Jiisusitut eqqumagit

“Eqqumagitsi, qinugitsilu.” — MATTHÆUSI 26:41.

QANOQ AKISSAVIT?

Eqqumanerput qinusarnitsinnit qanoq erserpa?

Oqaluussinermut tunngatillugu eqqumanerput qanoq ersersissinnaavarput?

Unamminiarnartoqaraangat sooq eqqumasariaqarpugut, aamma qanoq eqqumasinnaavugut?

1, 2. (a) Jiisusip eqqumanera eqqarsaatigalugu apeqqutit suut imminut apeqqutigineqarsinnaappat? (b) Inuit naammalluinnanngitsut Jiisusip maligassiaa naammalluinnartoq ilaarsinnaavaat? Assersuuteqarit.

IMMINUT ima aperinikuuit: Ilumut Jiisusitut eqqumasinnaavunga? Jiisusi naammalluinnartuummat immaqa eqqarsarputit taamaassinnaanak. Aamma Jiisusi ilaannikkut ukiut tusindillit siumut qanoq pisoqarnissaanik ilisimasaqareertarami ilumut eqqumasariaqarpa? (Matthæusi 24:37-39; Hebræerit 4:15) Apeqqutit taakku marluk akineqarpata aatsaat paasilissavarput eqqumanissarput qanoq pingaaruteqartigisoq.

² Inuup naammalluinnanngitsup inuk naammalluinnartoq ilinniarfigisinnaavaa? Aap, soorlu ilinniartup ilinniartitsisuni pikkorissoq ilinniarfigisinnaagaa. Takorlooriaruk angut piseriarnermut ilinniaqqaarniartoq. Aallaqqaammut ooqattaasakkani eqqorsinnaanngingajappaa, arlaleriarlunili ilinniartinneqarlunilu sungiusartuarpoq. Piseriallaqqinnerulerniarluni ilinniartitsisoq piseriallaqqissoq isiginnaaqqissaartarpaa. Ilinniartup maluginiarpaa qanoq nikorfanersoq, talini qanoq inisseqqanerai aamma inussani noqartaanut qanoq inisseqqanerai. Piffissap ingerlanerani ilinniartup ilikkassavaa pisissip qanoq qilutsitsiginissaa aamma anorip qarsumut qanoq sunniuteqartarnera. Sungiusartuaruni ilinniartitsisorlu ilaartaruniuk umillaqqinnerulissaaq ooqattaasakkallu qeqqa qarsuminik eqqoqqajaanerulissallugu. Tamatumunnga assingusumik Jiisusip ilinniartitsissutaanik maleruaanitsigut maligassiaanillu naammalluinnartumik ilaarsinitsigut kristumiuulluarnerulerniarluta sapinngisatsinnik iliortuarpugut.

3. (a) Jiisusip eqqumasariaqarnini ersersillugu qanoq oqarpa? (b) Allaaserisami matumani suut sammissavavut?

³ Jiisusi ilumut eqqumasariaqarpa? Aap. Assersuutigalugu toqunissaminut aqaguttoq apustilini aalajaatsut ima kajumissaarpai: “Maaniigitsi pigaaqatigalunga.” Taavalu  ima nangippoq: “Eqqumagitsi, qinugitsilu usserneqaqqunasi.” (Matthæusi 26:38, 41) Jiisusi nunarsuarmiitilluni eqqumajuarpoq. Ingammillu toqunngitsiarluni assut eqqumarusullunilu Ataataminut qilammiittumut sapinngisani tamaat qanikkusuppoq. Nalunngilaa aamma ajoqersukkani taamanikkuinnaanngitsoq aammali siunissami eqqumasariaqartut. Sammilaariartigu sooq Jiisusip eqqumajuarnissarput kissaatigigaa. Taavalu Jiisusip eqqumaneranut tunngasut ilinniarfigisassavut pingasut sammissavavut.

