Ilaqutariit kristumiuususi — ‘eqqumagitsi’

‘Eqqumaniarta aalakoornatalu.’ — 1 THESSALONIKAMIUT 5:6.

1, 2. Ilaqutariit anersaakkut eqqumaniarumallutik susariaqarpat?

‘JEHOVAP ullussaa angeqisoq siooranangaaqisorlu’ innersuussutigalugu apustilip Paulusip kristumiut Thessalonikamiittut ima allaffigai: “Qatanngutit, taarmiuunnginnassi ullussap taassuma tillittutut qaninngassanngilaasi. Ilissimi tamassi qaamanerup ullullu qitornaraasi; unnualluunniit taartulluunniit piginngilaatigut!” Paulusi ima nangippoq: “Taamaattumik sineqinata inuit allat ileqquattut, eqqumaniartali aalakoornatalu.” — Joeli 3:4; 1 Thessalonikamiut 5:4-6.

² Paulusip Thessalonikamiunut siunnersuutaa kristumiunut ullumikkut ‘naggatissap nalaani’ (NV) inuusunut naleqquppoq. (Danieli 12:4) Pissutsit aaqqissuussaanerata ajortup naggatissaa qanilliartortillugu Saatanip aalajangiusimavaa sapinngisamik amerlanerpaanik Jehovamut kiffartorunnaarsitsinissani. Taamaattumik silatusaassaagut Paulusip anersaakkut eqqumajuaqqusissutaa malikkutsigu. Ilaqutariit kristumiut anersaakkut eqqumaniarumallutik ilaqutariinniittut tamarmik immikkut Jehovamit akisussaaffilerneqarsimanertik malillugu iliortariaqarput. Uiusut, nuliaasut inuusuttullu ilaquttatik ‘eqqumaniarnissaannut’ ikiorniarlugit susinnaappat?

Ilissi uiususi — “paarsisoq ajunngitsoq” ilaarsiuk

3. Angutip ilaqutariinni ittuusutut suut akisussaaffigai?

³ Biibilimi allassimavoq ‘arnap angut niaqorigaa’. (1 Korinthimiut 11:3) Angutip ilaqutariinni ittuusutut suut akisussaaffigai? Biibilimi ima allassimasoqarpoq: “Eqqarliminik, pingaartumik inoqutiminik, isumaginninngitsoq uppernerminik tunussisuuvoq uppinngitsumillu ajornerulluni.” (1 Timotheusi 5:8) Soorunami angut ilaquttami timikkut pisariaqartitaannik isumaginnittussaavoq. Angutilli ilaquttani anersaakkut eqqumaniarnissaannut ikiorniarlugit aningaasarsiornissaannaa naammanngilaq. Inoqutini anersaakkut ineriartortittariaqarpai, ilaqutariinniittut tamaasa Guutimut attaveqarluarnerulernissaannut ikiorlugit. (Ussatit 24:3, 4) Qanoq ililluni taamaaliorsinnaava?

4. Uiusup ilaquttami anersaakkut ineriartortinnissaannut suut iluaqutigisinnaavai?

⁴ “Uiusoq nuliaminut niaquummat soorlu Kristusi ilagiinnut niaquusoq”, uiusoq Jiisusip ilagiinnut oqartussaassutsiminik atueriaasianik misissuisariaqarlunilu ilaarsisariaqarpoq. (Efesosimiut 5:23) Eqqarsaatigikkit Jiisusip ajoqersukkaminut attaveqarnini pillugu oqaasii. (Atuakkit Johannesi 10:14, 15). Uiusup ilaquttaminik anersaakkut ineriartortitsiumasup iluaqutiginerpaasinnaasai tassaapput Jiisusip ‘paarsisutut ajunngitsutut’ oqaasiinik iliuusiinillu eqqarsaatiginneqqissaarneq tumaanillu malinneqqissaarneq. — 1 Petrusi 2:21.

5. ‘Paarsisup ajunngitsup’ ilagiinniittut qanoq ilisarisimalluartigai?

