Guutip aqqanik ilisimanninneq qanoq paasisariaqartoq
ILLIT atit aalajangersimasumik isumaqarpa? Nunat ilaanni qitornanik itinerusumik isumalinnik atsiisarneq ileqquuvoq. Ateq immaqa angajoqqaajusut upperisaannik inuunermilu pingaartitaannik qitornamilluunniit siunissaanut tunngatillugu neriuutaannik takorluugaannillu ersersitsisarpoq.
Isumaqarnerusunik atsiisarneq qangarsuarli ileqquuvoq. Biibilip nalaani meeqqat atserneqartarput atip isumaa pissutigalugu, aamma ateq inummut ilimasuutinik ersersitsisinnaavoq. Assersuutigalugu Jehovap Daavi taassuma ernerata Salomop siunissami suliassaa pillugu oqaluttuukkamiuk ima oqarpoq: “Salomomik [ “eqqissineq”-mik isumalimmik naggueqartumik] ateqassaaq, taassuma nalaani Israelimi eqqissisimaneqartissagakku.” — 1 Nalunaarsuutit 22:9.
Ilaannikkut Jehova inunnik allamik suliassaqalersunik nutaamik atsiisarpoq. Aaperaap nulia ernisuitsoq Saramik, ‘arnamik akimasumik’ isumaqartumik, ateqalerpoq. Sooq? Jehova ima nassuiaavoq: “Pilluaqqujumaarpara, taassumuunalu ernermik tuniumaarpakkit. Pilluaqqujumaarpara, inuiaqatigiippassuanngussaaq, allaammi inuiannut kunngiusut taassumannga naggueqassapput.” (1 Mosesi 17:16) Sooq Sarap atertaarnera paasisinnaajumallugu suliassaanik nutaamik paasinninnissaq pisariaqarpoq.
Taavami ateq aternit tamanit pingaaruteqarnerpaaq — Jehova? Qanoq isumaqarpa? Guuti aqqi pillugu Mosesimit aperineqarami ima akivoq: “Tassaavunga uangaasoq!” (2 Mosesi 3:13, 14) Biibilimik nutsikkani arlalinni Jehovap akissutaa taamatut nutserneqarsimavoq. Rotherhamilli nutsigaani imaappoq: “Iluarisara naapertorlugu qanorluunniit ilissaanga.” Jehovap aqqanit paasinarsivoq taanna Guutiusoq assigiinngitsorpassuarnik suliaqartartoq. Tamanna paasiuminartumik ima assersuusiarineqarsinnaavoq: Anaanaasoq meeqqaminik isumassuiniarluni ullut tamarluinnaasa suliassarpassuaqartarpoq. Peqqissaasuusariaqartarpoq, igasuusariaqartarpoq, ilinniartitsisuusariaqartarpoq allarpassuarnillu suliaqartariaqartarpoq suut pisariaqartinneqarnerat apeqqutaalluni. Jehovamut tunngatillugu aamma taamaappoq, annertunerungaartunik suliaqaannarluni. Inunnut siunertani asanninnerminut ersiutaasoq naammassiniarlugu iluarisani naapertorlugu sunngorsinnaavorluunniit, imaluunniit pisariaqartinneqartumik sumilluunniit suliaqarsinnaavoq. Tassa Jehovap aqqanik tamatumalu isumaanik ilisimanninneq tassaavoq suliarisartagarpassuinik paasinninneq aamma ataqqinninnermik ersersitsineq qujamasuutiginninnerlu.
Ajoraluartumik Guutip kinaassusia imaannaanngitsoq taassuma aqqanik tamatumalu isumaanik ilisimanninngitsunut isertorneqarporlusooq. Biibilimilli atuaqqissaarnikkut Jehova ilisarisimalersinnaavat paasillugulu taanna Siunnersuisuusoq silatooq, Annaassisuusoq pissaaneqangaartoq Pilersuisuusorlu tukkortoq allarpassuarnillu suliaqartartoq. Jehovap aqqa ima isumaqartigaaq mianerinningaalissutaasarluni.
Guutilli aqqanik ilisimannilerniarneq ajornakusoorsinnaasarpoq. Sooq taamaannersoq allaaserisami tulliuttumi sammineqassaaq.