SOOQ JIISUSIP EQQUMANISSARPUT KISSAATIGAA

4. Sooq eqqumajuartariaqarpugut?

⁴ Paasisimanngisavut paasisimasavullu pissutigalugit Jiisusip eqqumanissarput kissaatigaa. Jiisusip nunarsuarmiikkallarami siunissamut tunngasut suut tamaasa nalunngilai? Naamik, maniguulluni ima oqarpoq: “[Ulloq] taanna nalunaaquttap-akunneraluunniit kimilluunniit ilisimaneqanngillat, inngililluunniit qilanniittut Ernerulluunniit ilisimanngilaat, Ataatalli kisimi.” (Matthæusi 24:36) Taamani Jiisusip, ‘Ernerup’, silarsuup matuma ajortup naggatissaa qaqugu nalliutissanersoq ilisimanngilaa. Uagummi ullumikkut? Siunissamut tunngasut suut tamaasa nalunngilavut? Soorunami naamik! Naluarput qaqugorpiaq Jehovap Ernini silarsuarmik matuminnga ajortumik suujunnaarsitsiartortissaneraa. Siunissamut tunngasut suut tamaasa nalunngikkutsigit eqqumasariaqassanngikkaluarpugut. Jiisusip nassuiarpaa silarsuup matuma naggatissaa tassanngaannaq pakasaallunilu nalliutissasoq. Taamaattumik eqqumajuartariaqarpugut. — Atuaruk Matthæusi 24:43.

5, 6. (a) Guutip naalagaaffia pillugu ilisimasaqarnerput eqqumanissatsinnut qanoq iluaqutigaarput? (b) Saatani pillugu ilisimasaqaratta sooq suli annerusumik eqqumanissarput aalajangiusimasariaqarparput?

⁵ Jiisusip siunissamut tunngasorpassuit nuannersut inuit amerlanersaasa nalusaat nalunngilai. Uagut Jiisusitut ilisimasaqartiginngilagut. Guutilli naalagaaffia naalagaaffiullu tamatuma qanittukkut sunik naammassisaqarumaarnera pillugit ilinniartippaatigut. Inuit amerlanersaasa, assersuutigalugu atuaqatitta, suleqatitta oqaluussinermilu naapitatta, nuannersut tamakku naluaat. Tamanna pissutigalugu aamma eqqumasariaqarpugut. Jiisusip pisimaneratut Guutip naalagaaffia pillugu allanut oqaluussinissatsinnut periarfissavut eqqumaffigisariaqarpavut. Pingaaruteqarpoq periarfissanik tamanik atorluaanissarput, inuimmi inuunerat pineqarpoq! — 1 Timotheusi 4:16.

⁶ Jiisusi aamma allamik ilisimasaqarpoq eqqumassutigisaminik. Nalunngilaa Saatanip ussernartorsiortinniaraani, malersorniaraani Guutimullu assuarnaakkunnaarsinniaraani. Akeraasoq ajortoq taanna Jiisusi usserniarlugu periarfissarsiortuarpoq. (Lukasi 4:13) Jiisusi eqqumajuarpoq. Misilinneqarnissamut sumulluunniit — ussernartorsiortinneqarnissamut, akerlilersorneqarnissamut malersorneqarnissamulluunniit — piareersimarusuppoq. Uagut aamma Jiisusitut misilinneqartarpugut. Nalunngilarput Saatani suli ‘løvitut uiannisaartutut angalasartoq iisassarsiorluni’. Taamaattuminguna kristumiut tamarmik Biibilimi ima kajumissaarneqartut: “Eqiingagitsi silatusaarlusilu!” (1 Petrusi 5:8) Qanorli ililluta eqiingasinnaavugut, imaluunniit eqqumasinnaavugut?

QINUSARNEQ EQQUMANISSATSINNUT QANOQ ILUAQUTIGIGIPPUT

7, 8. Qinunermut tunngatillugu Jiisusi qanoq siunnersuuteqarpa, tamatumunngalu tunngatillugu nammineq qanoq maligassaalluarpa?

⁷ Biibilimi ersersinneqarpoq Jehovamut attaveqarnerput illersorniassagatsigu qinusarneq eqqumanissatsinnut pingaaruteqarluinnartoq. (Kolossemiut 4:2; 1 Petrusi 4:7, NV) Jiisusip ajoqersukkani pigaaqatigeqqulluni oqarfigeqqammerlugit ima nangippoq: “Eqqumagitsi, qinugitsilu usserneqaqqunasi.” (Matthæusi 26:41) Jiisusi isumaqarpa taamaallaat pisimasumi tassanerpiaq qinuneq pisariaqartikkaat? Naamik, siunnersuutaa najoqqutassiaavoq  ullut tamarluinnaasa maleruartariaqagarput.

