigineqaraluaraangami Jehova asajuaannarlugulu tatigiuaannarpaa. Aamma nallittuisuuvoq. Uwe nassuerpoq aamma nammineq taamaattuunissaq sulissutigisariaqarlugu. Biibilimik atuaqqissaarnermini paasivaa qatanngutimi naammalluinnanngitsuunerat pillugit misigissutsini allanngortittariaqarlugit. Aalajangerpoq kukkussutaat puttarsissutigisarunnaarniarlugit ilagiinnilu ataasiussuseqarnerulersitsiniarluni iliuuseqarniarluni. Aamma illit tamanna anguniagaraajuk?
GUUTIP PIUMASAATUT ILIORTUNIK IKINNGUTEQARIT
14. Jiisusip kikkut ikinngutissamisut toqqartarpai?
14 Jiisusip Kristusip inuit inussiarnisaarfigisarpai. Arnat angutillu, inuusuttut utoqqaallu allaallu meeqqat Jiisusi peqatigigaangamikku iluarusuttarput. Jiisusilli kikkut tamaasa qanimut ikinngutiginngilai. Apustiliminut ima oqarpoq: “Inassutikka malillugit iliorussi tassaassaasi ikinngutikka.” (Joh 15:14) Jiisusip ajoqersukkani ilumoorfiginnitsini Jehovamillu asannillutik kiffartorfiginnittut qanimut ikinngutissamisut toqqartarpai. Illimmi, Jehovamik uummatikkut iluunngarlutik asannittut ikinngutissattut toqqartarpigit? Sooq tamanna pingaaruteqarpa?
Jehovamik uummatikkut iluunngarlutik asannittunik ikinngutissarsiortarpit?
15. Inuusuttut kristumiunik inersimalluartunik ikinnguteqarneq qanoq iluaqutigisinnaavaat?
Hebræerit 5:14 atuaruk.
15 Naatitat assigiinngitsut amerlanerit seqernup kissarneranit inerilluarnerusarput. Taamatuttaaq qatanngutitta angutit arnallu asannittuunerat kristumiutut inersimalluartunnguutigisinnaavat. Inuusuttuuit inuuninni sussanerlutit aalajangiiniarsarisoq? Taamaappat Jehovamut kiffartortunik misilittagaqarluartunik ilagiinnillu ataasiussuseqartitseqataasunik ikinngutissarsioruit silatusaassaatit. Immaqa taakku ajornartorsiuteqartarsimapput Jehovamullu kiffartornerminni unamminiagaqartarsimallutik. Taakkualu inooriaatsimik pitsaanerpaamik toqqaanissannik ikiorsinnaavaatsit. Peqatigisarukkit silatusaartumik aalajangiisarnissannik kristumiutullu inersimalluartunngornissannik ikiorsinnaavaatsit. –16. Ilagiinni inuusugunnaartut inuusuttoq qanoq ikiorpaat?
16 Helgap eqqaamavaa atuartuuffigisamini ukiumi kingullermi atuaqatimi amerlanersaasa siunissamut anguniakkatik eqqartortaraat. Taakkua ilarpassui atorfigissaalerniassagamik universitetimi ilinniarusupput. Helgalli ilagiinni ikinngutini inersimalluartut oqaloqatigai. Ima oqarpoq: “Taakkua amerlanersaat uannit angajulliunerupput, ikiorluarpaanngalu. Piffissaq tamaat kiffartortunngoqqullunga kajumissaarpaannga. Ukiunilu tallimani pioneriuvunga. Maanna ukiut arlallit qaangiutereersut nuannaarutigaara inuusuttuuninni Jehovamut kiffartornera pimoorukkakku. Taamaaliorninnut peqqissumissutissaqanngilanga.”
17, 18. Jehova pitsaanerpaamik qanoq kiffartorfigisinnaavarput?
17 Jiisusi ilaaraangatsigu kristumiutut inersimalluartunngortarpugut. Aamma Jehovamut qanillisarpugut taassumunngalu kiffartorusussuseqarnerulertarluta. Inuk inersimalluartoq pitsaanerpaamik Jehovamut kiffartortarpoq. Jiisusip ajoqersukkani ima kajumissaarpai: “Qaamasorsi qaamali inunnut, suliasi ajunngitsut taakkununnga takoqqullugit Ataatarsilu qilanniittoq unnersiutigeqqullugu.” – Matt 5:16.
18 Kristumiu inersimalluartoq ilagiinnut qanoq sunniuteqaqataalluarsinnaasoq ilikkarparput. Aamma kristumiup nalunngeqatiginnissutsiminik atuinermigut inersimalluartuunini ersersittarpaa. Nalunngeqatiginnissuserput silatusaartumik aalajangiinissatsinnut qanoq iluaqutigisinnaavarput? Aamma allat nalunngeqatiginnissusiat qanoq mianerisinnaavavut? Apeqqutit taakku allaaserisami tulliuttumi misissussavavut.
^ imm. 6 Assersuutigalugu imaassinnaavoq qatanngutit utoqqaat misilittagaqartut suliarisartakkatik qatanngutinut angutinut inuusunnerusunut isumagisassanngortinneqaraangata taakkuninnga tapersersueqquneqartut.