Naleqanngitsut isigeqinagit!
Naleqanngitsut isigeqinagit!
“Isikka alartikkit sallunermit [naleqanngitsunit, NV], inuuginnartinnga illit aqqutigeqqusanni!” — TUSSIAAT 119:37.
1. Isigisinnaanermik tunissut qanoq pingaaruteqartigaa?
ISIGISINNAASSUSERPUT erlinnangaartuuvoq. Isigisavut iluaqutigalugit sunik avatangiiseqarnerluta — avatangiisivut qanoq iluseqarlutillu qalipaateqarnersut — imaaliallaannaq paasisinnaavarput. Nuannarisavut takusinnaavavut, navianartunut piareersimasinnaavugut, pinngortitanik tupinnartunik qujamasuutiginnissinnaavugut Guutillu piuneranut angingaassusianullu uppernarsaatit takusinnaallugit. (Tussiaat 8:4, 5; 19:2, 3; 104:24; Romamiut 1:20) Aamma isit isumamut attaveqaataammata pingaarutillit, isigisinnaassuserput Jehova pillugu ilisimasaqalernermut taassumunngalu uppernermik ineriartortitsinermut tunngatillugu pingaaruteqangaarpoq. — Josva 1:8; Tussiaat 1:2, 3.
2. Sooq suut isiginnaarnerlugit mianersuutigisariaqarparput, tussiaasiortullu qinnutaa sumik ilinniarfigisinnaavarput?
2 Isigisavulli uagutsinnik ajoqusiisinnaapput. Isigisinnaassuseq isumalu imminnut ima atassuteqarluinnartigipput takusavut anguniagaqarusulersitsillutillu kissaateqalersitsisinnaallutik imaluunniit taakkuninnga sakkortusisitsisinnaallutik. Aamma silarsuarmi ajortunngorsimallunilu imminuinnaq eqqarsaatigiffiusumi Saatanimit Diaavulumit aqunneqartumi assinik ussassaarutinillu — takullatsiaannaraluarlugilluunniit — uagutsinnik tammartitseriaannaasunik sunnerniarneqartarpugut. (1 Johannesi 5:19) Taamaattumik paasinarpoq tussiaasiortup Guuti ima qinnuigimmagu: “Isikka alartikkit sallunermit [naleqanngitsunit, NV], inuuginnartinnga illit aqqutigeqqusanni!” — Tussiaat 119:37.
Isitta qanoq tammartissinnaagaatigut
3-5. Oqaluttuat Biibilimiittut suut isitsinnit tammartinneqarnerup navianaataanut erseqqissaataappat?
3 Arnamut siullermut, Evamut, pisut eqqarsaatigeriakkit. Saatanip taanna oqarfigaa ‘isai uisitaajumaartut’ ‘orpiup ajunngitsumillu ajortumillu ilisimalersitsisup’ paarnai neriffigigunigit. Evap isimi ‘uisitaanissaat’ nuannerunartissimassavaa. Paarnamik nereqqusaanngitsumik suli nererusunnerulerpoq taanna ‘qiviarlugu paasigamiuk neriffigiuminarlunilu isigiuminartuusoq’. Evap orpik kajungeralugu isigigamiuk, tamanna Guutip peqqussutaanik unioqqutitsissutigaa. Aamma taassuma uia, Adami, naalanngippoq, tamannalu inuiannut tamanut alianarluinnartumik kinguneqarpoq. — 1 Mosesi 2:17; 3:2-6; Romamiut 5:12; Jaaku 1:14, 15.
4 Noap nalaani inngilit ilaasa aamma takusatik sunnertissutigaat. Taakku pillugit 1 Mosesi 6:2-mi ima allassimasoqarpoq: “Guutit [Guutip, NV] ernerisa inuit panii isigilerpaat pinnaralugit pileritsaassatillu nulissiuttarlugit.” Inngilit pikitsitsiumatuut inuit panii pilerigalugit isigileramikkit pissusissamisuunngitsumik kissaatigilerpaat arnanik taakkuninnga kinguaassiuutitigut atoqateqarnissartik. Tamanna inngilit taakkua peqqarniitsunik meerartaarnerannik kinguneqarpoq. Taamanikkut inuit ajussusiat inuiaat tamarmik, Noa ilaqutaalu kisiisa pinnagit, nungutinneqarnerannik kinguneqarpoq. — 1 Mosesi 6:4-7, 11, 12.