⁸ Jiisusip maligassiaanit erserpoq qinusarneq qanoq pingaaruteqartigisoq. Eqqaamassagunarpat Jiisusip unnuaq naallugu Ataataminut qinusimanera. (Atuakkit Lukasi 6:12, 13). Una takorlooriaruk: Upernaajuvoq, Jiisusi Kapernaumip eqqaaniinnguatsiarpoq. Unnukkiartornerani Jiisusi qaqqat Galilæap Tasersuata eqqaaniittut ilaannut majuarpoq. Tarrajussilersoq qaqqamut qaqigami Kapernaumip nunaqarfiillu allat tungaannut qiviarami qulliit uuliatortut ikumasut takusimassagunarpai. Taavalu Jiisusi qinulerpoq, akornusersorneqarnanilu Jehovamut oqaluppoq. Minutsit tiimillu ingerlapput. Malugigunanngilai qulliit uuliatortut qamiterneqartut, qaammatip qulaakkaani imaluunniit uumasut eqqaminiittut nipaat. Aalajangigassani pingaaruteqartorujussuaq pillugu qinugunarpoq. Kikkut apustilissamisut aqqaneq-marluttut toqqassavai. Takorloorsinnaavarput Jiisusi ajoqersukkat ataasiakkaat pillugit eqqarsaatini isumakuluutinilu oqaatigalugit Ataatani siulersoqqulluni ilisimassusermillu tuneqqulluni qamannga pisumik qinnuigigaa.

9. Jiisusip unnuaq naallugu qinunera qanoq ilinniarfigisinnaavarput?

⁹ Jiisusip maligassiaanit ersersinneqarpa piffissarujussuaq qinunermut atortariaqaripput? Naamik, Jiisusimi ajoqersukkani pillugit inussiarnerluni ima oqarpoq: ‘Anersaaq kajumikkaluarpoq, uinilli sanngiippoq.’ (Matthæusi 26:41, 1936) Taamaakkaluartorli Jiisusi ilaarsinnaavarput. Assersuutigalugu aalajangertinnata uppernitsinnut ilumoorfiginninnitsinnullu, ilaquttatsinnut uppeqatitsinnulluunniit sunniuteqarsinnaasumik Ataatarput qilammiusoq saaffigisarparput? Qatanngutivut sallusuissummiittut qinnuttarpavut? Qamannga pisumik qinusarpugut, imaluunniit qinnutigisartakkavut uteqattaaginnavittarpavut? Aamma maluginiaruk Jiisusip kisimiilluni isertugaqarnani Ataataminut qinusarnini pingaartikkaa. Ullumikkut silarsuarmi ulapiffiusumi inuunermi pingaarnerpaajusut puioriaannaasinnaavavut. Kisimiilluta Jehovamut qamannga pisumik qinunissamut piffissaqarluartarutta eqqumalluarnerussaagut. (Matthæusi 6:6, 7) Jehovamut attaveqarnitsinnut ajoqutaasinnaasumik iliuuseqarnaveersaarlutalu attaveqarluarnerulerniarluta ilungersorluta iliuuseqartaratta taassumunnga attaveqarluarnerulertarpugut. — Tussiaat 25:14.

OQALUUSSINERMUT TUNNGATILLUGU QANOQ EQQUMASINNAASUGUT

10. Oqaluttuamit sorlermit erserpa Jiisusip oqaluussinissamut periarfissanik eqqumaffiginninnera?

¹⁰ Jiisusi Jehovap imminut suliassiissutaanut tunngatillugu eqqumavoq. Suliassat ilaat kingunerlutsitsinani allanik eqqarsaateqaatigaluni suliarineqarsinnaapput. Suliassat allat — assersuutigalugu kristumiut oqaluussinerat — eqqarsarluarluni mianersoqqissaarlunilu suliarineqartariaqarput. Jiisusi oqaluussigaangami eqqumajuartarpoq. Nutaarsiassaq nuannersoq pillugu allanut oqaluussinissaminut periarfissarsiortuartarpoq. Assersuutigalugu Jiisusi ajoqersukkallu ullaap tungaa tamaat pisoreersimallutik illoqarfimmut Sykarimut pigamik ajoqersukkat nerisassarsiniarlutik illoqarfiliarput. Jiisusi puilasuliap sanianut ingippoq qasuerserniarluni, eqqumavorli, oqaluussinissamullu periarfissarseriataarpoq. Arnaq Samariamiu puilasuliamut imertarluni takkuppoq. Jiisusi sinissinnaagaluarpoq, imaluunniit arnap oqaloqatiginnginnissaanut pissutissarsiorsinnaagaluarpoq. Taamaakkaluartorli Jiisusip oqaloqatigilerpaa sunniuteqarluartumik nalunaajaaffigalugu, tamannalu illoqarfimmiorpassuarnut iluaqutaavoq. (Johannesi 4:4-26, 39-42) Inunnut ulluinnarni naapittakkatsinnut oqaluussinissamut periarfissatta atorluarnissaasa eqqumaffiginerunerisigut Jiisusi ilaarluarnerusinnaavarput?