⁵ Ilaqutariinni ittuusup Kristusip maligassiaa sumik ilinniarfigisinnaaneraa misissoriartigu. Savanik paarsisup savaatiminut tunngasut tamaasa nalunngilai, savallu paarsisortik nalunngilaat tatigalugulu. Taakkua taassuma nipaa ilisarisarlugulu naalattarpaat. Jiisusi ima oqarpoq: “Savaatikka ilisimavakka, savaatimalu ilisimavaannga.” Taassuma ilagiinniittut ilisarisimavai qarsupittumiinnaanngitsoq. Oqaaseq grækerisooq matumani “ilisimavakka”-mik “ilisimavaannga”-millu nutserneqarsimasoq ilisarisimannilluarnermik isumaqarpoq. Aap, ‘paarsisup ajunngitsup’ savaatini ilisarisimalluarpai. Taakkua tamarmik immikkut pisariaqartitaat, nukittuffii sanngiiffiilu  nalunngilai. Savaatiminut tunngasunik arajutsisaqarneq ajorpoq. Aamma savaatit paarsisortik ilisarisimalluarlugulu siulersuisumittut tatigilluinnarpaat.

6. Uiusut “paarsisoq ajunngitsoq” qanoq ilaarsinnaavaat?

⁶ Uiusoq ittuunermini Jiisusimik ilaarsisinnaajumalluni imminut paarsisutut isiginiartariaqarpoq, aamma isumassukkani savaatimisut isiginiartariaqarpai. Ilaquttani ilisarisimalluarumallugit iliuuseqartariaqarpoq. Ilaquttani ilisarisimalluarumallugit tamaasa ammasumik attaveqarfigisariaqarpai, isumakuluuteqarpata tusarnaarlugit, ilaqutariittut sammisaqaqatigiinnermi siuttuulluni atuaqqissaaqatigiinnermullu ataatsimiinnernullu peqataanermut oqaluussinermullu sunngiffimmullu aliikkutassanullu tunngatillugu eqqarsaatigilluakkanik aalajangiisarluni. Ilaqutariinni ittuusup kristumiup Guutip oqaasianik ilisimasaqarluaruni ilaquttanilu tamaasa ilisarisimalluarunigit ilimanarnerussaaq ilaquttaminit siulersuisutut tatigineqarnissaa namminerlu taakkua pallorfiginninnermi ilumoortumi ataasioqatigiittuarnerannik nuannaarutiginninnissaa.

7, 8. Uiusoq isumassukkaminut asannittuliorneq eqqarsaatigalugu ‘paarsisumik ajunngitsumik’ qanoq ilaarsisinnaava?

⁷ Paarsisuulluartoq savaatiminik asannittuuvortaaq. Jiisusip inuunera kiffartorneralu pillugit iivangkiiliunik atuaqqissaaraangatta Jiisusip ajoqersukkaminut asannittuliorneranik qamannga pisumik pingaartitsingaalertarpugut. Taassuma allaat ‘inuunini akigaa savat pillugit’. Uiusut Jiisusi ilaartariaqarpaat ilaquttaminnut asannittuliortarnermikkut. Uiusup Guutimit iluarisaajumasup nuliani naqisimanagu asajuassavaa “soorlu Kristusip ilagiit asagai”. (Efesosimiut 5:25) Inussiarnersumik oqaluuttassavaa, ataqqineqartariaqarpormi. — 1 Petrusi 3:7.

⁸ Ilaqutariinni ittuusoq meeqqaminik perorsaanermini najoqqutassianik Biibilimiittunik aalajangiusimannittariaqarpoq. Aammali taakku asanninnerminik ersersitsivigisussaavai. Naqqittariaqaraangamigit asannilluni taamaaliortariaqarpoq. Meeqqat ilaat sumik piumaffigineqarnerminnik paasinninniaasaarnerusarput. Taamaattoqartillugu ataataasoq naammagittarnerusariaqarpoq. Uiusut Jiisusip maligassiaanik malinnittuartillutik angerlarsimaffimmik toqqissisimanartuutitsisarput. Anersaakkut toqqissisimaneq tussiaasiortup erinarsuutigisaa ilaqutaasa misigissavaat. — Atuakkit Tussiaat 23:1-6.

9. Uiusut kristumiut Noallu akisussaaffii qanoq assigiissuteqarpat, akisussaaffimmillu tamatuma isumaginissaanut suna iluaqutigisinnaavaat?

⁹ Ataataanerpaaq Noa Guutip taamanikkut pissutsinut akuliutingajalerfiata nalaani inuuvoq. Jehovalli taanna inuuinnartippaa ‘taamani ulersuaq iluaatsut silarsuaannut nalliutitikkamiuk allallu arfineq-marluk kisiisa asattuukkamigit’. (2 Petrusi 2:5) Noap ilaquttami Ulersuarmit aniguinissaannut ikiornissaat akisussaaffigaa. Ulluni kingullerni makkunani ilaqutariinni ittuusut kristumiut tamatumunnga assingusumik akisussaaffeqarput. (Matthæusi 24:37) Taamaattuminguna taakkua Paarsisup Ajunngitsup maligassiaanik misissueqqissaarnissaat taannalu ilaarniarlugu ilungersornissaat taama pingaaruteqartigisoq.