5 Ukiut hundredellit arlallit qaangiuttut Akanip Israelikkuusup illoqarfimmit tiguakkamit Jerikomit tigusatik takugamigit ussernartorsiulerpoq tillillugillu. Guuti peqqussisimavoq suut illoqarfimmiittut tamarmik suujunnaarsinneqassasut, aalajangersimasut Jehovap erlinnartuusivianut tunniunneqartussat kisiisa pinnagit. Israelikkut mianersoqquneqarput piuneerussassat nigorsimaqqullugit pilerigilinnginniassammatigit illoqarfimmillu tiguarneqartunik tigusinnginniassammata. Akanip naalannginnera Israelikkut illoqarfimmi Ajimi ajorsarnerannik kinguneqarpoq, Israelikkullu ilarpassui toqupput. Akanip tillissimanini qulaarneqarmat aatsaat nassuerpoq. Akani oqarpoq tiguarneqartut ilaat ‘takugamigit pileritsaateriaramigit tigusimallugit’. Isimi pilerisunnerat pissutigalugu ‘pigisani tamaasa’ ilanngullugit piuneerussaavoq. (Josva 6:17-19; 7:1-26) Tassa Akani pisassarinngisaminik pileriginnippoq.
Imminut aqussinnaanissaq pingaaruteqarpoq
6, 7. Saatanip uagutsinnik pilerisaareriaatsit suut atorajuppai, ussassaarisartullu periaaseq tamanna qanoq atortarpaat?
6 Ullumikkuttaaq inuit usserneqartarput Evap, inngilit naalanngitsut Akanillu usserneqarnerannut assingusumik. Saatanip inunnik tammartitseriaasiisa sunniuteqarluarnerpaartarisartagaat tassaavoq ‘isinik pilerisaarineq’. (2 Korinthimiut 2:11; 1 Johannesi 2:16) Ussassaarusiortartut nalunngilluarpaat isit pilerigisaat sunniuteqartupilussuusartut. Tuniniaanermik paasisimasaqarluartoq tusaamasaq Europamiu ima oqarpoq: “Isigisinnaassuseq misigissutit tamarmik pilerissuseqalersitsisinnaanerpaartaraat. Misigissutinik allanik ilaginnaagajuppoq inullu iliortissinnaallugu taassuma pitsaanerpaatut nalunngisaanut akerliusumik.”
7 Taamaattumik tupinnanngilaq ussassaarisartut sunnerniartarmatigut assinik ima peqqusersusaartigaluni aaqqissuunneqarsimasunik assit sapinngisamik annerpaamik sunniuteqarsinnaatillugit nioqqutigineqartunillu kiffartuussinissamilluunniit neqeroorutigineqartunik pisisariaqartutut misigititsisinnaatillugit. Misissueqqissaartartoq USA-miittoq ussassaarinerup sunniutigisartagaanik misissuisimasoq oqarpoq ussassaarutit “paasissutissiisussatut aaqqissuunneqaannaratik, sulili pingaarnerusumik aalajangersimasumik misigaluniluunniit qisuariartitsisussatut aaqqissuunneqartartut”. Ussassaarutini atorneqarajuttarput assit tiingasulersaarutit ingasattajaartut. Taamaammat pingaaruteqartorujussuuvoq sunik isiginnaarnitsinnik sunillu eqqarsaateqarlutalu uummammioqarnitsinnik ilisimaarinninnissarput.
8. Isigisatsinnik mianersuutiginninnissarput Biibilimi qanoq erseqqissarneqarpa?
8 Kristumiut ilumoortut isit pilerigisaannit uinngullu pilerigisaanit sunnertinngitsoorsinnaanngillat. Taamaattuminguna Guutip oqaasiani kajumissaarneqartugut isiginnaakkatsinnut kissaatigisatsinnullu tunngatillugu imminut aqussinnaaqqulluta. (1 Korinthimiut 9:25, 27; atuakkit 1 Johannesi 2:15-17). Isigisinnaassutsip pileriginninnerullu imminnut atassuteqarluinnarnerat angutip assuarnaatsup Jobip miserratiginngilaa. Ima oqarpoq: “Isikka isumaqatigiissuteqarfigisimavakka niviarsiaq pileritsaallugu isigiumanagu.” (Jobi 31:1) Jobi arnamik attuerusunngilaq inuunerluppalaartumik; taamaaliornissaniluunniit eqqarsaatigerusunngilaa. Jiisusi erseqqissaavoq isumarput minguitsuutittariaqaripput inuunerluppalaartumik eqqarsaleqqunata. Ima oqarpoq: “Kialuunniit allap nulia pilerigalugu isigiguniuk [pileritsaallugu arnamut isigiuaannartup, NV] taanna uummatimigut allasiorfigereerpaa.” — Matthæusi 5:28.