11, 12. (a) Jiisusip oqaluussinerminit allamut saasaaniartut qanoq oqarfigai? (b) Jiisusi kiffartornermini qanoq oqimaaqatigiissaarisarpa?

¹¹ Ilaannikkut inuit ajunngitsumik siunertaqarlutik Jiisusi oqaluussineranit allamut  saasarniartarpaat. Kapernaumimiittut Jiisusimut najuinnaqqugaluarput taanna tupinnartuliornikkut napparsimasunik ajorunnaarsitsimmat. Paasinarput, ilaa? Jiisusilli suliassaa immikkut ittoq tassaavoq “Israelikkunni savanut tammarsimasunut” — Kapernaumimiittunuinnaanngitsoq — oqaluussinissaq. (Matthæusi 15:24) Jiisusip inuit taakku ima oqarfigai: “Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.” (Lukasi 4:40-44) Jiisusip inuunermini oqaluussineq pingaarnerpaatippaa. Sumilluunniit kimilluunniillu allamut saasaateqarusunngilaq.

¹² Jiisusip oqaluussinissani ima ulapputigitigaa oqimaaqatigiissaarisinnaajunnaarluni nuannersunilluunniit allanik nuannaarutiginnissinnaajunnaarluni? Imaluunniit kiffartornermini ima ulapitsigiva inuit suut pisariaqartinneraat nalulerlugit? Naamik, Jiisusi oqimaaqatigiissaarinermut tunngatillugu maligassaalluarnerpaavoq. Inuuneq ikinngutini peqatigalugit nuannaarutigisarpaa. Ilaqutariinnermik pingaartitsingaarpoq taakkua pisariaqartitaannik ajornartorsiutaannillu paasinnilluartuulluni. Meeqqanillu asanninnera erseqqilluinnarpoq. — Atuakkit Markusi 10:13-16.

13. Jiisusitut oqaluussinitsinni qanoq oqimaaqatigiissaarillutalu eqqumasinnaavugut?

¹³ Jiisusitut qanoq oqimaaqatigiissaariitigaluta eqqumasinnaavugut? Silarsuup oqaluussinitsinnit allamut saasaaniarnera akornutaatittariaqanngilarput. Immaqa allaat ikinngutitta eqqarlittalu ajunngitsumik siunertaqarlutik kiffartornitsinnik unikaallatsitseqqulluta imaluunniit “nalinginnaasumik” inuuleqqulluta kajumissaartarpaatigut. Jiisusili ilaarutsigu kiffartornerput nerisassatut pingaartitsigissavarput. (Johannesi 4:34) Kiffartornerput Jehovamut attaveqarluarnerulissutigisarlugulu nuannaarutigingaartarparput. Ingasattajaalerusunnatali, imminut iluartuutilerusunnata nuannersunilluunniit allanik nuannaarutiginnissinnaajunnaarusunngilagut. Jiisusitulli ‘Guutimut pilluartumut’ kiffartornitsinni nuannaartoorusullutalu oqimaaqatigiissaarisinnaarusuppugut. — 1 Timotheusi 1:11.

UNAMMINIAGASSAQARAANGATTA QANOQ EQQUMASINNAASUGUT

14. Unamminiagassaqartilluta suna eqqaamasariaqarparput, aamma sooq?

¹⁴ Jiisusip misilinneqangaartilluni ajoqersukkani sakkortunerpaamik kajumissaarpai. (Atuaruk Markusi 14:37). Unamminiagassaqartilluta Jiisusip maligassiaanik malinninnissap eqqaamanissaa pingaaruteqarluinnarpoq. Inuppassuit unamminiagassaqaraangamik ilumoortoq pingaarutilik puioqqajaasarpaat, ilumoortoq tamanna ima pingaaruteqartigivoq marloriarluni Ussatini ima eqqaaneqarluni: “Ingerlavik inuup eqqortuusorisaralua tassaasinnaavoq toqumut aqqutaasoq.” (Ussatit 14:12; 16:25) Nammineq paasisimasaqassuserput tatigigutsigu, ingammik ingasattumik ajornartorsiuteqartilluta, imminut navianartorsiortissinnaavugut asasavullu navianartorsiortissinnaallugit.