Ilissi nuliaasusi — ‘illusi ineriartortissigit’

10. Nuliaasut uiminnut naalatsigitittussaanerat qanoq paasisariaqarpa?

¹⁰ Apustili Paulusi allappoq ‘nuliaasut uiminnut naalatsigitissasut soorlu Naalakkamut’. (Efesosimiut 5:22) Allassimaffimmi tamatumani nuliaasoq ilaqutariinni pingaaruteqanngitsumik inissisimaffeqarnerarneqanngilluinnarpoq. Jehova arnamik siullermik, Evamik, pinngortitsinnginnermini ima oqarpoq: “Iluanngilaq inuk kisimiimmat, ikiortissiussavara taassumunnga tulluartumik.” (1 Mosesi 2:18) Arnap angummut ‘ikiortitut’ — uimi ittuusutut suliassaminik isumaginninnerani tapersersuisutut — suliassaa ilumut ataqqinaataavoq.

11. Nuliaalluartoq ‘illuminik qanoq ineriartortitsisarpa’?

¹¹ Nuliaalluartoq ilaquttami iluaqutissaannik iliuuseqarniartarpoq. (Atuaruk Ussatit 14:1). * ‘Arnatut sianiitsutut’, siulersuinermik aaqqissuussamik ataqqinninngitsutut, innani ‘arnaq  ilisimatooq’ aaqqissuussamik tamatuminnga ataqqinningaartuuvoq. Pikitsitsiumatuneq oqaluukkuminaatsuunerlu silarsuarmi nalinginnaasumik pissuserineqartut pissuserinagit uiminut naalatsigitippoq. (Romamiut 12:2) Nuliaasup ‘sianiitsup’ uini oqaluuserinerloriaannaasarpaa. Nuliaasorli silatooq meeqqami allallu uiminik ataqqinninnerulernissaat anguniarlugu sapinngisaminik iliuuseqartarpoq. Uini kimigiiserfiginaveersaartarlugulu oqqateqatiginaveersaartarpaa siulersuisutut ataqqineqarunnaaqqunagu. Aningaasaqarneq eqqarsaatigalugu nuliaasup ‘sianiitsup’ immaqa ilaqutariit ilungersorlutik sulillutik aningaasarsiarisimasaat nungulussinnassavai. Nuliaasulli uiminik tapersersuisup uini aningaasaqarnermut tunngatillugu suleqatigisarpaa. Siumut sillimareertarpoq atorluaasarlunilu. Uini qaangiuttoorluni sulisaqqullugu kimigiiserfigineq ajorpaa.

12. Nuliaasoq ilaquttani anersaakkut ‘eqqumaniarnissaannut’ ikiorniarlugit susinnaava?

¹² Nuliaalluartup ilaquttani ‘eqqumaniarnissaannut’ ikiortarpai uini meeqqaminnik Biibili pillugu ilinniartitsinerani ikiorlugu. (Ussatit 1:8) Unnuk ilaqutariittut anersaakkut ittunik sammisaqarfigisartagartik iluatsissinnaaqqullugu iliuuseqartarpoq. Aamma uini meeqqaminnik siunnersuilluniluunniit perorsaatissiigaangat tapersersortarpaa. Aap, nuliaasumit uiminik suleqatiginninngitsumit, timikkut anersaakkullu sumiginnakkanik meeralimmit, allaanerulluinnarpoq!

13. Sooq nuliaasup uimi ilagiinni suliassaqartarneranut tunngatillugu taassuminnga tapersersuinissaa pingaaruteqarpa?

¹³ Nuliaasup uiminik tapersersuisup uimi ilagiinni suliassaqartarnera qanoq igisarpaa? Nuannaarutigisaqaa! Uini ilagiinni kiffartortuugaluarpat, utoqqaanertaagaluarpat, naalagaaffilersaarfinnik aserfallatsaaliuinermut peqataasaraluarpat Napparsimmavinnulluunniit Attaveqartitanut ilaagaluarpat immikkut pisinnaatitaaffia tamanna nuannaarutigisarpaa. Uini oqaatsimigut iliuutsimigullu tapersersorniarlugu qularnanngitsumik namminissarsiornani iliuuseqartariaqartarpoq. Nalunngilaali uimi Jehovap peqatigiissortaani suliniarnera ilaqutariinniittut tamarmik anersaakkut eqqumaniarnissaannut iluaqutaasoq.