Naleqanngitsut pinaveersaarneqartussat
9. (a) Internetti atoraangatsigu sooq immikkut mianersortariaqarpugut? (b) Assimik pornomut tunngasumik takullatsiaanerinnarluunniit qanoq kinguneqarsinnaava?
9 Ullumikkut pornografiimik, ingammik internettikkut, ‘isiginnaartuarneq’ nalinginnaaleraluttuinnarpoq. Nittartakkanik taama ittunik ujaasisariaqanngilagulluunniit — taakkua namminneq ujartarpaatigullusooq. Qanoq? Ussassaarut soqutiginartoq immaqa computerinni nuivoq. Immaqaluunniit e-maileq ajunngippasissoq ammarparput, taavalu asseq pornomut tunngasoq igalaasami matujuminaatsussatut programmererneqarsimasumi nuivoq. Asseq takullatsiaannaraluarlugu isumamut sunniuteqareersinnaavoq. Allaat pornomut tunngasumik takullatsiaaneq alianartunik kinguneqarsinnaavoq. Ilerasulernermik assinillu kinguaassiuutitigut inuunerlunnermut tunngasunik isumamit assut peeruminaatsitsinermik kinguneqarsinnaavoq. Sulili ajornerussaaq inuup assit taama ittut piaaraluni ‘isigiuarpagit’. Inummut taama ittumut pingaaruteqarpoq kissaatigisapiluminik toqutitsinissaa. — Atuakkit Efesosimiut 5:3, 4, 12; Kolossemiut 3:5, 6.
10. Sooq meeqqat pornografiimut tunngatillugu immikkut navianartorsiorpat, tamakkuninngalu isiginnaarnerat qanoq kinguneqarsinnaava?
10 Meeqqat pissusissamisoortumik alapernaatsuugamik pornografiimut tunngasunut alapernaaseriaannaapput. Taama pisoqarpat, tamanna kinguaassiuutitigut atoqatigiinnermik paasinnittaasiannut ataavartumik sunniuteqarsinnaavoq. Nalunaarusiat ilaanni allassimavoq kingunipiluit ilaatigut tassaasinnaasut kinguaassiuutitigut atoqatigiinnermik kukkulluinnartumik isiginninneq, “nuannersumik aappariittuarnissamut tunngatillugu ajornartorsiuteqarneq, piviusorsiunngitsumik arnanut isiginnittaaseqarneq pornografiimillu pinngitsuuisinnaannginneq atuarfimmi atuarnermut, ikinngutigiinnernut ilaqutariittullu inuunermut akornutaasumik”. Pornografiip inuunermi kingusinnerusukkut aappariinnermut sunniutai suli ajoqutaanerusinnaapput.
11. Pornografiimik isiginnaarnerup qanoq navianartigineranik assersuuteqarit.
11 Qatanngut angut kristumiu ima allappoq: “Jehovamut nalunaajaasunngunnginninni pinngitsoorsinnaajunnaarunnaarniarsarisama artornarnerpaartaat tassaavoq pornografii. Piffissani eqqumiinnerpaani assit taakku suli eqqaasarpakka — tipi, nipilersugaq takusaraluunniit aalajangersimasoq eqqarsaatigileriataagaraluunniit pissutigalugu eqqaasinnaasarlugit. Ullut tamaasa akiuuttuarpunga.” Qatanngutip angutip allap meeraalluni ataatami nalunaajaasuunngitsup atuagassiaatai pornografiimut tunngasut angajoqqaami angerlarsimannginneranni isiginnaartarsimavai. Ima allappoq: “Assit isumannut ajorluinnartumik sunniuteqarput. Allaat ullumikkut, ukiut 25-t tamatuma kingorna, assit taakkua ilaat puiorsinnaanngilakka. Qanorluunniit akiuutsigigaluaraangama suli isumanniittarput. Tamanna pisuusutut misigilissutigisarpara, aamma eqqarsaatiginaveersaaraluaraangakkilluunniit.” Taamaattumik naleqanngitsunik isiginninnginnikkut naalliuuteqarnaveersaarnissaq silatusaarnerungaarpoq. Suna taamaalinaveersaarnissamut iluaqutigisinnaavarput? ‘Eqqarsaatit tamaasa Kristusimi tigusaasutut naalattunngortinniarlugit’ ilungersortariaqarpugut. — 2 Korinthimiut 10:5.