15. Ilaqutariinni ittuusup ilaquttaminik pilersuiniarluni ilungersortorujussuup suna ussernartorsiorfigisinnaavaa?

¹⁵ Assersuutigalugu ilaqutariinni ittuusoq “inoqutiminik” pilersuiniarluni ilungersortorujussuusariaqarsinnaavoq.  (1 Timotheusi 5:8) Immaqa suliffik aalajangersimasoq ataatsimiigianngitsooqattaarutigisassani, ilaquttaminik atuaqqissaaqatiginninngitsooqattaarutigisassani oqaluusseqataanngitsooqattaarutigisassanilu ussernartorsiorfigaa. Nammineq isiginnittaatsini naapertorlugu suliffik taanna suliffittaariguniuk eqqortuliorsorisinnaavoq. Jehovamulli ikinngutaajunnaarsinnaavoq allaallu akerlilersuilersinnaalluni. Siunnersuutip Ussatit 3:5, 6-imiittup malinnissaa pitsaanerungaarpoq. Salomo ima allappoq: “[Jehova] tatigiuk uummatikkut iluunngarlutit, namminerlu paasisimasaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.”

16. (a) Jiisusip Jehovap ilisimassusianik tatiginninnermut tunngatillugu maligassiaa qanoq ilinniarfigisinnaavarput? (b) Ilaqutariinni ittuusorpassuit unamminiarnartoqartillugu Jiisusip maligassiaa qanoq malittarpaat?

¹⁶ Jiisusip misilinneqaraangami nammineq isummani tatigisanngilaa. Eqqarsaatigeriaruk — inuk nunarsuarmi inuusimasoq silatunerpaaq nammineq silatussutsini tatiginiarnagu aalajangertoq! Assersuutigalugu Saatani ussiiniarmat Jiisusip taanna ima akisaqattaarpaa: “Allassimavoq.” (Matthæusi 4:4, 7, 10) Jiisusip upperilluinnarpaa Ataatami ilisimassusia iluaqutigalugu ussernartut akiorsinnaallugit. Taamaalilluni Jiisusip pissuseq Saatanip pissuserinngilluinnagaa uumigilluinnagaalu ersersippaa — tassa maniguunneq. Uagummi, Jiisusi ilaarparput? Ilaqutariinni ittuusoq Jiisusitut eqqumasoq Guutip oqaasianit siulersortittarpoq, ingammik unamminiarnartoqartillugu. Silarsuaq tamakkerlugu ilaqutariinni ittuusut tusindilippassuit taamaaliortarput. Guutip naalagaaffia pallorfiginninnerlu ilumoortoq allanit — allaat timikkut pisariaqartitanit — pingaarnerutippaat. Taakkununngalu taamaaliorneq ilaquttanik isumassueriaasiuvoq pitsaanerpaaq. Ilaquttaminnik pilersuiniarlutik ilungersornerat Jehovap neriorsuinini naapertorlugu pilluaqqusarpaa. — Matthæusi 6:33.

17. Sooq eqqumanermut tunngatillugu Jiisusip maligassiaa malikkusuppiuk?

¹⁷ Qularutissaanngilluinnarpoq eqqumanermut tunngatillugu Jiisusi maligassaalluarnerpaajusoq. Taassuma maligassiaa malikkaanni iluaqutaangaarpoq, allaallu inuuinnarnissamut aalajangiisuuvoq. Eqqaamajuk Saatanip illit anersaakkut sinilernissat, uppernikillinissat, Jehovamut pallorfiginninnermut tunngatillugu ilungersorunnaarnissat assuarnaakkunnaarnissallu kissaatigigaa. (1 Thessalonikamiut 5:6) Saatanimut ajugaaffigiteqinak! Jiisusitut eqqumajuarit. Qamannga pisumik qinusarnissannut piffissaqarniartarit, oqaluussinermut tunngatillugu eqqumagit, unamminiagassaqaraangavillu Jehova tatigisaruk. Taamaalioruit siunertaqarluartumik, pilluarnartumik nalerisimaarnartumillu inuuneqassaatit, naak silarsuatoqqap naggatissaa qanilliartoraluartoq. Jiisusi silarsuarmik matuminnga suujunnaarsitsilerpat eqqumajuaruit piareersimassallutillu Guutimut kiffartorneq ulapputigissavat. Jehovallu illit aalajaattuarnerit nuannaarluni pilluaqqussavaa! — Saqqummersitat 16:15.

[Atuaqqissaarnermi apeqqutit]

[Qupp. 16-mi assiliartaq]

Jiisusip arnaq puilasuliap eqqaaniittoq oqaluussiffigaa. Ulluinnarni oqaluussinissamut periarfissarsiortarpit?

[Qupp. 17-mi assiliartaq]

Ilaquttavit anersaakkut peqqissuunissaat isumagisarukku ersersissavat anersaakkut eqqumallutit