14. (a) Nuliaasumut uiminik tapersersuiumasumut suna unamminiarnartuusinnaava, qanorlu iliorsinnaava? (b) Nuliaasoq qanoq ililluni ilaqutariinnik ingerlalluarnerulersitseqataasarpa?

¹⁴ Uiusoq nuliaasup isumaqataaffiginngisaanik aalajangiippat nuliaasup uiminik tapersersuinissani sapernartissinnaavaa. Taamaakkaluaraangalluunniilli ‘piuaatsumik qanilaartumillu anersaaqartarpoq’ uinilu suleqatigisarlugu. (1 Petrusi 3:4) Nuliaalluartup arnat Guutimik mianerinnittut, soorlu Sara, Ruthi, Abigajili Jiisusillu anaanaa Maria, ilaarniarsarisarpai. (1 Petrusi 3:5, 6) Aamma ullumikkut arnat utoqqaat ‘ataqqinnittumik pissusillit’ (NV) ilaarniartarpai. (Titusi 2:3, 4) Uiminik asannillunilu ataqqinninnermigut aappariittut ilaqutariittullu ingerlalluarnissaminnut siuarsaaqataasarpoq. Angerlarsimaffia nuannerlunilu toqqissisimanarpoq. Nuliaasoq  tapersersuilluartoq uiusumut Jehovamut kiffartortumut nalissaqanngilluinnarpoq. — Ussatit 12:4.

Ilissi inuusuttut — ‘takussaanngitsut isigisigit’

15. Ilaqutariit ‘eqqumasinnaaniassammata’ inuusuttut angajoqqaatik qanoq suleqatigisinnaavaat?

¹⁵ Ilissi inuusuttut ilaqutariittut anersaakkut eqqumasinnaaniassagassi angajoqqaasi qanoq suleqatigisinnaavisigit? Jehovap ilissinnut akissarsiassarititaa eqqarsaatigisiuk. Immaqa meeraasusili angajoqqaassi assilissanik Paratiisimi inuunermik ersersitsisunik takutittarpaasi. Alliartortillusi qularnanngitsumik Biibili Biibililersaarutillu atortarpaat silarsuassami nutaami inuuneq ilissinnut takorlooruminarsarniarlugu. Jehovamut kiffartorneq ‘isigiuarlugulusooq’ pingaarnerpaatikkussiuk inuunersilu kiffartornermut naapertuuttumik aaqqissuukkussiuk ‘eqqumasinnaassaasi’.

16, 17. Inuusuttut ajugaasup pissarsiassaanik pissarsiumallutik susinnaappat?

¹⁶ Apustilip Paulusip Korinthimiunut allakkamini siullerni 9:24-mi oqaasii maluginiariakkit. (Atuaruk). Inuunermut arpannermut peqataagit ajugaanissallu aalajangiusimallugu. Inooriaaseq illit ajugaasup pisassaanik, inuunermik naassaanngitsumik, pissarsininnik kinguneqartussaq toqqaruk. Inuppassuit pigisanik noqqaassutiginnikkamik ajugaasup pissarsiassaanik pissarsinissartik pingaartikkunnaarsimavaat. Ila sianiilliornerussusia! Pisuussutinik noqqaassutiginninneq pillualissutaanavianngilaq. Pisiarineqarsinnaasulli atuukkallaannartussaapput. Illit “takussaanngitsut” isigiuarlugillusooq pingaartittuakkit. Sooq? Taakku ‘soraajuitsuummata’. — 2 Korinthimiut 4:18.

¹⁷ ‘Takussaanngitsunut’ ilaapput Guutip naalagaaffiata pilluaqqussutissartai. Taakkuninnga pissarsisinnaannguutigisannik inooriaaseqarnissat aalajangiusimajuk. Pillualivittoqartarpoq inuunerup Jehovamut kiffartornermut atorneratigut. Illit Guutimut kiffartornikkut anguniagassanik siunissami qaninnerusumi siunissamilu ungasinnerusumi anguneqarsinnaasunik imminut anguniagassissinnaalissaatit. * Piviusorsiortumik anersaakkut ittunik imminut anguniagassinnerit Guutimut kiffartornermik pingaartitsiuarnissannut naggataatigullu ajugaasup pissarsiassaanik, inuunermik naassaanngitsumik, pissarsinissannut iluaqutigissavat. — 1 Johannesi 2:17.