12, 13. Naleqanngitsut suut kristumiut isiginnaarnaveersaartariaqarpaat, aamma sooq?
12 ‘Iluanngitsuliungaarnerit’ imaluunniit naleqanngitsut allat pinaveersaagassat tassaapput aliikkusersuutit pigisaleritunermik anersaarsiornermilluunniit siuarsaasut, imaluunniit nakuusernermik, aammik kuisinermik toqumilluunniit isiginnaagassartallit. (Atuaruk Tussiaat 101:3). Angajoqqaat kristumiut angerlarsimaffimmi sunik isiginnaarneqarsinnaasutut akuerinninnertik pillugu akisussaatinneqartussaapput. Soorunami kristumiu ilumoortoq piaaraluni anersaarsiornermut tunngassuteqartunik pigisaqarnavianngilaq. Angajoqqaalli filmit, tv-mi isiginnaagassiat qarasaasiamilu pinnguaatit allaallu tegneseriat meeqqanullu atuakkat anersaarsiornermut tunngasortallit eqqumaffigisariaqarpaat. — Ussatit 22:5.
13 Inuusuttuugaluarutta utoqqaagaluaruttaluunniit isivut qarasaasiami pinnguaatinik nakuusernernik toqutsinernillu piviusorpalaartunik isiginnaagassartalinnik nuannarisaqartissanngilavut. (Atuaruk Tussiaat 11:5). Iliuutsinik Jehovap assuarisaanik sunilluunniit eqqarsaateqarnaveersaartariaqarpugut. Eqqaamajuk Saatani eqqarsaatitsinnik sunniiniartartoq. (2 Korinthimiut 11:3) Aliikkusersuutit akuerineqarsinnaasutut isigineqaraluarpataluunniit, piffissamik tamakkununnga atuivallaarneq ilaqutariittut atuaqqissaaqatigiinnermut, ullut tamaasa Biibilimik atuartarnermut ataatsimiinnernullu piareersarnernut akornutaasinnaapput. — Filippimiut 1:9, 10.
Jiisusip maligassiaa maliguk
14, 15. Saatanip Jiisusimik pingajussaanik ussiinerani suna maluginiarnarpa, aamma taassuma ussernartoq qanoq ililluni akiorsinnaavaa?
14 Silarsuarmi ajortumi matumani ajoraluartumik naleqanngitsunik isigisaqarnissaq pinngitsoorluinnarsinnaanngilarput. Allaat Jiisusip tamanna misigaa. Saatanip pingajussaanik Jiisusi Guutip piumasaanut akerliusumik iliorteriaraluaramiuk “Diaavulup Jiisusi qaqqamut portusoorsuarmut ingerlaqatigaa qimerloortillugillu silarsuarmi naalagaaffiit tamaasa taakkualu alutornassusiat”. (Matthæusi 4:8) Sooq Saatani taamaaliorpa? Qularnanngitsumik isigisat sunniuteqangaarsinnaanerat atorluarusukkamiuk. Immaqa isumaqarsimavoq Jiisusi ataqqisaarusussusermut nakkaannassasoq silarsuarmi naalagaaffiit tamaasa taakkualu alutornassusiat takugunigit. Jiisusili qanoq piva?
15 Jiisusip neqeroorut ussernartoq tamanna isumaliutiginngilaaluunniit. Uummatini kissaatigisapilunnik immersunngilaa. Aamma Diaavulup neqeroorutaanut naaggaarsinnaajumalluni taanna eqqarsaatigisariaqanngilaa. Jiisusi ingerlaannaq iliuuseqarpoq. Ima peqqusivoq: “Nigorit, Saatani!” (Matthæusi 4:10) Jiisusip Jehovamut attaveqarnini pingaarnerutippaa, akissutaalu naapertuuppoq inuunerani pingaarnerpaajusumut — tassa Guutip piumasaatut iliornissaq. (Hebræerit 10:7) Taamaalilluni Jiisusip Saatanip pilersaarutipiluanik maangaannartitsiniaanera iluatsippoq.
