Qinuneq – Sooq?
QINUNEQ. Biibilimi allaaserineqartut ilaannamininngui qinunertut soqutigineqartigalutillu paasisaqarfigineqarusutsigipput. Qinuneq pillugu apeqqutigineqarajuttut arfineq-marluk sammeriartigik taakkualu akissutaat Biibilimeersut misissorlugit. Allaaserisat tulliuttut iluaqutissiaapput qinusarnitsinnut — qinusalernissatsinnut qinnutitsinnilluunniit pitsaanerulersitsinissatsinnut.
SILARSUARMI sumi tamaani, kulturini upperisarsiortunilu tamani inuit qinusarput. Kisimiitillutik qinusarput, aamma qinoqatigiittarput. Oqaluffinni, naalaffinni, synagogini, moskéni illernartuutitanilu qinusarput. Qinunermi atorneqartartut soorlu ujammit, tippit, kaavitittakkat aamma atuakkat, iluartuutitap assingi allattarfeeqqallu illernartuutitanut nivinngakkatik atortarpaat.
Inuit qinusinnaanertik nunarsuarmi matumani uumassusilinnit allanit tamanit allaassutigaat. Inuit uumasullu assigiissuteqaraluarput. Uumasutulli inuussutissat, ilti imerlu pisariaqartippavut. Taakkunatulli erniusarpugut, inuusarpugut toqusarlutalu. (Oqaluussisartup oqaasii 3:19) Inuilli kisimik qinusarput. Sooq?
Pisariaqartikkatsigu. Tassami qinuneq tassaanerarneqartarpoq anersaat silarsuaannut, illernartutut naassaanngitsutullu isigineqartunut, attaveqariaaseq. Biibilimi ersersinneqarpoq taamatut kissaateqarneq inunnguuserigipput. (Oqaluussisartup oqaasii 3:11, 1900) Ilaanni Jiisusi Kristusi ima oqarpoq: “Pilluarput anersaakkut piitsut.” — Matthæusi 5:3.
Anersaakkut piitsuuneq, imaluunniit anersaakkut pisariaqartitaqarneq — upperisarsiornikkut illut atortullu taama amerlatiginerat nalunaaquttap-akunnerpassuisalu qinunermut atorneqartarnerat allatut qanoq nassuiarneqarsinnaagamik? Ilumoorpoq isumaqartoqarmat anersaakkut pisariaqartitatik nammineq imaluunniit inoqatiminnit pisinnaallugit. Inuilli ikiuisinnaanerat killeqarpoq, ilaa? Inuunerput qajannaqaaq sivikeqalunilu, killilimmillu isiginnittaaseqarpugut. Ilisimasaqarnerungaartup, pissaaneqarnerungaartup naassaanngitsumillu inuusup kisimi pisariaqartitatsinnik tunisinnaavaatigut. Anersaakkulli pisariaqartitaqarneq qinunissamut kajumissisitsisoq suua?
Uku eqqarsaatigikkit: Inuit ilisimasinnaagunanngisaannik siunnersorneqarusungaarneq, ilisimassuseqarusungaarneq akissutissarserusungaarnerlu misiginikuuiuk? Asasannik toqukkut annaasaqareerlutit tuppallersarneqarnissaq, aalajangeruminaatsitannik aalajangigassaqartillutit siunnersorneqarnissaq pisuusutulluunniit misigigavit isumakkeerfigineqarnissaq pisariaqartinnikuuiuk?
Biibili naapertorlugu tamakku tamarmik qinunissamut pissutissaalluarput. Tamanna pillugu Biibili atuagaavoq tutsuiginarnerpaaq, angutillu arnallu aalajaatsorpassuit qinnutaannik imaqarpoq. Tuppallersarneqarnissaq, siunnersorneqarnissaq, isumakkeerfigineqarnissaq apeqqutillu akiuminaatsut akineqarnissaat qinnutigisarpaat. — Tussiaat 23:3; 71:21; Danieli 9:4, 5, 19; Habakkuki 1:3.
Qinnutit tamakku assigiinngitsuugaluarlutik tamarmik assigiissuteqarput. Qinusut tamarmik nalunngilaat qinnutitik tusarneqassappata piumasaqaat pingaarutilik suunersoq, piumasaqaat ullumikkut arajutsineqarajuttoq soqutigineqanngikkajuttorlu. Nalunngilaat kimut qinussanerlutik.