18, 19. Inuusuttut qanoq ilillutik paasisinnaavaat Jehovamut nammineq attaveqarnerlutik?

¹⁸ Ilissi inuusuttut, inuunermut aqqutikkoornermi alloriarneq siulleq tassaajumaarpoq Jehovamut nammineq attaveqalerneq. Illit Jehovamut nammineq attaveqalereerpit? Imminut ima aperigit: ‘Anersaakkut ittunik pingaartitsisuuvunga, imaluunniit taamaallaat angajoqqaakka peqatigalugit anersaakkut ittunik sammisaqartarpunga? Pissuserineqartussanik Guutip iluarisaanik ineriartortitsivunga? Qinuneq, atuaqqissaarneq, ataatsimiinnernut najuuttarneq, oqaluussineq sammisassallu pallorfiginninnermut ilumoortumut tunngassuteqartut allat ileqquliulluarumallugit ilungersorpunga? Guutimut attaveqarluarnerulernissara sulissutigaara?’ — Jaaku 4:8.

¹⁹ Mosesi sumik ilinniarfigisinnaanerlugu eqqarsaatigeriaruk. Taanna allamik kulturilinnik avatangiiseqaraluarluni “Faraop paniata erneranik taaneqaqqunngilaq”, aalajangerporli inuiaqatini peqatigalugit Jehovamik pallorfiginninniarluni. (Atuakkit Hebræerit 11:24-27). Aamma  ilissi inuusuttut kristumiuugassi aalajaallusi Jehovamut kiffartornissarsi aalajangiusimasiuk. Aalajangiusimanninnissigut pillualivissaasi, ullumikkut inooriaaserineqarsinnaasoq pitsaanerpaaq inooriaaserilissavarsi ‘inuuniviullu pigilernissaa’ neriuutigisinnaalissallugu. — 1 Timotheusi 6:19.

20. Inuunermut arpannermi kikkut ajugaasup pisassaanik pissarsissappat?

²⁰ Itsaq timersorluni unamminerni arpaliuttoqartillugu ataasiinnaq ajugaasarpoq. Inuunermut arpannermi taamaanngilaq. Guutip piumasaraa “inuit tamalaat annaanneqassasut sallusuissummillu eqqorluartumik ilisimasaqalissasut”. (1 Timotheusi 2:3, 4, NV) Inuppassuit illit sioqqullutit arpannerminnik naammassinnissimapput, aamma inuppassuaqarpoq ilinnik arpaqatiginnittunik. (Hebræerit 12:1, 2) Uniinnanngitsut tamarmik ajugaasup pisassaanik pissarsissapput. Taamaattumik ajugaanissat aalajangiusimajuk!

21. Allaaserisami tulliuttumi suut sammineqassappat?

²¹ ‘Jehovap ullussaa pingaartoq siooranaqisorlu nalliutinngitsoornavianngilaq.’ (Malaki 3:23) Ullup tamatuma nalliunnissaanut ilaqutariit kristumiut piareersimasussaapput. Ilaqutariinniittut tamarmik immikkut Jehovamit akisussaaffilerneqarsimanertik malillugu iliornissaat pingaaruteqarpoq. Anersaakkut eqqumajuarumallutit Guutimullu attaveqarluarnerulerumallutit suut allat iliuuserisinnaavigit? Allaaserisami tulliuttumi ilaqutariit anersaakkut ingerlalluarnissaannut sunniuteqartartut pingasut sammineqassapput.

[Quppernerup ataani ilanngussat]

Suna ilikkarpiuk?

• Sooq ilaqutariit kristumiut ‘eqqumanissaat’ pingaaruteqarpa?

• Uiusup qanoq ililluni “paarsisoq ajunngitsoq” ilaarsinnaavaa?

• Nuliaasoq uiminik tapersersuiniarluni susinnaava?

• Inuusuttut ilaquttatik anersaakkut eqqumanissaannut qanoq ilillutik ikiorsinnaavaat?

[Atuaqqissaarnermi apeqqutit]

[Qupp. 11-mi assiliartaq]

Nuliaalluartoq uiusumut Jehovamut kiffartortumut nalissaqanngilluinnarpoq