16. Saatanip ussiiniarnerinik akiuinermut tunngatillugu Jiisusi sumik ilinniarfigisinnaavarput?
16 Jiisusip maligassiaa ilinniarfigingaarsinnaavarput. Siullermik, kinaluunniit Saatanimit usserneqanngitsoorsinnaanngilaq. (Matthæusi 24:24) Aappassaanik, isigisavut uummatip kissaataanik, ajunngitsunik ajortunilluunniit, sakkortusisitsisinnaapput. Pingajussaanik, Saatanip uagutsinnik tammartitsiniaanermini “isit pilerigisaat” sapinngisani tamaat atornerlunniassavai. (1 Petrusi 5:8) Sisamassaanillu, uaguttaaq Saatani akiorsinnaavarput, ingammik ingerlaannaq iliuuseqartarutta. — Jaaku 4:7; 1 Petrusi 2:21.
Isit ‘tappissuutiguk’
17. Aatsaat usserneqaraanni suniarnerluni aalajangerneq sooq silatusaarnerunngila?
17 Jehovamut tunniulluinnarnitsinnut ilaavoq naleqanngitsunik alarsinissarput pillugu pingaartorsiorluni neriorsuineq. Guutip piumasaatut iliorniarluta neriorsuutitsinnut naapertuuttumik tussiaasiortutut ima oqarsinnaavugut: “Isikkakka aqqutinit ajortunit tamanit nigorsimatippakka oqaatsisit maleruarsinnaaqqullugit.” (Tussiaat 119:101) Silatusaassaagut siumut aalajangereerutta usserneqarutta qanoq iliorniarnerluta. Nalunngilarput Biibilimi suut assuarineqarnersut, aamma Saatanip pilersaarutipilui nalunngilavut. Qaqugukkununa Saatanip Jiisusi ujaqqanik timiusanngortitsinissaanut usseraa? Taanna ullut unnuillu 40-t iisinnginniareerluni ‘perlilermat’. (Matthæusi 4:1-4) Saatanip sanngiikkaangatta taamaattumillu ussernartumut nakkaannaqqajaagaangatta takusinnaasarpaa. Taamaattuminguna massakkut tamakkuninnga eqqarsaatiginneqqissaartariaqartugut. Eqqarsaatiginninnissat kinguarteqinagu! Jehovamut tunniulluinnarnitsinni neriorsuuterput ullut tamaasa takusinnaallugulusooq eqqaamajuarutsigu naleqanngitsunik alarsinissarput aalajangiusimalluinnassavarput. — Ussatit 1:5; 19:20.
18, 19. (a) Isip ‘tappissup’ isillu ‘ajortup’ suna assigiinngissutigaat? (b) Sooq nalilinnik eqqarsaatiginneqqissaartuarnissarput pingaaruteqarpa, tamatumunngalu tunngatillugu Filippimiut 4:8-mi suna siunnersuutigineqarpa?
18 Ullut tamarluinnaasa uagutsinnut allamut saasaataasinnaasunik assigiinngitsorpassuarnik usserneqartarpugut, sulilu amerligaluttuinnarput. Taamaattumik Jiisusip ‘isimik tappissuutitsinissaq’ pillugu oqaaqqissaarutaa malillugu iliornissaq aatsaat taama pingaaruteqartigaaq. (Matthæusi 6:22, 23, NV) Isi ‘tappissoq’ ataasiinnarmik aalajangiusimasaqarpoq — Guutip piumasaatut iliornissamik. Isili ‘ajortoq’ peqqusersuuvoq, pileritulluni naleqanngitsunillu kajungerisaqarluni.
19 Eqqaamajuk isigisavut isumatsinnik immersuisartut, isumarpullu uummatitsinnut sunniuteqartartoq. Taamaattumik pingaaruteqangaarpoq nalilinnik eqqarsaatiginneqqissaartuarnissarput. (Atuaruk Filippimiut 4:8). Tussiaasiortup pisimaneratut ima qinujuartariaqarpugut: “Isikka alartikkit sallunermit [naleqanngitsunit, NV], inuuginnartinnga illit aqqutigeqqusanni!” Qinnummut tamatumunnga naapertuuttumik iliornissarput ilungersuutigisarutsigu qularutiginngilluinnarsinnaavarput Jehovap ‘aqqutigeqqusamini inuuginnartikkumaaraatigut’. — Tussiaat 119:37; Hebræerit 10:36.
Uteqqiineq
• Isigisavut, isumarput uummaterpullu imminnut qanoq attuumassuteqarpat?
• Pornografiimik isiginnaarnerup suut navianaatigai?
• Sooq isitta ‘tappissuutinnissaa’ pingaaruteqarpa?
[Atuaqqissaarnermi apeqqutit]
[Qupp. 23-mi assiliartat]
Naleqanngitsut suut kristumiut isiginaveersaartariaqarpaat?